ঙাকশেল মন্ত্রালয়
azadi ka amrit mahotsav

প্রধান মন্ত্রী শ্রী নরেন্দ্র মোদীনা গুজরাত, গান্ধীনগরদা দেফেক্সপো ২০২২ হৌদোকখ্রে


হিন্দুস্তান এরোনোতিক্স লিমিতেদনা শাবা ঐচ.তি.তি.-৪০ ইন্দিজিনিয়স ত্রেনর এয়র্ক্রাফ মাইখুম হাংদোকখ্রে; মিসন দেফস্পেস হৌদোকখি অমসুং দীসা এয়র্ফিল্দগী উরেপ উয়ুংসু তমখি

দেফএক্সপো অসি মালেম্না ভারত্তা থাজবা থম্লকপগী খুদম অমনি: পি.এম.

“দিফেন্স সেক্তরদা অপাম্বা লৈবা, অনৌবা থৌওং পাংথোকপা অমসুং থবক ওইনা পায়খৎপগী মন্ত্রগা লোয়ননা “অনৌবা ভারত”না তুংলমচত্তা চঙশিল্লি”

ঐখোয়না লাক্কদৌরিবা মতমশিংদা লুপা করোর ৪০,০০০গী দিফেন্স এক্সপোর্ত তৌনবা পান্দম থম্লে: পি.এম.

ঙাক-শেল মন্ত্রী, শ্রী রাজনাথ সিংহনা ‘পাথ তু প্রাইদ’পু মপাঙ্গল লৈবা অমসুং মরমদোম লেপচবা ঙম্বা ‘অনৌবা ভারত’কী অনৌবা পান্দম্নি হায়খি

“দেফেক্সপোদা মীওই মশিং য়াম্বনা শরুক য়ারকপনা ভারতকী কারবার মতিক হেনগৎলক্লিবা অসিদা লৈবাক অমসুং মালেমগী ব্যুজিনেস কম্ম্যুনিতীনা নৌহৌহননা থাজবা অমুক থম্লক্লিবা অসিগী মতৌ তাক্লি

নেস্নেল সেক্যুরিতীনা ঐখোয়গী খ্বাইদগী অহানবা মিৎয়েং মতম পুম্বদা ওইদুনা লাক্লি; ঐখোয়না ফোর্সশিংগী অন্দর ৱাতর দোমেন এৱিয়র্নেস অমসুং এরো-স্পেসকী খুত্থাংদা ঐখোয়গী তৌবা ঙম্বগী মতিক হেনগৎহল্লি: আর.এম.

Posted On: 19 OCT 2022 12:34PM by PIB Imphal

প্রধান মন্ত্রী শ্রী নরেন্দ্র মোদীনা  ওক্তোবর ১৯, ২০২২দা গুজরাত, গান্ধীনগরগী মহাত্মা মন্দির কনভেন্সন অমসুং একজিবিসন সেন্তরদা পাংথোকপা দেফএক্সপো ২০২২ হৌদোকখ্রে। প্রধান মন্ত্রীনা হিন্দুস্তান এরোনোতিক্স লিমিতেদনা শাবা ঐচ.তি.তি.-৪০ ইন্দিজিনিয়স ত্রেনর এয়র্ক্রাফ ইন্দিয়া পাভিলিয়ন্দা মাইখুম হাংদোকখি। এয়র্ক্রাফ অসিদা স্তেত ওফ দি আর্ত কন্তেম্পোরীরী সীস্তেম য়াওই অমসুং পাইলোত ফ্রেনলী ফিচর য়াওদুনা শাবনি। প্রধান মন্ত্রীনা স্তার্তঅপ অমসুং ইন্দস্ত্রীগী খুত্থাংদা আর্ম্দ ফোর্সকীদমক্তা স্পেস দোমেন্দা ইন্নোভেতিব ওইবা ৱারোইশিন কয়া পীগদবা মিসন দেফস্পেস হৌদোকখি। মহাক্না দীসা এয়র্ফিল্দগী উরেপ উয়ুংসু তমখি।

