ಗೌರವಾನ್ವಿತ ಸದಸ್ಯರೇ:

1. ಪ್ರಧಾನಮಂತ್ರಿಯವರು, ವಿರೋಧ ಪಕ್ಷದ ನಾಯಕರು ಮತ್ತು ಮತ್ತಿತರರ ಸ್ವಾಗತಾರ್ಹ ಮಾತುಗಳಿಂದ ನಾನು ಭಾವುಕನಾಗಿದ್ದೇನೆ.

2. ಭಾರತದ ಉಪ ರಾಷ್ಟ್ರಪತಿಯಾಗಿ ಮತ್ತು ಈ ಸದನದ ಸಭಾಪತಿಯಾಗಿ ಭಾರತಕ್ಕೆ  ಸೇವೆಸಲ್ಲಿಸುವ ಅವಕಾಶ ಕಲ್ಪಿಸಿದ್ದಕ್ಕಾಗಿ ಗೌರವಾನ್ವಿತ ಸಂಸತ್ತಿನ ಸದಸ್ಯರಿಗೆ ಕೃತಜ್ಞನಾಗಿರುತ್ತೇನೆ.

3. ವಿಶ್ವದ ಅತಿದೊಡ್ಡ ಪ್ರಜಾಪ್ರಭುತ್ವದ ಬೆಳವಣಿಗೆಯ ಪಥಕ್ಕೆ ಕೊಡುಗೆ ನೀಡಲು ಎದುರುನೋಡುತ್ತಿದ್ದೇನೆ ಮತ್ತು ಅದರ ನಂಬಿಕೆ ಮತ್ತು ವಿಶ್ವಾಸವನ್ನು ಎತ್ತಿಹಿಡಿಯುತ್ತೇನೆ.

4. ಈ ಸದನದ ಗೌರವಾನ್ವಿತ ಸದಸ್ಯರೊಂದಿಗೆ ಕೆಲವು ಕಳಕಳಿಗಳನ್ನು ಹಂಚಿಕೊಳ್ಳಲು ಈ ಐತಿಹಾಸಿಕ ಅವಕಾಶವನ್ನು ಬಳಸಿಕೊಳ್ಳುತ್ತೇನೆ.

ಮಾನ್ಯ ಸದಸ್ಯರೇ:

5. ‘ಮೇಲ್ಮನೆ’ ಅಥವಾ ‘ಹಿರಿಯರ ಮನೆ’ಎಂಬುದು ಅಧಿಕೃತ ಪದಕೋಶದ ಭಾಗವಾಗಿಲ್ಲದಿದ್ದರೂ, ಈ ಸಂಸ್ಥೆಗಿರುವ ಮಹತ್ವದ ಪ್ರಾಮುಖ್ಯತೆಯನ್ನು ಪ್ರತಿಬಿಂಬಿಸುತ್ತದೆ. ಗಣರಾಜ್ಯದ ಮೂಲ ಮೌಲ್ಯಗಳನ್ನು ಪುನರುಚ್ಚರಿಸಲು ಮತ್ತು ವರ್ಧಿಸಲು ಹಿರಿಯರ ಸದನವು ನಿರ್ಣಾಯಕವಾದ ಮುಂದಾಳತ್ವವನ್ನು ವಹಿಸುತ್ತದೆ ಮತ್ತು ಸಂಸದೀಯ ಪ್ರಜಾಪ್ರಭುತ್ವದ ಸಂಪ್ರದಾಯಗಳನ್ನು ಸ್ಥಾಪಿಸಲು ಅತ್ಯುನ್ನತ ಚರ್ಚೆಯ ಅನುಕರಣೀಯ ಮಾನದಂಡಗಳಿಗೆ ಮಾದರಿಯಾಗುತ್ತದೆ ಎಂದು ರಾಷ್ಟ್ರವು ಸಹಜವಾಗಿಯೇ ನಿರೀಕ್ಷಿಸುತ್ತದೆ.

