امور داخلہ اور امداد باہمی کے مرکزی وزیر جناب امت شاہ نے جنتا دل یونائیٹڈ کے سابق قومی صدر شرد یادو کے انتقال پر تعزیت کا اظہار کیا ہے۔ جناب امت شاہ آنجہانی لیڈر کو آخری خراج عقیدت پیش کرنے کے لیے شرد یادو کی رہائش گاہ گئے۔ انہوں نے نئی دہلی میں آج ان کے اہل خانہ سے تعزیت کا اظہار کیا۔

امور داخلہ اور امداد باہمی کے مرکزی وزیر نے کہا کہ جناب شرد یادو کی موت ملک کی عوامی زندگی کے لیے ایک ناقابل تلافی نقصان ہے۔ دہائیوں پر محیط اپنی عوامی زندگی میں جناب شرد یادو نے ملک میں ایمرجنسی کے خلاف بھرپور طریقے سے جدوجہد کی،انہوں نے غریبوں اور پسماندہ لوگوں کے مسائل کو اٹھایا اور اپنی عوامی زندگی میں کئی دہائیوں تک عوام کی فلاح و بہبود کے لیے کام کیا۔ اپنی 5 دہائیوں کی طویل عوامی زندگی میں جناب شرد اپنی آخری سانس تک سوشلسٹ بنیادی اصولوں کو آگے بڑھاتے رہے۔

جناب امت شاہ نے کہا کہ شرد یادو نے بہار اور ملک کی سیاست میں کئی دہائیوں تک گرانقدر تعاون دیا۔ مدھیہ پردیش میں پیدا ہونے والے شرد یادو نے اپنی فطری محنت اور اصولوں کے مطابق زندگی گزاری۔ انہوں نے مسلسل کوششیں کرکے ملک بھر میں اپنی ایک مستقل چھاپ چھوڑی ہے۔ جناب امت شاہ نے مزید کہا کہ’’غم کی اس گھڑی میں میں ان کے اہل خانہ اور حامیوں کے تئیں اپنی تعزیت کا اظہار کرتا ہوں۔ بھگوان ان کی روح کو اپنے جوار رحمت میں جگہ عطا فرمائے۔‘‘

************

ش ح۔ع م۔ ع ن

(U: 449)