فروری 2021 میں منعقدہ بھارتی سمندری خطہ (آئی او آر) وزرائے دفاع کے کنکلیو کی زبردست کامیابی کے بعد، وزیر دفاع  جناب راج ناتھ سنگھ نے 19 اکتوبر 2022 کو گاندھی نگر، گجرات میں 12ویں ڈیفنس ایکسپو کے موقع پر آئی او آر+ وزرائے دفاع کے کنکلیو کی میزبانی کی۔ کانفرنس میں 40 ممالک نے شرکت کی جبکہ 22 وزراء نے کانفرنس سے خطاب کیا، جن میں سے کچھ ہائبرڈ موڈ میں کانفرنس سے جڑے ہوئے  تھے۔ اس کا وسیع موضوع تھا ’بحر ہند میں چیلنجز مواقع اور تعاون‘۔ اس نے خطے میں سب کے لیے سلامتی اور ترقی کے وزیر اعظم جناب نریندر مودی کے ویژن (ایس اے جی اے آر) کے مطابق آئی او آر کے اندر اسٹریٹجک اور تجارتی شراکت داری کے ساتھ ایک مستحکم اور پرامن بحر ہند کو فروغ دینے کے لیے بات چیت میں سہولت فراہم کی۔

کلیدی خطبہ دیتے ہوئے، جناب راج ناتھ سنگھ نے کانفرنس کو ایک ادارہ جاتی اور تعاون پر مبنی ماحول میں بات چیت کو فروغ دینے کی ایک پہل قرار دیا جو آئی او آر میں امن، استحکام اور خوشحالی کو فروغ دے سکتا ہے۔ انہوں نے کہا کہ اس فورم کا نام آئی او آر+ رکھا گیا ہے کیونکہ اس کانکلیو کا تصور مشترکہ ذمہ داری اور خوشحالی ہے۔ ہم ایک کثیر مربوط پالیسی پر یقین رکھتے ہیں جس کا ادراک متعدد اسٹیک ہولڈرز کے ساتھ مصروفیات کے ذریعے ہوتا ہے، تاکہ سب کے خیالات اور خدشات پر تبادلہ خیال کیا جا سکے اور سب کے خوشحال مستقبل کے لیے ان کا ازالہ کیا جا سکے۔ انہوں نے کہا کہ ہندوستان تمام اسٹیک ہولڈرز کے ساتھ مل کر کام کرنے کے لیے تیار ہے تاکہ خطے میں سبھی کے فائدے کے لیے ضابطہ پر مبنی میری ٹائم آرڈر کو یقینی بنایا جا سکے۔

وزیر دفاع نے ساگر کے وزیر اعظم کے وژن کو نئی دہلی کی بحر ہند پالیسی کا موضوع قرار دیا۔ انہوں نے وزیر اعظم کا حوالہ دیتے ہوئے کہا کہ بحیرہ ہند کے علاقے کے لیے ہمارے وژن کی جڑیں ہمارے خطے میں تعاون کو آگے بڑھانے اور اپنے مشترکہ سمندری گھر میں سب کے فائدے کے لیے اپنی صلاحیتوں کو بروئے کار لانے میں ہے۔

جناب راج ناتھ سنگھ نے مارٹن لوتھر کنگ جونیئر کے اس بیان کا حوالہ دیا کہ ’’کہیں بھی ناانصافی ہر جگہ انصاف کے لیے خطرہ ہے‘‘، یہ کہتے ہوئے کہ یہ اعلیٰ رابطے اور باہمی انحصار کے اس دور میں سب سے زیادہ مطابقت رکھتا ہے۔ ’’جب کسی بھی خطے کے امن و سلامتی کو خطرہ لاحق ہوتا ہے تو پوری دنیا اس کے اثرات کے متعدد طریقوں کو محسوس کرتی ہے۔ حالیہ یوکرائنی تنازعہ نے ظاہر کیا کہ کس طرح اس کے لہروں کے اثرات انتہائی کمزور ممالک کے لیے توانائی اور خوراک کی حفاظت پر منفی اثرات مرتب کر سکتے ہیں۔ اسی طرح، ناکام ممالک نہ صرف اپنے خطے بلکہ پوری دنیا کے لیے ایک چیلنج بنتے ہیں، کیونکہ یہ ممالک دہشت گردی، بحری قزاقی اور اسمگلنگ کی نرسری کے طور پر کام کر سکتی ہیں۔انہوں نے کہا کہ ہم سمجھتے ہیں کہ اس طرح کے فورمز کے ذریعے اپنے پارٹنر ممالک کو شامل کرنا ہمیں ایک دوسرے کے تحفظات کی قدر کرنے کی اجازت دیتا ہے اور ایک عالمی نظم قائم کرنے میں مدد کرتا ہے جو ہم سب کے لیے فائدہ مند ہے،‘‘۔

