অৱাং নোংপোক লমদমগী চাউখৎ-থৌরাং, তুরিজম অমসুং কলচর মন্ত্রালয়, শ্রী জি. কিশন রেদ্দীনা হয়েং, হায়বদি, এপ্রিল ২৮, ২০২২দগী হৌগদবা নীংতম্বগী অমৃত মহোৎসব – অৱাং নোংপোক্কী কুহ্মৈগী মতাংদা ঙসি মিদিয়াগী মফমদা পাউদমখ্রে।

চয়োল অমা চুপ্না চত্থগদবা হরাও-কুহ্মৈ হৌদোকপগী থৌরমশিং অসি রাজ্য ৮ শিনবা থুংবদা মখোয় মশাগী অখন্নবা অমসুং মশক থোকপা থৌওংগা লোয়ননা পাংথোক্কনি হায়না মন্ত্রীনা হায়খি। চয়োল অসিগী মপুং ফারকপগী থৌরম্না মে ৪দা গুৱাহাতীদা কুহ্মৈ লোইশিনবগী থৌরমদা পাংথোক্কনি হায়না মহাক্না মখা তাখি। থৌরম অসিদা রাজ্য ৮গী রাজ্যপাল অমসুং মুখ্য মন্ত্রীশিংগা লোয়ননা ইকায় খুম্ননীংঙাই ওইরবা ভারতকী রাস্ত্রপতি, শ্রী রাম নাথ কোবিন্দনা শরুক য়াগনি।

শ্রী কিশন রেদ্দীনা অৱাং নোংপোক্কী এ.কে.এ.এম. চয়োলগী খুদোংচাবা লৌদুনা মসিগী মনুংদা অৱাং নোংপোক লমদম চাউখৎপগা মরী লৈনবা তঙাই ফদবা হীরম কয়াগী মতাংদা খন্ন-নৈনগনি হায়বগী মতাংদা মিৎয়েং চঙখি। মসিনা চাউখৎপা অমসুং নুংঙাই য়াইফবা অৱাং নোংপোক লমদম অমগী থাজবা, অপাম্বা অমসুং মঙলান মঙফাওনরগনি হায়বগী নুংঙাইবা ফোংদোকপগী থৌওং অমা ওইগনি হায়না মহাক্না মখা তাখি।

এপ্রিল ২৯দগী হৌদুনা, রাজ্যা ৮ শিনবা থুংবদা নুমিৎ খুদিংবু তোঙানবা থীম অমগী মখাদা নুংঙাইবা ফোংদোক্কনি হায়না মহাক্না পাউদমখি। মরু ওইবা থৌরম খুদিংদা মরী লৈনবা কেন্দ্রগী মন্ত্রীশিংনা শরুক য়াগনি হায়না মহাক্না হায়খি। থৌরমশিং অসিনা মরু ওইবা হীরমশিংদা মিৎয়েং চঙবগা লোয়ননা তোঙানবা স্তেকহোলদর কয়াবু অমত্তা ওইনা পুন্সিন্দুনা মীয়ামগী মিৎয়েং অসিগী মতাংদা খন্ন-নৈনবগী খুদোংচাবা অমা পীগনি হায়বগী থাজবা থম্লি।

তোঙান-তোঙানবা প্রোগ্রাম অমসুং থৌরমগী খুত্থাংদা মীয়াম্না শকখঙবিদ্রবা অৱাং নোংপোক্কী অথৌবশিংবু নীংশিংদুনা ইকায় খুম্নবা উৎকনি হায়না মহাক্না মখা তাখি।

থৌরম অসিবু অৱাং নোংপোক লমদমগী তোপ-তোপ্পা মতৌবু মশক তাকপা নাৎকী থৌরম কয়ানা লৈতেংগনি অমসুং মসিদা নীংথিরবা থৌওং পাংথোক্তুনা লমদমসিগী মতিক উৎকনি। এ.কে.এ.এম.-এন.ই. ফেস্তিবেলনা অৱাং নোংপোক্তা নীংতম্বগী অমৃত মতমগী খোল্লাও লাউগনি হায়না মহাক্না অমুক্কা হন্না নীংশিংখি।

দোনর মন্ত্রালয়না কুহ্মৈ অসিগী কো-ওর্দিনেতিং বোদি ওইরি হায়না মন্ত্রীনা মখা তাখি। রাজ্য সরকারশিংদা পাংবা য়াবা মরী লৈনবা মতেং খুদিংমক পাংহন্নবগীদমক্তা রাজ্য খুদিংগী ওফিসর কয়া থমখ্রে হায়না মহাক্না হায়খি।

অৱাং নোংপোক লমদমগী চাউখৎ-থৌরাংগা মরী লৈনবা তোঙানবা হীরম ক্যাগী মতাংদা মন্ত্রীনা ফোংদোকখি। অৱাং নোংপোক লমদমগী লৌউ-শিংউ অমসুং হোর্তিকলচরগী লমদা লৈবা মতিক কয়াবু মপুং ফানা শোইদনা পাংথোকপা ঙমহন্নবগীদমক্তা অখন্নবা এগ্রিকলচর তাস্ক ফোর্স অমসু শেমখ্রে হায়না মহাক্না প্রেসকী মীওইশিংদা পাউদমখি। চাউখৎ-থৌরাং হায়বসিনা লমদমসিগী খ্বাইদগী মরু ওইবা পান্দম্নি অমসুং কেন্দ্র অমসুং রাজ্য সরকারনা লেপ্পা লৈতনা পাউ ফাওনরি হায়না মহাক্না হায়খি।

নীংতম্বগী অমৃত মহোৎসব – অৱাং নোংপোক্কী কুহ্মৈ অসি এপ্রিল ২৮, ২০২২দগী মে ৪, ২০২২ ফাওবা চত্থগনি। নুমিৎ ৭নি খুদিং অসি অখন্নবা থীমদা য়ুম্ফম ওইগনি। মসিগী মনুং চনবশিংদি -

• ইনভেস্তমেন্ত পোতেন্সিএল অমসুং তুংদা ইনর্জীগী তঙাই ফদবা লৈরক্কদবা (এপ্রিল ২৯, শিল্লোং)
• ত্রাইবেলশিংগী য়াইফ য়ুম্বাল অমসুং ঙমখৈ শেন্নবা (এপ্রিল ৩০, ইতানগর)
• এন.ই.দা স্মার্ত সিতী রিভোল্যুসন লাকপা (এপ্রিল ৩০, গেংতোক)
• এন.ই.গী চাউখৎ-থৌরাংদা নুপীশিংগী থৌদাং (মে ১, আগর্তলা)
• এন.ই.দা ইকো-তুরিজম লৈবা (মে ২, আইজোল)
• অৱাং নোংপোক্কী এগ্রি, হোর্তি অমসুং ওর্গানিক পোত্থোকশিংগী মতিক (মে ২, দিমাপুর)
• শান্ন-খোৎনবগী চয়োলগা পুন্না এন.ই.গী শান্ন-খোৎনবগী মতিক হায়বা থৌরম অমা শীন-লাঙখ্রে। অরোইবগী থৌরম্না মে ৩দা ইম্ফালদা পাংথোক্কনি।
• থৌরম লোইশিনবা অমসুং কায়বনগী থৌরম্না মে ৪দা গুৱাহাতীদা পাংথোক্কনি।

*********