কেন্দ্রনা স্পোন্সর তৌবা স্কিমগী মখাদা য়ু.জি. কোর্সশিং ঙন্না হৌনবগীদমক্তা অয়াবা পীখ্রবা, হৌজিক লৈরিবা দিস্ত্রিক্ত/রিফরেল হোস্পিতালশিংগা এতেচ তৌরিবা অনৌবা মেদিকেল কোলেজ অথুবা মতমদা শাবা লোইশিন্নবা সেন্ত্রেল ফন্দ খোঙজেল য়াঙনা শিজিন্ননবা কেন্দ্রনা রাজ্য ১৪গী মফমদা খঙহনখ্রে। কেন্দ্রগী হকশেল সেক্রেতরী, শ্রী রাজেশ ভুসন্না রাজ্য/য়ু.তি. ১৪গী হকশেল সেক্রেতরী অমসুং দাইরেক্তর (মেদিকেল এজুকেসন)শিংগা লোয়ননা পনখ্রিবা থবকশিং অসিবু  ভিদিও কনফরেন্সিংগী খুত্থাংদা য়েংশিনবদা প্রোজেক্তশিং অসিগী মরী লৈনবা থবকশিং খোঙজেল তপ্না পায়খৎলম্বা থেংনখি। স্কিম অসিগী মখাদা ইং ২০১৪দগী হৌনা ফেজ অহুম থোক্না হৌজিক ফাওবদা অনৌবা মেদিকেল কোলেজ ১৫৭কী অয়াবা পীখিবনি।

ঙসিগী য়েংশিনবগী মীফমদা শরুক য়াখিবা রাজ্য/য়ু.তি.শিংদি অন্দমান অমসুং নিকোবার ইথৎ, অরুনাচল প্রদেশ, অসম, বিহার, ছতিসগর, হিমাচল প্রদেশ, হরিয়ানা, ঝার্খন্দ, জম্মু অমসুং কশ্মির, মহারাস্ত্রা, মধ্য প্রদেশ, মেঘালয়, মিজোরম, নাগালেন্দ, ওরিশা অমসুং পঞ্জাবনি।

ইং ২০২৩-২৪গী একাদমিক সেসন ফাওবদা য়ু.জি. কোর্স হৌবা ঙম্নবগীদমক্তা প্রোজেক্তশিং অসি অথুবা মতমদা লোইশিন্নবা রাজ্যশিংগী মফমদা কেন্দ্রগী হকশেল সেক্রেতরীনা হায়খি। স্কিম অসিনা মার্চ ৩১, ২০২৪দা লোইগদবা ওইবনা, প্রোজেক্তশিং অসি লেপ্নখিবা মতমগী মনুংদা লোইশিনবগী তঙাই ফদবা লৈ হায়বা ৱাফম পুথোকখি। শেনবা চহি ২০২২-২৩গী ওইনা, হ্যুমেন রিসোর্স ফোর হেল্থ (ঐচ.আর.ঐচ.) অমসুং মেদিকেল এজুকেসন (এম.ই.)গী স্কিমগী ওইনা লুপা করোর ৭৫০০গী শেনফম কাইথখ্রবনি হায়বা ৱাফমসু পুথোকখি। অদুবু, রাজ্য/য়ু.তি.শিংনা শেনফমশিং অসি শিজিন্নবদা তপ্পা অমসুং রাজ্যশিংনা ফন্দ থাদোকপীরক্নবা হায়জরকপা লৈতবনা মরম ওইরগা, কেন্দ্রনা রাজ্যশিংগী মফমদা মখা তাবা ফন্দ থাদোকপা য়াদনা লৈরি। লেমহৌরিবা ফন্দশিংবু কেন্দ্রনা থাদোকপা য়ানবগীদমক্তা রাজ্যশিংনা অথুবা মতমদা হান্নগী য়ুতিলাইজেসন সর্তিফিকেত অথুবা মতমদা পীশিন্নবা হায়খি। রাজ্যগী লৈঙাক্লোইশিংনা প্রোজেক্ত অসিবু চাং নাইনা য়েংশিন্দুনা প্রোজেক্ত অসিগী ফিজিকেল অমসুং ফাইনেন্সিএল প্রোগ্রেস য়েংশিনবা য়ানবগীদমক্তা কেন্দ্র মন্ত্রালয়গী পোর্তেলসু অথুবা মতমদা অপদেত তৌনবা খঙহনখ্রে।

অতোপ্পা প্রোজেক্ত কয়াদা শিজিন্নরিবা চৎনবী ওইনা শিজিন্নরিবা তেক্নোলোজী কয়াগা চাংদম্নবদা প্রোজেক্ত অসিবু থুনা লোইশিনবা ঙমহন্নবা অমসুং ইনর্জী কঞ্জর্বেসনগী থবকশিংসু থাক ৱাংনা পাংথোকপা য়াহনগদবা তেক্নোলোজী কয়া মসিগী প্রোজেক্তসিদা শিজিন্নরি হায়না কেন্দ্রগী হকশেল সেক্রেতরীনা মরু ওইনা পনখি। হৌদনা লোইরিবা প্রোজেক্ত অসিগীদমক্তা করি পাংথোকপা য়াবগে থীদোক্তুনা, লোকেলগী মফমগা চুনবা অমসুং গ্রীন তেক্নোলোজী ওপ্সন, অমসুং স্তীল কম্পোজিত স্ত্রকচর শিজিন্ননবা রাজ্যশিংগী মফমদা খঙহনখিবসু লৈখ্রবনি। হোস্পিতাল শাবা অমসুং মরী লৈনবা স্পেসিএলাইজ সর্ভিসকীদমক্তা তঙাই ফদবা খুদোংচাবা পীবগী মতাংদা কন্সত্রক্সন কম্পেনীশিংনা এক্সপেরিএন্স ৱাৎপনা মরম ওইরগা প্রোজেক্ত খরদি খুমান চাউশিন্দনা লৈরি হায়বা ৱাফমসু পুথোকখি। প্রোজেক্ত অসিগীদমক্তা খনগৎলবা কন্ত্রেক্তরশিংনা মতিক চাবা অমসুং চুনবা লৌশিং অমসুং স্কিল লৈহন্নবা অমসুং সব-কন্ত্রেক্তরশিংসু হায়রিবা তঙাই ফদবশিং অসি লৈহন্নবা রাজ্যশিংগী মফমদা খঙহনখ্রে।