6. ಇಂದು, ನಾವು ಅಮೃತಕಾಲದಲ್ಲಿದ್ದೇವೆ, ನಾವು ವಿಶ್ವದ ಅತ್ಯುತ್ತಮ ಸಂವಿಧಾನಗಳಲ್ಲಿ ನಮ್ಮದೂ ಒಂದು ಎಂದು ಗೌರವಿಸುತ್ತೇವೆ. ಸಂವಿಧಾನ ಸಭೆಯ ಸದಸ್ಯರು ಅಪರಿಮಿತ ಅರ್ಹತೆ ಮತ್ತು ಅಪಾರ ಅನುಭವದೊಂದಿಗೆ ಅಗಾಧವಾದ ಪ್ರತಿಭಾವಂತರಾಗಿದ್ದರು. ಅಂದಿನ ಸನ್ನಿವೇಶದಲ್ಲಿ ಸಂವಿಧಾನ ಸಭೆಯು ಸಾಧ್ಯವಾದಷ್ಟು ಪ್ರಾತಿನಿಧಿಕವಾಗಿತ್ತು.

ಗೌರವಾನ್ವಿತ ಸದಸ್ಯರೇ:

7. ಪ್ರತಿ ಚುನಾವಣೆಯೊಂದಿಗೆ ಪ್ರಾತಿನಿಧ್ಯದಲ್ಲಿ ಹಂತಹಂತವಾಗಿ ಅಧಿಕೃತ ಹೆಚ್ಚಳ ಕಂಡುಬಂದಿದೆ. ಪ್ರಸ್ತುತ ಸಂಸತ್ತು ಹಿಂದೆಂದಿಗಿಂತಲೂ ಹೆಚ್ಚಿನ ಜನರ ಆದೇಶ ಮತ್ತು ಆಕಾಂಕ್ಷೆಗಳನ್ನು ಪ್ರತಿಬಿಂಬಿಸುತ್ತದೆ.

ಗೌರವಾನ್ವಿತ ಸದಸ್ಯರೇ:

8. ಸಂವಿಧಾನ ಸಭೆಯು ಸೂಕ್ಷ್ಮ, ಸಂಕೀರ್ಣ ಮತ್ತು ಗಂಭೀರವಾದ ಸಮಸ್ಯೆಗಳನ್ನು ಸಹಕಾರ ಮತ್ತು ಒಮ್ಮತದ ಮನೋಭಾವದಿಂದ ಗುರುತಿಸಲಾದ ಸಂವಾದಗಳು, ವಾದಗಳು, ಚರ್ಚೆಗಳು, ಮತ್ತು ಮಾತುಕತೆಗಳ ಮೂಲಕ ಪರಿಹರಿಸಿರುವ ಉತ್ಕೃಷ್ಟ ಮಾದರಿಯಾಗಿದೆ. ಯಾವುದೇ ಅಡೆತಡೆಗಳು ಅಥವಾ ಆಕ್ರೋಶಗಳಿಲ್ಲದೆ ವಿವಿಧ ಸಮಸ್ಯೆಗಳನ್ನು ಪರಿಹರಿಸಲಾಯಿತು. 

9. ಸಂಸತ್ತಿನ ಅಭ್ಯಾಸ ಅಥವಾ ಆಯ್ಕೆಯಾಗಿ ಕಲಾಪಗಳಿಗೆ ಅಡಚಣೆ ಮಾಡುವುದು ಮತ್ತು ಅಡ್ಡಿಪಡಿಸುವುದು ಪ್ರಜಾಸತ್ತಾತ್ಮಕ ಮೌಲ್ಯಗಳಿಗೆ ವಿರುದ್ಧವಾಗಿದೆ. ಇದು ಪ್ರಸ್ತುತ ಸನ್ನಿವೇಶಕ್ಕೆ ಸಂಬಂಧಿಸಿದೆ ಮತ್ತು ಸಂವಿಧಾನದ ಸಭೆಯಲ್ಲಿ ಸ್ಥಾಪಿಸಲಾದ ಉನ್ನತ ಮಾನದಂಡಗಳನ್ನು ಅನುಸರಿಸಲು ನಮಗೆ ಇದು ಅನಿವಾರ್ಯವಾಗಿದೆ. ಪ್ರಜಾಪ್ರಭುತ್ವದ ದೇಗುಲದಲ್ಲಿ ಸಭ್ಯತೆಯ  ಕೊರತೆಯಿಂದಾಗಿ ಎದುರಿಸಬೇಕಾದ ತೀವ್ರ ಸಾರ್ವಜನಿಕ ಮುಜುಗರ ಮತ್ತು ಭ್ರಮನಿರಸನವನ್ನು ನಾವು ಅರಿಯಬೇಕಾಗಿದೆ.

