য়ু.এন সেক্রেতরি জেনরেল এন্তোনিও গুতেরাস শরুক য়াদুনা ঙসি গুজরাতকী এক্তা নগরদা লৈবা স্তেচু ওফ য়ুনিতিদা প্রধান মন্ত্রী শ্রী নরেন্দ্র মোদীনা মিসন লাইফ(লাইফস্তাইল ফোর ইনভাইরোনমেন্ত) হৌদোকখ্রে। কোপ-২৬দা অহানবা ওইনা প্রধান মন্ত্রীনা হৌদোকখিবা লাইফ মিসন অসিনা ভারতনা মাঙজিল থাবা মালেমগী খোঙজং অমনা অকোয়বগী ফিবম ঙাক-শেন্নবা অমসুং কন্নবা লনাই ওইনা অমসুং অপুনবা ওইনা থবক পাংথোক্নবা পান্দম থম্লি।

থৌরম অদুদা প্রধান মন্ত্রী অমসুং য়ু.এন.এস.জিনা লাইফ লোগা অমসুং তেগলাইন হাংদোকখি অমসুং মিসন দোকুমেন্ত ফোঙখি। থৌরম অদুদা কেন্দ্রগী মপান থৌরম মন্ত্রী দোক্তর এস জয়সঙ্কর অমসুং গুজরাতকী চীফ মিনিস্তর শ্রী ভুপেন্দ্রভাই পতেলশু শরুক য়াখি।

থৌরম অদুদা প্রধান মন্ত্রীনা হায়খি অইং-অশাগী খল হোংলকপা থেংন্নবা পুন্না থবক তৌমিন্নবা অসি য়াম্না মরুওই। অইং-অশাগী খল হোংলকপা অসি থৌশিল খক্তগা মরী লৈনবা ৱাফম অমনি অমসুং অইং-অশাগী হোংলকপা অসি সরকারনা পাংথোকপা ঙম্বা থবক্কী ৱাংমদা লৈরে অমসুং লনাই মীওইশিং, ইমুংশিং অমসুং মীয়ামগী মতেং দরকার ওই।

প্রধান মন্ত্রীনা হায়খি মিসন লাইফনা অইং-অশাগী খল হোংলকপা অসি গনতন্ত্রিক ওইনা থেংনগনি অমসুং মখোয়না ঙমজবা মওংদা মীওই খুদিংমক্না মতেং পাংগনি। মিসন লাইফ অসি পি-৩ মোদেল হায়বদি প্রো প্লানেত পিপলদা য়ুম্ফম ওইবনি। মিসন অসি ‘লাইফস্তাইল ওফ দি প্লানেত, ফোর দি প্লানেত এন্দ বাই দি প্লানেত’গী মরুওইবা ৱাখল্লোন্দা য়ুম্ফম ওইরি।

মহাক্না হায়খি ‘রিদিউজ, রিয়ুজ অমসুং রিসাইকল’ অমসুং সর্কুলার ইকোনোমি অসি চহি লিশিং কয়াগী মমাঙদগী ভারতমচাশিংগী পুন্সি মহিংগী শরুক অমা ওইদুনা লাক্লি। মালেম অসি হেন্না নুঙাইবা মফম অমা ওইহন্নবা অনৌবা পাম্বৈশিং পুথোক্নবা ভারত অমসুং য়ুনাইতেদ নেসন্সনা পুন্না থবক তৌমিন্নরে। মালেমগী য়োগা নুমিৎ পাংথোক্নবা ভারতনা হৌদোরকপা ৱাফম য়ু.এন্না শৌগৎখি। ঙসিদি নুমিৎ অসিনা মালেমগী মীওই মিল্লিয়ন কয়াদা হকচাং ফবা পুন্সি অমা পুরক্নবা ইথিল পীরে। ২০২৩দা মালেমগী মিল্লেতশিংগী চহি পাংথোক্কনি অমসুং মসি মালেমগী ৱারি শান্নফম অমা ওইরগনি। লাইফ মিসন অসি মালেমগী কাচিন-কোয়া শীনবা থুংনা য়ৌরবা মতমদা মাইপাক্কনি। ঐখোয়না প্রকৃতি রক্ষাতি রক্ষিতা হায়বদি- মহৌশা ঙাকথোক্লিবা মীওইশিং, মখোয়বু মহৌশানা ঙাকথোকই হায়বা লাইৱা আসি নিংশিংগদবনি। মিসন লাইফ থবক ওইনা পাংথোকপনা ঐখোয়না হেন্না ফবা মালেম অমা ওইহনগনি হায়না ঐনা থাজবা থম্লি।

য়ু.এন সেক্রেতরি জেনরেল এন্তোনিও গুতেরাসনা হায়খি ঐখোয়গী গ্রহগী লুরবা তানফম অসিদা ঐখোয় অমনা অমবু মতেং পাংনবা দরকার ওইরে। লাইফ মিসন অসি তঙাইফদবশিং অমসুং অচুম্বশিং খঙহন্নবা পায়খৎপনি। ঐখোয়গী গ্রহ অমসুং ঐখোয়গী অপুনবা তুংলমচৎ ঙাক্তুনা থম্নবা পাম্বৈগী শরুক অমা ঐখোয়, লনাই অমসুং মীয়াম শরুক য়াগদবনি। অইং-অশাগী খল হোঙলকপা, শা-উচেক অমসুং পাম্বীশিং মাঙশিল্লকপা অমসুং পোল্লুসনগী মরুওইবা হৌরকফম অসি পোৎথোকশিং কা হেন্না শীজিন্নবা অসিনা থোকহনবনি। অকোয়গী ফিবম শোকহন্দবা থৌশিল কয়া ভারতনা পায়খৎপা অসিদা ঐ তশেংনা পুক্নিং থৌগৎলি অমসুং মসিগী ৱাখল্লোন অসি মাঙলোমদা পুখৎনবা ভারতকা লোয়ন্না থবক তৌমিন্ননবা ঐনা থাজবা থম্লি।