وزیر دفاع نے آئی او آر میں سلامتی اور استحکام کے لیے موجودہ اور ابھرتے ہوئے خطرات سے نمٹنے کے لیے اجتماعی کوششوں پر زور دیا۔ انہوں نے کہا کہ وزیر اعظم جناب نریندر مودی نے پہلے ہی اپنے پانچ ’ایس‘ وژن میں عالمی خدشات سے نمٹنے کے لیے ہندوستان کے عزم اور وژن کا خاکہ پیش کیا ہے، جس میں سمن، سمواد، سہیوگ، شانتی اور سمردھی (احترام، بات چیت، تعاون، امن اور خوشحالی) شامل ہیں۔ جناب راج ناتھ سنگھ نے ذمہ دارانہ کردار ادا کرنے اور علاقائی اور عالمی سلامتی میں تعاون کرنے کے ہندوستان کے عزم کا اظہار کیا۔ انہوں نے کہا کہ ہم نے آئی او آر کے مختلف دوطرفہ اور کثیر جہتی فورمز پر تنظیمی اور آپریشنل پہلوؤں میں اپنی وابستگی کا مظاہرہ کیا ہے اور مستقبل قریب میں یہ خطہ عالمی معیشت کے ڈرائیونگ انجن کے طور پر اپنا صحیح مقام حاصل کرنے کو یقینی بنانے کے لیے اپنی مصروفیت کو آگے بڑھانے  کیلئے پرامید ہے۔

جناب راج ناتھ سنگھ نے آئی او آر میں مشترکہ چیلنجوں جیسے سمندری راستوں سے دہشت گردی کا پھیلاؤ، غیر قانونی، غیر رپورٹ شدہ اور غیر منظم (آئی یو یو) ماہی گیری، قزاقی اور علاقائی اور عالمی غذائی تحفظ کی فہرست دی ۔ انہوں نے زور دے کر کہا کہ سمندری راستوں سے دہشت گردی، برآمد، حمایت یا ہم آہنگی ایک بڑی تشویش بنی ہوئی ہے اور ہندوستان اس لعنت کے پھیلاؤ سے بچنا جاری رکھے ہوئے ہے۔ انہوں نے اس حقیقت کو سراہا کہ مغربی بحر ہند میں بحری قزاقی کو مربوط بین الاقوامی کوششوں سےکم کیا گیا ہے اور اس خطرے کو روکنے کے لیے مسلسل کوششیں جاری رکھنی چاہئیں۔

آئی یو یو ماہی گیری پر وزیر دفاع نے مختلف ذرائع یعنی سیٹلائٹ، ریڈار، جاسوس طیاروں یا انسانی انٹیلی جنس سے جمع کردہ نگرانی کے ڈیٹا کو مرتب کرنے، جمع کرنے اور شیئر کرنے کے لیے ایک کثیر القومی کوشش  کی اپیل کی ۔ انہوں نے کہا کہ اس سے خاطیوں کی بے ضابطگی یا دھمکی آمیز رویے کی نشاندہی کرنے میں مدد ملے گی، جس کا پھر سختی سے مقابلہ کرنا ہو گا۔

