কমর্স অমসুং ইন্দস্ত্রী মন্ত্রালয়
azadi ka amrit mahotsav

অৱাং-নোংপোক লমদম অসি এগ্রি এক্সপোর্ত হব ওইনা শেমগৎনবা সরকারনা লাল্লোংশিং শেম্লে

সরকারগী থবকশিংনা হৌখিবা চহি ৬তা অৱাং-নোংপোক লমদম্না মপান্দা থাদোকপা চাদা ৮৫ হেনগৎপা থেংনরে

বাংলাদেস, ভুতান, মিদ্দল ইস্ত, য়ু.কে, য়ুরেোপ অসি অৱাং-নোংপোক লমদমগী পোৎথোকশিং য়োন্নবা মরুওইবা মফমশিংনি

হৌখিবা চহি ৩দা অৱাং-নোংপোক লমদমদা অপেদানা শীন্দুনা এক্সপোর্তকী মতাংদা খঙহন্নবা ত্রেনিং প্রোগাম ১৩৬ অমসুং মালেম থাক্কী অরৈবশিং অমসুং অয়োনবশিংগী মীফম ২২ পাংথোকখ্রে

মহৈ-মরোং লোক্ত্রিঙৈ অমসুং লোক্লবা মতুংদা পাংথোক্কদবা থবকশিং অমসুং অতোপ্পা রিছার্সকী থবকশিংগী মতাংদা তোঙান-তোঙানবা ত্রেনিং কয়া পাংথোক্নবা অপেদানা অসাম এগ্রিকলচরেল য়ুনিভর্সিতি জোরাতকা লোয়ন্না এম.ও.য়ু অমা খুৎয়েক পীনখ্রে

Posted On: 12 JUL 2022 7:04PM by PIB Imphal

অৱাং-নোংপোক লমদমদা ফংলিবা হোর্তিকলচরগী পোৎথোকশিং মপান্দা থাদোকপা হেনগৎনবা লমদম অসিদা ফংলিবা লৌউ-শিংউগী পোৎথোকশিং মালেমগী কৈথেলশিংদা য়ৌনবা হৌজিক সরকারনা অফবা লাল্লোং অমা পায়খৎলে। অৱাং-নোংপোক লমদম অসি চাইনা, ভুতান, ম্যান্মার, নেপাল অমসুং বাংলাদেসকা মালেমগী ঙমখৈশিং লৈবা মরম্না য়ুম্লোন্নরিবা লৈবাকশিং অমসুং অতোপ্পা মপানগী লৈবাকশিংদা মফম অসিদগী লৌউ-শিংউগী পোৎথোকশিং থাদোক্নবগী খুদোংচাবা কয়া লৈরি।

 

হৌখিবা চহি খর অসিদা অৱাং-নোংপোক লমদমগী রাজ্যশিং হায়বদি অসাম, নাগালেন্দ, মনিপুর, মিজোরম, ত্রিপুরা, অরুনাচল প্রদেস, সিক্কিম অমসুং মেঘলয়দগী লৌউ-শিংউগী পোৎথোকশিং মপান্দা থাদোকপা শিংথাবা য়ানা হেনগৎলে। হৌখিবা চহি ৬দা লমদম অসিগী লৌউ-শিংউগী পোৎথোকশিং মপান্দা থাদোকপা চাদা ৮৫.৩৪ হেনগৎতুনা, ইং ২০১৬-১৭দা মপান্দা থাদোকপা য়ু.এল দোল্লার মিল্লিয়ন ২.৫২ ওইরম্বদগী ইং ২০২১-২২আ য়ু.এস দোল্লার মিল্লিয়ন ১৭.২দা হেনগৎখি। বাংলাদেস, ভুতান, মিদ্দল ইস্ত, য়ু.কে, য়ুরেোপ অসি অৱাং-নোংপোক লমদমগী পোৎথোকশিং য়োন্নবা মরুওইবা মফমশিংনি।

পোৎথোকশিং য়োন্নবা কৈথেলশিংগা শম্নবা ঙম্নবা, কম্মর্স অমসুং ইন্দস্ত্রি মিনিস্ত্রিগী মখাদা লৈবা এগ্রিকলচরেল এন্দ প্রোসেস ফুদ প্রদক্স দিবলপমেন্ত এন্দ ওথোরিতি(অপেদা)না শীন্দুনা লৌমীশিংনা পায়খৎলিবা মগুন লৈরবা লৌউ-শিংউগী থবকশিং ইমপোর্তরশিং য়েংহন্নবা থৌরম কয়া পাংথোকখি। মদুদা মিদ্দল ইস্ত, ফার ইস্ত লৈবাকশিং অমসুং য়ুরোপকী লৈবাকশিং অমসুং অস্ত্রেলিয়াকী ইমপোর্তরশিং শরুক য়াখি।

