উত্তর প্রদেশকী রাজ্যপাল, শ্রীমতি অনন্দিবেন পতেল, মফমসিগী মীয়াম্না য়াবা মুখ্য মন্ত্রী,  য়োগী অদিত্যনাথজী, মন্ত্রী মন্দলদা লৈরিবা ঐহাক্কী খোঙলোই ধর্মেন্দ্র প্রধানজী, নেস্নেল এজুকেসন পোলিসীগী দ্রফাতিং কম্মিতীগী চেয়রমেন কে. কস্তুরিরঙ্গনজী, সরকারগী অতোপ্পা মন্ত্রী, থৌরম অসিদা শরুক য়ারিবা ভাইস চান্সেল্লর খুদিং, এজুকেস্নেল ইন্সতিত্যুসনশিংগী দাইরেক্তর, একাদমিসিয়ন, মহৈরোই অমদি ইবেম্মা অমসুং ইবুংঙোশিং!

‘অখিল ভারতিয় শিক্ষা সামাগম’ অসি লৈবাক্না নীংতম্বা ফংদ্রিঙৈগী মমাংদা মরু ওইবা য়ুনিভর্সিতী কয়া হৌদোকখিবা মদুগুম্বা শেংলবা মফমদা পাংথোক্লি। লৈবাক্না নীংতম্বগী অমৃত মহোৎসব পাংথোক্লিঙৈ মতমদা ঙসিগী সামাগমসু পাংথোক্লি। অমৃত কাল অসিদা লৈবাক্কী অমৃত ৱারেপ কয়া মঙফাওনহনবগী থৌদাং কয়া ঐখোয়গী এজুকেসন সীস্তেমদা লৈ, ঐখোয়গী হৌরক্লিবা নহারোলশিংগী চারোন শুরোন্দা লৈ। ঐখোয়গী উপানিশদশিংদসু অসুম্না হায়বীরম্মি – বিদ্যা অমৃতম অশ্রীতে। মসিনা হায়বদি, মহৈ-মশিং খক্তনা ঐখোয়দা অমৃত পীগনি হায়বনি। কাশীবু মোক্স নগরী হায়বগী মরমদি এজুকেসনগী রিসর্চ অমসুং ইন্নোভেসন কয়া মফমসিদা পাংথোকপা মতমদা, মফমসিদগী থোকখিবা মীপুম খুদিংনা লৈবাক্কী চাউখৎ-থৌরাংগী হীরমদা মাইকৈ পীবা ঙমগনি হায়বগীনি। ঐহাক্না ঙসিগী তাঞ্জা অসিদা মহামনা মালিবিয়জীগী খুয়াখাদা চঙজদুনা থৌরম অসিগীদমক্তা অদোম খুদিংগী মফমদা য়াইফ পাউজেল পীজবগা লোয়ননা পুম্নমকপু থাগৎচরি। ঐহাক কাশীগী এম.পি.নি। অদোম্না কাশীদা লাকপীরিবনিনা ঐহাক্না অদোমগী হোস্তসু ওইরিবনি। অদোম অসিগী ঐহাক্কী মীথুংলেন্নি। মীপুম খুদিংনা অদোমগী নুংঙাইনবা শীন-লাঙবনি, পুম্নমক অসিদা অদোমগী মফমদা খুদোংচাবা অমত্তা নংহল্লোই হায়না ঐহাক্না থাজবা থম্লি। মফুফাওবদা করিগুম্বা অৱাৎ-অপা লৈরবদি, মদু ঐহাক্কী অশোইবনি। মসিগীদমক্তা ঐহাক্না অদোম্না ঙাকপীগনি হায়না মাংজৌননা হায়জরি।

