অৱাং-নোংপোক ভারতকী অনিশুবা বিজিনেস-২০(বি ২০)কনফরেন্স ঙসি আইজোলদা লৈবা মিজোরম য়ুনিভর্সিতিগী ওদিতোরিয়মদা পাংথোকখ্রে। থৌরম অদুদা মিজোরমগী চীফ মিনিস্তর শ্রী জোরমথাঙ্গা, ভারত সরকারগী কম্মর্স অমসুং ইন্দস্ত্রিগী রাজ্য মন্ত্রী শ্রী সোম প্রকাস, ভারত সরকারগী মপান থৌরমগী রাজ্য মন্ত্রী দোক্তর আর কে রঞ্জন অমসুং মিজোরম সরকারগী চীফ সেক্রেতরি দোক্তর রেনু শর্মা শরুক য়াখি। কনফরেন্স অদু মীজোরম সরকারগা লোয়ন্না বি-২০ ইন্দিয়া সেক্রেতরিয়েত অমসুং কনফিদেরেসন ওফ ইন্দিয়ান ইন্দস্ত্রিনা পুন্না শীনবনি।

থৌরম অদুদা চীফ মিনিস্তর শ্রী জোরমথাঙ্গানা হায়খি রাজ্য অসিদা লৈরিবা লম, উদোগকশিং লিংখৎপদা খুদোংচাগদবা নোং-চিংগী ফিবম য়েংলগা রাজ্য অসিগী লৌউ-শিংউগী লমদা লৈরিবা খুদোংচাবশিং লৌনবা হোৎনগদবনি। রাজ্য অসিদা ফংলবা য়াম্লবা ৱাগী পোৎথোকশিং অসি হৌজিক ফাওবা মপুংফানা শীজিন্নদনা লৈরি অমসুং সেক্তর অসিদা ইনভেস্তরশিংনা শেন থাদবদা য়াম্না কান্নবা ফংগনি। হায়রিবা ৱাগী পোৎথোকশিং অসিদা য়ুম্ফম ওইরগা প্রোসেসিং ইন্দস্ত্রিদা শেন থাবা য়াবগী খুদোংচাবশিং মরাংকাইনা লৈরি। রাজ্য অসিগী নোংথক্কী লম্বী, রেলৱে অমসুং ঈশিং লম্বী চাউখৎহনবদা ললোন-ইতিক্কী খুদোংচাবা হেন্না ফংগনি।

ভারত সরকারগী কম্মর্স অমসুং ইন্দস্ত্রিগী রাজ্য মন্ত্রী শ্রী সোম প্রকাসনা হায়খি রাজ্য অমগী শেন-থুমগী ফিবম ফগৎহনবদা স্তার্দঅপশিংনা মরুওইবা থৌদাং লৌগদবনি। ঙসি লৈবাক অসিদা মশক খঙলবা স্তার্দঅপ ৯২,০০০গী মনুংদা অৱাং-নোংপোক রাজ্যশিংগী স্তার্দঅপ ১০০০ হেন্না য়াওরি। লম মিল্লিয়ন হেক্তর ১৩.৯৬ হেনবদা ৱা মখল ১৩৬ ফংদুনা ভারত অসি মালেমদা অনিশুবা খ্বাইদগী য়াম্না ৱা হৌবা লৈবাক অমনি। মিজোরমগী অপুনবা লমগী চাদা ৫৭ হেন্না ৱা হৌরি। হিরম অসিদা ইনভেস্তরশিংনা শেন থাদনবা হোৎনগদবনি।

