ਉਪ ਰਾਸ਼ਟਰਪਤੀ, ਸ਼੍ਰੀ ਐੱਮ. ਵੈਂਕਈਆ ਨਾਇਡੂ ਨੇ ਅੱਜ ਬੱਚਿਆਂ ਦੇ ਸਰਬਪੱਖੀ ਵਿਕਾਸ ਅਤੇ ਰਾਸ਼ਟਰ ਦੇ ਸੁਰੱਖਿਅਤ ਭਵਿੱਖ ਦੇ ਨਿਰਮਾਣ ਲਈ ਇੱਕ ਸੰਪੂਰਨ, ਮੁੱਲ-ਅਧਾਰਿਤ ਸਿੱਖਿਆ ਦੇ ਮਹੱਤਵ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਨੇ 'ਅੰਕ-ਕੇਂਦ੍ਰਿਤ ਸਿੱਖਿਆ' ਦੀ ਮਾਨਸਿਕਤਾ ਨੂੰ ਦੂਰ ਕਰਨ ਅਤੇ ਸਿੱਖਿਆ ਨੂੰ 'ਸਿਰਫ਼ ਅੱਖਰਾਂ ਅਤੇ ਸੰਖਿਆਵਾਂ ਦੇ ਰੂਪ ਵਿੱਚ ਨਹੀਂ, ਬਲਕਿ ਸੱਭਿਆਚਾਰ ਅਤੇ ਕਦਰਾਂ-ਕੀਮਤਾਂ ਦੀ ਸਿੱਖਿਆ' ਵਜੋਂ ਦੇਖਣ ਦਾ ਸੱਦਾ ਦਿੱਤਾ।

ਹੈਦਰਾਬਾਦ ਵਿੱਚ ਉੱਘੇ ਤੇਲੁਗੂ ਵਿਦਵਾਨ ਅਤੇ ਸਾਹਿਤਕ ਕਲਾਕਾਰ (ਅਵਧਾਨੀ) ਸ਼੍ਰੀ ਗਾਰਿਕੀਪਤੀ ਨਰਸਿਮਹਾ ਰਾਓ ਨੂੰ ਇੱਕ ਸੱਭਿਆਚਾਰਕ ਸੰਸਥਾ ‘ਆਕ੍ਰਿਤੀ’ ਵੱਲੋਂ ਸਥਾਪਿਤ 'ਸੰਸਕਾਰ' ਪੁਰਸਕਾਰ ਪ੍ਰਦਾਨ ਕਰਦਿਆਂ ਉਪ ਰਾਸ਼ਟਰਪਤੀ ਨੇ ਤੇਲੁਗੂ ਭਾਸ਼ਾ ਵਿੱਚ ਸਾਹਿਤਕ ਯੋਗਦਾਨ ਅਤੇ ਉਨ੍ਹਾਂ ਦੀਆਂ ਅਧਿਆਤਮਿਕ ਸਿੱਖਿਆਵਾਂ ਲਈ ਸ਼੍ਰੀ ਗਾਰਿਕੀਪਤੀ ਦੀ ਸ਼ਲਾਘਾ ਕੀਤੀ।

ਗੁਰੂ ਪੂਰਣਿਮਾ ਦੇ ਮੌਕੇ ਸ਼੍ਰੀ ਨਾਇਡੂ ਨੇ ਕਿਹਾ ਕਿ ਭਾਰਤੀ ਪਰੰਪਰਾ ਵਿੱਚ, 'ਗੁਰੂ' ਨੂੰ ਸਭ ਤੋਂ ਵੱਧ ਸਤਿਕਾਰ ਦਿੱਤਾ ਜਾਂਦਾ ਹੈ, ਅਤੇ ਇਹ ਕਿ ਇੱਕ ਗੁਰੂ ਅਤੇ ਇੱਕ 'ਸਿਸ਼ਯ' ਵਿਚਕਾਰ ਸਬੰਧ ਨੂੰ ਸਭ ਤੋਂ ਪਵਿੱਤਰ ਮੰਨਿਆ ਜਾਂਦਾ ਹੈ। ਉਪ ਰਾਸ਼ਟਰਪਤੀ ਨੇ ਅੱਗੇ ਕਿਹਾ ਕਿ ਗੁਰੂ ਸਾਡੇ ਜੀਵਨ ਵਿੱਚ ਇੱਕ ਅਨਮੋਲ ਭੂਮਿਕਾ ਨਿਭਾਉਂਦੇ ਹਨ ਅਤੇ "ਸਿਰਫ਼ ਗਿਆਨ ਦੇਣ ਤੋਂ ਇਲਾਵਾ, ਚਰਿੱਤਰ ਨੂੰ ਢਾਲਣ ਅਤੇ ਸਾਡੇ ਭਵਿੱਖ ਨੂੰ ਘੜਨ ਵਿੱਚ ਮਦਦ ਕਰਦੇ ਹਨ।"

ਉਪ ਰਾਸ਼ਟਰਪਤੀ ਨੇ ਆਪਣੇ ਅਧਿਆਪਕਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ, ਉਨ੍ਹਾਂ ਦੀਆਂ ਸਿੱਖਿਆਵਾਂ ਨੂੰ ਯਾਦ ਕੀਤਾ ਅਤੇ ਉਨ੍ਹਾਂ ਦੇ ਜੀਵਨ 'ਤੇ ਉਨ੍ਹਾਂ ਦੇ ਬਹੁਤ ਪ੍ਰਭਾਵ ਨੂੰ ਨੋਟ ਕੀਤਾ। ਆਪਣੇ ਅਧਿਆਪਕਾਂ ਨੂੰ ਸ਼ੁਕਰਗੁਜ਼ਾਰੀ ਨਾਲ ਯਾਦ ਕਰਨਾ ਅਹਿਮ ਹੈ ਜਿਨ੍ਹਾਂ ਨੂੰ "ਭਾਰਤੀ ਸੰਸਕ੍ਰਿਤੀ ਵਿੱਚ ਮਾਤਾ-ਪਿਤਾ ਅਤੇ ਇੱਥੋਂ ਤੱਕ ਕਿ ਰੱਬ ਜਿਹਾ ਦਰਜਾ ਦਿੱਤਾ ਗਿਆ ਹੈ।"

ਡਾ. ਕੇਵੀ ਰਮਨਾਚਾਰੀ, ਤੇਲੰਗਾਨਾ ਸਰਕਾਰ ਦੇ ਸਲਾਹਕਾਰ, FECCI ਦੇ CMD, ਸ਼੍ਰੀ ਅਚਯੁਤਾ ਜਗਦੀਸ਼ ਚੰਦਰ, ਆਕ੍ਰਿਤੀ ਦੇ ਪ੍ਰਧਾਨ ਸ਼੍ਰੀ ਸੁਧਾਕਰ ਰਾਓ, ਸਾਹਿਤਕ ਸ਼ਖਸੀਅਤਾਂ, ਕਲਾਕਾਰ ਅਤੇ ਹੋਰ ਪਤਵੰਤੇ ਸੱਜਣ ਹਾਜ਼ਰ ਸਨ।

 

 

 ************

ਐੱਮਐੱਸ/ਆਰਕੇ/ਐੱਨਐੱਸ/ਡੀਪੀ

(Release ID: 1841342) Visitor Counter : 113