আজাদী কা অমৃত মহোৎসব-এক ভারত শ্রেস্থ ভারত (এ.কে.এ.এম.-ই.বি.এস.বি.)গী শরুক ওইনা মনিপুরগী ইম্ফালদগী কোলেজ অমসুং স্কুল মহৈরোয় ৩৩না মধ্য প্রদেশকী ইন্দোর অমসুং মালৱা রিজনগী অকোইবদা লৈবা মফমশিংদা চৎখ্রে। মহৈরোয় ৩৩গী মনুংদা মহৈরোয় ১৯না  ইম্ফালগী তোঙান-তোঙানবা স্কুলশিংগী মহৈরোয়শিংনি অমসুং ১৪না এম.আই.তি., ইম্ফালদগী ১৪ য়াওখি। মহৈরোয়শিং অসিগা লোয়ননা ফেকলতী মেম্বর অনিসু চৎখি।

তীম অসিনা জুন ২৬তগী জুলাই ০২, ২০২২ ফাওবা ইন্দোর, মহেশ্বর, মান্দবগর য়াওনা মালৱা রিজনগী তোঙান-তোঙানবা মফমশিংদা চৎখি। ইন্দোরগী আই.পি.এস. একাদেমী ইন্সতিত্যুত ওফ ইঞ্জিনীয়রিং এন্দ সাইন্সনা হোস্ত ইন্সতিত্যুত ওইখি। অপুনবা গ্রুপ অসিদা নুপী মেম্বর ১৮ য়াওখি। এক ভারত শ্রেস্থ ভারত স্কিমগী মখাদা মনিপুর অমসুং মধ্য প্রদেশ অসি পুংবা শারিবা রাজ্যশিংনি।

 

সাইন্স অমসুং তেক্নোলোজী: উজ্জৈনদা লৈবা দোংগলা রোবোতিক্স ওবজর্বেতরীদা জিরো শেদো ইফেক্তকী মতাংদা প্রোফেসরনা শন্দোক্না তাকপা

তীম অসিনা সরকারগী অখন্নবা থৌশিল এক ভারত শ্রেস্থ ভারতকী মখাদা স্তুদেন্ত একচেঞ্জ প্রোগ্রামগী শরুক ওইনা ইন্দোরদা চৎখি। অহানবা নুমিৎতা মনিপুরদগী মহৈরোয়শিংনা মধ্য প্রদেশকী ইন্দোরদা থুংখি। মখোয়না হৌদোকপগী থৌরম লোইরবা মতুংদা অনিশুবা নুমিৎতা ইন্দোর ম্যুনিসিপাল কোর্পোরেসনগী বাইও সি.এন.জি. প্লান্তদা অমসুং খজরানা গনেশ মন্দিরদা চৎখি। বাউও সি.এন.জি. প্লান্ত অসি প্রধান মন্ত্রী নরেন্দ্র মোদীনা হন্দক্তা শঙ্গাখিবা এসিয়াগী খ্বাইদগী চাউবা সি.এন.জি. প্লান্তনি। ইন্দোরনা মঙারক শুবা ওইনা থংনা-থংননা ভারতকী খ্বাইদগী লুনানবা সহর ওইবা ঙমখি। মহৈরোয়শিংনা প্লান্ত অসিদা লৈরিবা মেছিনশিং অমসুং প্রোসেসশিং অসি উবদা অঙকপা ফাওখি।

ক্লীন এন্দ স্মার্ত সিতীশিং, ইনর্জী সেভিং অমসুং অর্বান প্লান্নিং: হন্দক্তা পি.এম. শ্রী নরেন্দ্র মোদীজীনা শঙ্গাখিবা ইন্দোরগী দেবগুরুদিয়াদা লৈবা বাইও সি.এন.জি. প্লান্তদা চৎপা

