ঙসি অয়ুক পুং ১০:৩০ রোম তাবদা গঙ্গা বিলাস ইন্দো-বাংলাদেস ঙমখৈগী জিরো পোইন্তদা থুংলখ্রে অমসুং তুংদা মখা তানা কিলোমিতর ৩২ হোল্লবা মতুংদা ঙসি নুংথিল পুং ৪ তাবদা ধুব্রিদা থুংখ্রে। ক্রুইজ অদু  জেরো পোইন্তদগী পান্দু হিথাংফম ফাওবা সর্ভে ভেসেল এস.এল সুবান্সিরিনা লমজিংখি।

গঙ্গা বিলাসনা অসামগী ধুব্রিদা থুংলখিবা অদু ভারতকী অৱাং-নোংপোক্কী কংফালগী শরুক্ত লৈবা ঈশিংগী লম্বী চাউখৎনবগী মরুওইবা তাঞ্জা অমনি হায়না পোর্তস, সিপ্পিং অমসুং ৱাতরৱেজ অমসুং অয়ুসকী য়ুনিয়ন মিনিস্তর শ্রী সর্বানন্দা সোনোৱালনা ফোঙদোকখ্রে। রিভর তুরিজমগী খুদোংচাবশিং ফুদোক্নবা পান্দম থম্লিবা পুৱারি ওইরবা তাঞ্জা অসিগীদমক মিনিস্তরনা অসাম অমসুং অৱাং-নোংপোক্কী মীয়াম থাগৎপা ফোঙদোকখি।

থৌরম অদুদা মিনিস্তরনা হায়খি ঙসি অসাম অমসুং অৱাং-নোংপোক্কী মীয়ামগীদমক পুৱারি ওইরবা নুমিৎ অমনি। গঙ্গা বিলাস খোঙচৎ মাইপাকপগা লোয়ন্না ললোন-ইতিক্কী লমদা অসামগী মাইপাকপা অদু অমুক হঞ্জিন্নবা ঐখোয়না পায়খৎলিবা থবকশিংদা অচৌবা ইনোৎ অমা পীরগনি। লৈবাক অনি থোক্না খাইদোক্ত্রিঙৈদা কংফাল মনুংগী ঈশিং লম্বীশিং ফাওরবা ললোন-ইতিক পাংথোক্লম্বগী ঐখোয়গী পুৱারি অমা লৈরম্মী। গঙ্গা বিলাস মাইপাকপা অসিনা অনৌবা খুদোংচাবা কয়া পীবা ঙম্লগনি। গঙ্গা বিলাস মসিগী খোঙচৎকী শরুক অমা ওইনা অসামদা চংলকপা অসিনা প্রধান মন্ত্রী শ্রী নরেন্দ্র মোদীগী মঙলান অদু থবক ওইনা পাংথোকপা ঙমহল্লে।

য়ুনিয়ন মিনিস্তরনা মখা তানা হায়খি, জহাসদা তোংলিবা লমকোয়বা মীওইশিংগী ৱারোলদগী গঙ্গা অমসুং ব্রাহ্মাপুত্রাদা রিভর ক্রুইজ তুরিজমগী থবকশিং ফগৎলক্নবগী থাজবা উবা ফংলে। লৈবাক অসিগী মনুং-হুঞ্জিনবা মফমশিং চাউখৎনবা অমসুং ঐখোয়গী তুরেলশিংগী কান্নবা লৌনবা ঐখোয়না থবক পায়খৎপা হৌরে।
গঙ্গা বিলাস অসি জনুৱারি ১৩,২০২৩দা বরানসীদগী প্রধান মন্ত্রী শ্রী নরেন্দ্র মোদীনা লমথাখিবনি অমসুং ভারতকী রাজ্যশিং হায়বদি উত্তর প্রদেস, বিহার, নোংচুপ বঙ্গাল অমসুং বাংলাদেস ফাওরগা নুমিৎ ৩৯গী খোঙচৎ মতুংদা অসামগী ধুব্রিদা থুংলখিবনি। মালেমদা খ্বাইদগী শাংবা রিভর ক্রুইজ ওইরিবা, বরানসীদগী বোগীবিল ফাওবগী খোঙচৎ অসি মার্চ ১,২০২৩দা নুমিৎ ৫১গী খোঙচৎ লোইরগা দিব্রুগরগী বোগীবিলদা লোইশিনগনি।
ধুব্রিদা থুংলবা মতুংদা লমকোয়বা মীওইশিং অদু এম.ভি প্রতিমানা ইম্মিগ্রেসন ক্লিয়ারেন্সকীদমক ধুব্রি কস্তমস পোর্ততা পুরকখি। লমকোয়বা মীওই ২৮ অদু ধুব্রিগী দি.সি অমসুং ইনলেন্দ ৱাতরৱেজ ওথোরিতি ওফ ইন্দিয়াগী রিজনেল দিরেক্তর অমসুং সরকারগী তুরিজম দিপার্তমেন্তগী ওফিসিএলশিংনা তরাম্না ওকখি। লমকোয়বশিং অদু হরাওবা অসামগী চা অমসুং অচা-অথকশিং পীখি। মফম অদুগী খুৎশা-হৈবগী পোৎথোকশিং হায়বদি লিমোনগী পোৎথোকশিং, তেরাকোতাগী পোৎলমশিং অমসুং কুহিলা স্তোলশিং শাদুনা লমকোয়বা মীওইশিংদা উৎখি। কোচ রাজবোংসি জগোয় উৎতুনা লমকোয়বা মীওইশিং অদু নুমিদাংৱাইরমদা ব্রাহ্মপুত্রা মথক্তা পোথাখি।

মফম অদুগী কলচর, হেরিতেচ, ক্রাফশিং অমসুং লমকোয়বশিংনা পাম্নবা অতোপ্পা মফমশিং উৎনবা ধুব্রি সহর অমসুং মসিগী অকোয়বদা থৌরাং তৌরে। তেরাকোতাগী পোৎলমশিং শাবা য়েংনবা লমকোয়বা মীওইশিং মমিং লৈরবা ধুব্রিগী অসারিকান্দি খুঙ্গংদা চৎকনি। গুরু তেক বহাদুর সাহিব জিগী শেংলবা মফম অমসুং শেংলবা খোঙনাং পাম্বী অমসুং ভিক্তোরিয়া পার্ক য়েংনবা থৌরাং তৌরে। গঙ্গা বিলাস হয়েং ফেব্রুৱারি ১৮, ২০২৩দা ধুব্রিদগী গোলপারাদা থুংগনি।

*****