লৌউ-শিংউ অমসুং লৌমীশিংগী য়াইফ য়ুম্বাল মন্ত্রী, শ্রী নরেন্দ্র সিংহ তোমারনা চাউখৎ-থৌরাংগী মতাং লাকপদা ঐখোয়গী মিৎয়েংনা হীরম খুদিংদা তাগদবনি হায়না ফোংদোকখ্রে। “চাউখৎপা হায়রগা লম্বে শোরোক নত্ত্রগা বিলদিং শাবা খক্তা নত্তে, মদুনা অৱাবা তাদুনতা লাক্লবা মীওইশিংগী পুন্সিদা অফবা অহোংবা পুরক্কদবনি, মদুদা তসেংবা চাউখৎপা হায়বদু ওইগনি। শাংলবা মতমগী মতুংদা, শ্রী নরেন্দ্র মোদীগী শক্তমদা, করিগুম্বা অমা পাংথোক্কে হায়বগী অপাম্বা লৈবা মহাক্কুম্বা প্রধান মন্ত্রীগী লুচিং পুরেল অমা ফংলে, মহাক্কী মফমদা ‘স্রেস্থ ভারত’ (খ্বাইদগী ফবা ভারত) হায়বগী মিৎয়েং অমা লৈ অমসুং মদুবু তসেংবা ওইহন্নবা মহাক্না হোৎনরি”, হায়না মহাক্না হায়খি।

শ্রী তোমারনা ৱাফম অসি ইন্দিয়া সস্তেনেবিলিতী কনক্লেবতা হায়খিবনি। লৌউ-শিংউগী কেন্দ্রগী রাজ্য মন্ত্রী, শ্রী কাইলাশ চৌধরীনা অথোইবা মীথুংলেন ওইখি। শ্রী তোমারনা লৈবাক অসিগী মীশিং য়াম্না য়াম্মি, মীওই খুদিংনা মসিদা মশাগী অফবা শরুক তম্নরকপা মতমদা চাউখৎপা ভারত হায়বসিদি শোইদনা ওইথোক্কনি হায়না ফোংদোকখি। “মীপুম খুদিংনা মশাগী থৌদাং য়াগদবনি, খোঙ্কাপ নাইনা চৎকদবনি, সেক্তর খুদিংনা হীরমসিদা শরুক তমগদবনি। মীওইবা খুন্নাইগী পুন্সি খুদিং খুন্নাইগী কান্নবগীদমক্তা কত্থোক্কদবনি, মহৌশা ইমাবু ঙাক শেনগদবনি, লৈবাক্কী সেবা তৌগদবনি অমসুং লৈবাকপু মীথোই মীহেনবগী মাইকৈদা লেপ্পা লৈতনা লমজিংদুনা পুগদবনি”, হায়না মহাক্না হায়খি।

ভারতনা লৌউ-শিংউগী লৈবাক অমা ওইনা, লৌমীশিংগী থৌদাং হায়বসি য়াম্না মরু ওই হায়না শ্রী তোমারনা হায়খি। “করিগুম্বা ঐখোয়না লৌউ-শিংউ সেক্তরদগী লাপথোক্লবা, ঐখোয়গী নাক্তা শেল মরাং কায়না লৈরবা ফাওবদা, লৌউ-শিংউগী পোত্থোক্তি ফংলরোই। ভারতনা নীংতম্বা ফংবা মতমদা, লৌউ-শিংউ সেক্তরনা জি.দি.পি.দা তম্লম্বা শরুক অসি ৫০%নি, অদুবু অতোপ্পা সেক্তরগী শরুক তম্বগী চাংনা হেনগৎলকপগী মতুং ইন্না লৌউ-শিংউগী চাংদি হন্থরকখি, মতমদুদা ওইরম্বা ফিভম অদু মসিমক্নি”, হায়না শ্রী তোমারনা হায়খি। “লৈবাক্কী লৌউ-শিংউ সেক্তর অসি য়াম্না পাক চাওই অমসুং অপুনবা মীশিংগী চাদা ৬০না লৌউ-শিংউগী মখা পোল্লি, মদুদা নত্তনা, ঐখোয়গী মীশিংগী অয়াম্বা মীওইগী পুন্সি মহিংদি লৌউ-শিংউদা য়ুম্ফম অই। মসিগী মরক্তগী, অপুনবা মীওইশিং অসিগী ৮৬%তি অপীকপা লৌমীনি। মখোয়গী ওইনদি, মালেমগী থাক মতুং ইন্না পোত্থোক পুথোকপা হেনগৎহন্নবা মখোয়না লৌউবগী থৌওংদা তেক্নোলোজী শিজিন্নবগী মথৌ তাই অমসুং মসিগী মতুং ইন্না চুনবা শেন্থোক তানবা ঙমগনি হায়বা ঐখোয়না ঙসি নীংথিনা খঙবা তারে”।