মরুপশিং,

ঐহাক্না থৌরম অমা য়াওরুরবা তুংদা মফমসিদা অমুক য়ৌরকপনি। মিদ দে মীলগীদমক্তা মফমদুদা সেন্ত্রেলাইজ কিৎচনগী থবক কয়া পায়খৎহৌরি। মফমদুদা ঐহাক্না সরকারগী স্কুলদা তম্বা চহি ১০-১২গী অঙাংশিংগা ৱারী শাবগী খুদোংচাবা ফংজরকখি। মখোয়গী মফমদগী ৱাফম কয়া তারগা লাকপনি, অদোমগী মফমদা ৱারী কয়া তমগে খল্লগা লাক্লিবনি। অদুগা ঐহাক্না ঙসি উন্নরকখিবা অঙাংশিংগী ওজাশিংগা মথং লাকপদা শোইদনা উন্নবা পামগনি। ঐহাক্কী ইফমদা মসিগুম্বা ৱাখল্লোন করিগীদমক্তা লাক্লিবনো হায়বা অদোম্না খনবা ঙম্লমগনি। শুপ্নগী মিনিৎ ১০-১৫ খক উন্ন্রকপা মতমদা মখোয়গী তেলেন্তনা ঐহাক্কী পুক্নিং মপুং ওইনা শুমহৎখি। সরকার স্কুলদা তম্বা অচম্বা ইমুংগী অঙাংশিংনা মশাগী তেলেন্ততা অশুক য়াম্না থাজবা লৈবসিদা ঐহাক্তি য়াম্না ঙকখ্রে। মখোয়দা লৈরিবা তেলেন্তশিং অদু অদোমগী ইচা-ইশুদা লৈরবদি, অদোমগী ইমুংদা মীওই লাকপা খুদিংগী মমাংদা অদোম্না মখোয়বু শোইদনা পুথোক্নীংগনি। ঐহাক্না হায়জনীংবদি, হৌজিক্কী চারোন-শুরোনশিংনা লৈরিবা মতিক-মগুন অসিগা লোয়ননা মখোয়না অদোম্না হৌজিক লৈরিবা থাক্তা য়ৌরকপা মতমদা, মখোয়দি ইন্সতিত্যুসন্দা লৈররোই, মখোয়না ইন্সতিত্যুসন ওইনা শেম্লগনি, অদোম্না ফিভম অসিবুদি উবদি ফংলরোই, অদুবু মখোয়না অসিগুম্বা মতম অমা শোইদনা পুরকপা ঙমগনি। মখোয়গী পুক্নিং হন্থনগদবা ফিভম লৈহন্দবা হায়বসি অদোমগী খ্বাইদগী চাউবা থৌদাং ওইরবনি, অমসুং হৌজিক্কী থৌরমগী মনুং চন্না মথংগী নুমিৎ নিনি-হুম্নিদা খন্ন-নৈনগদৌরিবা ৱাফমশিংনা নেস্নেল এজুকেসন পোলিসীদা অনৌবা মাইকৈ পীগনি হায়বগী ঐহাক্না চাউনা থাজবা থম্মি।

 

মরুপশিং,

নেস্নেল এজুকেসন পোলিসীগী মরু ওইবা পান্দমদি এজুকেসনবু অখুবা ৱাখল্লোন্দগী পুথোক্লক্তুনা ২১শুবা চহি-চাগী মতমগা চুনবা ৱাখল্লোনগা অমত্তা ওইহনবনি হায়বসি অদোম খুদিংনা খঙলবনি। লৈবাক অসিদা হী-শিংবগী অৱাৎপা অমত্তা লৈরমদে। অদুবু লাইবক থীবদি, ঐখোয়গী মফমসিদা এজুকেসন হায়বদি থবক ফংনবা পাম্বৈ অমনি হায়বগী পথাপ অমা শেম্নীরম্লিবা অসিনি। মীখা পোল্লিঙৈ মতমদা ব্রিতিশশিংনা মখোয়গী সেবা তৌনবা অমসুং মখোয়গী তঙাই ফদবা ফংনবগীদমক্তা মসিগুম্বা পথাপ অসি শেম্লম্বনি। নীংতম্বা ফংলবা তুংদা, মসিগুম্বা ফিভমদা অহোংবা খরদি লাকখি, অদুবু অচৌবা অওনবা অমা পুরক্কদবদি য়াম্না ৱাৎলি। অদুবু ব্রিতিশশিংনা শেম্লম্বা এজুকেসন সীস্তেম অসি ভারতকী ইথোসকী শরুক কৈদৌনুংদা ওইরমদে অমসুং ওইবসু কৌদৌনুংদা ওইবা য়ারোই। ঐখোয়না লৈবাক্কী অরিবা মতমদা ইয়েংলুবা মতমদা, ঐখোয়গী লমদমসিদা এজুকেসনগী তোঙান-তোঙানবা মখল লৈরম্মি। অদুগা বনারস, ঐহাক্কী কাশীদি হায়রিবসি ময়েক লারবা খুদম্নি। মফমসিদা অফবা গুরুকুল অমসুং মহৈ-মশিং ইন্সতিত্যুসন অফবা কয়া লৈরম্বনা বনারসপু লৌশিংগী ময়োল ওইহল্লম্বা নত্তে, ম্ফমসিগী লৌশিং অমসুং এজুকেসন্না মলতি-দাইমেন্সনেল ওইরম্বগীদমক্তা মফমসিনা লৌশিংগী ময়োল ওইরম্লিবনি। এজুকেসন্দা দাইবর্সিতী লৈবমক অসিনা এজুকেসনগী ইথিল ফংফম ওইফম থোক্লিবনি। ঐখোয়না দিগ্রী পায়বা নহাখক শেমগদবা নত্তে, লৈবাকপু মাংজিল থানা পুনবগীদমক্তা তঙাই ফদবা হ্যুমেন রিসোর্স খুদিং পীবা ঙমগদবা এজুকেসন সীস্তেম অমা লৈবাক্কী মফমদা পীগদবনি। ৱারেপ অসিবু ঐখোয়গী ওজা অমসুং এজুকেসনগী ইন্সতিত্যুসনশিংনা লমজিংগদবনি। ঐখোয়গী ওজাশিংনা মসিগুম্বা ৱাখল্লোন ইন্দুনা চৎলবা মতমদা, লৈবাক্কী নহারোল অমসুং মহৈরোইশিংনা কান্নবা ফংবগুম্না লাক্কদৌরিবা চারোন শুরোনশিংসু হায়রিবা কান্নবসি ফংদৌরিবনি।

