কেন্দ্রগী হোম অমসুং কোওপরেসন মন্ত্রী শ্রী অমিত সাহনা ঙসি নই দিল্লীদা লচিৎ বোরফুকনগী ৪০০শুবা মপোক কুমওন থৌরমগা মরী লৈননা পাঙথোকপা থৌরমদা ৱা ঙাঙখ্রে‍। অসামগী মুখ্য মন্ত্রী দোক্তর হিমন্ত বিস্বা সর্ম অমদি কেন্দ্র মন্ত্রী শ্রী সর্বনন্দ সোনোৱাল য়াওনা মীথুং কয়ানা থৌরম অদুদা শরুক য়াখি‍।

মহাক্কী ৱারোলদা, শ্রী অমিত সাহনা লচিৎ বোরফুকন লৈরমদ্রবদি, অৱাং নোংপোক ঙসি ভারতকী শরুক অমা ওইরম্লোই, মরমদি মহাক্না মতমদুদা লৌরম্বা ফিরেপ অমদি মহাক্কী মরিংজেলনা অৱাং নোংপোক খক্তা নত্তনা খা এসিয়া পুম্ববু লাইনিংগী মিংদা লম লৌশিনবশিংদগী ঙাকথোক্লম্বনি হায়খি‍। লৈবাক অসিনা, সিভিলাইজেসন অমদি কল্চর অসিনা লচিৎ বোরফুকনগী থৌনা লিংজেলগী লমন তোনশিল্লবনি হায়না মহাক্না হায়খি‍।

অসামগী মুখ্য মন্ত্রী দোক্তর হিমন্ত বিস্বা সর্মনা ভারতকী অথোইবা মপারীশিংগী মমিংবু অৱাং নোংপোক্কী ঙমখৈগী ৱাংমদা পুথোরক্নবা হোৎনরি হায়না শ্রী অমিত সাহনা হায়খি‍। মশাগী পুৱারীদা চাউথোকচবা পোক্ত্রবা মীওইশিংনা মখোয়গী লৈবাক্কী সনা ফুদোংবা তুংলমচৎ অমা কৈদৌঙৈদসু পুরকপা ঙম্লোই হায়না শ্রী সাহনা হায়খি‍। লৈবাকসিগী সনা ফুদোংবা পুৱারী অমা লৈহন্সি হায়রগদি ঐখোয়না ঐখোয়গী পুৱারীগীদমক চাউথোকচবা তাই হায়না মহাক্না ফোঙদোকখি‍।

খ্বাইদগী খুদোংচাখিদ্রবা মতমদুদা বোরফুকন্না উৎখিবা থৌনানা লৈবাক্কী মফম খুদিংদা ঔরঙ্গজেবকী মায়োক্তা লেপ্ননবগী থৌনা হাপখিবনি হায়না কেন্দ্রগী গৃহ মন্ত্রীনা হায়খি‍। খারোমদা সিবাজী মহারাজনা মরোমদোম লৈবাক ঙাকচবগী ৱাখল্লোন্দা থৌনা হাপখিবা মতমদা, তরাশুবা গুরু, গুরু গোবিন্দ সিংহ জীনা অৱাংলোমদা অমদি নোংচুপ্লোমদনা রাজস্থান্দা বীর দুর্গাদাস রাধোরনা লান্থেংনখি, অমদি হায়রিবা মতমদুদা লচিৎ বোরফুকন্না নোংপোক্লোমদা মুঘল লান্মীশিংবু মায়থিবা পীখি‍।

