কলচর মন্ত্রালয়গী আজাদী কা অমৃত মহোৎসব (এ.কে.এ.এম.)গী মখাদা রাজা রাম মোহন রোইগী ২৫০শুবা মপোক কুমওন পাংথোকপগী চহি অমা চুপ্না চত্থগদবা থৌরম হৌদোকপগী থৌরম ঙসি কোলকতাদা পাংথোকখ্রে। মসিনা মথং চহিগী মে ২২ ফাওবা চত্থগনি। হৌদোকপগী থৌরম অসি কোলকাতাগী সোল্ত লেক্তা লৈবা রাজা রাম মোহন রোই লাইব্রেরী ফাউন্দেসন অমসুং কোলকাতাগী সাইন্স সিতী ওদিতোরিয়মদা পাংথোকখি। থৌরম অসি ভারত সরকারগী কলচর মন্ত্রালয়গী ইস্তর্ন জোনেল কলচর সেন্তর (ই.জেত.সি.সি.)না শীন-লাঙবনি। কলচর, তুরিজম অমসুং অৱাং নোংপোক লমদমগী চাউখৎ-থৌরাং (দোনর)গী কেন্দ্র মন্ত্রী শ্রী জি. কিশন রেদ্দীনা থৌরম অসিদা ভর্চুএলগী খুত্থাংদা শরুক য়াখি। নোংচুপ বেঙ্গোলগী রাজ্যপাল, শ্রী জগদীপ ধঙ্করসু থৌরম অসিদা শরুক য়াখি। ঙসি অসি রাজা রাম মোহন রোই লাইব্রেরী ফাউন্দেসনগী ৫০শুবা ফাউন্দেসন দেসু ওইবনি।

শ্রী রেদ্দীনা রাজা রাম মোহন রোইগী আইকোনিক ওইরবা মীতম অমা ভর্চুএলগী মোদতা ঙসি কোলকতাদা মাইখুম হাংদোকখি।

নোংচুপ বেঙ্গোলগী রাজ্যপাল, শ্রী জগদীপ ধঙ্করনা তুংগী চারোন-শুরোন্না রাজা রাম মোহন রোইগী ৱাখল্লোন ইনবগী মতৌ লেপ্লোইদবনি হায়না ফোংদোকখি।

কেন্দ্র মন্ত্রীনা মহাক্কী ৱারোলদা অসুম্না হায়খি, “ঙসি, রাজা রাম মোহন রোইগী ২৫০শুবা মপোক কুমওন অসিদা, ঐহাক্না প্রধান মন্ত্রী, শ্রী নরেন্দ্র মোদী অমসুং ভারত সরকারগী মহুৎ শিন্দুনা, মহাক্না ঐখোয়গী ভারতকী খুন্নাইবু শেমদোকপগীদমক্তা মশক থোকপা থবক কয়া পাংথোক্তুনা তেংবাংলম্বগীদমক্তা থাগৎচবগা লোয়ননা ইকায় খুম্নবা উৎচরি। ঙসি অসি শক্নাইরবা সোসিএল রিফোর্মর রাজা রাম মোহন রোইগী ২৫০শুবা মপোক কুমওন ওইবগা লোয়ননা রাজা রাম মোহন রোই লাইব্রেরী ফাউন্দেসনগী পুৱারী ওইরবা চহি ৫০ ফাবা নুমিৎ ওইবসি য়াম্না নীংথিবা তান চানবা থৌওং অমসু ওইরে”। মহাক্না অসুম্না মখা তাখি, “ঐখোয় পুম্নমক্না ‘নীংতম্বগী অমৃত মহোৎসব’ অসি লৈবাক্কী নীংতম্বগীদমক্তা মথৱাই থাখ্রবা অথৌবা নুপা অমসুং নুপীশিংগী মফমদা ইকায় খুম্নবা উৎপগী মতম্নি হায়বা খঙনরবনি। রাজা রাম মোহন রোইগী মীতম খিল্লিবা অসিনা ঐখোয়না মহাক্কী মফমদা ইকায় খুম্নবা উৎপগী থৌওং অমনি। অসিগুম্বা মরু ওইরবা খোঙথাং অসিগীদমক্তা ঐহাক্না রাজা রাম মোহন লাইব্রেরী ফাউন্দেসনবু থাগৎলি। মহাক্কুম্বা শক্নাইরবা মীওইগী মীতম অসিনা ঐখোয় অমসুং নহারোলগী চারোন শুরোন্দা ইথিল পীগনি। মসিনা মহাক্কী মীথোই মীহেল্লবা থবক, ৱাখল চাউবা অমসুং মহাক্কী পুন্সিগী ফিলোসোফীবু ঐখোয় খুদিংদা নীংশিংহনগনি”।

