নোর্থ-ইস্ত রিজন পুম্নমক অসিনা প্রধান মন্ত্রী, শ্রী নরেন্দ্র মোদীগী লুচিং মখাদা খোংজেল য়াংনা চাউখৎ-থৌরাংগী অনৌবা য়ুক অমদা মাইওন চুম্লক্লি।  হায়রিবা অসি ভারতকী ফুতবোলদা পাৱরহাউস অমা ওইরিবা, নোর্থ ইস্তকী রাজ্য অসিদা শান্নখিবা খ্বাইদগী অহানবা দুরান্দ কপ মেচ (নেরোকা এফ.সি. অমসুং ত্রাউ এফ.সি.) অসিগী হৌদোকপগী থৌরমদা, রক্সা মন্ত্রী, শ্রী রাজনাথ সিংনা ২০২২গী ওগস্ত ১৮দা মনিপুরদা ইম্ফালগী খুমন লমপাক মেন স্তেদিয়মদা থমখিবা ৱাফম্নি। রক্সা মন্ত্রীনা হায়খি মদুদি নোর্থ-ইস্তনা হৌখিবা চহি খরা অসিদা হেল্থ, এজুকেশন, ত্রান্সপোর্ত, এগ্রিকলচর অমসুং অর্বান দেবেলপমেন্তকী লমদা অনৌবা রেকোর্দ কয়া অমা থমখি, হায়রিবশিং অসি লমদম অসিদা মাইকৈ পুম্নমক্তা চাউখৎ-থৌরাং কয়া পুরক্নবা সরকারগী নিংহন্নবা লৈত্রবা অচেৎপা ফিরেপ অদুগী খুদম-চাংদম্নি।

রক্সা মন্ত্রীনা মখা তারকখি মদুদি সরকার অসিনা রাজ্যশিং/য়ুনিয়ন তেরিতোরী পুম্নমক্কী চাউখৎ-থৌরাং পুরকপদা থাজবা থম্লি, অথাপ্পা মফমশিংদা ইনফ্রাস্ত্রকচর দেবেলপমেন্তকী মাইকৈদা অখন্নবা মিৎয়েং তম্লি হায়না মরু ওইনা পনখি। “ঐখোয়না কনেক্তিবিতী লৈহন্দুনা অথাপ্পা মফমশিংবু মেনলেন্দগা শম্নহল্লি,” হায়না মহাক্না হায়খি। শ্রী রাজনাথ সিংনা থাজবা পীরকখি মদুদি লৈবাক অসিনা ‘আজাদি কা অমৃত মাহোতসব’ পাংথোক্লিঙৈ মতম অসিদা মনিপুরদা দুরান্দ কপকী অহানবা মেচ পাংথোকপা অসিনা রিজন অমসুং রাজ্য পুম্নমক্না লৈবাক অসিবু হেন্না ৱাংবা থাক্তা পুখৎনবগীদমক্তা খুৎশম্নদুনা মাং লোমদা খাখৎলক্লিবা ‘অনৌবা ভারত’ অমগী হৌরকপগী খুদম্নি।

শ্রী রাজনাথ সিংনা মশান্না মখল পুম্নমকপু থৌগৎনবা সরকারগী ফিরেপ অদুবু পনখি, মহাক্না হায়খি মদুদি হৌখিবা চহি খরা অসিদা হোৎনখিবশিং অদুনা মরম ওইরগা ভারতনা ওলীমপিক্স, এসিয়ন গেম্স অমসুং কমনৱেলথ গেমসগুম্বা মরু ওইবা স্পোর্তিং ইভেন্তশিং অসিদা মাইপাকপগী অনৌবা অৱাংবা থাক অমা য়ৌখি। লৈবাক অসিগী মফম কয়াদগী শান্নরোইশিংনা হৌজিক্তি চপ মান্ননা খুদোংচাবা ফংলে, মসিগী ফলনি ঐখোয়না হৌজিক উবা ফংলিবসি, হায়না মহাক্না হায়খি। রক্সা মন্ত্রীনা আর্মদ ফোর্সেসপু লৈবাক অসিবু ঙাক-শেনবদা নত্তনা মসিগী গেম্সশিং অসিগী তোঙান-তোঙানবা মশান্নশিংদা লৈবাক অসিগীদমক্তা মেদলশিং পুরক্লি হায়না থাগৎখি। 

শান্নরোই অমসুং আর্মদ ফোর্সেস পর্সোনেলগী মরক্তা লৈরিবা মান্নবা কয়া অমা পল্লদুনা, রক্সা মন্ত্রীনা হায়খি, “দেদিকেশন, কমিৎমেন্ত, লোয়ল্তী, তীম ৱার্ক, দিসিপ্লিন অমসুং মরৈবাক নিংবগী ৱাখল্লোন অসিনা শান্নরোই অমসুং আর্মদ ফোর্সেস পর্সোনেলগী মরক্তা য়াওরিবা মান্নবা মগুনশিংনি। মরম অদুনা শান্নরোইশিংদা লান্মীগী অমসুং লান্মীশিংদা শান্নরোই অমগী মমি তারিবনি,” হায়না মহাক্না হায়খি।

মনিপুরগী মুখ্য মন্ত্রী, শ্রী এন. বিরেন সিং, চীফ ওফ আর্মী স্তাফ, জেনরেল মনোজ পান্দে অমসুং জি.ও.সি.-ইন-চার্জ ইস্তর্ন কমান্দ, লেপ্তনেন্ত জেনরেল আর.সি. তিৱারিনা হৌদোকপগী থৌরমদা শরুক য়াখি। অহানবা ওইনা, মনিপুরনা অসামগা লোইননা খ্বাইদগী অরিবা ফুতবোল তুর্নামেন্তশিংগী মনুংদা অমা ওইরিবা দুরান্দ কপকী থৌবু ওইমিন্নরি। মসি তুর্নামেন্ত অসিগী ১৩১শুবা এদিশন্নি।

*****

(Release ID: 1853005) Visitor Counter : 130