ভারতকী নুপাগী হোক্কী তিমগী চীফ কোচ গ্রহাম রিদনা থাজবা থম্লি মদুদি ৩৬শুবা নেসনেল গেমস অসি মতম চানা পাংথোক্লে অমসুং মসিনা পেরিসতা পাংথোক্কদবা ২০২৪ ওলেম্পিক গেমসকীদমক অফবা তিম অমা শেমগৎপদা মতেং পাংগনি।

নেসনেল গেমসতগী মহাক্না খঙবা ঙমখিবা কয়াগী মতাংদা রিদনা হায়খি লৈবাকপোকপা নুমিৎতা মেজর ধ্যানচান্দ স্তিদিয়মদা পাংথোকখিবা ফাইনেল শান্নখিবা অদুগী মমাঙদা তিম ৮ চাংদম্নবগী মেতচশিং অদুগী ফজবা মশান্নশিং উবদা মহাক অপেনবা পোকখি।

অস্ত্রেলিয়াগী ক্বুইন্সলেন্দতা পোকখিবা রিদনা হায়খি “মসি ঐনা অহানবা ওইনা য়েংবা নেসনেল গেমসনি। মসি মতম চানা পাংথোকপা গেম অমনি হায়না ঐনা হায়রি। গেমস অসিদা নহা ওইরিবা শান্নরোয় কয়ানা মখোয়গী হৈথোই-শিংথোইবশিং উৎলে অমসুং মসিনা পেরিস ওলেম্পিক্কীদমক ভারতকী অফবা তিম অমা শেমগৎপদা খুদোংচারগনি”।

লৈবাক মনুং অমসুং মালেমগী থাক্তা শান্নরোয়শিংনা তোঙান-তোঙানবা মওংদা শান্নখিবা অদু চীফ কোচনা মশক খঙখি। মহাক্না হায়খি নেসনেল গেমসতা শান্নরোয় অমমমগী স্কিলশিং হেন্না উবা ফংখি, মালেমগী থাক্তা শান্নবা মতমদা অমগা অমগা পাস তৌনবা অদুদগী তোঙানখি। শান্নরোয় অমমমগী স্কিলশিং অসি দরকার ওই অদুবু শান্নরোয়শিংনা মতম মতমগী হোঙলকপশিং অদুগা চুশিন্নবা ঙমগদবনি।

রিদনা হায়খি হৌজিক লৈরিবা ভারতকী তিম অসি মালেমগী লৈবাক কয়া মাইথিবা পীবা ঙমগদবা তিম অমা ওইনবা মচাকশিং য়াওরে। মতম মতমগী ফিবমশিংদা চুশিন্নবা ঙম্নবা অমসুং লৈজবা থৌনা ফুদোক্তুনা শান্নবা ঙম্নবা তিম ইন্দিয়াগী শান্নরোয় অমদা হেক্তা মীৎয়েং থমগদবনি। মালেমগী থাক্তা শান্নবা মতমদা ভারতকী তিমদা মতেং ওইগদবা শান্নরোয়শিং পুথোক্কদবনি।

এফ.আই.ঐচ প্লেয়ার ওফ ইয়র ২০২২ মনা ফংখ্রবা হরমানপ্রিত সিংহগী মতাংদা চীফ কোচনা হায়খি মনা অসিনা মহাক পুক্নিং থৌগৎকনি। মহাক্কী অফবা চহি অমা ওইরে। মহাক ফগৎলক্কনি অমসুং ফজনা শান্নগনি হায়না ঐনা থাজৈ। মহাক ইরাই লাইনা পেন্থোক্তে অমসুং নুমিৎ খুদিংগী ফগৎলক্নবা ইখৌ লাংবা লৈরি অমসুং মসি অফবা শান্নরোয় অমগী অফবা খুদমনি।

চীফ কোচনা গোলকিপ্পর পি.আর শ্রীজেসশু থাগৎখি। মহাক্না হায়খি মহাক য়াম্না ফরে। কিপ্পরশিংগী কেরিয়র অসি অতোপ্পা শান্নরোয়শিংদগী হেন্না শাংই। গোলকিপ্পরশিং শেমগৎনবা ভারতনা থবক পায়খৎলে, কিপ্পরশিং মশক খঙদোক্নবা অমসুং শেমগৎনবা কেম্প অমা পাংথোক্নবা থৌরাং তৌরে।

******

(Release ID: 1866922) Visitor Counter : 117