جناب راج ناتھ سنگھ نے اس بات کا اعادہ کیا کہ ہندوستان عالمی نظم و نسق کے کسی بھی درجہ بندی کے تصور اور بین الاقوامی تعلقات میں اخلاقی برتری کے دعووں کو واضح طور پر مسترد کرتا ہے۔ انہوں نے زور دے کر کہا کہ نئی دہلی باہمی احترام اور ہر ملک کے فائدے پر مبنی عالمی نظم پر یقین رکھتی ہے۔ ہم اسٹریٹجک مسابقت کے نفع ونقصان پر غورنہیں کرتے ہیں۔ بلکہ، ہم بین الاقوامی تعلقات کی جیت کی مثال پر یقین رکھتے ہیں۔ ہندوستان آئی او آر کے امن اور استحکام کے لیے اقوام کے درمیان تعاون اور قریبی تعامل کو فروغ دینے کے لیے ہمارے شراکت دار ممالک کی حکومت، کاروبار اور اکیڈمی کے نمائندوں کے ساتھ کام کرنے کیلئے پرامید ہے۔

وزیر دفاع نے سمندری وسائل کے پائیدار حصول کو 21ویں صدی میں آئی اوآر میں اقوام کی ترقی ایک اہم ذریعہ قرار دیا۔ انہوں نے علاقائی اور عالمی غذائی تحفظ کو یقینی بنانے کے لیے بحر ہند کے سمندری پھیلاؤ کو پرامن اور بہترین طریقے سے استعمال کرنے کو یقینی بنانے کے لیے باہمی تعاون پر زور دیا۔ انہوں نے کہا کہ ہم نے ضوابط پر مبنی احکامات کے لیے اپنے احترام کا مظاہرہ کیا ہے اور بحر ہند کو امن اور استحکام کے خطہ کے طور پر فروغ دینے کی ضرورت پر زور دیا ہے۔ ہم اس بات کا اعادہ کرنا چاہیں گے کہ تسلط کے بجائے باہمی انحصار ہی اس اہم تجارتی اور توانائی کے آبی گزرگاہ کو مستحکم رکھنے کا واحد راستہ ہے۔ دنیا کی نصف کنٹینر شپمنٹ کے ساتھ، اس کے بلک کارگو ٹریفک کا ایک تہائی اور تیل کی دو تہائی کھیپ اس کے ذریعے لے جایا جاتا ہے، آئی او آر واضح طور پر ہمارے بین الاقوامی معاملات میں بہت اہم مقام رکھتا ہے۔

جناب راج ناتھ سنگھ نے بحری جہاز، سمندری ہوائی جہاز، ساحلی راڈار اور دیگر نگرانی کے نظام، تربیت، ہندوستانی شپ یارڈز تک رسائی اور اسی طرح کی صلاحیتوں کی مقامی ترقی کے لیے تربیت یافتہ افرادی قوت کی دستیابی کے ذریعے شراکت دار ممالک کی صلاحیتوں کو بڑھانے کے لیے حکومت کے عزم کا اعادہ کیا۔ انہوں نے کہا کہ ہندوستان میں ایرو اسپیس اور دفاعی شعبے نے ایک طویل سفر طے کیا ہے، جس میں نجی اور سرکاری شعبے کی صنعتیں جدید ترین ٹیکنالوجیز تیار کرنے میں سب سے آگے ہیں۔

وزیر دفاع نے کہا کہ ہندوستان دوست ممالک کو مختلف قسم کے میزائل سسٹم، ہلکے جنگی ہوائی جہاز/ہیلی کاپٹر، کثیر مقصدی لائٹ ٹرانسپورٹ ہوائی جہاز، جنگی جہاز اور گشتی جہاز، آرٹلری گن سسٹم، ٹینک، ریڈار، فوجی گاڑیاں، الیکٹرانک وارفیئر سسٹم اور دیگر ہتھیاروں کے نظام فراہم کرنے کے لیے تیار ہے۔