এন.ই./স্পিসিএল কেতগোরীগী ওইনা কেন্দ্র অমসুং রাজ্য সরকারগী মরক্তা ৯০:১০গী রেসিওদা অমসুং অতোপ্পা রাজ্যশিংগীনা ৬০:৪০দা ফন্দ শেয়র তৌনদুনা “হান্নদগী লৈরক্লবা দিস্ত্রিক্ত/রিফরেল হোস্পিতালশিংদা এতেচ তৌদুনা অনৌবা মেদিকেল কোলেজ শাবা”গী কেন্দ্রনা স্পোন্সর তৌবা স্কিম অমা ভারত সরকারনা জনুৱারী ২০১৪দা হৌদোকখিবনি।

কেন্দ্রনা স্পোন্সর তৌবা স্কিম অসি ফেজ অহুম থোক্না পায়খৎলিঃ

• ফেজ ১ (২০১৪) (এস্পিরেস্নেল দিস্ত্রিক্ত ১৩ কোনদুনা অনৌবা মেদিকেল কোলেজ ৫৮ লিংখৎপা)
• ফেজ ২ (২০১৮) (এস্পিরেস্নেল দিস্ত্রিক্ত ৬তা অনৌবা মেদিকেল কোলেজ ২৪ লিংখৎপা); অমসুং
• ফেজ ৩ (২০১৯) (এস্পিরেস্নেল দিস্ত্রিক্ত ২০গী মনুংদা অনৌবা মেদিকেল কোলেজ ৭৫ লিংখৎপা)

মেদিকেল কোলেজ লিংখৎপগী সি.এস.এস. স্কিমগী ফেজ ১বু শেনবা চহি ২০১৯-২০ ফাওবগী মনুংদা লোইশিনবা হায়বগী অকক্নবা মতমগা লোয়ননা জনুৱারী ২০১৪দা অয়াবা পীখিবনি। কেন্দ্রনা মখোয়গী ফন্দগী অহানবা শরুক (লুপা করোর ৭৫৪১.১০) থাদোকখ্রবা তুংদা ফেজ অসিগী মখাদা কোলেজ অমমম লোইশিনবদা চাউরাক্না চঙগদবা শেনফম্না লুপা করোর ১৮৯ ওইগনি পানখি। মেদিকেল কোলেজ ৫৮গী মনুংদা, ৮দি মথৌ পাংথোকপা হৌদ্রি।

ফেজ ২ অসি ফেব্রুৱারী ২০১৮দা অয়াবা পীখি অমসুং মসিনা ২০২১-২২ ফাওবা মখা চত্থগনি। ফেজ অসিগী মখাদা পার্লিয়ামেন্তরী কন্সতিত্বেন্সী ৩দা মেদিকেল কোলেজ অমদা লুপা করোর ২৫০ চঙগনি পাদুনা য়ামদ্রবদা মেদিকেল কোলেজ অমা শাবগী পান্দম য়াওরি। লুপা করোর ৩৬৭৫গী কেন্দ্রগী শেয়র অসি রাজ্য/য়ু.তি.দা থাদোকখ্রে। হৌজিক ফাওবদা, শুপ্নগী কোলেজ ৮না মথৌ পাংথোকপা হৌখ্রে।

সি.এস.এস. স্কিমগী ফেজ ৩বু শেনবা চহি ২০২৩-২৪ ফাওবগী মনুংদা লোইশিনবা হায়বগী অকক্নবা মতমগা লোয়ননা ওগস্ত ২০১৯দা অয়াবা পীখিবনি। ফেজ অসিগী মখাদা কোলেজ অমমম লোইশিনবদা চাউরাক্না চঙগদবা শেনফম্না লুপা করোর ৩২৫ ওইগনি পানখি। কেন্দ্রগী অপুনবা শেয়র, লুপা করোর ১৫৪৯৯.৭৪গী মনুংদা, লুপা করোর ৯৩২৪.১১দি রাজ্য/য়ু.তি.শিংদা থাদোকখ্রে। হৌজিক ফাওবগী ওইনা, কোলেজ ১৪না মথৌ পাংথোকপা হৌখ্রে।

দাঃ মনোহর অগ্নানী, এ.এস. (হকশেল মন্ত্রালয়), কুমারী হেকালী ঝিমোমী, জে.এস. (হকশেল মন্ত্রালয়) অমসুং মন্ত্রালয়গী সেনিয়র ওফিসিএলশিংনা মীফমসিদা শরুক য়াখি।

****