মপান্দা পোৎথোকশিং য়োনবগী মতাংদা খঙহন্নবা হৌখিবা চহি ৩দা অৱাং-নোংপোক লমদমগী তোঙান-তোঙানবা মফমশিংদা অপেদানা শীন্দুনা ত্রেনিং ১৩৬ পাংথোকখ্রে। লদমদম অসিদা ২০১৯-২০দা ত্রেনিং ৬২, ২০২০-২১দা ত্রেনিং ২১ অমসুং ২০২১-২২দা ত্রেনিং ৫৩ পাংথোকখি। ত্রেনিং প্রোগ্রামশিং অসিগী মথক্তা, অপেদানা শীন্দুনা হৌখিবা চহি ৩ অসিদা অৱাং-নোংপোক লমদমদা ত্রেদ ফিয়ারশিং ওইনা মালেম থাক্কী অরৈবশিং অমসুং অয়োনবশিংগী মীফম ২২ পাংথোকখি।

অসাম অমসুং অৱাং-নোংপোক লমদমগী অতোপ্পা রাজ্যশিংদগী মপান্দা য়োনবা য়াবা লৌউ-শিংউগী পোৎথোকশিং খঙদোক্নবা অপেদানা শীন্দুনা জুন ২৪, ২০২২দা গুৱাহাতিদা জিওগ্রাফিকেল ইন্দিকেসন(জি আই)অমসুং ওর্গানিক অমসুং মহৌশা লৌউগী মতাংদা কনফরেন্স পাংথোকখি।

লৌমীশিং অমসুং পোৎথোকশিং শেম-শারিবা মীওইশিংদগী এক্সপোর্তরশিংনা হকথেংন্না পোৎথোকশিং লৌনবা অসামদা মফম অমা শেমগৎনবা অপেদানা পান্দম থম্লি। মফম অসিদা অসামগী লৌমীশিং অমসুং পোৎথোকশিং শেম-শারিবশিং উনগনি অমসুং মসিনা অৱাং-নোংপোক লমদমগী মীয়াম থবক ফংনবগী খুদোংচাবা হেনগৎহনগনি।  

অৱাং-নোংপোক লমদমদগী মপান্দা থাদোকপা হেনগৎহন্নবা মহৈ-মরোং লোক্ত্রিঙৈ অমসুং লোক্লবা মতুংদা পাংথোক্কদবা থবকশিং অমসুং অতোপ্পা রিছার্সকী থবকশিংগী মতাংদা তোঙান-তোঙানবা ত্রেনিং কয়া পাংথোক্নবা অপেদানা অসাম এগ্রিকলচরেল য়ুনিভর্সিতি জোরাতকা লোয়ন্না এম.ও.য়ু অমা খুৎয়েক পীনখ্রে।

অৱাং-নোংপোক লমদমগী উ মোরোক, অসাম চম্প্রা য়াওনা জি.আই ফংলবা পোৎথোক কয়া অপেদানা য়োকখৎখি অমসুং মদু মহাক্কী মন কি বাত থৌরমদা প্রধান মন্ত্রী শ্রী নরেন্দ্র মোদীনা পনখি। হৌজিক অসাম লেমন অসি লন্দন অমসুং মিদল ইস্ততা চাংনাইনা য়োল্লে অমসুং অসাম লেন মেত্রিক তন ৫০ হেন্না মপান্দা য়োনখ্রে। অপেদানা অসামগী লিতচি অমসুং মাইরেলশু লৈবাক কয়াদা য়োনখ্রে।

অপেদাগী চিয়ারমেন দোক্তর এম অঙ্গামুতুনা হায়খি, অসাম অমসুং অতোপ্পা অৱাং-নোংপোক লমদমগী রাজ্যশিংদা লৌউ-শিংউ অমসুং হোর্তিকলচরগী মহৈ-মরোং খুদিংমক হৌনবগী চুনবা লৈবাক-লৈহাও অমসুং ঈশিং-নুংশিৎকী ফিবমশিং লৈরি। অৱাং-নোংপোক লমদমগী ঙমখৈগী অয়াম্বা শরুকশিং ভুতান, বাংলাদেস, ম্যান্মার অমসুং চাইনা থংনরি অমসুং লমদম অসিদগী মপান্দা থাদোক্নবগী খুদোংচাবা কয়া লৈরি।

কোবিদ-১৯ মনুংদা, তোঙান-তোঙানবা লৈবাকশিংদা লৈরিবা ভারতকী এম্বেসিশিংগী মতেংগা লোয়ন্না লমদম অসিদগী কিহোম, শিং, চম্প্রা অমসুং কম্লা য়োন্নবা এক্সপোর্তর অমসুং লমদম অসিগী লৌমীশিংগা লোয়ননা ভর্চুএল বয়র সেল্লর মীতকী খুৎথাংদা অপেদানা থবক পায়খৎখি। লায়চৎ মনুংদা মপান লৈবাকশিংদা য়োনবা হেনগৎনবা অপেদানা ভর্চুএল ত্রেদ ফিয়ার কয়া শীনখি।