প্রধান মন্ত্রীনা তিল্লিবা মীয়ামদা ৱা ঙাঙবদা মতিক লৈবা অমসুং ‘আত্মানির্ভর ভারত’কী থৌরম অসিদা প্রধান মন্ত্রী অমসুং গুজরাতকী মচানুপা অমা ওইনা দেলিগেতশিংবু তরাম্না ওকখি। দেফএক্সপো শীন লাঙলিবা অসিগী মতাংদা ৱাফম থম্লদুনা, প্রধান মন্ত্রীনা মসিনা অমৃত কালগী মতমদা শেমখিবা অনৌবা ভারত অমগী শক্তম অমসুং মতিক মগুনশিং তাক্লি হায়খি। থৌরমসিদি লৈবাক্কী চাউখৎপা অমসুং রাজ্যশিংনা তেংবাংবগী অপুনবা শক্তম অমনি হায়না মহাক্না হায়খি। “মসিদি নহাশিংগী মপাঙ্গল অমসুং মঙলান কয়া য়াওরি, অসিদা নহাশিংগী ৱারেপ অমসুং তৌবা ঙম্বগী মতিকশিং য়াওরি। মসিদা মালেমগী থাজবা অমসুং য়ুম্লোন্নবা লৈবাক্কী খুদোংচাবা কয়া য়াওরি”, হায়না প্রধান মন্ত্রীনা ফোংদোকখি।

হন্দক্কী দেফএক্সপো অসিগী তোঙানবা মতৌ চেনবসিদা মিৎয়েং চঙলদুনা, প্রধান মন্ত্রীনা হায়খি, “মসিনা ভারতকী কম্পেনীশিংনা শরুক য়াবা অমসুং ভারত্তা শাবা পোৎলমখক্তমক উৎপা খ্বাইদগী অহানবা দিফেন্স এক্সপোনি”। মহাক্না মখা তানা হায়খি, “আইরন মেন, সর্দার পতেলগী লমদমদগী ঐখোয়না ভারতকী তৌবা ঙম্বগী মতিক কয়া মালেমগী মাঙদা উৎলি। এক্সপো অসিদা ভারতকী দিফেন্স ইন্দস্ত্রী, মখোয়, এম.এস.এম.ই. অমসুং স্তার্তঅপ ১০০ হেনবগা পুন্না পায়খৎমিন্নবা জোইন্ত ভেঞ্চর খরা য়াওনা একজিবিতর ১৩০০ হেনবনা শরুক য়ারি”। মসিনা ভারতকী তৌবা ঙম্বগী চাউরাকপা শক্তম অমা ফ্রেম অমখক্তদা উৎলি হায়না প্রধান মন্ত্রীনা হায়খি। এম.ও.য়ু. ৪০০ হেনববুসু খ্বাইদগী ইহান হানবা ওইনা খুৎয়েক পীনরি হায়না মহাক্না মখা তাখি।

তোঙানবা লৈবাক কয়ানা অফবা ৱারোল থম্লকপবু শকখঙলদুনা, প্রধান মন্ত্রীনা ভারতনা মশাগী মঙলান মঙফাওনবা ঙম্বা অমসুং অফ্রিকাগী অফবা মরী লৈনবা লৈবাক ৫৩না ঐখোয়গা পুন্না চৎমিন্নবসিদা নুংঙাইবা ফোংদোকখি। “ভারত অমসুং অফ্রিকাগী মরীসিদি মতম্না খুদম ওইরবা অচুম্বা ৱাফমফা য়ুম্ফম ওইবনি অমসুং মসিনা মরী হেন্না চেৎশিন্নদুনা মতমগী মতুং ইন্না অনৌবা মাইকৈ কয়াদা চঙশিল্লি”, প্রধান মন্ত্রীনা মখা তাখি। অফ্রিকা অমসুং গুজরাতকী মতাংদা লৈরিবা অরিবা মরীগী মতাংদা পল্লদুনা, অফ্রিকাগী অহানবা রেলৱে লাইন শাবদা কৎচকী মীওই কয়াসু শরুক য়াখি হায়না ফোংদোকখি। অফ্রিকাগী নোংমগী পুন্সিদা শিজিন্নবা ৱাহৈ কয়া অফ্রিকাদা লৈবা খুজরাত খুন্নাইদগী হৌখিবনি। “মহাত্মা গান্ধীগুম্বা মালেমগী লুচিংবগী পোক্নফম লমদম্না গুজরাত ওইবা মতমদা, অফ্রিকানা মহাক্কী অহানবা ‘কর্মভুমী’ ওইরিবনি। অফ্রিকাগা মতৌ অসুম্না মরী লৈনরিবসি ঐখোয়গী ভারতকী ফোরেন পোলিসীনা মরু ওইনা লৌরি। কোরোনা মতমদা মালেম্না ভেক্সিনগী মতাংদা ৱানবা মতমদা, ঐখোয়গী অফবা মরী লৈনবা অফ্রিকাগী লৈবাকশিংদা ভারতনা অহেনবা মিৎয়েং চঙদুনা ভেক্সিন পীখিবনি”, প্রধান মন্ত্রীনা হায়খি।