১৯৯৯দগী হৌরগা লচিৎ বোরফুকন গোল্দ মেদল, ঐখোয়গী থৌনা ফরবা লান্মীশিংবু অথৌবা অসিনা পুক্নিং থৌগৎনবগীদমক, নেস্নেল দিফেন্স একাদমী (এন.দি.এ.)গী খ্বাইদগী ফবা কেদেত্তা পীদুনা লাক্লি হায়না শ্রী অমিত সাহনা হায়খি‍। শ্রী সাহনা ঙসি লৈবাকসিগী খ্বাইদগী শেংলবা নাৎ মহৌশাগী ফজবশিংগীদমক মমিং চৎলিবা অৱাং নোংপোক্তা লৈরি হায়খি‍। অৱাং নোংপোক্কী লোল, নাৎ, ঈশৈ নোংমাই, ফিজোল অমদি চীঞ্জাক মখোয়গী অশেংবা মশক মওংদা লৈরি‍। অকবর নৎত্রগা ঔরঙ্গজেব ওইরবসু, কুতুবউদ্দিন ঐবক নৎত্রগা ইলতুতমিস ওইরবসু, বখতিয়ার খিল্জি নৎত্রগা ইৱাজ খিল্জি ওইরবসু, মুহম্মদ বিন তুঘ্লক নৎত্রগা মির জুম্লা ওইরবসু, মখোয় পুম্নমক অৱাং নোংপোক্তা মায়থিবা নংখি‍।

কেন্দ্রগী গৃহ মন্ত্রীনা লচিৎ বোরফুকনগী পুন্সি অসি থৌনা লিংজেলগী খুদম অমনি হায়খি‍। থৌনা লিংজেল লৈবা হায়বসি ময়াম্না কিনরবা থবক্তুবু পাঙথোকপদুনি অমদি হায়রিবা থৌনা লিংজেলসিনা চিংদুনা বোরফুকন্না মহাক্কী মতমদা চাউখ্রবা মুঘল লান্মীশিংগী মায়োক্তা শিংনবা থল্লবা ফীভমদা খ্বাইগদী চাউনা মায় পাকখি‍। বোরফুকন্না অসামগী ত্রাইবেল লান্মীশিংবু পুনশিন্নদুনা অপুনবগী শক্তম পুরকখি হায়না শ্রী অমিত সাহনা হায়খি‍। বিজ্ঞান ভবন্দা পাঙথোক্লিবা একজিবিসন অসিনা লৈবাকসিগী অৱাং নোংপোকথংবা শরুক্তা শোক্নখিবা নীংতম লানগী মরমদা চাউরাকপা মশক অমা উৎলি হায়না মহাক্না হায়খি‍। ঐখোয়গী পুৱারী লান্না ইশিনখ্রে, অদুবু হৌজিক্তি কনামত্তনা ঐখোয়গী পুৱারী মশক থোক্না ইবদা অথিংবা পীবা ঙম্লরোই হায়না মহাক্না হায়খি‍। ঐখোয়না ঐখোয়গী পুৱারীবু মালেমসিগী মাঙদা মশক থোক্না পুথোকপা তাই হায়না মহাক্না হায়খি‍। শ্রী সাহনা পুৱারী নৈনবা অমদি পুৱারীগী মহৈরোয়শিংগী মফমদা লৈবাকসিগী মফম অমা হেক্তদা চহি ১৫০ হেন্না পাল্লম্বা অচৌবা এম্পাইয়র ৩০ অমদি লৈবাকসিগী নীংতম্বগীদমক মপুন্সি কত্থোকখিবা অথৌবা ৩০০গী মরমদা থিজিন্দুনা পুথোরক্নবা ৱাফম থমখি, অমদি মদুনা অশেংবা পুৱারীবু মাঙদা পুথোরক্তুনা অরানবা পুৱারীবু মশা মথন্তা তোখাই তাহনখিগনি হায়খি‍। ঐখোয়গী নীংতম লান্মীশিংগী কত্থোকপা অমদি থৌনাগী ৱারীবু লৈবাকসিগী কাচিন কোয়া থুংনা শন্দোকপনা তুংগী মীরোলদা পুক্নিং থৌগৎকনি হায়না মহাক্না মখা তাখি‍।

