মহারাস্ত্রা ই.বি.এস.বি. কাংবুনা মনিপুরদা ৩নি চনবা নুমিত্তা য়ারৌ সঙাইবু মহাক মশাগী চাক্তাফম ওইরিবা নীংথিজরবা লোক্তাক্তা য়েংবা ফংখ্রে

মহারাস্ত্রগী ই.বি.এস.বি. কাংবুনা য়ুমশকৈশা নুমিত্তা মনিপুর খোঙচৎকী ৩নি চনবা  নুমিত্তা মচি লোংবা য়ারৌ সঙাইবু মহাক মশাগী মহৌশাগী চাক্তাফম ওইরিবা মনিপুরগী বিশনুপুর জিলাগী অমত্তা ঙাইরবা অতাওবা নেসনেল পার্ক ওইরিবা কৈবুল লমজাও নেসনেল পার্ক্তা উজবা ফংখ্রে।

খা থংবা এসিয়াগী খ্বাইদগী চাউবা থুমহি চেন্দবা পাৎশিংগী মনুংদা অমা ওইরিবা, পাৎ অসিগী খা থংবা শরুক্তনা কৈবুল লমজাও নেসনেল পার্ক লৈরিবা লোক্তাক পাৎকী ফজবা উবদা কাংবু অসিবু পুক্নিং শুমহৎখি।

মনিপুরদা চয়োল অমা চুপ্না পাঙথোক্কদবা খোঙচৎকী হুম্নি চনবা নুমিৎতা, ফেকলতী অহুম অমসুং মহৈরোই ভোলুন্তীয়র মরিগা লোইননা লাকখিবা মহারাস্ত্রগী নাগপুরদগী মহৈরোই ৫০না লোক্তাক পাৎ অমসুং তাওদুনা লৈবা কৈবুল লমজাও নেসনেল পার্ক য়েংখি।

লোক্তাক দিবেলপমেন্ত ওথোরিতী (এল.দি.এ.)গী চীয়রমেন এম. অস্নিকুমার সিংহনা লমজিংলদুনা কাংবু অসিনা নেসনেল পার্ক অসিদা য়ারৌ সঙাইবু মহৌশাগী চাক্তাফম ওইরিবা মফম অসিদা য়েংবা ফংনবগীদমক অয়ুক অঙনবদা থুংখি।

অস্নিকুমার মশামক্না মহারাস্ত্রগী ই.বি.এস.বি. কাংবু তোংবা হি পাৎ অসিগী অকোইবদা থৌদুনা লোক্তাক অমসুং কৈবুল লমজাও নেসনেল পার্ক্কী অকোইবদা লৈরিবা মফমশিং উৎখি। মহাক্না মফম অসিদা ফংলিবা চীঞ্জাকশিং, হি অমসুং চত্থোক চৎশিন কয়া শীল লাংখি।

লোক্তাক পাৎকী ফজবদা পুক্নিং শুমহৎলদুনা অমসুং য়ারৌ সঙাইবু মশাগী মহৌশাগী  চাক্তাফম অসিদা উবদা অঙকপা পোক্লদুনা মহৈরোইশিং অসিনা মখোয়গী থম্মোইদা ফাওরিবা অপেনবশিং চীয়রমেন্দা ফোংদোকখি।

ভারতকী খ্বাইদগী চাউবা থুমহি চেন্দবা ঈশিংগী পাৎ অসিগী ফজবা উবদা অঙকপা পোক্নখি।

মহৈরোই অমনা মহাক মমাংদা মনিপুরগী মরমদা তাখ্রে, অদুবু লোক্তাক পাৎ অমসুং কৈবুল লমজাও নেসনেল পার্ক্কী মরমদদি তাখিদ্রি হায়না ফোংদোকখি।

মহাক্না প্রধান মন্ত্রী নরেন্দ্র মোদীবু অসিগুম্বা খোঙচৎ অসিবু শীনবীবগীদমক থাগৎখি অমসুং মনিপুরগী মুখ্য মন্ত্রী এন. বিরেন সিংহ অমসুং এল.দি.এ.গী চীয়রমেন এম. অস্নিকুমার সিংহবু অসিগুম্বা নীংথিজরবা অমসুং অঙকপগী মশক ওইরবা লোক্তাক পাৎ অমসুং অতাওবা নেসনেল পার্ক উবা ফংহনবা অমসুং মফম অসিগী চীঞ্জাক কয়া মহাও তংবা ফংবগী খুদোংচাবা অসিবু পীবীবগীদমক থাগৎপা ফোংদোকচখি।

"অরোইবা ওইনা, ঐহাক্না আই.আই.আই.তি. মনিপুরবু অসিগুম্বা অঙকপা ফংলবা থৌরম অসিদা মতেং পাংবীবগীদমক থাগৎচরি," হায়না মহাক্না মখা তাখি।

মহারাস্ত্রগী নাগপুরদগী ফেকলতী অহুম অমসুং মহৈরোই ভোলুন্তীয়র মরি য়াওবা মহৈরোই ৫০গী কাংবু অসিনা ইম্ফালদা নিংথৌকাবা নুমিত্তা (ফেব্রুৱারী ২৭) এক ভারত শ্রেস্থা ভারত (ই.বি.এস.বি.), ভারত সরকারগী অনৌবা থৌরাং অমা ওইরিবা অসিগী মখাদা মনিপুর খঙনবগী চয়োল খোঙচৎকীদমক থুংলখি। থৌরম অসিগী নুমিত নিনিশুবদা, কাংবু অসিনা ইম্ফাল অমসুং মসিগী অকোইবদা লৈরিবা তোঙান-তোঙানবা পুৱারীগা শাগোন্নরবা মফমশিংদা চৎখি।

ঙসি, হুম্নি চনবা নুমিৎ অসিদা, লোক্তাক পাৎকী ফজবশিং য়েংলুরবা মতুংদা কাংবু অসিনা মোইরাংদা লৈরিবা আই.এন.এ. ম্যুজিয়মদা চৎতুনা মোইরাং খুনৌদা লৈরিবা সঙাই এথনিক পার্ক তম্না চৎত্রিঙৈ মমাংদ্দা আই.এন.এ. ময়াই লোইশঙদা চৎখি।

ইম্ফাল তম্না হল্লকপগী খোঙচৎতা, কাংবু অসিনা মাইবম লোকপা চীংদা লৈরিবা ইম্ফাল পিস ম্যুজিয়মদা চৎখি অমসুং মসিগী মতুংদা ইম্ফালগী সঙাইপ্রৌদা লৈরিবা ইস্কোন তেম্পলদা চৎখি। নুংথিলগী ওইবা কোইনা চৎতুনা য়েংবগী থৌরম্না ইম্ফালগী কোনুংগী গোভিন্দজি লাইশঙদা চৎতুনা আর্তি য়াওদুনা লোইশিনখি।

মহারাস্ত্রগী কাংবু অসিনা মখোয়গী রাজ্য (মহারাস্ত্রদা) মনিপুরগী মহৈরোইশিংনা চৎলুবা খোঙচৎকী পাউখুম ওইনা মফম অসিদা থুংলখিবনি অমসুং মখোয়না মহারাস্ত্রগীদমক মার্চ ৩দা ইম্ফাল থাদোক্কনি।

*****