য়ু.এস-ইন্দিয়া বিজিনেস কাউন্সিল অমসুং য়ু.এস চেম্বর ওফ কম্মর্স, ইন্তরনেসনেল এফেয়ার্স, সাউথ এসিয়ানা শীনবা ইন্দিয়া আইদিয়াস সম্মিৎতা ঙসি ইজুকেসন অমসুং স্কিল দিবলপমেন্ত অমসুং ওন্ত্রেপ্রেনিউয়রশিপকী য়ুনিয়ন মিনিস্তর শ্রী ধরমেন্দ্র প্রধান শরুক য়াখ্রে। মীফম অদুগী পান্দমদি “মথং চহি ৭৫দা য়ু.এস-ভারতকী নুংঙাই-য়াইফবা হেনগৎহনবা” হায়বনি। থৌরম অদুদা অমেরিকাগী কম্পেনিশিংগী সি.ই.ওশিং অমসুং মকোক থোঙবা লুচিংবশিং শরুক য়াখি।

ভারত-য়ু.এস মরীগী মতাংদা শ্রী প্রধান্না হায়খি ভারত অমসুং য়ু.এসকী মান্নবা খুন্নাই অমসুং মীৎয়েং লৈ। লাইরিক-লাইশু তম্বা অমসুং স্কিল হেনগৎহনবা হায়বসি ভারত-য়ু.এস মরীগী মরুওইবা য়ুম্বীশিংনি। অপুনবা দিগ্রিশিং পীনবা অমসুং দুএল দিগ্রি প্রোগ্রামশিং পাংথোক্নবা লৈবাক অনিগী অৱাংবা থাক্কী মহৈলোয়শঙশিংগী মরক্তা হেন্না মতেং পাংন্নবা মহাক্না তকশিনখি।

উদোগশিংগী লুচিংবশিংগা ৱারি শানবদা লাইরিক-লাইশু তম্বা অমসুং স্কিল হেনগৎহনবগী মতাংদা ভারতকী মঙলানশিং শ্রী প্রধান্না ফোঙদোকখি। নেসনেল ইজুকেসন পোলিসি ২০২০গী মতাংদা মহাক্না হায়খি মসিনা ২১শুবা চহিচাগী মহৈরোয়শিং শক্তি পীগনি অমসুং তুংগী থৌরাং তৌরবা শীন্মিশিং শেমগৎকনি।

নেসনেল ইজুকেসন পোলিসি ২০২০না লাইরিক তম্বা অসি মালেমগী থাক্তা পুখৎনবগী মতাংদা মিনিস্তর প্রধান্না হায়খি লাইরিক লাইশু তম্বা অমসুং স্কিল হেনগৎহন্নবা হীরমদা য়াংনা অওনবা পুরক্নবা ভারতনা অমেরিকাগী কম্পেনিশিংগা চৎমিন্নগদবনি। চাউখৎলক্লিবা দিজিতেল ইকোনোমি অমা, তুংগী অসা লৈরিবা মীয়াম, লৌশিংদা য়ুম্ফম ওইবা অপুনবা মীশিং অমসুং থৌশিলদা অওনবা পুরকপা অসিনা ভারত্তা মমাঙদা অমুক্তা থেংনখিদ্রিবা খুদোংচাবা কয়া ফংহল্লে।

স্কিল হেনগৎহনবগী মতাংদা মিনিস্তরনা হায়খি প্রধান মন্ত্রী শ্রী নরেন্দ্র মোদীগী লমজিং মখাদা নহারোলশিং স্কিল লৈহন্নবা, অমুক হন্না স্কিল ত্রেনিং পীনবা অমসুং স্কিল হেনগৎহন্নবা ভারতনা থবক কয়া পায়খৎলি। করিগুম্বা উদোগকী দরকার ওইবশিং ফংহনবা ঙম্নবা নহারোলশিংদা ত্রেনিং পীরবদি মালেমগী উদোগ অমদা হেক্তা মশিং য়াম্লবা ভারতকী নহারোল অমসুং লাইরিক হৈরবা মীয়াম অসি লন অমনি। লৈবাক অসিগী অপুনবা মীশিং অমসুং স্কিল লৈহন্নবা পায়খৎলিবা থবকশিং অসিনা মরম ওইদুনা ভারতনা খুদোংচাবা ফিবম অমদা লৈরি।

*****