ভারত সরকারগী মপান থৌরমগী রাজ্য মন্ত্রী দোক্তর আর কে রঞ্জন্না হায়খি লমদম অসিগী চাউখৎপগী খোঙজেল য়াংখৎহন্নবা প্রধান মন্ত্রী শ্রী নরেন্দ্র মোদীগী লমজিং মখাদা হৌখিবা চহি ৮ অসিদা লমদম অসিদা অচৌবা অহোংবা কয়া পুরক্লে। হৌখিবা চহি কয়া অসিদা মিজোরমগী অফবা লাইরিক-লাইশু তাকপী-তম্বীবগী থৌরাং অমা লৈরকপনা লাইরিক হৈবগী চাং য়াম্না ৱাংলে অমসুং হৈশিংবা শিন্মী কয়া পুথোক্লে অমসুং হোস্পিতেলিতি, কিয়ার-গিভিং, অনা-লায়য়েং অমসুং রিতেল সেক্তরদা রাজ্য অসিগী মশাগী ওইবা মগুন অমা লৈজরে। হায়রিবা সেক্তরশিং অসিদা মিজো নহারোলশিংগী হৈথোই-শিংথোইবগী খুদোংচাবশিং লৌনবা হোৎনগদবনি।

কনফরেন্স হৌদোকপগী থৌরম লোইরবা মতুংদা পাউগী মীফম অমা পাংথোকখি। পাউগী মীফম অদুদা মিজোরমগী চীফ মিনিস্তর শ্রী জোরমথাঙ্গা, ভারত সরকারগী কম্মর্স অমসুং ইন্দস্ত্রিগী রাজ্য মন্ত্রী শ্রী সোম প্রকাস, ভারত সরকারগী মপান থৌরমগী রাজ্য মন্ত্রী দোক্তর আর কে রঞ্জন অমসুং মিজোরম সরকারগী চীফ সেক্রেতরি দোক্তর রেনু শর্মা শরুক য়াখি অমসুং কনফরেন্স অসিনা কমদৌনা অৱাং-নোংপোক্কী রাজ্যশিং কান্নবা পীগদগে হায়বগী মতাংদা শন্দোক্না তাকখি। 

কনফরেন্সকী প্লেনারি সেসন্দা মিজোরম সরকারগী প্লান্নিং অমসুং প্রোগ্রাম দিপার্তমেন্তগী সেক্রেতরি লালমালসৌমা পাচৌয়ানা ললোন-ইতিক পাংথোক্নবা মতেং পাংগদবা থবকশিংগী মতাংদা ৱা ঙাংখি। মিজোরম য়ুনিভর্সিতিগী কম্মর্স দিপার্তমেন্তগী প্রোফেসার লালদিলিয়ানা ৱারতেনা ৱা, নর্সিং অমসুং পেরামেদিক্স, হেন্দলুম অমসুং হেন্দিক্রাফ, স্তার্দ-অপস অমসুং স্কিল দিবলপমেন্তগী মতাংদা ৱা ঙাংখি। ওন্ত্রেপ্রেনিউয়রশিংনা স্কিল দিবলপমেন্ত অমসুং আর্তিফিসিএল ইন্তিলিজেন্সকী মতাংদা ৱা ঙাংখি।

কনফরেন্স অদুদা মপান লৈবাক ১৭গী দেলিগেদ ৩৮ অমসুং ভারতকী দেলিগেদ ১২৪ শরুক য়াখি। থৌরম অদুদা য়ু.এস.এ, চাইনা, কনাদা, ফ্রান্স, জর্মনি, জপান, রুসিয়া, আর্জেন্তিনা, খা অফ্রিকা, বাংলাদেস, নেপাল, ভুতান, শ্রী লঙ্কা, ঘনা, জিমবাবৱে, কোত দি আইভোরে, কোস্তা রিকাগী দেলিগেদশিং শরুক য়াখি।

তোঙান-তোঙানবা হিরমশিংদা মিজোরমগী হৈথোই-শিংথোইবশিং উৎনবা হেন্দলুম অমসুং হেন্দিক্রাফকী পোৎথোকশিং স্তোল ১৫গী একজিবিসন অমা দেলিগেদশিংগীদমক হাংদোকখি।

হয়েং পাংথোক্কদবা বি-২০ কনফরেন্স লোইশিনবা থৌরমদা মিজোরমগী খ্বাইদগী চাউবা কুহ্মৈ অমা ওইরিবা চাপচার কুত ফেস্তিবেল উৎকনি।

*****