প্রধান মন্ত্রীগী সেক্যুরিতী অমসুং গ্রোথ ফোর ওল রিজন (সাগর)গী পান্দমগা মরী লৈননা শান্তি লৈহন্নবা, চাউখৎপা পুরক্নবা, তংদু লৈতাবা অমসুং নুংঙাই য়াইফনা লৈবগীদমক্তা আই.ও.আর.+ লৈবাকশিংগী মরক্তা দিফেন্স খুমাং চাউশিলহন্নবা দাইলোগ অমগী ফম্বাক শেম্লিবা ২শুবা ইন্দিয়ন ওসীন রিজন প্লস (আই.ও.আর.+) কনক্লেবসু এক্সপো অসিদা পাংথোক্কনি। প্রধান মন্ত্রীনা হায়খি, “ঙসি, ইন্তর্নেস্নেল সেক্যুরিতীদগীনা গ্লোবেল ত্রেদ ফাওবদা, মেরিতাইম্না গ্লোবেল প্রাইওরিতী অমা ওইরক্লি। মর্চেন্ত নেভীগী থৌদাংসু গ্লোবেলাইজেসনগী য়ুগ অসিদা পাকথোক চাউথোরক্লি”। “মালেম্না ভারত্তা থম্লিবা থাজবা হেনগৎলে অমসুং ঐহাক্না থাজবা পুম্নমক ঙাক্কনি। মরম অসিনা, মসিগী দিফেন্স এক্সপো অসিনা মালেম্না ভারত্তা থম্লিবা থাজবগী খুদম অমসু ওইরি”, মহানা মখা তাখি।

 

 

প্রধান মন্ত্রীনা চাউখৎ থৌরাং অমসুং ইন্দস্ত্রিএলগী তৌবা ঙম্বশিংগা মরী লৈননা গুজরাতকী লৈরিবা আইদেন্তিতী অসি শকখঙখি। মহাক্না হায়, “দিফেন্স এক্সপোনা আইদেন্তিতী অসিবু অনৌবা পনখৈ অমা পীরি”। মহাক্না মখা তাদুনা হায়খি মদুদি গুজরাতনা তুংদা লাক্কদবা মতমশিংদা দিফেন্স ইন্দস্ত্রীগী মরু ওইবা সেন্তর অমা ওইরক্লগনি।

গুজরাত্তা দীসা এয়রফিল্দগী উরেপ-উয়ুং তমখিবা প্রধান মন্ত্রীনা হায়খি মদুদি ফোরৱার্দ এয়রফোর্স বেজ অসিনা লৈবাক অসিগী সেক্যুরিতী আর্কিতেকচর হাপকৎলগনি। ঙমখৈগী দীসাগী নকশিন্নবা অসিগী মতাংদা প্রধান মন্ত্রীনা হায়খি মদুদি হৌজিক ভারতনা নোংচুপ থংবা ঙমখৈশিংদা লাকপা খুদোংথিবা অমা হেক্তা মায়োক্নবা ঙম্বগী নীংথিনা শেম-শাদুনা লৈরি। শ্রী মোদীনা মখা তারদুনা হায়, “সরকার পাইরবা মতুংদা ঐখোয়না দীদা ওপরেস্নেল বেজ অমা লিংখৎনবা ৱারেপ লৌখি অমসুং ঙসি ঐখোয়গী ফোর্সশিংগী অপাম্বা অদু থুংহনবা ঙম্লে। লমদম অসিনা লৈবাক অসিগী সেক্যুরিতীগী কান্নরবা সেন্তর অমা হৌজিক ওইরগনি”।