শ্রী অমিত সাহনা, পুৱারী নৈনবশিংগী মতুং ইন্না, সরাইঘাৎকী লান্ফমদা, লচিৎ বোরফুকন্না মহাক্কী অপীকপা হি অমদি খুৎশু খুৎলায় মতিক চানা পায়বা লান্মীশিংখক্তনা মুঘলগী অচৌবা তোপ অমদি জহাজশিংবু মায়োক্নখি হায়রখি‍। লচিৎ বোরফুকনগী লান্মীশিং মরৈবাক নীংবগী ইহুলনা লমজিংখি, অদুগা মুঘল লান্মীশিংদা মদু ৱাৎলম্মী, মরম অসিননি মশিং, মচাক মথুম অমদি খুৎশু খুৎলায়দা খেন্নজরবসু লচিৎ বোরফকনগী লান্মীনা মায় পাক্তুনা অহোম লৈবাক্কী নীংতম্বা, নাৎ অমদি খুন্থোকলোনবু কনখিবা‍। লচিৎ বোরফুকনগী লান্মীনা মায়থিবা পীখ্রবা মতুংদা বেঙ্গলদগী কান্দহর ফাওবদা য়াম্লবা লানফম কয়া মায় পাকখিবা রামসিংহনা, হি হোনবদা, তেন কাপ্পদা, খোংলম তৌবদা, নোংমৈ অমদি তোপ শীজিন্নবদা হৈথোই শিংথোইরবা অসামিজ লান্মীগী হীরম কয়াদা হৈশিংবা মমাঙদা অমুক্তা উখিদ্রি হায়না ফোঙদোকখি হায়না মহাক্না হায়খি‍। শ্রী সাহনা অসিগুম্বা লান্মী অসি মমিৎ মনা শিংবা অমদি ইচঙ থৌবা লুচিংবা অমা খক্তনা শেমগৎপা ঙমগনি হায়খি‍। লচিৎ বোরফুকন্না লান্মী লুচিংবা ওইরবা মতুংদা মহাক্কী লান্মীবু তেনখ্রবা মতমগী মনুংদা তোঙান তোঙানবা লালগী মওং মতৌদা হৈথোই শিংথোইবা ওইহনখি‍। অসামগী ব্রহ্মপুত্রদা লান শোক্ননবগীদমক মপাঙ্গল কনবা ঈশিং লান্মী শেম শানবগীদমক, লচিৎ বোরফুকন্না মহাক্কী ঈশিং লান্মীদা লৈরিবা মীওই খুদিংমক ত্রেনিং পীখি‍।

মুঘলশিংনা লান্দারকপা মতমদা, লচিৎ বোরফুকন্না লানবন শেম্নবগী থৌদাং মহাক্কী মাম্মদা শিন্নখি হায়না কেন্দ্রগী গৃহ মন্ত্রীনা হায়খি‍। অদুবু মহাক্কী ইমুং মনুংগী মীওইশিং নুংশিবগী মথক্তা মরৈবাক নুংশিবগী ইহুলনা থাঙ্গত্তুনা, লচিৎ বোরফুকন্না মতম চানা শেম শাদবগীদমক মহাক্কী মাম্মবু মঙক কক্তুনা হাৎখি‍। অসিগুম্বা মরৈবাক নিংবগী খুদম অসি মফম অতৈদা ফংলোই‍। মরৈবাক নিংবগী ইহুলদা মপুং ফানা লুপ্লবা মীওই অমখক্তনা মসি তৌবা ঙমগনি‍। থৌদোক অসিনা লচিৎ বোরফুকনগী লান্মীদা মরৈবাক নিংবগী ইথিল অমা ইহৌহনখি‍। শ্রী অমিত সাহনা, লচিৎ বোরফুকন লান মায় পাক্নবা চপ য়ুংনা লেপখি হায়খি‍। সরাইঘাৎ লানফমগী মাঙওইননা মশা ঙমদদুনা লৈরবসু, লচিৎ বোরফুকন্না লান শোক্নবা য়াওনবা ফিরেপ লৌখি‍। মহাক্কী লান্মীনা মহাকপু শাফগদবা মফম অমদা থৈদোক্নবা হোৎনরবসু বোরফুকন্না মুঘলশিংগী মায়োক্তা লান্থেংনখি অমদি লান মায় পাক্তুনা মুঘলশিংগা শোক্নখিবা অহানবা লানফমদা অহোম লৈবাক্না মায়থিবা নংখিবা অদু কোকহনখি‍। মহাক্না কয়ামুক য়াম্না থৌনা লৈনা লমন খুমখিবগে হায়ববু লানফমদুগী মতুংদা মুস্লিন লম খোপচিনবা অমত্তনা অসামদা লান্দারকপা ঙমখিদে‍।

