কমর্স অমসুং ইন্দস্ত্রী মন্ত্রালয়
মিজরোম্না বি২০ মীফম পাঙথোক্নবা শেম শাবা লোইরে
অর্বান প্লান্নিং, ইনফ্রাস্ত্রকচর, ৱা, স্তার্তঅপ, স্কিল দিভেলপমেন্ত, নর্সিং অমসুং পেরামিদিকগী লমদা মল্তিলেতরেল বিজিনেস পার্ত্নরসিপকী খুদোংচাবশিংগী মতাঙদা মীফম পাঙথোক্কনি
Posted On:
28 FEB 2023 2:46PM by PIB Imphal
মিজোরম্না অৱাং নোংপোক্তা মালেমগী বিজিনেস কম্ম্যুনিতীগী ওফিসিএল জি২০ দাইলোগ ফোরম অমা ওইরিবা বি২০ মীফম মরিগী মনুংদা অনিসুবা মীফম হয়েং পাঙথোক্নবা শেম শাবা লোইরে। তোঙান তোঙানবা লৈবাকশিংদগী লাক্কদৌরিবা মীথুংশিং তরাম্না ওক্নবগীদমক স্তেত লৈঙাক্না নীংথিনা শিন লাংদুনা থম্লে।
মিজোরমগী মুখ্য মন্ত্রী জোরমথঙানা মপান থৌরমগী রাজ্য মন্ত্রী দোক্তর রাজকুমার রঞ্জন সিংহ অমদি ভারত লৈঙাক্কী কম্মর্স অমসুং ইন্দস্ত্রীগী রাজ্য মন্ত্রী শ্রী সোম প্রকাসকা লোয়ননা স্তেত অমদি কেন্দ্র লৈঙাক্কী মকোক থোংবা ওফিসিএলশিং য়াওবা থৌরম অমদা বি২০ মীফম হৌদোক্কনি।
থৌরম অদুগী মরমদা ঙসি আইজোলদা লৈবা মুখ্য মন্ত্রীগী ওফিসতা পাঙথোকপা পাউগী মীফমদা মিদিয়াগী মফমদা ৱা ঙাঙলদুনা, মুখ্য মন্ত্রী জোরমথঙানা মালেমগী বিজিনসে কম্ম্যুনিতীগী ওফিসিএল জি২০ দাইলোগ ফোরম অমা ওইরিবা বি২০ থৌরম অসিবু মার্চ ১দগী ৩, ২০২৩ ফাওবা থৌবু ওইদুনা পাঙথোক্নবগী তাঞ্জা ফংবা অসি মিজোরমগী ওইনা চাউথোকচনিংঙাই অমদি লাইবক ফবনি হায়খি। মসিনা অৱাং নোংপোক্তা পাঙথোক্কদবা বিজিনেস ২০ (বি২০)গী মীফম মরিগী মনুংদা অনিসুবনি।
বি২০ থৌরম্না লমদম অসিদা বি২০ ইন্দিয়াগী মখাদা লল্লোন ইতিক্কী এজেন্দাগী মতাঙদা মরিক চুম্না খন্ন-নৈননবা তোঙান তোঙানবা মল্তিলেতরেল ওর্গনাইজেসনশিংগী মীহুৎশিংগা লোয়ননা জি২০ অমদি খোঙবু ওইরিবা লৈবাকশিংগী পোলিসীমেকরশিং, লুচিংবশিং, লল্লোন ইতিক্কী লুচিংবশিং, সি.ই.ও.শিং অমদি মকোক থোংবা একজেক্যুতিবশিং ফম্পাক অমদা পুনগনি।
মিজোরমদা পাঙথোক্কদৌরিবা বি২০ মীফম অসিনা মশক খঙদোক্লবা প্রাইওরিতীশিংগী মরমদা খন্ন-নৈনবা হৌদোকপদা অমদি খুজিল থৌরাং য়াৎপগী লমদা থবক পায়খৎপদা মতেং পাংগনি হায়না মুখ্য মন্ত্রী জোরমথঙানা হায়খি। মসিনা দেলিগেৎশিং অসিদা ঐখোয়গী কলচর, হেরিতেজ, কুমহৈ হরাও অমদি তুরিজমগী মতিংশিং উবা ফংহনবগী মথক্তা স্তেত অসিগী মতিকশিং উত্থোক্কতুনা মফম অসিবু মরুওইবা ইনভেস্তমেন্তকী লমথুংফম অমা ওইনা উত্থোকপদা মতেং ওইগনি হায়না মহাক্না মখা তাখি।
স্তেতকী কোনুংদা ভারতকী অমদি লমদমসিগী বিজিনেস পার্তিসিপেন্তশিংগী মথক্তা অর্জেন্তিনা, বংলাদেশ, ভুতান, কেনদা, কোস্তা রিকা, কো দি’আইভোইর (আইভোরী কোস্ত), চাইনা, ফ্রান্স, জর্মনী, ঘনা, জপান, নেপাল, রসিয়া, স্রি লঙ্কা, সাউথ অফ্রিকা, য়ুনাইতেদ স্তেতস অমদি জিম্বাবৱেবু মহুৎ শিন্দুনা লৈবাক ১৭তগী লাকপা মপান লৈবাকশিংগী মীথুংশিংনা তিল্লরগনি। লাক্কদৌরিবা মীথুংশিং অসিদা মপান লৈবাক্কী বিজিনেস দেলিগেৎ ৪৮ অমদি দিপ্লোমেৎ ১৭ ত্রেদ অমদি বিজিনসে দেলিগেসনশিং, ভুতান, বংলাদেশ অমদি জপানগী মীহুৎশিং য়াওরি।