ಮಾನ್ಯ ಸದಸ್ಯರೇ:

10. ತನ್ನ ಮೂರು ಮುಖಗಳಾದ ಶಾಸಕಾಂಗ, ನ್ಯಾಯಾಂಗ ಮತ್ತು ಕಾರ್ಯಾಂಗಗಳು ತಮ್ಮ ತಮ್ಮ ಕ್ಷೇತ್ರಗಳಿಗೆ ನಿಷ್ಠುರವಾಗಿ ಬದ್ಧವಾದಾಗ ಪ್ರಜಾಪ್ರಭುತ್ವವು ಅರಳುತ್ತದೆ ಮತ್ತು ಪ್ರವರ್ಧಮಾನವಾಗುತ್ತದೆ.

12. ಅಧಿಕಾರಗಳ ಪ್ರತ್ಯೇಕತೆಯ ಸಿದ್ಧಾಂತದ ಉತ್ಕೃಷ್ಟತೆಯು, ಶಾಸಕಾಂಗ, ನ್ಯಾಯಾಂಗ ಮತ್ತು ಕಾರ್ಯಾಂಗವು ಅತ್ಯುತ್ತಮವಾಗಿ ಒಟ್ಟಾಗಿ ಮತ್ತು ಒಗ್ಗಟ್ಟಿನಿಂದ ಕಾರ್ಯನಿರ್ವಹಿಸಿದಾಗ ಮಾತ್ರ ಸಾಕಾರವಾಗುತ್ತದೆ. ಇತರ ಅಂಗಗಳಲ್ಲಿ ಇನ್ನೊಂದು ಅಂಗದ ಯಾವುದೇ ಆಕ್ರಮಣವು, ಅದು ಎಷ್ಟೇ ಸೂಕ್ಷ್ಮವಾಗಿರಲಿ, ಆಡಳಿತದ ಬಂಡಿಯನ್ನು ಉರುಳಿಸುವ ಸಾಮರ್ಥ್ಯವನ್ನು ಹೊಂದಿರುತ್ತದೆ.

13. ಆಗಾಗ್ಗೆ ನಡೆಯುವ ಆಕ್ರಮಣಗಳ ಈ ಕಠೋರ ವಾಸ್ತವವನ್ನು ನಾವು ನಿಜವಾಗಿಯೂ ಎದುರಿಸುತ್ತಿದ್ದೇವೆ. ಆಡಳಿತದ ಈ ಅಂಗಗಳ ನಡುವೆ ಸೌಹಾರ್ದತೆಯನ್ನು ತರಲು ದೃಢವಾದ ಕ್ರಮಗಳನ್ನು ತೆಗೆದುಕೊಳ್ಳಲು ಈ ಸದನವು ಉನ್ನತ ಸ್ಥಾನದಲ್ಲಿದೆ. ನೀವೆಲ್ಲರೂ ಇದನ್ನು ಪ್ರತಿಬಿಂಬಿಸುವಿರಿ ಮತ್ತು ಮುನ್ನಡೆಯುವ ಹಾದಿಯಲ್ಲಿ ತೊಡಗುತ್ತೀರಿ ಎಂದು ನನಗೆ ಭರವಸೆಯಿದೆ.

ಗೌರವಾನ್ವಿತ ಸದಸ್ಯರೇ:

14. ಪ್ರಜಾಪ್ರಭುತ್ವದ ಸಾರವು ನ್ಯಾಯಸಮ್ಮತವಾದ ವೇದಿಕೆಯ ಮೂಲಕ ಪ್ರತಿಫಲಿಸುವ ಜನರ ಪ್ರಭುತ್ವದಲ್ಲಿದೆ. ಯಾವುದೇ ಪ್ರಜಾಪ್ರಭುತ್ವದಲ್ಲಿ, ಸಂಸದೀಯ ಸಾರ್ವಭೌಮತ್ವವನ್ನು ಉಲ್ಲಂಘಿಸಲಾಗುವುದಿಲ್ಲ. ಇಲ್ಲಿ ನಾವೆಲ್ಲರೂ ಅದನ್ನು ಸಂರಕ್ಷಿಸಲು ಪ್ರತಿಜ್ಞೆ ಮಾಡಿರುತ್ತೇವೆ.