মরুপশিং,

অনৌবা ভারত শেম্নবগীদমক্তা অনৌবা খুদোংচাবা, মতমগা চুনবা খুদোংচাবা শেম্বগী তঙাই ফদবা চাউনা লৈ। মমাংদা খল্লমদবা কয়ানা ঙসিগী অশেংবা ওইরে। কোরোনাগুম্বা চাউরবা লাইচত্তগী ঐখোয়না খোঙজেল য়াঙনা থোক্লকপদা নত্তনা ঙসিদি ভারতনা মালেমগী খ্বাইদগী য়াঙনা শাহৌ লৌরিবা শেন্মিৎলোনগী মনুংসু চল্লে। ঙসিদি ঐখোয়না মালেমগী খ্বাইদগী অহুমশুবা চাউবা স্তার্ত-অপ ইকোসীস্তেম ওইরে। সরকার খক্তনা থবক পুম্নমক পাংথোক্লম্বা স্পেস তেক্নোলোজীগুম্বা সেক্তরশিংদা হৌজিক্তি প্রাইভেত প্লেয়রশিংগী খুত্থাংদা নহারোলশিংগী অনৌবা মালেম অমা শেম্লে। লৈবাক্কী ইচানুপী অমসুং নুপীশিংগীদমক্তা থোং থিংলম্বা সেক্তর খুদিংমক্না ঙসিদি ঐখোয়গী নুপীমচাশিংগী তেলেন্তশিংগী খুদম মীয়ামদা পীরিবনি।

মরুপশিং,

লৈবাক্কী অপাম্বনা মসিগুম্বা মতোউ ওইরবা, লৈবাক্কী খোঙজেলনা অসুম্না য়াঙলবা, অদু ওইরবদি, ঐখোয়গী নহারোলশিংগী চাউখৎনবা ঐখোয়না মখোয়দা শক্তি হাপ্পা তাবনি। অঙাং অমনা করম্বা মাইকৈদা চৎকনি হায়বদি হৌজিক ফাওবদি স্কুল, কোলেজ অমসুং লাইরিক্না লেপ্লম্বনি। নেস্নেল এজুকেসন পোলিসীগী মতুংদা নহারোলশিংগী থৌদাং হেনগৎলবনি। মসিগা লোয়ননা ঐখোয়গী থৌদাংসু মান্ননা হেনগৎলবনি, নহারোলশিংগী অনীংবা অপাম্ববু ঐখোয়না লেপ্তনা পুক্নিং থৌগৎপীগদবনি, মখোয়গী অপাম্বা খঙগদবনি, মতমদুদা ঐখোয়না মখোয়গীদমক্তা করি-করম্বা মওংদা হোৎনবীগনি হায়বা খঙবা ঙমগনি। মখোয়গী অপাম্বা খঙদনা মখোয়গী মফমদা মসিমা তৌগদবনি হায়না নমশিনবগী মতম লোইরবনি। ঐখোয়না ৱাফম অসি মতম পুম্বদা নীংশিংগদবনি। মান্নবা এজুকেসন, ইন্সতিত্যুসনগী মান্নবা পথাপ অমসুং হ্যুমেন রিসোর্স শেমগৎনীংবগী মান্নবা ৱাখল্লোন ঐখোয়দা লৈগদবনি। ঐখোয়গী নহারোলশিংনা স্কিল লৈবা, প্রেক্তিকেল অমসুং কালক্যুলেতিব ওইনবা, এজুকেসন পোলিসীনা মসিগীদমক্তা ফম্বাক শেম্লি।