“স্পেস তেক্নোলোজী অসি তুংলমচৎতা মপাঙ্গল কনবা লৈবাক অমা হেক্তগীদমক সেক্যুরিতী হায়বা অসি করিনো হায়বগী খুদম অমা ওইরগনি। সর্ভিস অহুম অসিনা লম অসিদা মায়োক্নবা তোঙান-তোঙানবা শীংনবশিং য়েংশিনখি অমসুং মশক খঙদোকখি। মখোয়বু কোকহন্নবা ঐখোয়না খোঙজেল য়াংনা হোৎনবা তাই”। “মিসন দিফেসন্স স্পেসনা ঐখোয়গী ফোর্সশিংগী ইনোভেসন থৌগৎপা অমসুং মপাঙ্গল কনখৎহনবা খ্তা নত্তনা মসিনা অনৌবা অমসুং ইনোভেতিব সোল্যুসনশিংসু পীরগনি”। প্রধান মন্ত্রীনা হায়খি মদুদি স্পেস তেক্নোলোজীনা ভারতকী অফবা স্পেস দিপ্লোমেসীগী অনৌবা ৱাহন্থোক অমা পীরি অমসুং মসিনা অনৌবা ওইথোকপা য়াবশিং পুথোক্লি। মহাক্না মখা তারদুনা হায়, “এফ্রিকাগী লৈবাক কয়া অমসুং অতোপ্পা অপীকপা লৈবাক কয়ানা মসিদগী কান্নবা ফংলি”। প্রধান মন্ত্রীনা হায়খি মদুদি চাউখৎলক্লিবা লৈবাক ৬০ হেনবগা ভারতনা মাগী স্পেস সাইন্স শিয়র তৌরি। মহাক্না মখা তারদুনা হায়, “সাউথ এদিয়া সেতলাইৎ অসি মসিগী অফবা খুদম অমনি। মথংগী চহিদা এসিয়ন লৈবাক তরানা ভারতকী সেতলাইৎ দেতাগী রিএল-তাইম এক্সেসসু ফংলগনি। য়ুরোপ অমসুং অমেরিকাগুম্বা চাউখৎলবা লৈবাকশিংনা ফাওবা ঐখোয়গী সেতলাইৎ দেতা শীজিন্নরি”।

প্রধান মন্ত্রীনা হায়খি দিফেন্স সেক্তরদা অনৌবা ভারতনা ইন্তেন্ত, ইনোভেসন অমসুং ইমপ্লিমেন্তেসনগী মন্ত্রফা লোয়ননা মাংদা চংশিল্লি। চহি ৮গী মমাং ফাওবদা ভারত অসি মালেমগী খ্বাইদগী চাউবা দিফেন্স ইম্পোর্তর ওইনা শকখঙখি। অদুবু অনৌবা ভারত অসিনা তৌবা ঙম্বা উৎখি, অখাং কনবা উৎখি অমসুং ‘মেক ইন ইন্দিয়া’না ঙসিগী দিফেন্স সেক্তরদা মাইপাকপগী ৱারী অমা ওইরি। মহাক্না মখা তারদুনা হায়, “ঐখোয়গী দিফেন্স এক্সপোর্তশিং অসি হৌখিবা চহি ৫দা শরুক ৮ হেনগৎখি। ঐখোয়না মালেমগী লৈবাক ৭৫ হেনবদা দিফেন্সকী মেতরিএল অমসুং ইক্বিপমেন্ত এক্সপোর্ত তৌরি। ২০২১-২২দা ভারতকী দিফেন্স এক্সপোর্তশিং অসি দোলর বিলিয়ন ১.৫৯ য়ৌখি হায়বদি লুপা করোর লিশিং ১৩ য়ৌখি। অমসুং তুংদা লাক্কদবা মতমশিংদা ঐখোয়না দোলর বিলিয়ন ৫ য়ৌনবা পান্দম থমখি হায়বদি লুপা করোর লিশিং ৪০”।

