ভগৱান বুদ্ধৰ চাৰিটা পবিত্ৰ কপিলবাস্তু ধ্বংসাৱশেষ আজি প্ৰদৰ্শনীৰ বাবে বৌদ্ধ জপ আৰু সংগীত পৰিৱেশনৰ মাজত গান্দন মঠৰ বাটচাগান মন্দিৰৰ সভাগৃহত আনুষ্ঠানিকভাৱে শ্ৰদ্ধাসহকাৰে স্থাপন কৰা হয়।

বৰ্ণাঢ্য অনুষ্ঠানত ভাৰতীয় কেন্দ্ৰীয় আইন আৰু ন্যায় মন্ত্ৰী শ্ৰী কিৰেন ৰিজিজু, মংগোলীয় সংসদৰ অধ্যক্ষ জানদানছাতাৰ গোম্বোজাভ, মংগোলীয়াৰ সাংস্কৃতিক মন্ত্ৰী নমিন চিনবাট, খাম্বা নমুন খান, ভাৰতৰ প্ৰতিনিধি দলৰ সদস্যসকলৰ সৈতে ১৭ জন সাংসদ আৰু অৱতাৰী লামা উপস্থিত আছিল। আজি মংগোলিয়াত বুদ্ধ দিৱস উপলক্ষে আয়োজিত উক্ত অনুষ্ঠানটোত বহু সংখ্যক ভক্তও উপস্থিত আছিল।

অনুষ্ঠানত ভাষণ দি কেন্দ্ৰীয় মন্ত্ৰী শ্ৰী কিৰেন ৰিজিজুৱে কয় যে কেইবা শতিকাৰ পূৰ্বে বৌদ্ধ ধৰ্মৰ চেতনাই ভাৰতৰ হিমালয় পৰ্বতমালাৰ পৰা মংগোলীয়ালৈ যাত্ৰা কৰি আমাৰ মূল্যৱান অংশীদাৰী ঐতিহ্যত পৰিণত হৈছিল। কেন্দ্ৰীয় মন্ত্ৰীগৰাকীয়ে কয় যে এই আধ্যাত্মিক সংযোগে আমাৰ দুয়োখন ৰাষ্ট্ৰৰ লোকসকলক বান্ধি ৰাখিছে। কেন্দ্ৰীয় মন্ত্ৰীগৰাকীয়ে লগতে মন্তব্য কৰে যে মংগোলীয়াৰ বৌদ্ধ ধ্বংসাৱশেষসমূহ ইয়াত ভাৰতীয় ধ্বংসাৱশেষসমূহৰ সৈতে গান্দন মঠত প্ৰদৰ্শন কৰা হৈছে যিয়ে আমাৰ দুয়োখন ভাতৃত্বপূৰ্ণ ৰাষ্ট্ৰৰ মাজত এই অনন্য আধ্যাত্মিক সম্পৰ্কক শক্তিশালী কৰি তোলে।

শ্ৰী কিৰেন ৰিজিজুৱে কয়, "আহক আমি সকলোৱে প্ৰাৰ্থনাত অংশগ্ৰহণ কৰোঁ যাতে ঘৃণা আৰু হিংসাই আমাৰ চিন্তা ভাবনাত কোনোধৰণৰ স্থান নাপায়। পৃথিৱীত শান্তি, সহানুভূতি আৰু শুভবুদ্ধি বিৰাজ কৰক, বুদ্ধৰ শিক্ষা আৰু দৰ্শনে এই পৃথিৱীৰ বহুতো লোকৰ দুখ-কষ্ট নিৰাময় কৰক।"

কেন্দ্ৰীয় মন্ত্ৰীগৰাকীয়ে লগতে কয়, "মোক কোৱা হৈছে যে মংগোলীয়সকলে মংগোলীয় ভাষাত ডাব কৰা ৫৫ খণ্ডৰ ভাৰতীয় বুদ্ধ ধাৰাবাহিকৰ সম্প্ৰচাৰৰ পৰা সান্ত্বনা লাভ কৰিবলৈ সক্ষম হৈছিল আৰু ই মানুহক বৌদ্ধ ধৰ্মৰ পথলৈ অনুপ্ৰাণিত কৰি আহিছে"।

কেন্দ্ৰীয় মন্ত্ৰীগৰাকীয়ে লগতে জনায় যে ভাৰতে ১০৮ খণ্ডৰ পবিত্ৰ মংগোলিয়ান কাঞ্জুৰৰ ১০০ টা ছেট পুনৰ মুদ্ৰণ কৰিছে যিসমূহ শীঘ্ৰেই মঠ আৰু অন্যান্য বৌদ্ধ প্ৰতিষ্ঠানসমূহত বিতৰণ কৰা হ'ব।

অনুষ্ঠানত ভাষণ প্ৰদান কৰি মংগোলীয় সংসদৰ অধ্যক্ষ জানদানছাতাৰ গোম্বোজাভে ১১ দিনৰ বাবে পবিত্ৰ ধ্বংসাবশেষসমূহ প্ৰদৰ্শনৰ অনুমতি দিয়াৰ বাবে আৰু মংগোলিয়াৰ লোকসকলক তেওঁলোকৰ শ্ৰদ্ধাঞ্জলি জ্ঞাপন কৰাৰ আৰু আশীৰ্বাদ লোৱাৰ সুযোগ দিয়াৰ বাবে ভাৰত চৰকাৰক ধন্যবাদ জ্ঞাপন কৰে।

*******************************************************

NB/SK/UD /KG