মরুপশিং,

হন্দক্কী থা লোইশিল্লকপা, জুলাই ২৯দা নেস্নেল এজুকেসন পোলিসীগী চহি ২ মপুং ফারগনি। ধর্মেন্দ্রজীনা হৌজিক্তা হায়খিবগুম্না, পোলিসী অসি পাক চাউনা হোৎনরবা তুংদা শেমখিবনি। কস্তুরিরঙ্গনজীনা নীংথিনা লমজিংবীখি, অদুনবু থৌওং অসি মায় পাকপা ঙম্লিবনি। দাইবর্সিতী য়াম্না লৈবা ঐখোয়গী লৈবাক অসিনা পোলিসী অসিবু তরাম্না ওক্লিবসি, মায় পাকপগী চাউরবা মখল অমনি। য়াম্না চাউবা মায় পাকপনি। মসিগী অখন্নবা মতৌদা অমুক য়েংসি, মসি শেম্বদা পাংথোকখিবা ব্রেনস্তোর্মিং কয়ানি, অদুগা সরকারগী ওইবা মহৌশাগী ৱাখলদি, করিগুম্বা দোক্যুমেন্ত অমা শেম-শাবা লোইরবা তুংদা দোক্যুমেন্ত অসিবু অদুম্নমক থাদোক্তুনা থম্নৈ, মীওই অমা অনিদা শিন্নরগা থাদোকই। দোক্যুমেন্ত অসিনা মতম খরদি তেবলগী মগুন ঙাকই। তেবলদগী হেক থোকখবগা অতোপ্পা দোক্যুমেন্ত অমনা অদুমক মহুৎ শিনখি। মদুদা ৱাফম খুদিংমক লোইশিল্লে। মসিগী মতাংদা অদোমসু খঙলবনি, মফমসিদা তিল্লিবা মীপুম খুদিংনা খঙলবনি। অদুবু, ঐখোয়না অসুম্না ওইহনখিদে। ঐখোয়না নেস্নেল এজুকেসন পোলিসীবু মীকুপ খুদিং হিংহন্দুনা থমখি। ঐহাক ইশামকসু তেল্লবা চহি ২গী মতমদা য়ামদ্রবদা সেমিনার ২৫দা শরুক য়াখ্রে। সেমিনার খুদিংদা ঐহাক্না মান্নবা হীরমগী মতাংদা ৱাফম থমখিবনি। মসিগী রিপোর্ত পীরবা তুংদা কস্তুরিরঙ্গন মশমক্না লেপ্তনা খন্ন-নৈনদুনা লৈখিবনি, মফম খুদিংগী মীয়ামগা ৱা তান্নখিবনি। মসিগী মতাংদা শন্দোক্না তাক্তুনা, মসিগী পান্দমগী মতাংদা মীয়ামদা পাউদমদুনা, মরী লৈনবা ই-পাউ খুদিংমক পীনবা মহাক্না হোৎনখিবনি। অপুনবা সরকারগী বিভাগ পুম্নমক্না চহি ৩০গী মতুংদা লাকপা মসিগুম্বা দোক্যুমেন্তপু মাঙখিদনবা লেপ্তনা হোৎনদুনা লাকখিবনি। অদোম্না পোলিসী অসিগী লমাই খুদিংমক পারবসু, নুমিৎ নিনি-হুম্নি খন্ন-নৈনবা মতমদা অনৌবা ৱাখল্লোন কয়া লাক্কনি, অনৌবা থোউওং কয়া পায়খৎপা য়াগনি হায়বা খঙলক্কনি। মরম অদুনা, ইশাগী য়ুনিভর্সিতী মনুংদসু মরী লৈনবা ব্রেন্সতোর্মিং পাংথোক্নবা থৌরাং শীনগদবনি। মফমসিদগী অদোম্না ৱাফম কয়া তারগা হনখিগদবা নত্তে। অদোমগী লোয়নরিবা অদোমগী মরুপ-মপাংশিংসু হীরম অসিগী মরী লৈননা খন্ন-নৈনহল্লু, মতমদুদা কান্নবা কয়া ফংবা ঙম্লক্কনি। মসিবু চৎনহনবদা থেংনবা শিংনবা খুদিংবু ঐখোয়না নীংথিনা খঙবগী মথৌ তাই।

