مرکزی وزیر داخلہ اور تعاون کے وزیر جناب امت شاہ نے آج کرناٹک کے پٹور میں کیمپکو (سنٹرل آریکنٹ اینڈ کوکوا مارکیٹنگ اینڈ پروسیسنگ کوآپریٹو لمیٹڈ) کی گولڈن جوبلی تقریبات میں بطور مہمان خصوصی شرکت کی۔

جناب امت شاہ نے جناب کشیترہ ہنوماگیری میں بنائے گئے سری بھارتی امرجیوتی مندر کا افتتاح کیا اور پتور کے پنچ مکھی انجنیا مندر میں پوجا بھی کی۔ اس موقع پر کرناٹک کے وزیر اعلی جناب بسواراج بومائی سمیت کئی معززین موجود تھے۔

اپنے خطاب میں مرکزی وزیر تعاون نے کہا کہ وزیر اعظم جناب نریندر مودی کی قیادت میں ہماری حکومت نے پنڈت دین دیال اودھادھیا جی کے انتیودیا کے اصول پر عمل کرتے ہوئے غریبوں کی فلاح و بہبود کے لیے ایک مشن شروع کیا ہے، اس مشن کے تحت ہر غریب کو گھر، بجلی، پانی، گیس، بیت الخلا، ہیلتھ انشورنس اور مفت اناج فراہم کیے گئے ہیں ۔ جناب شاہ نے کہا کہ ملک بھر میں ہماری پارٹی کی حکومتیں قومی سلامتی، خوشحالی اور غریبوں کی فلاح و بہبود کے لیے وقف ہیں۔ انہوں نے کہا کہ پنڈت دین دیال اپدادھیا جی نے ان تینوں نظریات کو انٹیگرل ہیومنزم کے فلسفہ میں شامل کیا اور اس کا پرچار کیا۔ مرکزی وزیر داخلہ نے بھی پنڈت دین دیال اپادھیائے جی کو ان کی برسی پر خراج عقیدت پیش کیا۔

جناب امت شاہ نے کہا کہ آج کیمپکو کے ایگرو مال کا سنگ بنیاد رکھا گیا ہے اور اس 1,50,000 مربع فٹ کے ایگرو مال میں تمام سہولیات جیسے زرعی آلات، مشینری، کیڑے مار دوا، کھاد، بیج اور اسٹوریج دستیاب ہیں۔ یہ  بھارت میں  پہلا ایگرو مال  ہے جو امداد باہمی کی  بنیاد پر چلے گا۔ انہوں نے کہا کہ کیمپکو نے 50 سال مکمل کر لیے ہیں اور کسی تنظیم کی طرف سے 50 سال کی تکمیل اس بات کی تصدیق کرتی ہے کہ تنظیم نے اپنی بہترین صلاحیت کے مطابق کسانوں اور اپنے  اراکین کی خدمت کی ہے۔ جناب شاہ نے کہا کہ کیمپکو جسے 1973 میں بصیرت والے کسان لیڈر جناب وارانسی سبرایا بھٹ نے قائم کیا تھا، اب ایک بڑی تنظیم بن گئی ہے۔ انہوں نے مزید کہا کہ قیام کے وقت اس کے 3000 ارکان تھے اور آج، 3,000 کروڑ روپے کے سالانہ کاروبار کے ساتھ، کیمپکو 1,38,000 ارکان کے ساتھ ایک بڑے کوآپریٹو کی شکل  میں ترقی کر چکا ہے۔

ملک کے تعاون کے پہلے وزیر نے کہا کہ وزیر اعظم جناب نریندر مودی نے تعاون کی وزارت قائم کی اور کوآپریٹیو کے ذریعے کسانوں اور دیہاتوں کی خدمت کرنے کا ایک نیا طریقہ تلاش کیا ہے۔ انہوں نے کہا کہ کیمپکو ایک کوآپریٹو سوسائٹی ہے جس نے ونڈ مل یونٹ اور 500 میگاواٹ کے سولر پینل بنائے ہیں۔ 107 شاخیں، 2000 ملازمین اور 2700 کروڑ روپے کا کاروبار، کیمپکو میں لوگوں کے اعتماد کو ظاہر کرتا ہے۔ انہوں نے کہا کہ وزیر اعظم جناب نریندر مودی نے بجٹ میں ہر پنچایت میں کثیر جہتی پی اے سی ایس (پی اے سی ایس) بنانے کا فیصلہ کیا ہے اور اب ہندوستان میں 3 سال میں 2 لاکھ نئے پی اے سی ایس بنائے جائیں گے۔ اس کے ساتھ امداد باہمی  کے لیے بہت سی سہولیات کا اعلان کیا گیا ہے۔ انہوں نے کہا کہ وزیر اعظم جناب نریندر مودی نے اس شعبے کے لیے بہت کچھ کیا ہے۔