15. "ವಿಧಾನಕ್ಕೆ ಅನುಗುಣವಾಗಿ ಈ ಸಂವಿಧಾನದ ಯಾವುದೇ ನಿಬಂಧನೆಯನ್ನು ಸೇರ್ಪಡೆ, ಬದಲಾವಣೆ ಅಥವಾ ರದ್ದುಗೊಳಿಸುವ ವಿಧಾನದ ಮೂಲಕ ತಿದ್ದುಪಡಿ ಮಾಡಲು" ತನ್ನ ಸಂವಿಧಾನದ ಅಧಿಕಾರವನ್ನು ಚಲಾಯಿಸಲು ಸಂಸತ್ತು ಅಧಿಕಾರ ಹೊಂದಿದೆ ಮತ್ತು ಸರ್ವೋಚ್ಚವಾಗಿದೆ. ಸಂವಿಧಾನದ 145(3) ನೇ ವಿಧಿಯಲ್ಲಿ ಕಲ್ಪಿಸಲಾದ ಸಂವಿಧಾನದ ವ್ಯಾಖ್ಯಾನಕ್ಕೆ ಸಂಬಂಧಿಸಿದಂತೆ ಕಾನೂನಿನ ಗಣನೀಯ ಪ್ರಶ್ನೆಯನ್ನು ಒಳಗೊಂಡಿರುವ ಯಾವುದೇ ಪ್ರಕರಣವನ್ನು ನಿರ್ಧರಿಸುವ ಉದ್ದೇಶವನ್ನು ಹೊರತುಪಡಿಸಿ ಕಾರ್ಯಾಂಗ ಅಥವಾ ನ್ಯಾಯಾಂಗದ ಹಸ್ತಕ್ಷೇಪಕ್ಕೆ ಅವಕಾಶವಿಲ್ಲ.

 16. ತಿದ್ದುಪಡಿ ಮಾಡಲು ಈ ಸಾಂವಿಧಾನಿಕ ಅಧಿಕಾರವನ್ನು ಬಳಸಿಕೊಂಡು, ಪ್ರಜಾಪ್ರಭುತ್ವವನ್ನು ಮತ್ತಷ್ಟು ಬಲಪಡಿಸಲು ಸಂಸತ್ತು ಆರೋಗ್ಯಕರ ರಚನಾತ್ಮಕ ಆಡಳಿತ ಬದಲಾವಣೆಗಳನ್ನು ಮಾಡಿದೆ. ಪಂಚಾಯತ್ ರಾಜ್, ಪುರಸಭೆಗಳು ಮತ್ತು ಸಹಕಾರ ಸಂಘಗಳಿಗೆ ಸಮಗ್ರವಾದ ಕಾರ್ಯವಿಧಾನವನ್ನು ಒದಗಿಸುವ ಸಂವಿಧಾನದಲ್ಲಿ ಭಾಗ IX, IX A ಮತ್ತು IX B ಅನ್ನು ಸಂಯೋಜಿಸುವ ಮೂಲಕ ಇದು ಸಾಧ್ಯವಾಗಿದೆ.

17. ಇದೇ ರೀತಿಯಲ್ಲಿ, ರಾಷ್ಟ್ರೀಯ ನ್ಯಾಯಾಂಗ ನೇಮಕಾತಿ ಆಯೋಗಕ್ಕೆ (ಎನ್‌ ಜೆ ಎ ಸಿ) ದಾರಿ ಮಾಡಿಕೊಡುವ 99 ನೇ ಸಾಂವಿಧಾನಿಕ ತಿದ್ದುಪಡಿ ಮಸೂದೆಯನ್ನು ಸಂಸತ್ತು ಅತ್ಯಂತ ಅಗತ್ಯವಾದ ಐತಿಹಾಸಿಕ ಹೆಜ್ಜೆಯಾಗಿ ಅಂಗೀಕರಿಸಿತು.

