قبائلی امور  اور جل شکتی کے وزیر مملکت  جناب بشویسور ٹوڈو آج  اڈیشہ کے شہر  پوری  میں  سردھابالی کے مقام پر  20  ویں لوک میلے  (قومی قبائلی /  لوک گیتوں  اور  رقص کا تہوار) اور  13  کرشی میلے  2022 کا افتتاح کیا۔ ان دونوں میلوں کا مقصد  قبائلی ثقافت کو  محفوظ کرنا اور  زراعت کے شعبے میں جدت طرازی کو فروغ دینا ہے۔ یہ میلے  5  روز  تک جاری رہیں گے اور  24 جون کو اختتام پذیر ہو جائیں گے۔

میلے کا افتتاح کرتے ہوئے جناب  بشویسور ٹوڈو نے اس تقریب کے انعقاد  اور  گزشتہ دو دہائیوں  سے  مالا مال قبائلی فن اور ثقافت کو محفوظ رکھنے کی غرض سے  گراں قدر کوششوں کے لئے منتظمین کا شکریہ ادا کیا۔ انہوں نے سبھی پر زور دیا کہ وہ  کرشی میلے میں اسٹالوں کو دیکھنے جائیں اور  زرعی شعبے  سے متعلق جدت طرازیوں اور تکنیکیوں کی معلومات حاصل کریں۔ وزیر موصوف نے  ریاست میں  قبائلی افراد کی فلاح وبہبود کی غرض سے  مرکزی حکومت کی جانب سے  ہر ممکن مدد  کا بھی یقین دلایا۔

اجتماع سے خطاب کرتے ہوئے اڈیشہ  کے زراعت کے وزیر  جناب  رنیندر پرتاپ سوائن  نے کہا کہ اڈیشہ  قبائلی  ثقافت  سے مالا مال ہے اور  ریاستی معیشت   کے لئے  اُن کا تعاون اہمیت کا حامل ہے۔ انہوں نے مزید کہا کہ  اڈیشہ  زراعت کے شعبے میں ایک سرکردہ ریاست ہے اور  یہ چاول اور دیگر فصلوں کی اضافی  پیدا وار میں نمایاں  حیثیت رکھتی ہے۔

20  ویں لوک میلے  2022 کا  مقصد  قبائلی ثقافت  کی اہمیت  پر زور دینا ہے اور  اس کے  اصلیت اور انفرادیت  کو برقرار رکھنا ہے۔ میلے کے ذریعہ قبائلی برادریوں کے  گروپوں اور افراد  کی مدد کرنے کی کوشش  کی جارہی ہے تاکہ وہ  اپنی  ہنر مندیوں  کا مظاہرہ  کرسکیں  اور اپنی ثقافت کو محفوظ رکھ سکیں۔

13 واں کرشی میلہ زراعت  سے متعلق جدت طرازیوں ، مصنوعات ، طریقہ کار  اور خدمات  فراہم کرنے والی سبھی تنظیموں اور کمپنیوں کے لئے ایک پلیٹ فارم ہے۔ اس نمائش میں  زراعت  اور  اس سے وابستہ صنعت ،  مینوفیکچررس،  متعلقہ کاروباری  اداروں ، تاجروں، بر آمد کاروں اور مشیروں کے سبھی پہلوؤں  کی نمائندگی  موجود ہے۔

آج  کی اس افتتاحی تقریب میں کھاندا پارہ کے رکن اسمبلی اور  سمواد گروپ کے بانی جناب سمیا رنجن پٹنائک اور پوری کے رکن اسمبلی  جناب جینتا کمار سارنگی اور  دیگر ممتاز شخصیات نے شرکت کی۔ یہ میلے  ایک غیر منافع بخش    غیر سرکاری تنظیم (این جی او) شری  شری چھیترا سوچانا (ایس ایس ایس) کے زیر  اہتمام منعقد کئے جارہے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

۰۰۰۰۰۰۰۰

(ش ح-  ع م- ق ر)

U-6726

(Release ID: 1835857) Visitor Counter : 113