শ্রী অমিত সাহনা অসামগী মুখ্য মন্ত্রী দোক্তর হিমন্ত বিস্বা সর্মগী মফমদা লচিৎ বোরফুকনগী থৌনা অমদি কত্থোকপবু অঙাংশিংদা খঙহন্নবগীদমক, মহাক্কী পুন্সি ৱারীবু হিন্দি অমদি ভারতকী লোল ১০দা হন্দোক্নবা ৱাফম থমখি‍। প্রধান মন্ত্রী শ্রী নরেন্দ্র মোদীনা, মশক মমিং খঙহৌদ্রবা অথৌবশিং অমদি নীংতম লান্মীশিং ঐখোয়গী নহা, অঙাংশিংদা মশক তাক্ননবা অমদি মখোয়না ফিদম ওইদুনা নীংতম্বগী মমল খঙহন্নবা, নীংতম্বগী অমৃৎ মহোৎসব পাঙথোক্নবা ফিরেপ লৌবনি হায়না গৃহ মন্ত্রীনা হায়খি‍। থৌরম অদুদা, শ্রী অমিত সাহনা মমিং লৈরবা পুৱারী নৈনবা সুর্য়কুমার ভুরিয়া নীংশিংখি অমদি ভুরিয়ানা বোরফুকনবু, মহাক্কী পুন্সিগা মরী লৈনবা পুৱারীশিং শেম-শাদুনা, হন্দোক্তুনা অমদি ফোঙদোক্তুনা শিনাইদবা মফম অমা পীখ্রে‍ হায়খি‍। মসি স্তেত খুদিংদা পুবা অমদি ভারতকী লোল খুদিংদা হন্দোকপা মথৌ তাই হায়খি‍।

শ্রী অমিত সাহনা, নোংথক অমদি রেল লম্বীগী খুত্থাঙদা অৱাং নোংপোক ভারত্তা ইং তপ্পা অমদি চাওখৎপা পুরক্তুনা, প্রধান মন্ত্রীনা অৱাং নোংপোকপু ভারতকী মফম অতৈগা শমজিন্নরে হায়খি‍। প্রধান মন্ত্রী নরেন্দ্র মোদীনা অৱাং নোংপোক স্তেতশিং অমদি ভারতকী মফম অতৈগা পুক্নিংগী ওইবা মরী শমজিন্নরে‍। ঙসিদি অৱাং নোংপোক ভারতকী শরুক ওইবদা চাউথোকচবা পোক্লে‍। হৌখিবা চহি ৮সিদা, খুৎলায় পায়বা কাঙলুপশিংনা খুৎলায় থাদোক্তুনা মহৌশাগী পুন্সিদা হঞ্জিল্লকপনচিংবা মায় পাকপা কয়া লৈখ্রে‍। হৌজিক লৈবাক অসিবু পুৱারী, নাৎ, লোল অমদি লাইনিংগী খুত্থাঙদা মপাঙ্গল কল্লবা ভারত অমা ওইহন্নবগীদমক পুনশিনবা মতমনি অমদি অসাম লৈঙাক্না লৌখৎলিবা থৌরাংশিং হায়রিবা পান্দম অসি ফংনবগী মায়কৈদা থাংজিল্লিবা অচৌবা খোঙথাঙ অমনি, অমদি মসি মখা তানা থাংজিনখিগনি‍। মসিনা লৈবাক পুম্বদা অৱাং নোংপোক্কী ইহুল অমা পোকহন্দুনা অৱাং নোংপোক্তা লৈবাক পুম্ববু মশাগী ওইনা খঞ্জবগী ইথিল অমা পোকহনগনি হায়না মহাক্না মখা তাখি‍।

*****