মরুপশিং,

থবক অমা পাংথোক্কে হায়না ঐখোয়না মাইপুনবা মতমদা মদুগী ৱারোইশিনসু মথন্নতা অদুমক লাকচগনি। শিংনবনি খন্দুনা ঐহাক করি তৌসিগে, করিগী মাইপুনরিবনো খল্লবদি, কৈদৌনুংদা ৱারোইশিন পুরকপা ঙম্লোই। মরুপশিং, লৈবাক্না চহিশিং অসিদা পোলিসী অসিবু চৎনহন্নবা মশক থোকপা খোঙথাং কয়া পায়খৎখ্রে। মসিগী মনুংদা এক্সেস, ক্বালিতী অমসুং ফ্যুচর রেদিনেসকুম্বা মরু ওইবা হীরমশিংদা পাংথোকখিবা ৱর্কশোপ কয়ানা মতেং য়াম্না পাংখি। লৈবাক অমসুং মালেমগী একাদমিসিয়নশিংগা ৱারী শাখিবা, লৈবাক্কী এজুকেসন মন্ত্রীগা ঐহাক ইশামক্কা ৱারী শাখিবা, একাদমিকশিংগা ৱারী শাখিবা, ময়াম অসিনসু থৌওং অসিবু খোঙজেল য়াঙনা পাংথোকপদা তেংবাংখি। ঐখোয়গী ধর্মেন্দ্রজীনা নুমিৎ খরনিগী মমাংদা লৈবাক শিনবা থুংবগী এজুকেসন মন্ত্রীশিংবু কৌখিবনি। অদোমগা লোয়ননা খন্নরিবা অসিগুম্না মখোয়গসু ৱাফম কয়া খন্ন-নৈনখিবনি। পোলিসী অসিবু চাম্মদা চাম্মগী চাংদা মতৌ করম্না মায় পাক্না চৎনহনসিগে হায়না লেপ্তনা হোৎনদুনা লাক্লিবনি। রাজ্য সরকারশিংনসু মখোয়গী অঙম্বা থাক্তা মশক থোকপা অমসুং মরু ওইবা খোঙথাং কয়া পায়খৎনরি। হোৎনজমন কয়া অসিগী মহৈ ওইনা ঙসিদি লৈবাক্কী নহারোলশিংনা অসিগুম্বা অচৌবা অহোংবা অমা পুরক্নবা হোৎনরিবা অসিগী শরুক ওইরিবনি।

মরুপশিং,

অনৌবা নেস্নেল এজুকেসন পোলিসীগীদমক্তা লৈবাক অসিগী এজুকেসন ইনফ্রাস্ত্রকচরবু চাউনা শেমগৎপগী থবক পায়খৎলি। লৈবাক অসিদা অনৌবা কোলেজ, আই.আই.তি., আই.আই.এম. কয়া হাংলক্লে। ইং ২০১৪দগী হৌদুনা মেদিকেল কোলেজকী মশিংদা চাউরাকপা ৫৫%গী চাংদা হেনগৎলে। য়ুনিভর্সিতীশিংগী কম্মন এন্ত্রান্স তেস্ত (সি.য়ু.ই.তি.)না য়ুনিভর্সিতীদা মিং চনবদা লাইহনবগা লোয়ননা মান্নবা খুদোংচাবা পীরগনি। মসিগা মান্নবা তোঙানবা রিফোর্ম কয়াসু পাংথোক্লি। লৈবাক্কী মসিগুম্বা হোৎনজমন্না মরম ওইরগা, মালেমগী য়ুনিভর্সিতী রেঙ্কিংদা ভারতকী য়ুনিভর্সিতী মশিংসু তপ্না তপ্না হেনগৎলক্লি। মসিগী অহোংবা অসি হৌরকপদা ঙাইরিবনি। মসিদা ঐখোয়না শাংলবা খোঙচৎ অমা চৎকদৌবা লৈরি।