18. ಮೇಲಿನವುಗಳಿಗೆ ಅಭೂತಪೂರ್ವ ಬೆಂಬಲವಿತ್ತು. ಆಗಸ್ಟ್ 13, 2014 ರಂದು, ಲೋಕಸಭೆಯು ಯಾವುದೇ ಗೈರುಹಾಜರಿಯಿಲ್ಲದೆ ಅದರ ಪರವಾಗಿ ಸರ್ವಾನುಮತದಿಂದ ಒಪ್ಪಿಗೆ ನೀಡಿತು. ಈ ಸದನವೂ ಆಗಸ್ಟ್ 14, 2014 ರಂದು ಒಂದು ಗೈರುಹಾಜರಿಯೊಂದಿಗೆ ಸರ್ವಾನುಮತದಿಂದ ಅಂಗೀಕರಿಸಿತು. ಸಂಸದೀಯ ಪ್ರಜಾಪ್ರಭುತ್ವದಲ್ಲಿ ಅಪರೂಪವಾಗಿ, ಸಾಂವಿಧಾನಿಕ ಶಾಸನಕ್ಕೆ ಇಂತಹ ಬೃಹತ್ ಬೆಂಬಲ ದೊರಕಿತು.

19. 29 ರಾಜ್ಯಗಳಲ್ಲಿ 16 ರಾಜ್ಯ ವಿಧಾನಸಭೆಗಳು ಕೇಂದ್ರ ಶಾಸನವನ್ನು ಅನುಮೋದಿಸಿದ ನಂತರ ಈ ಪ್ರಕ್ರಿಯೆಯು ಸಾಂವಿಧಾನಿಕ ವಿಧಿಯಾಯಿತು; ಆರ್ಟಿಕಲ್ 111 ರ ಪ್ರಕಾರ ಭಾರತದ ರಾಷ್ಟ್ರಪತಿಯವರು ಡಿಸೆಂಬರ್ 31, 2014 ರಂದು ಇದಕ್ಕೆ ತಮ್ಮ ಒಪ್ಪಿಗೆಯನ್ನು ನೀಡಿದರು.

20. ಈ ಐತಿಹಾಸಿಕ ಸಂಸದೀಯ ಆದೇಶವನ್ನು ಸುಪ್ರೀಂ ಕೋರ್ಟ್ ಅಕ್ಟೋಬರ್ 16, 2015 ರಂದು 4:1 ರ ಬಹುಮತದಿಂದ ರದ್ದುಗೊಳಿಸಿತು ಮತ್ತು ಸಂವಿಧಾನದ 'ಮೂಲ ರಚನೆ'ಯ ಸಿದ್ಧಾಂತಕ್ಕೆ ಅನುಗುಣವಾಗಿಲ್ಲ ಎಂದು ಹೇಳಿತು.

21. ಪ್ರಜಾಸತ್ತಾತ್ಮಕ ಇತಿಹಾಸದಲ್ಲಿ ಕಾನೂನುಬದ್ಧವಾದ ಸಾಂವಿಧಾನಿಕ ವಿಧಿಯನ್ನು ನ್ಯಾಯಾಂಗವು ರದ್ದುಗೊಳಿಸಿದ ಇಂತಹ ಬೆಳವಣಿಗೆ ಮತ್ತೊಂದಿಲ್ಲ. ಇದು ಸಂಸತ್ತಿನ ಸಾರ್ವಭೌಮತ್ವವನ್ನು ಮತ್ತು ಈ ಸದನ ಮತ್ತು ಲೋಕಸಭೆಯು ಪಾಲಕರಾಗಿರುವ ಜನರ ಜನಾದೇಶವನ್ನು ಕಡೆಗಣಿಸುವ ಒಂದು ಜ್ವಲಂತ ನಿದರ್ಶನವಾಗಿದೆ.

ಗೌರವಾನ್ವಿತ ಸದಸ್ಯರೇ:

ಪ್ರಜಾಸತ್ತಾತ್ಮಕ ಆಡಳಿತದಲ್ಲಿ ಯಾವುದೇ 'ಮೂಲ ರಚನೆ'ಯ ಮೂಲವು ಸಂಸತ್ತಿನಲ್ಲಿ ಪ್ರತಿಬಿಂಬಿಸುವ ಜನಾದೇಶದ ಪ್ರಾಬಲ್ಯವಾಗಿದೆ ಎಂಬುದನ್ನು ನಾವು ಗಮನದಲ್ಲಿಟ್ಟುಕೊಳ್ಳಬೇಕು. ಸಂಸತ್ತು ಸಂವಿಧಾನದ ರಚನೆಯ ವಿಶೇಷ ಮತ್ತು ಅಂತಿಮ ನಿರ್ಧಾರಕವಾಗಿದೆ.