মার্চ ২, ২০২৩দা পাঙথোক্কদৌরিবা বি২০ কন্ফরেন্স অসিনা অর্বান প্লান্নিং, ইনফ্রাস্ত্রকচর, ৱা, স্তার্তঅপ, স্কিল দিভেলপমেন্ত, হেন্দলুম অমদি হেন্দিক্রাফ্ত, নর্সিং অমসুং পেরামেদিককী লমদা মল্তিলেতরেল বিজিনেস পার্ত্নরসিপকী খুদোংচাবশিংদা মীৎয়েঙ থমগনি।
থৌরম অদুগী শরুক অমা ওইনা, কন্ফিদরেসন ওফ ইন্দিয়ন ইন্দস্ত্রী (সি.আই.আই.)না বিজিনেস তু বিজিনেস (বি২বি) অমদি বিজিনেস তু গভর্নমেন্ত (বি২জি) মীফমশিং পাঙথোক্কনি। লাক্কদৌরিবা মপান লৈবাক্কী বিজিনেস দেলিগেৎশিংনা শেল থাদবা য়াবা, পুন্না চৎমিন্নবা য়াবা অমদি খুৎশম্ননা চৎমিন্নবা য়াবা খুদোংচাবশিং খঙদোক্নবগীদমক বি২বি দা লমদমদুগী ইন্দস্ত্রীশিংগা অমদি বি২জি দা লৈঙাক্কা ৱারী ৱাতায় শান্নবগী খুদোংচাবা ফংগনি। হেল্থ, অর্বান দিভেলপমেন্ত, কম্মর্স এন্দ ইন্দস্ত্রিজ, তুরিজম, স্পোর্তস, লেবর এন্দ এমপ্লোইমেন্ত, স্কিল দিভেলপমেন্ত এন্দ ওন্ত্রপ্রিন্যুরসিপনচিংবা লৈঙাক্কী দিপার্তমেন্তশিংগা ৱারী ৱাতায় শান্নবগী রিক্বেস্তশিং য়াওনা বি২বি অমদি বি২জি রিক্বেস্ত ১০০ হেন্না জেনেরেৎ তৌখ্রে। সি.আই.আই.না ভারত পুম্বদগী স্পীকরশিংবু কন্ফরেন্স অসিদা মীৎয়েঙ থম্লিবা হীরমশিংদা মচা খায়বা ৱারোলশিং থম্ননবা পাউকৎ পীরি।
পাউগী মীফম অদুদা মুখ্য মন্ত্রী জোরমথঙানা মখাদা তারদুনা মালেমগী দেলিগেৎ মশিং য়াম্না তিল্লগদৌরিবা অসিগী খুদোংচাবা লৌদুনা, স্তেত লৈঙাক্না স্তেত অসিদা লৈরিবা ইনভেস্তমেন্ত অমদি পার্ত্নরসিপকী খুদোংচাবশিং উত্থোকপখক নত্তনা স্তেত অসিগী নাৎ, চীঞ্জাক, কলা, কুমহৈ হরাও, অমদি মহৌশাগী ফজরবা শক্তমশিং য়েংহন্দুনা তোপ তোপ্পা মহাও অমা পীননবগীদমক স্তেত লৈঙাক্না নীংথিনা শেম শারি হায়খি।
দেলিগেৎশিং অদুনা মার্চ ৩, ২০২৩দা অসাম রাইফল্স গ্রাউন্দদা পাঙথোক্কদবা মিজোরমগী মরুওইবা কুমহৈ অমা ওইরিবা চপচর-কুৎ কুমহৈদসু শরুক য়াগনি। বি২০ মীফম মনুংদা ইনভেস্তমেন্তকী পুক্নিং চিংশিন্নবগীদমক স্তেত অসিগী মতিংশিং উত্থোক্তুনা মখোয়না শরুক য়ানবা, লৈফম চাফমগী অমদি মীওক মীচান ফজবা মতৌ উৎনবগীদমক নীংথিনা শেম শাদুনা থম্লে।
মুখ্য মন্ত্রীনা স্তেত অসিগী পুৱারীদা মশক থোকপা তাঙ্কক অমা ওইরিবা মমিং লৈরবা বি-২০ মীফম অসি মিজোরম স্তেতপু য়ুম্বু ওইদুনা পাঙথোকপা য়াহনবিবগীদমক অমদি ভারতকী জি২০ প্রেসিদেন্সীনা পীরিবা খুদোংচাবশিং লৌহৌনবগী তাঞ্জা পীবিবগীদমক প্রধান মন্ত্রী নরেন্দ্র মোদী, কেন্দ্রগী গৃহ মন্ত্রী অমিৎ সাহ অমদি মপান থৌরম মন্ত্রী এস. জয়শঙ্করগী মফমদা তৌবিমল খঙবা অমদি থাগৎপা ফোঙদোকখি।
****
(Release ID: 1903104)
Visitor Counter : 137