جناب راج ناتھ سنگھ نے آئی او آر ممالک پر زور دیا کہ وہ سب کے باہمی فائدے کے لیے ہندوستان میں حکومت کے ذریعہ بنائے گئے  تحقیق وترقی کے ماحولیاتی نظام کا فائدہ اٹھائیں۔ انہوں نے کہاکہ  صحیح پالیسیوں اور فریم ورک کے ساتھ ہندوستان ایک عالمی  تحقیق وترقی کا مرکز بننے کے لیے تیار ہے۔ ہمارا اسٹارٹ اپ ماحولیاتی نظام، خاص طور پر دفاعی شعبے میں، دنیا کے سب سے بڑے اداروں میں سے ایک ہے اور ایک خود انحصار ہندوستان کی تشکیل میں اہم کردار ادا کر رہا ہے۔ دفاع اور ایرو اسپیس انڈسٹری میں جدت اور ٹیکنالوجی کی ترقی کو فروغ دینے کے لیے اب پالیسیاں اور فریم ورک موجود ہیں۔ ہمارے پاس اپنے شراکت دار ممالک سے سیکھنے کے لیے بہت کچھ ہے، اور ان کے ساتھ اشتراک کرنے کے لیے بہت کچھ ہے۔

موسمیاتی تبدیلی پر جناب راج ناتھ سنگھ نے کہا کہ اس کا سمندری ماحول پر بہت بڑا اثر پڑتا ہے اور اس کے اثرات قومی اور علاقائی امنگوں کو آگے بڑھانے کے لیے چیلنجز پیدا کر سکتے ہیں۔ انہوں نے زور دے کر کہا کہ ہندوستان پچھلے کچھ سالوں سے خطے میں انسانی امداد اور قدرتی آفات سے متعلق امداد (ایچ اے ڈی آر) کی ضرورتوں کی ایک بڑی تعداد میں پہلا جواب دہندہ رہا ہے۔اس موقع پر انہوں نے کووڈ۔19 کے دوران ساگر مشن اور آپریشن سمندر سیتو کا خصوصی ذکر کیا۔ تاہم، انہوں نے ناخوشگوار واقعات کا بہتر جواب دینے کے لیے آئی او آر ممالک کے درمیان وسیع اور گہرے ڈیزاسٹر مینجمنٹ تعاون پر زور دیا۔ انہوں نے کہا کہ ہم خطے میں بحریہ کے ساتھ مشغول رہے ہیں اور ایسا کرتے رہیں گے۔ ہم مستقبل میں چیلنجوں کا مقابلہ کرنے کے لیے ’سیلنگ ٹوگیدر‘ سے ’آپریٹنگ ٹوگیدر‘کی طرف آگے بڑھنا چاہتے ہیں۔

اپنے استقبالیہ خطاب میں دفاع کے سکریٹری ڈاکٹر اجے کمار نے بحر ہند کے ایک تہذیبی ربط کے طور پر پوری دنیا میں اہم کردار پر روشنی ڈالی۔ انہوں نے کہاکہ  ہندوستان کے بڑھتے ہوئے عالمی انضمام کا مطلب ہے کہ بحر ہند اولین پالیسی ترجیحات میں سے ایک ہے۔ انہوں نے بحری سلامتی تعاون کو آئی او آر میں ہندوستان کے متنوع تعاون کے پورٹ فولیو کا ایک اہم جزو قرار دیا اور مختلف اقدامات کا ذکر کیا۔

دوسرے آئی او آر+ کانکلیو میں دفاعی صنعت کے تعاون، بحالی کے لیے ہندوستانی شپ یارڈز کی دستیابی، بحری سفر ، جہاز کے ڈیزائن اور جہاز سازی، ہندوستانی بندرگاہوں تک رسائی، بحری معلومات کا اشتراک، سمندری نگرانی اور تعاون، ایچ اے ڈی آر، سمندری آلودگی سے نمٹنے، سمندری اور سمندری ہوا بازی کے وسائل وغیرہ کو استعمال کرنے کے لیے ٹیکنالوجیز اور صلاحیتوں کی ترقی سے متعلق پہلوؤں کو شامل کیا گیا۔

اس کانفرنس کا اہتمام دفاعی پیداوارکا محکمہ اور وزارت دفاع نے کیا تھا۔ اس اقدام کو تمام شریک ممالک کی طرف سے خوب پذیرائی ملی اور اسے بہت سراہا گیا۔

*****

ش ح۔ ع ح

Uno-11633

(Release ID: 1869537) Visitor Counter : 123