22. ಪ್ರಜಾಸತ್ತಾತ್ಮಕ ರಚನೆಗೆ ಬಹುಮುಖ್ಯವಾದ ಇಂತಹ ಮಹತ್ವದ ವಿಷಯದ ಬಗ್ಗೆ ಈಗ ಏಳು ವರ್ಷಗಳಿಂದ ಸಂಸತ್ತಿನಲ್ಲಿ ಯಾವುದೇ ಗಮನಹರಿಸಿಲ್ಲ ಎಂಬುದು ಬೆಚ್ಚಿಬೀಳಿಸುವ ಸಂಗತಿಯಾಗಿದೆ.

23. ಈ ಸದನವು, ಲೋಕಸಭೆಯ ಜೊತೆಯಲ್ಲಿ, ಜನರ ಆದೇಶದ ಪಾಲಕನಾಗಿರುವುದರಿಂದ, ಸಮಸ್ಯೆಯನ್ನು ಪರಿಹರಿಸಲು ಕರ್ತವ್ಯ ಬದ್ಧವಾಗಿದೆ ಮತ್ತು ಅದು ಹಾಗೆ ಮಾಡುತ್ತದೆ ಎಂದು ನನಗೆ ಭರವಸೆಯಿದೆ.

24. ಯಾವುದೇ ಸಂಸ್ಥೆಯಲ್ಲಿ ಸಾಂವಿಧಾನಿಕ ಸ್ಥಾನದಲ್ಲಿರುವವರು ತಮ್ಮ ನಡವಳಿಕೆಯಲ್ಲಿ ಔಚಿತ್ಯ, ಘನತೆ ಮತ್ತು ಸಜ್ಜನಿಕೆಯ ಉನ್ನತ ಗುಣಮಟ್ಟಕ್ಕೆ ಮಾದರಿಯಾಗಿರಬೇಕು.

ಗೌರವಾನ್ವಿತ ಸದಸ್ಯರೇ:

25. ಎಲ್ಲಾ ಸಾಂವಿಧಾನಿಕ ಸಂಸ್ಥೆಗಳು ಈ ವೇದಿಕೆಗಳಿಂದ ಹೊರಹೊಮ್ಮುವ ಪ್ರತಿಕೂಲವಾದ ಸವಾಲಿನ ನಿಲುವು ಅಥವಾ ಸಲಹೆಗಳ ವಿನಿಮಯದ ಸಾರ್ವಜನಿಕ ಪ್ರದರ್ಶನವನ್ನು ಪ್ರತಿಬಿಂಬಿಸಲು ಮತ್ತು ಸ್ತಬ್ಧಗೊಳಿಸಲು ಇದು ಸಮಯವಾಗಿದೆ. ಈ ತಪ್ಪುಹಾದಿಯನ್ನು ಕೊನೆಗೊಳಿಸುವ ಆರೋಗ್ಯಕರ ಸೌಹಾರ್ದಯುತ ಪರಿಸರ ವ್ಯವಸ್ಥೆಯನ್ನು ಸಕ್ರಿಯವಾಗಿಸುವಂತೆ ನಾನು ಸದನದ ಸದಸ್ಯರನ್ನು ಒತ್ತಾಯಿಸುತ್ತೇನೆ.