মরুপশিং,

নেস্নেল এজুকেসন পোলিসীদা ইমা লোলদা মহৈ তম্বগী লম্বী হাংদোকপসিদা ঐহাক্না য়াম্না নুংঙাইবা ফাওই। থৌওং অসিগী মনুং চনবা ওইনা, সংস্কৃতকুম্বা অরিবা লোলবু চাউখৎহন্নবা থবক পায়খৎলি। ঙসিগী থৌরম অসিদসু, সংস্কৃতকা মরী লৈনবা মীওইশিংগী অখন্নবা থৌরাং শীনবগী শক্তম ঐহাক্না উবা ফংলি। কাশীগী লমদমদগী হৌদোক্লিবা অনৌবা খোঙচৎ অসিনা ভারতকী লোল অমসুং অপাম্বশিংবু অনৌবা শক্তি পীবদা তেংবাংগনি।

মরুপশিং,

লাক্কদৌরিবা মতমশিংদা ভারতনা এজুকেসনগী মতাংদা মালেমগী ওইবা মরু ওইবা ময়োল অমা ওইরকপা য়াগনি হায়বগী ঐহাক্না থাজবা থম্লি। ভারত অসি মালেমগী নহারোলশিংগী এজুকেসনগী মরী লৈনবা পন্থুংফম অমা ওইবা য়াবতা নত্তনা, মালেমগী লৈবাক অমা হেক্তদা ঐখোয়গী নহারোলশিংগী অনৌবা খুদোংচাবা কয়াসু লৈরক্কনি। লৈবাক্না মাইকৈ অসিদা লেপ্তনা হোৎনরি। ফোংদোকখি। ভারতকী এজুকেসন সীস্তেম্বু মালেমগী থাক্তা পুখৎনবা শেম-শানবগীদমক্তা কাঙলোন কয়া শেমখ্রে হায়না মহাক্না হায়খি। ইন্সতিত্যুসনশিংগী মালেমগী ওইবা হীরমগীদমক্তা য়ুনিভর্সিতী ১৮০দা অখন্নবা ওফিস হংখ্রে। মহাক্না অখঙ-অহৈশিংনা ফিল্দদা চৎনরিবা মালেমগী থৌওংশিংগী মতাংদা খঙনবা হোৎনহন্নীংই। মসিগুম্বা অনৌবা খুদোংচাবা অসিনা ভারতকী এজুকেসনগী পথাপ্পু মালেমগী এক্সপেরিএন্সকা মরী লৈনহবদা তেংবাংগনি।