শ্রী তোমারনা ঙসিদি লৌউ-শিংউ সেক্তর অসি দ্রোন, দিজিতেল এগ্রী মিসন অমসুং প্রাইভেত ইনভেস্তমেন্তশিংবু পুক্নিং থৌগৎপগী থৌওং কয়াগী খুত্থাংদা অপগ্রেদ তৌরি হায়না ফোংদোকখি। “মমাংগী সরকারগী মতমদা, লৌউ-শিংউবনা ফংফম থোকপা মিৎয়েং চঙবীরমদে অমসুং সরকারনসু থোইদোক্না খনবীদবনা মরম ওইরগা লৌমীশিংগী শেন্থোক হেনগৎলমদে অমসুং লৌমীশিংগী মনাক্তা অকক্নবা রিসোর্স খক্তমক লৈরম্মি, অদুবু, ঐখোয়গী প্রধান মন্ত্রী, শ্রী নরেন্দ্র মোদীগী লুচিং মখাদা লৌমীশিংবু হৌজিক্তি মপাঙ্গল য়াম্না হাপ্লে”, হায়না মহাক্না হায়খি।

শ্রী তোমারনা হায়খিবদা, ভারতকী হোংলক্লিবা শক্তম অসিদা, প্রধান মন্ত্রী কিসান সনমান নিধীদগী লৈবাক্কী লৌমী করোর ১১ মখায়গী বেঙ্ক একাউন্ততা ঙসিদি লুপা ৬০০০/৬০০০ হাপ্লে হায়না ফোংদোকখি। “মসিদি মালেমগী খ্বাইদগী চাউবা প্রোগ্রাম অমনি। হৌজিক ফাওবগী ওইনা, মরক্তা হোবা অমত্তা য়াওদনা, লৌমীশিংদা লুপা করোর লাখ ২ হেন্না পীখ্রে, মসিগী অপুনবা লুপা ৬০০০ অসি লৌমীশিংগী মশাগী বেন্ত একাউন্ততা হকথেংননা হাপ্পনি”, হায়না মহাক্না হায়খি।

এগ্রি স্তার্তঅপ খুমাং চাউশিলহনবা, কে.সি.সি. য়েন্থোকপা অমসুং লুপা করোর লাখ ১৬কী শোর্ত-তর্ম লোনগুম্বা মশক থোকপা খোঙথাং কয়া অমা ঐখোয়না পায়খৎখ্রে হায়না শ্রী তোমারনা হায়খি। “কোবিদ-১৯ লাইচৎ মনুং ফাওবদা, ঐখোয়গী লৌমীশিংনা ফুদ সেক্যুরিতী শোইদনা লৈহনখি অমসুং মসিগী মতমগী মনুংদা ভারতনা চিঞ্জাক পুথোকপগী হীরমদা মালেমগী লুচিংবা ওইনা থোক্লকপদা নত্তনা, ঐখোয়গী লাইরবা মীয়াম করোর ৮০দা কেন্দ্র সরকারনা লেম্না রাসন পীবগী খুত্থাংদা চেং হৱাই ফংহনখি”, হায়না মহাক্না হায়খি।

লৌমী নত্ত্রগা শিন্মীশিংবু ঐখোয়না হন্থনা য়েংগদবা নত্তে, মখোয়গুম্বা লৈবাক্কী স্কিল লৈরবা মীওইশিংগী মেনপাৱর অসিনা ঐখোয়গী লৈবাক্কী চাউরবা পাঙ্গলনি হায়না লৌগদবনি হায়না শ্রী তোমারনা হায়খি।

ঙসিগী থৌরম মনুংদা, মন্ত্রী অনিমক্না ইন্সতিত্যুসন অমসুং কম্পেনীশিংদা মখোয়গী মশক থোকপা থৌদাং কয়াগী শকখঙবা ওইনা মনা পীখি।

*****