ঙসিদি মালেম অসিনা ভারতকী তেক্নোলোজীগী মতেং লৌরি মরমদি ভারতকী আর্মীশিংনা মখোয়গী তৌবা ঙম্বা অদু উৎখ্রে। ইন্দিয়ন নেভীনা আই.এন.এস.-বিক্রান্তগুম্বা স্তেত-ওফ-দি-আর্ত এয়রক্রাফ কেরিয়রশিং ইন্দক্ত তৌখ্রে। মসিগী ইঞ্জিনিয়রিং জাইন্ত অমসুং কোলোজেল মাস্তরপিস অসি ইন্দিজিনিয়স তেক্নোলোজীগা লোয়ননা কোচি সিপয়ার্দ লিমিতেদনা শাবনি। ইন্দিয়ন এয়র ফোর্সনা ‘মেক ইন ইন্দিয়া’ ইনইসিএতিবকী মখাদা শাখিবা প্রচান্দ লাইত কোম্বেত হেলিকোপ্তরশিং ইন্দক্ত তৌখিবা অসি ভারতকী দিফেন্সকী তৌবা ঙম্বা অদু ময়েক শেংনা উৎলিবা খুদম অমনি হায়না মহাক্না ফোঙদোকখি।

ভারতকী দিফেন্স সেক্তর অসিদা মীপান তাংদবগী মতাংদা পল্লদুনা প্রধান মন্ত্রীনা হায় লৈবাক অসিখক্তদগী লৈগদবা খুৎশু-খুলাইশিংগী লিস্ত অনিসু আর্মীনা ফাইনেলাইজ তৌরে। অদুগুম্বা আইতেম ১০১গী লিস্ত অদু ঙসি থাদোকখ্রে। মসিগী ৱারেপশিং অসিনা মীপান তাংদবা ভারতকী তৌবা ঙম্বা অদু উৎখ্রে। লিস্ত অসিগী মতুংদা, “মেক ইন ইন্দিয়া’গী মখাদা লৈগদবা অসিগুম্বা খুৎশু খুলাই অমসুং দিফেন্স সেক্তরগী খুৎশু খুলাই ৪১১ লৈরি। অসুগুম্বা অচৌবা বজেদ অসিনা ভারতকী কম্পনীশিংগী য়ুম্ফম থোনবদা মতেং পাংলগনি অমসুং মখোয়বু অনৌবা পনখৈ অমা য়ৌহনবা ঙম্লগনি হায়না প্রধান মন্ত্রীনা ফোঙদোকখি। মসিদগী খ্বাইদগী হেন্না কান্নবা ফংগদৌরিবা অসি লৈবাক অসিগী নহারোলশিংনা হায়না মহাক্না মখা তখি।

দিফেন্স সপ্লাইগী লমদা কম্পনী খরনা শেমগৎলম্বা মোনোপোলী অসি মহুৎ শিন্নবা থাজবা য়াবা ওপ্সনশিং মরাং কায়না লৈরে হায়না প্রধান মন্ত্রীনা ফোঙদোকখি। “ভারতকী নহারোলশিংনা দিফেন্স ইন্দস্ত্রীদা লৈরিবা মসিগী মোনোপোলী অসি থুগাইনবা শক্তি অদু উৎখ্রে অমসুং ঐখোয়গী নহারোলশিংনা উৎলিবা মসিগী থৌনা অসি মালেমগী য়াইফনবনি” হায়না শ্রী মোদীনা ফোঙদোকখি। রিসোর্সশিং লৈতবনা মরম ওইদুনা মখোয়গী সিক্যুরিতীদা শোত্থদুনা লৈরিবা মালেমগী অপীকপা লৈবাকশিংনা মসিগী চাউনা কান্নবশিং ফংগনি হায়না মহাক্না মখা তাখি।

“ভারতনা দিফেন্স সেক্তর অসি খুদোংচাবশিংগা লোয়ননা পোজিতিব ওইবা ওইথোকপা য়াবশিংগী লোইবা নাইদনা লৈ” হায়না প্রধান মন্ত্রীনা ফোঙদোকখি। দিফেন্স সেক্তরদা লৈরিবা ইনবেস্তমেন্তগী খুদোংচাবশিংগী মতাংদা ফোঙদোক্লদুনা প্রধান মন্ত্রীনা হায়, ভারতনা য়ু.পি. অমসুং তমিল নাদুদা দিফেন্স কোরিদোর অনি শারি অমসুং মালেমগী অচৌবা কম্পনী কয়ামরুম্না ভারত্তা ইনবেস্ত তৌনবা লাক্লি। মহাক্না সেক্তর অসি এম.এস.এম.ই.শিংগী মরাইবক্কী মতাংদসু ফোঙদোকখি অমসুং মসিগী ইনবেস্তমেন্ত অসিগী মরুমদা সপ্লাই চেনশিংগী অচৌবা নেতৱর্ক অমা শেমদুনা মসিগী অচৌবা কম্পনীশিং অসি ঐখোয়গী এম.এস.এম.ই.শিংনা মতেং পাংগনি হায়না ফোঙদোকখি। “মসিগী সেক্তর অসি য়াম্না চাউনা ইনবেস্তমেন্তশিং তৌবা অসিনা মমাংদা অমুক ফাওবা ৱাখল তৌরুদবা অদুগুম্বা মফমশিংদা নহাশিংগী থবক্কী অচৌবা খুদোংচাবশিং ফংলগনি” হায়না প্রধান মন্ত্রীনা মখা তাখি।