মরুপশিং,

মথংগী নুমিৎ নিনি-হুম্নিসিদা তোঙান-তোঙানবা হীরমশিংদা কুপ্না খন্ন-নৈনগদৌরি। অদোমগী খন্ন-নৈনবনা লৈবাক্কী তোঙানবা সেক্তরশিংগী অনৌবা থোঙ কয়া হাংবা, নহারোলশিংগী চারোন শুরোন্দা অনৌবা খুদম পীবা হায়বসি ঐহাক্কী অপাম্বনি। মালেমগী লৈবাক কয়ানা তোঙানবা সেক্তরশিংদা মশক থোকপা থবক কায় পাংথোক্লি, মসিদা মখোয়গী য়ুনিভর্সিতীগী অচৌবা থৌদাং য়াওরি। য়ুনিভর্সিতীশিংনা খুন্নাইগী কান্নবা অমসুং সাইন্তিফিক ওইবা হীরমশিংদা লেপ্তনা রিসর্চ তৌই, সরকারদা মরী লৈনবা পাউতাক কয়া পী। মসিগুম্বা চৎনবী অসি ঐখোয়গী লৈবাক্তসু লৈহনবগী মথৌ য়াম্না তারে। মসিনা মরম ওইরগা, নহারোলশিংনা লৈবাক অমসুং লৈবাক্কী  পোলিসীশিংগী মতাংদা খঙবা ঙমহল্লি, মদুদগী মখোয়গী তৌবা ঙম্বগী মতিকসু খঙবদা তেংবাংই। লৈবাক্কী নহারোলশিংগী ইন্নোভেতিব ওইবা ৱাখল্লোনগা অনৌবা সীস্তেমশিংগা মরী লৈনহনগদবনি হায়না ঐহাক্না খল্লি। মসিদগী অনৌবা তেলেন্ত থোক্লক্কনি, থৌরাং কয়া লৈরক্কনি। য়ুনিভর্সিতীনা লৈঙাক্তা মতৌ করম্না তেংবাংবগে হায়বা ঐখোয়না নীংথিনা খঙফম থোকই। ঐখোয়না করিদা মীথোই মীহেনবা ঙমগনি হায়বদি ঐখোয়না খনগদবনি। অদোম্না লৈরিবা সেক্তরগা মরী লৈনবা সর্ভে অমসুং রিসর্চ তৌবীয়ু, সরকারদা পাউতাক পীবিয়ু। অদোমগী য়ুনিভর্সিতীগী কিলোমীতর ৫০-১১গী অকোয়বদা লৈরিবা মীয়াম্না করম্বা শিংনবা থেংনবগে খঙবীয়ু। মখোয়গী করি ৱারোইশিন পুরকপা য়াবগে, মখোয়গী করি রিসোর্স লৈবগে, রিসোর্স লৈহন্নবা অমসুং হেনগৎহন্নবা করি তৌবা য়াবগে, মফমদুগী মীয়ামগী মহৌশাগী ওইবা ৱাখল্লোন কমদৌবগে? পুম্নমক অসি খঙদোক্নবা প্রোজেক্ত অমা অদোমগী মহৈরোইশিংনা ফংগনি। লোকেলগী মফমশিংদগী অফবা রিপোর্ত ফংগনি। ৱারোলশিং অসিগী মতাংদা সরকারদা কুপ্না পাউদম্বা মতমদা মহৈ খরদি ফংগনি। ঐহাক্না গুজরাত্তা লৈরিঙৈদা সরদার পতেল য়ুনিভর্সিতীদা থৌরম অমা পাংথোকখিবা ঐহাক্না নীংশিংলি। য়ুনিভর্সিতী অসিগী মীওইশিংনা রুরেল দিভেলপমেন্তকী মতাংদা রিসর্চ তৌদুনা লাইরিক খরা শেম-শাখি। মখোয়না লাইরিক্তু ঐহাক্কী ইফমদা খুদোল ওইনা পীরকখি। ঐহাক্না য়াম্না কুপ্না নৈনখি, য়াম্না নুংঙাইবা ফাওখি। ঐহাক্না দিপার্তমেন্ততা থবক পীখি। মহৈরোইশিংনা হায়রিবশিংগা সরকারনা থেংনরিবশিংগা কয়াম্না খেন্নবগে য়েংহনখি। মখোয়গী ৱারোলশিংনা রুরেল দিভেলপমেন্তকী থবক্তা ঐখোয়গী ইফমদা মতেং কয়া য়াম্না পাংখি খঙবদা অদোমসু ঙক্কনি। সরকারনা এয়র কন্দিসন কাদা ফমদুনা পাংথোকপদা লুনা থোকখিবশিংবু মহৈরোই অমসুং ওজাশিংনা নীংথিনা পাংথোকখিবনি। ঐখোয়গী মফমসিদা লৈরিবা এগ্রিকলচর য়ুনিভর্সিতীগী লেবতা চঙলুবা মতমদা মখোয়না অফবা থবক কয়া পাংথোকপা ঐখোয়না উবা ফংগনি। অদুবু, অফবা থবক কয়া পাংথোক্লবসু, মখোয়না সর্তিফিকেত হেক ফংখিবগা, মখোয়গী রিপোর্তশিং মালেমগী মেগাজিন্দা হেক ফোঙখিবগা অদুমক লোইশিল্লে। দিগ্রীসু ফংলে, হীরম খুদিংসু লেবতা লোইশিনখ্রে। ঐখোয়গী ওইবা লেব তু লেন্দ হায়বা পোলিসী লৈফম থোকই। লেবতা পাংথোকপশিংবু লেন্দদা অশেংবা থবক ওইনা পাংথোকফম থোকই হায়না ঐহাক্না খল্লি। লেবতা চৎলুদ্রিবা লেন্দদা খক্তা লৈবশিংগীসু নীংথিরবা এক্সপেরিএন্স লৈরিবনি। মখোয়বুসু লেবতা পুরকপগী তঙাই ফদবা লৈ। মসি করম্না ওইথোক্কনি? রিসর্চপু মপাঙ্গল করম্না হেন্না লৈহনগনি, চৎনবীগী মখা পোন্না ফংলকপা এক্সপেরিএন্সপু করম্না মপাঙ্গল লৈহনগনি হায়বগী মতাংদা ঐখোয়না থবক পায়খৎফম থোকই। মতৌ অসুম্না, ঐখোয়গী অয়ুর্বেদগুম্বা নাৎকী হিদাক লাংথক্কী মপুং ওইবা লৌশিংদা কনামত্তা য়েৎপা ঙম্লোই, ঐহাকসু ঙম্লোই, অদোমসু ঙম্লোই। অদুবু, মালেমগী লৈবাক ময়াম অমা লৈরি, নাৎকী হিদাক লাংথক্কী মতাংদা মখোয়না ঐখোয়দগী হেন্না লৌশিং লৈখ্রে। মসি করিগীনো হায়বদা, ঙসিগী মতমদা মহৈ অমসুং খুদমগী মথৌ তাবননি।