26. ಇದು ಪರಸ್ಪರ ನಂಬಿಕೆ ಮತ್ತು ಗೌರವದಿಂದ ಗುರುತಿಸಲಾದ ಸಾಂಸ್ಥಿಕ ತಡೆರಹಿತ ಸಂಪರ್ಕವಾಗಿದ್ದು ಅದು ರಾಷ್ಟ್ರದ ಸೇವೆಗೆ ಸೂಕ್ತವಾದ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುತ್ತದೆ. ಸಾಂವಿಧಾನಿಕ ಸಂಸ್ಥೆಗಳ ಸಮನ್ವಯದ ಕಾರ್ಯನಿರ್ವಹಣೆಯನ್ನು ಉತ್ತೇಜಿಸಲು ಈ ಸದನವು ಈ ಆರೋಗ್ಯಕರ ವಾತಾವರಣವನ್ನು ಸೃಷ್ಟಿಸುವ ಅಗತ್ಯವಿದೆ, ಲಕ್ಷ್ಮಣ ರೇಖೆಯನ್ನು ಗೌರವಿಸುವ ಅಗತ್ಯವನ್ನು ಒತ್ತಿಹೇಳುತ್ತದೆ.

ಮಾನ್ಯ ಸದಸ್ಯರೇ:

27. ಉಪ ರಾಷ್ಟ್ರಪತಿಯಾಗಿ, ನವೆಂಬರ್ 12 ಮತ್ತು 13, 2022 ರಂದು ಕಾಂಬೋಡಿಯಾದ ನೋಮ್ ಪೆನ್‌ನಲ್ಲಿ ನಡೆದ ಭಾರತ-ಆಸಿಯಾನ್ ಮತ್ತು ಪೂರ್ವ ಏಷ್ಯಾ ಶೃಂಗಸಭೆಗಳಲ್ಲಿ ಮತ್ತು 20 ನವೆಂಬರ್ 2022 ರಂದು ಕತಾರ್‌ನ ದೋಹಾದಲ್ಲಿ ನಡೆದ ಫಿಫಾ ವಿಶ್ವಕಪ್ ಉದ್ಘಾಟನಾ ಸಮಾರಂಭದಲ್ಲಿ ನಾನು ದೇಶವನ್ನು ಪ್ರತಿನಿಧಿಸುವ ಗೌರವವನ್ನು ಪಡೆದೆ. ವಿಶ್ವ ನಾಯಕರಿಂದ ಭಾರತವು ಪಡೆಯುತ್ತಿರುವ ಗೌರವದ ಬಗ್ಗೆ ಇರುವ ಅಪಾರ ಹೆಮ್ಮೆ ಮತ್ತು ತೃಪ್ತಿಯನ್ನು ನಾನು ನಿಮ್ಮೊಂದಿಗೆ ಹಂಚಿಕೊಳ್ಳುತ್ತೇನೆ ಮತ್ತು ನಮ್ಮ ಬೆಳವಣಿಗೆಯ ಪಥವು ಜಾಗತಿಕ ಶಾಂತಿ ಮತ್ತು ಸಮೃದ್ಧಿಯನ್ನು ಸೃಷ್ಟಿಸುತ್ತದೆ ಎಂದು ಭಾವಿಸುತ್ತೇನೆ.

ಗೌರವಾನ್ವಿತ ಸದಸ್ಯರೇ:

28. ನಾವೆಲ್ಲರೂ ಒಗ್ಗಟ್ಟಿನಿಂದ ರಾಷ್ಟ್ರಕ್ಕೆ ಅತ್ಯುತ್ತಮವಾದ ಸೇವೆ ಸಲ್ಲಿಸಲು ಹಿತಕರವಾದ ಮತ್ತು ಫಲಪ್ರದವಾದ ಸಹಯೋಗವನ್ನು ನಾನು ಭರವಸೆ ಮತ್ತು ನಿರೀಕ್ಷೆಯೊಂದಿಗೆ ಎದುರು ನೋಡುತ್ತಿದ್ದೇನೆ.

29. ಮತ್ತೊಮ್ಮೆ, ಅತ್ಯಂತ ಆತ್ಮೀಯ ಅಭಿನಂದನೆಗಳಿಗಾಗಿ ನಿಮಗೆ ನನ್ನ ಅತ್ಯಂತ ಶ್ರದ್ಧಾಪೂರ್ವಕ ಧನ್ಯವಾದಗಳು.

30. ಸಂವಿಧಾನದ ರಕ್ಷಣೆಯ ಕಾಲಾಳುವಾಗಿ, ನಿಮ್ಮೆಲ್ಲರಿಗೂ ವಂದಿಸಿ, ನನ್ನ ಮಾತುಗಳನ್ನು ಮುಗಿಸುತ್ತಿದ್ದೇನೆ.

*****