অহুমশুবা নুমিৎতা তীম অসিনা ০ দিগ্রীদা লৈবা দোংগলা রোবোতিক ওবজর্বেতরী, অমসুং উজ্জৈনদা লৈবা মহাকলেশ্বর মন্দিরদা চৎখি। অখন্নবা অয়াবা লৌদুনা মহৈরোয়শিংদা ওবজর্বেতরীগী খুৎশু-খুৎলাই কয়ামরুম য়েংহনখি। তীম অসিনা ইন্দোরগী লাল ভাগ পেলেস অমসুং রাজৱাদাদা চৎখি অমসুং শান্ন-খোৎনবগী এক্তিবিতীশিংদা শরুক য়াখি। খোঙবু অসিনা মঙাশুবা নুমিৎতা ইন্দোরদগী কিমি ১০০ চৎলগা লৈবা মহেশ্বরদা লৈবা দেবি অহিল্যা ফোর্ত্তা চৎখি। ১৬শুবা চহিচাগী ফোর্ত অসি মাগী ফজরবা আর্কিতেকচর অমসুং নর্মদা তুরেলগী পুক্নিং হুরবা দ্রিশা অসিগীদমক মমিং চৎলি। মখোয়না মফম অসিগী মমিং লৈরবা ফী ওইরিবা মালেমগী ওইনা ফাওরবা মহেশ্বরি মুগা য়েংখি। তরুক শুবা নুমিৎতা মখোয়না পুৱারী ওইরবা মন্দব গরদা চৎখি। মসি মধ্য প্রদেশকী মমি লৈরবা লমকোইবশিংগী লমথুংফমনি। মখোয়না রূপমতি পেলেস অমসুং বাজ বহাদুর পেলেস অমসুং অতোপ্পা মফমশিং য়েংলকখি।

 

অরোইবা নুমিৎতা মহৈরোয়শিংনা রাজ্য অনিগী চৎনবী অমসুং নাৎ উৎলিবা অপুনবা কলচরেল প্রোগ্রামদা শরুক য়াখি। মখোয়গী খোঙচৎ অদুদা মহৈরোয়শিংনা ইন্দোরগী সারাফা চৌপত্তীদা য়ুম্বু ওইরিবা রাজ্যগী তোঙান-তোঙানবা মথেল-লুকোইশিং চাখি। মখোয়না সারাফা চৌপত্তীগী মমিং লৈরবা মথেলশিং, জোশি দহি বদাদা ‘দহি বদা’ অমসুং ‘ভুত্তে কা কিস’ ওইরবসু নত্ত্রগা বিজয় চেৎ হাউসতা ‘খোপ্রা পেত্তীস’ নত্ত্রগা ‘জলেবি’ ওইরবসু চাখি। মহৈরোয়শিংনা অথেংবা নুমিদাংদা সারাফা চৌপত্তীদা তিল্লিবা মীয়াম অদু উবদা অঙকপা পোকখি।

আই.পি.এস. একাদেমীগী মালেমগী থাক্তা শেমগৎখিবা স্পোর্তস কমপ্লেক্সতা তোঙান-তোঙানবা শান্ন-খোৎনবগী এক্তিবিতীশিং পাঙথোকখি।

খোঙচৎ অদু চৎখিবা মনিপুরি তীমনা পুৱারী ওইরবা মফমশিং, চৎনবীশিং, নাৎ অমসুং লোকেল কুজিনশিং অসিদা অঙকপা পোকখি। মনিপুরি মহৈরোয়শিংনা হায়খি মদুদি মখোয়না ইন্দোরদা লৈবা মখোয়গী কাউন্তপার্তশিংগা লোয়ননা মরুপ ওইখি। মখোয়না মধ্য প্রদেশকী হেরিতেজকী মরমদা খঙজিনখি। মসিগা চপ মান্ননা মধ্য প্রদেশকী মহৈরোয়শিংনা মনিপুরী চৎনবী, মখোয়গী খুনুং ঈশৈ অমসুং জগোইশিংগী মরক্তা খঙজিনখি। গ্রুপ অনিমক্না অমনা অমগী চাকচা-য়ুথক্কী চৎনবী খঙনবা হোৎনখি। মধ্য প্রদেশকী মহৈরোয় কয়ানা মনিপুরীদা থৌগলোনগী ৱাহৈ খরা তমশিনখি। রাজ্য অনিগী মহৈরোয়শিংনা থাদোক্লমদাই মীকুপতা নুংশিনা কাইনখি।

খোঙচৎ অসি কেন্দ্রগী এজুকেসন মন্ত্রালয় অমসুং ওল ইন্দিয়া কাউন্সিল ফোর তেক্নিকেল এজুকেসন (এ.আই.সি.তি.ই.), নই দিল্লীনা তেংবাং পীখি।

*****

(Release ID: 1841642)