মরুপশিং,

লৈবাক্কী তুংগী মতমবু নুংঙাই য়াইফহনবা, নেস্নেল এজুকেসন পোলিসীবু লমজিংদুনা চৎপা হায়বদি অদোমগী খুত্তা লৈ হায়বসি ঐখোয়না কাওগদবা নত্তে। অখিল ভারতিয় শিক্ষা সামাগমদা পাংথোকপা ব্রেন্সতোর্মিংদগী থোক্লকপা অমৃত, অদোমগী পাউতাক্না লৈবাক্তা অনৌবা মাইকৈ তাক্কনি হায়বগী ঐহাক্না থাজবআ থম্মি। অদোমগা লোয়নরিবা নহারোলশিংগী তুংগী অফবা মতম্বু অদোম্না শেমগদবনি। হয়েং নুমিৎকীদমক্তা শেম শাবা হায়বসি লাক্কদৌরিবা চহি কয়াগীদমক্তা শেম শাবনি। অদোম্না হয়েংগী মতমগীদমক্তা শেম শারবদি, অদোমগী ইন্সতিত্যুতকী লাক্কদৌরিবা চহি ১০০গীসু শেম শাগদবনি, মদুদতা ঐখোয়গী অনীংবা অপাম্বা খুদিংমক ফংবা ঙমগনি অমসুং মসিগুম্বা ৱাখল্লোন অসিগা লোয়ননা অদোম পুম্নমক্না কাশীগী শেংলবা লমদমদা লৈরি। ইমা গঙ্গাগী তোর্বান্দা লৈবিরি। সংস্কৃতীগী মরী লৈনবা চৎনবীশিং অসিদি ইথিল পীবা ঙম্বা চৎনবীনি। মসিগুম্বা চৎনবীদগী অদোম্না অমৃত খরদি শোইদনা ফংদুনা হনখিগনি। মসিনা লাক্কদৌরিবা অমৃত কালগী মতমদা ভারতকী নুংঙাই য়াইফরবা তুংগী লম্বী শেম্বদা য়াম্না কান্নরক্কনি। ঐহাক্না ঙসিগী থৌরম অসিবু শীন-লাঙবগীদমক্তা বিভাগপু অমুক হন্না থাগৎচরি। অদোম্না থৱাই হকচাং য়াওনা থৌরমসিদা শরুক য়াবীরি। মথংগী নুমিৎ নিনি-হুম্নিদা অদোম্না চোকথবা ফাওরোই হায়বা ঐহাক্না থাজৈ। ঐহাক্না থৌরম অসি ফম্না ফম্না শুম য়েংলম্বদা, অদোম্না নুমিৎ হুম্নিগী মতুংদা করি তৌগনি হায়না খল্লম্বনি। অদুবু, অদোমদি একাদমিক মালেমগী মীওইনি, অদোম্না থৌরম অসিগী কান্নবশিংবু তুংলমচত্তা শোইদনা পীগনি হায়বগী ঐহাক্না থাজৈ। মসিগীদমক্তা অদোম্বু ঐহাক্না য়াইফ পাউজেল পীজরি।

অদোম্বু হন্না-হন্না থাগৎচরি।

****

(রিলিজ আই.দি.: 1840085) ভিজিতর কাউন্তর : 130