امور داخلہ اور امداد باہمی کے مرکزی وزیر جناب امت شاہ نے آج مدھیہ پردیش میں گوالیار ہوائی اڈے کے راج ماتا وجئے راجے سندھیا ٹرمنل کا سنگ بنیاد رکھا۔ جناب امت شاہ نے بھومی پوجن کیا اور 4,200 کروڑ روپے کی مالیت کے نل کے پانی کے پروجیکٹوں کو قوم کے نام وقف کیا اور پردھان منتری آواس یوجنا کے تحت بنائے گئے مکانات مستفیدین کے حوالے کئے۔ اس موقع پر مدھیہ پردیش کے وزیر اعلیٰ شیوراج سنگھ چوہان، مرکزی وزیر زراعت جناب نریندر سنگھ تومر اور شہری ہوابازی کے مرکزی وزیر جیوترآدتیہ سندھیا سمیت کئی معززین موجود تھے۔

اپنے خطاب میں مرکزی وزیر داخلہ نے کہا کہ حال ہی میں ملک کے 130 کروڑ عوام کی جانب سے وزیر اعظم نریندر مودی نے اپنی بے پناہ عقیدت کے ساتھ مہاکال کی پوجا کی۔ انہوں نے کہا کہ سابقہ حکومتوں نے برسوں اقتدار میں رہنے کے بعد بھی ہندوستان کے ثقافتی ورثے کو خستہ حالت میں رکھا۔ انہوں نے کہا کہ وزیر اعظم نریندر مودی نے خوشامد کی سیاست میں شامل ہوئے بغیر ہماری تمام اقدار کا یکساں احترام کیا۔

جناب امیت شاہ نے کہا کہ آج ہوائی اڈے کی ایک جدید ترین ٹرمنل عمارت کا افتتاح کیا گیا ہے اور یہ ملک کے بہترین ہوائی اڈوں میں سے ایک ہو گا۔ انہوں نے کہا کہ وزیر اعظم نریندر مودی نے شہر یا دیہات میں ہر غریب کو گھر فراہم کرنے کا ہدف رکھا ہے۔ انہوں نے کہا کہ پچھلی حکومت نے مدھیہ پردیش میں تمام اسکیموں کو روک دیا تھا، لیکن دوبارہ وزیر اعلیٰ کا عہدہ سنبھالنے کے بعد شیوراج سنگھ چوہان نے تمام اسکیموں کو دوبارہ شروع کیا اور انہیں 2024 کے ہدف سے پہلے مکمل کرنے کا عزم ظاہر کیا ہے۔ انہوں نے کہا کہ وزیر اعظم نریندر مودی نے 'ہر گھر نل سے جل' کی اسکیم شروع کی اور اسے بھی پچھلی حکومت نے روک دیا، لیکن جناب شیوراج سنگھ چوہان نے اس اسکیم کو شروع کیا اور گوالیار کے لیے تقریباً 4,200 کروڑ روپے کے کام آج شروع کیے جا رہے ہیں۔ انہوں نے کہا کہ اس ہوائی اڈے کا تعمیر شدہ رقبہ 25,000 مربع میٹر ہے جس میں سالانہ 1.6 لاکھ مسافروں کی گنجائش کو بڑھا کر 11 لاکھ مسافروں کو سالانہ کر دیا گیا ہے۔ 2.5 گیگا واٹ شمسی توانائی کے ساتھ گرین انرجی سے چلنے والے اس ہوائی اڈے میں بیک وقت 1,400 سے زیادہ مسافروں کو سنبھالنے کی گنجائش ہے۔ اس کے ساتھ ایک کارگو ٹرمینل بھی بنایا گیا ہے، جو گوالیار-چمبل ڈویژن کی دنیا بھر میں ایم ایس ایم ای مصنوعات اور چھوٹے پیمانے کی صنعتوں کو بھیجنے کے لیے کارآمد ثابت ہوگا۔

مرکزی وزیر داخلہ نے کہا کہ وزیر اعظم نریندر مودی کی قیادت میں ملک بھر میں بنیادی ڈھانچے میں بہت زیادہ ترقی ہوئی ہے۔ انہوں نے کہا کہ مرکز میں سابقہ حکومت کے دور میں یومیہ 12 کلومیٹر قومی شاہراہیں بنتی تھیں، آج 37 کلومیٹر قومی شاہراہیں یومیہ بنتی ہیں۔ اس سے پہلے ایک سال میں 375 کلومیٹر ریلوے لائنیں بچھائی جاتی تھیں، اب یہ بڑھ کر سالانہ 1458 کلومیٹر ہو گئی ہیں۔ اس سے قبل زرعی بجٹ 27,000 کروڑ، جسے اب وزیر اعظم نریندر مودی کے ذریعہ بڑھا کر 1,24,000 روپے کر دیا گیا ہے۔ وزیر اعظم نریندر مودی کی قیادت میں مرکزی حکومت ہمہ جہت ترقی کی سمت کام کر رہی ہے۔

جناب امت شاہ نے کہا کہ بہت سے مسائل، جو برسوں سے حل نہیں ہو سکے تھے، وزیر اعظم نریندر مودی نے دوبارہ حل کر دیے ہیں۔ انہوں نے کہا کہ وزیر اعظم مودی نے عظیم الشان رام مندر کا سنگ بنیاد رکھا۔ اپنے عزم اور حوصلے کے ساتھ وزیر اعظم نریندر مودی نے 5 اگست 2019 کو جموں و کشمیر سے آرٹیکل 370 ہٹا دیا۔ اسی طرح راج پتھ کو 'کرتویہ پتھ' میں تبدیل کر دیا گیا ہے۔ وزیر اعظم مودی نے ایسے بہت سے کام پورے کیے ہیں جو پہلے کبھی نہیں ہو سکتے تھے۔

مرکزی وزیر داخلہ نے کہا کہ وزیر اعظم نریندر مودی شہری ہوابازی کے شعبے میں بھی اڑان اسکیم لیکر آئے اور آج 10 ملین مسافر دوسرے درجے اور تیسرے درجے کے شہروں کے درمیان فضائی رابطہ کی وجہ سے ہوائی سفر کر رہے ہیں۔ انہوں نے کہا کہ ٹیکنالوجی کے استعمال سے وزیر اعظم مودی نے ہمارے وسیع ملک میں 224 کروڑ کووڈ 19 ویکسین مفت فراہم کی ہیں۔ اس کے علاوہ جناب نریندر مودی کی قیادت والی حکومت نے تقریباً ڈھائی سال سے غریبوں کو مفت راشن فراہم کیا ہے۔ جناب شاہ نے کہا کہ وزیر اعظم نریندر مودی نے 80 کروڑ لوگوں کو مکانات، بجلی، بیت الخلاء اور پانچ لاکھ روپے تک کی صحت سہولیات اور 80 کروڑ لوگوں کو مفت راشن فراہم کئے ہیں۔ انہوں نے کہا کہ مدھیہ پردیش کی ہمہ جہت ترقی وزیر اعظم نریندر مودی اور وزیر اعلیٰ شیوراج سنگھ چوہان کا ہدف ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ش ح۔ م ع۔ع ن

 (U: 11495)