ঙসি নবেম্বর ৩, ২০২২দা ভারতকী রাস্ত্রপতি, শ্রীমতি দ্রৌপতি মুর্মু মিজোরম য়ুনিভর্সিতিগী ১৭সুবা কনভোকেসন শরুক য়াখ্রে। মহাক্না ভর্চুএল ওইনা শঙ্গাখিবা লাইরিক-লাইশুগা মরী লৈনবা তোঙান-তোঙানবা প্রোজেকশিং অদুগী মনুংদা সাইরাং অমসুং মিজোরম য়ুনিভর্সিতিগী এস.তি গার্লস হোস্তেলশিং, মাউলপুইদা গভর্নমেন্ত আইজোল কোলেজ, আইজোলদা ইন্দিয়ান ইন্সতিতুৎ ওফ মাস কম্মুনিকেসনগী পর্মনেন্ত কেম্পস অমসুং পাছুঙ্গা য়ুনিভর্সিতি কোলেজদা পোস্ত গ্রেজুয়েত একাদেমি ব্লোক য়াওখি।

থৌরম অদুদা ৱা ঙাংবদা রাস্ত্রপতিনা হায়খি, ২০০২১দা থবক হৌখিবা মিজোরম য়ুনিভর্সিতি ঙসিদি অৱাং-নোংপোক লমদমদা অফবা মগুন লৈবা লাইরিক তম্বগী খুদোংচাবা ফংহনবা মশক নাইবা য়ুনিভর্সিতি অমা ওইরে। য়ুনিভর্সিতি অসিনা সাইন্স, আর্তস, কম্মর্স, ইঞ্জিনিয়ারিং অমসুং মেদিকেল সাইন্সকী হিরমশিংদা শিংথাবা য়াবা থবকশিং পাংথোক্লে। য়ুনিভর্সিতি অসি ‘ইন্সতিতুৎ ওফ ইমিনেন্স’কী থাক অদু য়ৌবা ঙম্লে অমসুং অনৌবা থবক কয়া পাংথোক্লে। তেনখ্রবা মতম খরগী মনুংদা মিজোরম য়ুনিভর্সিতিগী মচাক-মথুমশিং শেমগৎপা অসি থাগৎনিঙাইনি।

রাস্ত্রপতিনা হায়খি মহৈরোয়শিংদা অনৌবা অমসুং প্রাক্তিকেল ত্রেনিং পীনবা মিজোরম য়ুনিভর্সিতিদা ইকুবেতর অহুম লৈরে। একাদেমিক অমসুং তেক্নোলোজিগী লমদা মতেং পীন্নবা য়ুনিভর্সিতি অসিনা নেসনেল অমসুং ইন্তরনেসনেলগী থাক্তা তোঙান-তোঙানবা য়ুনিভর্সিতিশিং অমসুং মহৈলোয়শঙশিংগা এম.ও.য়ুশিং খুৎয়েক পীনখ্রে। মসিনা অৱাংবা থাক্কী মহৈলোয়শঙশিংনা নেসনেল অমসুং ইন্তরনেসনেল ওর্গনাইজেসনশিংগা পুন্না থবক তৌমিন্ননবগী অনৌবা মফম অমা পীরে অমসুং একাদেমিক অমসুং তেক্নোলোজিগী লমদা অনৌবা অফবা থবক কয়া পাংথোক্লে।

মহৈরোয়শিংদা ৱা ঙাংবদা রাস্ত্রপতিনা হায়খি কনভোকেসন অসি নিংশিংনবা অমসুং মহৈরোয়শিং মখোয়গী পুন্সিগী খোঙচৎতা শৌগৎলিবা মখোয়গী ইমুং-মনুংগী থবকশিং ইকায়খুম্নবা উৎনবা মরুওইবা থৌরম অমনি। মহৈরোয়শিংনা পাংথোকপা ঙম্বা থবকশিংগী পনখৈ লৈতে। মরম অদুনা মখোয়না মখোয়গী তৌবা ঙম্বশিং খঙজগদবনি। মখোয় মশাগী হৈথোই-শিংথোইবা অমসুং থৌনাগী খ্বাইদগী ফরবা জজদি মখোয়নি। মহৈরোয়শিংনা মালেম অসি খঙনবা হোৎনগদবনি অমসুং অনৌবা থবক কয়া পাংথোক্কদবনি। লাইরিক হৈতবশিং লাইরিক হৈহন্নবা মখোয়না থবক তৌগদবনি অমসুং লৌশিংগী মঙাল শন্দোক্কদবনি।

মহাক্না হায়খি একাদেমিক সেসন ২০২১-২২দা গ্রেজুয়েদ পাস তৌখিবা মহৈরোয়শিংগী চাদা ৫০ হেন্না নুপীমচাশিংনি। অৱাংবা থাক্কী মহৈ-মশিং তম্বদা নুপীমচা মশিং য়াম্না শরুক য়াবা অসি থাগৎনিঙাইনি অমসুং মসি হেন্না ৱাংখৎহনগদবনি। লাইরিক-লাইশু তম্বদা নুপী মশিং য়াম্লিবা অসিনা থবক শুনবা নুপী মশিং হেনগৎহনবা ঙমহনগদবনি। নুপীশিং চাউখৎপা মতমদা লৈবাক অমা শীনবা থুংনা চাউখৎকনি।  

রাস্ত্রপতিনা হায়খি মিরোজম য়ুনিভর্সিতি অমসুং সাইরাংদা এস.তি গার্লস হোস্তেল অনি শঙ্গাবা অসি মহৈরোয় নুপীমচাশিংদা অফবা মগুন লৈবা লাইরিক তাকপী-তম্বীবা অমসুং অতোপ্পা খুদোংচাবশিং পীদুনা মখোয়গী ফিবম ফগৎনবা খোঙথাং অমনি। আই.আই.এম.সি আইজোলগী পর্মনেন্ত কেম্পস শঙ্গাবা অসিনা অৱাং-নোংপোক শীনবা থুংনা মেদিয়া অমসুং মাস কম্মুনিকেস তম্বগী খুদোংচাবা হেনগৎহল্লগনি।

*****