প্রধান মন্ত্রীনা দিফেন্স এক্সপোদা লৈরিবা কম্পনী খুদিংমক্কী পুক্নীং চিংশিনখি অমসুং ভারতকী তুংলমচৎনা মরুওইনা লৌদুনা মসিগী খুদোংচাবশিং অসি মায়োন চুম্নবা পাউজেল পীখি। “অদোম্না ইনোবেত তৌবীয়ু, মালেমদা খ্বাইদগী ফবা ওইনবা ৱাশক লৌবীয়ু, অমসুং শক্তি লৈবা চাউখৎলবা ভারত অমগী মংলান্দা লমজিংদুনা চৎপীয়ু। মতম চুপ্পদা নখোয়গী মতেং পাংনবা ঐহাক্না ঙাইদুনা লৈগনি” হায়না ফোঙদোক্লদুনা মহাক্কী ৱারোল অদু তেনশিনখি।

ঙাক-শেল মন্ত্রী, শ্রী রাজনাথ সিংহনা মহাক্কী ৱারোলদা ‘পাথ তু প্রাইদ’পু মপাঙ্গল লৈবা অমসুং মরমদোম লেপচবা ঙম্বা ‘অনৌবা ভারত’কী অনৌবা পান্দম্নি অমসুং দেফএক্সপো ২০২২গী থীম ওইবখক নত্তে হায়খি। অমৃত কাল হৌদ্রিঙৈদা দেফএক্সপো ২০২২ হৌবসিনা সরকারনা লৈবাকপু শিংনবা খুদিংদগী ঙাকথোক্নবা অমসুং মথংগী চহি ২৫গী মনুংদা ভারতপু মালেমগী দিফেন্স মেন্যুফেকচরিং হব ওইহন্নবা খোঙফম চেৎপগী মতৌ উৎলি হায়খি। “দেফএক্সপো অসিদি মিৎয়েং শানবা অমসুং মরোমদোম লেপচবা ঙম্বা ভারতকী খুদম্নি। মসিনা ভারতকী ৱারেপ, পাঙ্গল অমসুং চাউথোকচবগী খুদম্নি”, হায়না মহাক্না হায়খি।

প্রধান মন্ত্রী, শ্রী নরেন্দ্র মোদীগী মতিক লৈবা লুচিং মখাদা দিফেন্স সেক্তরনা থৱাই য়াওবগা লোয়ননা লৈবাকপু চাউথোকচহন্নবা লম্বীদা খোঙদারি হায়না ঙাক-শেল মন্ত্রীনা হায়খি। লৈবাক ৮০ হেনবগী দিফেন্স মন্ত্রী, সর্ভিস চীফ অমসুং ওফিসিএলশিংগী মথক্তা ভারতকী একজিবিতর ১৩০০ হেনবনা মখোয়গী খ্বাইদগী নৌবা তেক্নোলোজী পুথোক্তুনা দেফএক্সপো ২০২২দা শরুক য়ারকপা অসিনা লৈবাক অমসুং মালেমগী ব্যুজিনেস কম্ম্যুনিতীনা নৌহৌহননা থাজবা অমুক থম্লক্লিবা অসিগী মতৌ তাক্লি হায়না মহাক্না ফোংদোকখি। দেফএক্সপো মনুংদা অমসুং মমাংদা পাংথোকপা বাইলেতরেল মীফম কয়াদা লৈবাক কয়ানা ভারত্তা শাবা দিফেন্সকী ইক্বিপমেন্ত/ তেক্নোলোজী/ত্রেনিং সীস্তেমদা অপাম্বা ফোংদোক্নখ্রবনি অমসুং ফিভম অসিনা সেক্তর অসিনা শাহৌ লৌরি হায়বা তাক্লি হায়না মহাক্না মখা তাখি।