مرکزی وزیر داخلہ اور تعاون کے وزیر نے کہا کہ پچھلی حکومت نے پی ایف آئی کے 1700 لوگوں کو رہا کیا تھا، لیکن وزیر اعظم جناب نریندر مودی نے پی ایف آئی پر پابندی لگا کر اسے ہمیشہ کے لیے بند کر دیا ہے۔ انہوں نے کہا کہ جو لوگ خوشنودی حاصل کرنے  کے ذریعہ ملک دشمن عناصر کو طاقت دیتے ہیں وہ کرناٹک کو کبھی بھی محفوظ نہیں رکھ سکتے۔ جناب شاہ نے کہا کہ وزیر اعظم جناب نریندر مودی کی قیادت والی حکومت نے ملک کو محفوظ بنایا ہے اور ملک سے دہشت گردی اور نکسل ازم کا خاتمہ کیا ہے۔ انہوں نے کہا کہ جب جموں و کشمیر سے آرٹیکل 370 کو منسوخ کیا گیا تھا تو وہاں کوئی تشدد نہیں ہوا تھا اور جناب نریندر مودی نے 5 اگست 2019 کو آرٹیکل 370 کو ختم کرکے کشمیر کو ہمیشہ کے لیے مادر ہند  کا تاج بنا دیا ہے۔

جناب امت شاہ نے کہا کہ ہم جنوبی کرناٹک میں ہائیڈروجن پاور پلانٹ لگانے کا ایک پروجیکٹ لے کر آرہے ہیں، 104 ایکڑ صنعتی علاقے میں پلاسٹک پارک قائم کیا جارہا ہے۔ ہم کیمپکو کو مضبوط کر رہے ہیں، ماہی گیروں کے لیے ریاست میں تعاون کے لیے ایک علیحدہ وزارت بنائی ہے اور پردھان منتری متسیا سمپدا یوجنا کے ذریعے ہم ساحلی اضلاع میں گہرے سمندر میں ماہی گیری میں ماہی گیروں کی مدد کر رہے ہیں۔ انہوں نے کہا کہ اقلیتی طلباء کے لئے 1000 گنجائش والا ہاسٹل بھی بنایا گیا ہے۔ بنگلورو اور منگلورو کو اسٹارٹ اپ ہب بنایا گیا ہے اور اس کے ساتھ ساتھ سری نارائنا گرو رہائشی اسکول بھی بنایا گیا ہے اور کرناٹک کی حکومت نے جناب بسواراج بومائی کی قیادت میں قبائلی بھائیوں کو تقریباً 34850 ہیکٹر زمین فراہم کی ہے۔

مرکزی وزیر داخلہ اور تعاون کے وزیر نے کہا کہ حکومت ہند نے شرڈی گھاٹ پر ایک سرنگ سڑک تعمیر کی ہے جس سے بندرگاہ کے لیے نقل و حمل میں بہت مدد ملے گی۔ ایم ایس پی اسکیم کے تحت کرناٹک حکومت ابلے ہوئے چاول خرید کر کسانوں کے ساتھ مضبوطی سے کھڑی ہے۔ انہوں نے کہا کہ وزیر اعظم جناب نریندر مودی نے ابھی اپنے منگلورو کے دورے کے دوران 3800 کروڑ روپے کے مختلف پروجیکٹوں کا سنگ بنیاد رکھا ہے، منگلورو پورٹ کی اپ گریڈیشن کے لیے 1000 کروڑ روپے کی 5 اسکیمیں بھی لائی گئی ہیں اور ہماری حکومت نے منگلورو ریفائنری کے لیے 2500 کروڑ روپے کی لاگت  کے  پروگرام کو بھی  توسیع دی ہے۔

*************

( ش ح ۔ اک۔رب(

U. No. 1735