রাজা রাম মোহন রোইনা পাংথোক্লম্বা অমসুং তেংবাংলম্বশিংবু নীংশিংলদুনা, কেন্দ্র মন্ত্রীনা অসুম্না ফোংদোকখি, “মহাক্কী মমিং হেক পনবা মতমদা, মশক নাইবা সোসিএল রিফোর্মর অমা ওইবতা নত্তনা শক্নাইরবা ফিলোসোফর, এজুকেস্নিস্ত অমসুং পাউমী ওইরম্বা মনীং তম্বা অমসুং মিৎয়েং শান্না ৱাখল খনবা মীওই অমগী শক্তম উবা ফংই। মহাক্না বেঙ্গালী, পর্সিয়ন, অরাবিক অমসুং সংস্কৃত লোলবু মশাগী চহি ১৫শুবা মতমদা খঙবা ঙমখিবা অসিদা মহাক্কী স্কোলার ওইবা ৱাখল্লোন ঐখোয়না খঙবা ঙম্মি। মহাক্না মতুং তারকপদা হিন্দি অমসুং ইংলিশ তমখি। নুপীশিংগী মহৈ-মশিং অমসুং খুন্নাইগী ফিভম শেমদোক্নবগীদমক্তা মহাক্না পাংথোকখিবা থবকশিং অসিগা চাংদম্ননীংঙাই অমত্তা লৈতে। অঙাং ওইনা লুহোংবগী মতাংদা, নুপীশিংগী লুহোংবা য়ারে হায়বগী চহি অসি হেনগৎপগী তঙাই ফদবা য়াম্না লৈরে অমসুং নুপীশিংনা অমুক্কা হন্না লুহোংবা য়াবগী হক ফংগদবনি হায়না মহাক্না য়াম্না চেৎনা থাজখি। অশেংবা মিৎয়েং অমদা য়েংলুবা মতমদা, মহাক অসি হৌজিক্কী মতমগা চুনবা ভারতকী আর্কিতেক্ত ওইবগা লোয়ননা বেঙ্গাল রিনাইসেন্সকী মপাসু ওইরিবনি”।

লৈবাক শিনবা থুংবগী লাইব্রেরীশিংবু হেন্না চাউখৎহনবা অমসুং অপগ্রেদ তৌবগী কলচর মন্ত্রালয়গী হোৎনজমনবু কেন্দ্র মন্ত্রী, শ্রী জি. কিশন রেদ্দীনা থাগৎপা ফোংদোকখি। “কলচর মন্ত্রালয়না নেস্নেল লাইব্রেরী মিসনগী মখাদা স্তেত সেন্ত্রেল লাইব্রেরী অমা অমসুং দিস্ত্রিক্ত লাইব্রেরী অমগী তেংবাং পীরি। মখোয়না লৈবাক শিনবা থুংবগী লাইব্রেরী ৫০দা লুপা করোর ৫৪ হেন্না পীখ্রে। ঐখোয়না লৈবাক শিনবা থুংবদা লৈবা লাইব্রেরীশিংবু পাকথোক চাউথোকহন্নবা অমসুং মতমগা চুনহন্নবা লেপ্তনা হোৎনরি”।

মহাক্না অমুক্কা মখা তাখিবদা, “পব্লিক লাইব্রেরী সীস্তেমশিংবু ‘নীংতম্বগী অমৃত মহোৎসব’কী মতমসিদা মপাঙ্গল হেন্না হাপকদবনি হায়না ঐহাক্না ঙসি রাজ্য অমসুং য়ুনিয়ন তেরিতোরীশিংগী ওথোরিতীশিংগী মফমদা খঙহল্লি। নেস্নেল মোদেল লাইব্রেরীগী প্রোগ্রামশিংদা মীয়াম্না শোইদনা শরুক য়াহনগদবনি অমসুং ঐখোয়না ই-বুক অমসুং দিজিতেল লাইব্রেরীগী মাইকৈদসু খোঙ থাংজিনগদবনি। লৌশিং অমসুং স্কিল খক্তনা ভারতপু মপাঙ্গল লৈবা অমসুং মরোমদোম লেপচবা লৈবাক ওইহনবা ঙমগনি হায়না ঐহাক্না খল্লি। ঐখোয় পুম্নমক্না অনৌবা ৱারেপ লৌবগী মথৌ তারে অমসুং ঐখোয়গী মতিক লৈবা লৈবাক অসিবু বিশ্বগুরু অমুক্কা হন্না ওইহনবগী মাইকৈদা চঙশিনফম থোক্লবনি”।

ঐহাক্না

কোলকাতাগী সাইন্স সিতী ওদিতোরিয়মদা অতোপ্পা থৌরম কয়া অমসু শীন লাঙখি। অঙাংশিংগী সেমিনার অমসুং ক্বিজ প্রোগ্রাম অমসু পাংথোকখি। রাজা রাম মোহন রোইগী পুন্সিগা মরী লৈনবা তোঙানবা ৱাফম কয়া তাকপা মলতিমেদিয়া প্রজেন্তেসন অমসু ঙসিগী থৌরমদা লান্থোকখি।

*****

(Release ID: 1827540) Visitor Counter : 183