লমদম অসিগী নৌরিবা ওন্ত্রেপ্রেনিউয়র অমসুং এক্সপোর্তর, ফার্মর প্রদুসর ওর্গনাইজেসন অমসুং ফার্মর প্রদুসর কম্পেনি ৮০ রোমগী ত্রেনিং প্রোগ্রাম কয়া পাংথোক্নবা অপেদানা থৌরাং তৌরে। রাজ্য সরকারশিংগী ওফিসিএলশিংনা স্কিল দিবলপমেন্ত, চীঞ্জাক শেম-শাবা অমসুং হোর্তিকলচরগী পোৎথোকশিং মগুন হেনগৎহনবগী মতাংদা ত্রেনিং পাংথোকখ্রে। 

অসাম এগ্রিকলচর দিপার্তমেন্তগী ওফিসিএলশিং ত্রেনিং পাংথোক্নবা অপেদানা থৌরাং তৌরি অমসুং খল্লবা ওফিসিএলশিং তাঙ্কক নাইনা কর্নাতকা, মহারাস্ত্রা অমসুং গুজরাত্তা থাগনি।

অৱাং-নোংপোক লমদমগী পোৎথোকশিং হায়বদি কিৱি ৱাইন, শেম-শারবা চীঞ্জাকশিং, জোহা রাইস প্লাউ, চাকহাও খের অসিনচিংবা ব্রান্দ শেমগৎনবা অমসুং য়োকখৎনবা অপেদানা মতেং পাংলি।

মফম অসিদা ফংলিবা পোৎথোকশিং মগুন হেনগৎহন্নবা অমসুং মপান্দা থাদোক্নবা মেনুফেকচররশিং, এক্সপোর্তরশিং অমসুং ওন্ত্রেপ্রেনিউয়রশিংগী স্কিল দিবলপমেন্ত প্রোগ্রামশিং অপেদানা শীল্লি। সেন্ত্রেল ফুদ তেক্নোলোজি রিছার্স ইন্সতিতুৎ, মৈসুর অমসুং ইন্দিয়ান ইন্সতিতুৎ ওফ ফুদ প্রোসেসিং তেক্নলোজিগা লোয়ন্না অৱাং-নোংপোক লমদমগী তোঙান-তোঙানবা রাজ্যশিংদা ত্রেনিং কয়া পাংথোকখ্রে।

অৱাং-নোংপোক লমদমগী লৌউ-শিংউ অমসুং হোর্তিকলচরগী পোৎথোকশিং মপান্দা থাদোকপা হেনগৎহন্নবা মেঘলয়গী রি বোই অমসুং অসামগী দিব্রুগরদা ফুদ ক্বালিতি অমসুং সেফতি মেনেজমেন্তগী মতাংদা অপেদানা ৱার্কসোপ অমা পাংথোকখ্রে।

অপেদানা মতেং পাংদুনা, ত্রিপুরাগী থৈবোং লন্দনদা য়োল্লে অমসুং অহানবা ওইনা লোকেল এক্সপোর্তর অমগী খুৎথাংদা নাগালেন্দগী উমোরোক লন্দনদা য়োল্লে। অসামগী লেতেকু(বর্মিজ গ্রেপ) দুবাইদা থাদোক্লে অমসুং অসামগী ক্বা মনা চাংনাইনা লন্দনদা য়োল্লে।

ওক অমসুং ওকশা মপান্দা থাদোক্নবা, নোংমদা শা ৪০০ শেম-শাবা ঙমগদবা মতমগা চুনবা ওকশা শেম্নবা মফম অমা নাজিরাদা শেমগৎপদা অপেদানা অসাম সরকারগী মতেং পাংলে। য়ুনিত অসি অথুবা মতমদা থবক হৌরগনি।

ভারতকী ওর্গানিক রাজ্য অমা ওইরিবা সিক্কিমদগী ওর্গানিক ওকশা মপান্দা থাদোক্নবা রাজ্য অদুগী এনিমেল হসবেন্দরি দিপার্তমেন্তগা লোয়ন্না অপেদানা ত্রেনিং প্রোগ্রাম অমা পাংথোকখ্রে। লমদম অসিগী শেম-শারবা ওকশা অমসুং ওকশা অতেকপা থাদোক্নবা চৎন-কাংলোনশিং অপেদানা শেম্লে। অৱাং-নোংপোক লমদমগী অহানবা ওইনা, অপেদাগী মতেংগা লোয়ন্না ২০১৬দা সিক্কিমদা অহানবা ওইনা ওর্গানিক সর্তিফিকেসন এজেন্সি অমা লিংখৎলে।

*****



(Release ID: 1841098) Visitor Counter : 39


Read this release in: English , Urdu , Hindi