ভারতকী দিফেন্স ইন্দস্ত্রীদা অহোংবা লাক্লিবসিদা মিৎয়েং চঙলদুনা, শ্রী রাজনাথ সিংহনা ঙসিদি, অচৌবা ইন্দস্ত্রীএল হাউস কয়ানা দিফেন্স প্রোজেক্তকীদমক্তা চাংয়েংনরি অমসুং শেল য়াম্না থাদগে হায়না শেম শানরি হায়খি। ইন্তরপ্রাইসশিং অসিনা দিফেন্স সেক্তরদা শরুক য়াবগী চাং হেনগৎহন্নবগীদমক্তা অখন্নবা ইন্সেন্তিব কয়া পীরি পল্লদুনা মহাক্না সরকারনা এম.এস.এম.ই.দা অহেনবা মিৎয়েং চঙলি হায়নসু পাউদমখি।

রিসর্চ অমসুং দিভেলপমেন্তকী হীরম অসিনা অতোপ্পা মরু ওইবা লম অমনি হায়রদুনা, ঙাক-শেল মন্ত্রীনা সরকারনা ফ্রন্তিয়র তেক্নোলোজীগী আর. অমসুং দি. ফন্দিংদা মিৎয়েং চঙলি অমসুং দিফেন্স প্রদক্সনদা লুচিংবা ঙম্নবা পব্লিক-প্রাইভেত পার্ত্নরশিপ কয়াসু পুক্নিং থৌগৎলি হায়খি। তেক্নোলোজিকেল দিভেলপমেন্ত ফন্দ ফোর দিফেন্স এক্সেলেন্স (আই.দি.ই.এক্স.) খোঙথাং অসি মাইকৈ অসিদা থাংজিনবা খোঙথাংনি মহাক্না হায়খি।

শ্রী রাজনাথ সিংহনা নেস্নেল সেক্যুরিতীদা সরকারনা মতম পুম্বদা অহেনবা মিৎয়েং চঙদুনা লাক্লি অমসুং “কংফাল, ঈশিং অমসুং অতিয়ানা ঐখোয়গী মিলিতরীগী থৌনা উখ্রবনি, অদুবু, ঐখোয়গী দিফেন্স কেপেবিলিতীবু অন্দর ৱাতর দোমেন এৱিয়র্নেসকী  মওংদা সমুদ্রদা অমসুং এরো স্পেস ফোর্সকী মওংদা স্পেসতা পাকথোক চাউথোক্লি” হায়খি। প্রধান মন্ত্রীনা হৌদোকখিবা মিসন দেফ-স্পেস অসি মাইকৈ অসিদা পায়খৎপা মশক থোকপা খোঙথাং অমনি হায়না মহাক্না হায়খি। স্পেস দোমেন্দা দিফেন্সকী তঙাই ফদবা লৈবগী মখা পোন্না মিসন অসিগী মখাদা, ইন্নোভেতিব ওইবা ৱারোইশিন পুরক্নবগীদমক্তা শিংনবা ৭৫ মশক খঙদোক্লে।

তিনখিবা মীওইশিংগী মরক্তা গুজরাতকী মুখ্য মন্ত্রী, শ্রী ভুপেন্দ্র পতেল, গুজরাতকী রাজ্যপাল, শ্রী আচার্য় দেবব্রত, কেন্দ্রগী ঙাকশেল মন্ত্রী, শ্রী রাজনাথ সিংহ, চীফ ওফ দিফেন্স স্তাফ, জেনরেল অনিল চৌহান, চীফ ওফ আর্মী স্তাফ, জেনরেল মনোজ পান্দে, চীফ ওফ এয়র স্তাফ, এয়র চীফ মার্সেল ভি.আর. চৌধরী, চীফ ওফ নভেল স্তাফ, এদমিরেল আর হরি কুমার অমসুং ভারত সরকারগী দিফেন্স সেক্রেতরী, দা. অজয় কুমার য়াওরি।

****



(Release ID: 1869281) Visitor Counter : 34


Read this release in: English , Urdu , Marathi , Hindi