ফ্রান্সকী রাস্ত্রপতি ইম্মানুয়েল মেক্রোন, য়ু.কেগী প্রধান মন্ত্রী মেরি ত্রুস, গুয়ানাগী রাস্ত্রপতি ইরফান অলি, আর্জেন্তিনাগী রাস্ত্রপতি অলবর্তো ফর্নানদেজ, মৌরিসিয়সকী প্রধান মন্ত্রী প্রবিন্দ জুগনৌথ, মাদাগাস্কারগী রাস্ত্রপতি অন্দ্রি রাজোলিনা, নেপালগী প্রধান মন্ত্রী সের বহাদুর দিউবা, মালদিবসকী রাস্ত্রপতি ইব্রহিম মোহমদ সোলিহ, জোরজিয়াগী প্রধান মন্ত্রী ইরাক্লি গারিবাসভিলি অমসুং ইস্তোনিয়াগী প্রধান মন্ত্রী কাজা কাল্লাস অমসুং অতোপ্পশিংনা ইহৌ অসি শৌগৎখি।

মপান লৈবাকশিংদা লৈরিবা ভারতকী মিসনশিংগী লুচিংবা ১১৬, ভারত্তা লৈবা য়ু.এন এজেন্সিশিংগী লুচিংবশিং, কেন্দ্রগী মপান থৌরম মিনিস্তর, গুজরাতকী চীফ মিনিস্তর, সরকারগী সেনিয়র ওফিসিএলশিং অমসুং অতোপ্পশিং য়াওনা মীওই ৫০০ রোম থৌরম অদুদা শরুক য়াখি। মালেমগী ওইনা মিসন লাইফ হৌদোকপা থৌরম অসি নিতি অয়োগ অমসুং এম.ও.ই.এফ.সি.সি অমসুং গুজরাত সরকারনা পুন্না শীনবনি।

অহানবা চহি অসিদা নিতি অয়োগনা মিসন লাইফ অসি মপুংফাহন্নবা থবক পায়খৎকনি অমসুং মসিগী মতুং তারকপদা মিসন অসি এম.ও.ই.এফ.সি.সিনা থবক ওইনা পাংথোক্কনি। মিসন অসিগী মতম অসি চহি ৫নি।

লাইফকী মরমদা

ইং ২০২১গী নবেম্বর ১দা গ্লাসকোদা পাংথোকপা কোপ-২৬ মীফমদা প্রধান মন্ত্রীনা লাইফকী ৱাখল্লোন অসি হৌদোকখি। ইং ২০২২, জুন ৫, মালেমগী ইনভাইরোনমেন্ত নুমিৎতা, ভারতনা লাইফ গ্লোভেল মুভমেন্ত হৌদোকখি অমসুং অকোয়বগী ফিবম শোকলকপদগী থেংনরিবা অৱাবশিং কোকহন্নবা অকক্নবা অমসুং সাইন্তিফিক ওইবা পাম্বৈশিং পুথোক্নবা অখঙ-অহৈশিং, রিছর্স তৌবা মীওইশিং অমসুং স্তার্দ-অপশিং কৌদুনা ৱা তান্নখি। খোঙজং অসি মালেমগী লুচিংবশিংনা শৌগৎনরকখি।

মিসন লাইফকী পান্দমশিং অসি মিসনগী মওংদা, সাইন্তিফিক ওইনা অমসুং তরং-তরং উবা য়াবা থবকশিং ওইনা পাংথোক্কনি অমসুং অইং-অশাগী খল হোংলকপগী মতাংদা ভারতনা পীরিবা থাজবশিং থবক ওইনা উৎকনি। মিসন লাইফ অসিনা ২০২২দগী ২০২৭ ফাওবা অকোয়বগী ফিবম ঙাক-শেন্নবা অমসুং কন্নবা য়ামদ্রবদা ভারতমচা বিল্লিয়ন অমা অমসুং মালেমগী অতোপ্পা নাগরিকশিং শীজিন্নগনি। ২০২৮ ফাওবগী মনুংদা য়ামদ্রবদা খুঙ্গংশিংগী চাদা ৮০ অমসুং সহরগী লোকেল বোদিশিং অকোয়বগী ফিবমগা মরুপ-মপাং ওইনা লৈমিন্ননবা ভারতনা পান্দম থম্লি।

মফম অসিদা মপুংফাবা থৌরম য়েংবীয়ু : https://pmindiawebcast.nic.in

প্রধান মন্ত্রীগী মপুংফাবা ৱারোল পাবীয়ু: https://pib.gov.in/PressReleseDetailm.aspx?PRID=1869466

মিসন দোকুমেন্ত পাবীয়ু : https://www.niti.gov.in/sites/default/files/2022-10/Brochure-10-pages-op-2-print-file-20102022.pdf

******

(Release ID: 1869808) Visitor Counter : 128