নিতি আয়োগনা নীংতম্বগী অমৃত মহোৎসবকী শরুক অমা ওইনা এপ্রিল ২৫, ২০২২গী অয়ুক্কী পুং ৯দগী নুংথিলগী পুং ৪.৩০ ফাওবা নই দিল্লীগী বিগ্যান ভবন্দা “ইন্নোভেতিব এগ্রিকলচর”গী মতাংদা লৈবাক্কী থাক্কী ৱর্কশোপ অমা পাংথোকখ্রে।

নিতি আয়োগকী এগ্রিকলচর অমসুং এল্লাইদ সেক্তরশিং (এ.এ.এস.দি.) ভর্তিকেলগী সেনিয়র এদভাইজর, দাঃ নীলম পতেলনা শরুক য়ারীবা মীয়াম্বু তরাম্না ওক্লদুনা নেচরেল ফার্মিংগী সাইন্স, মসিগী তঙাই ফদবা অমসুং মসি পাংথোকপদা মথৌ তাবা থৌওংশিং নীংথিনা খঙবগী মথৌ তাই ফোংদোকখি। ৱর্কশোপ অসিদা শরুক য়ারীবা মালেমগী অখঙ-অহৈশিংগী লৌশিং, রিসর্চ এক্সপেরিএন্স অমসুং হৈ-শিংবনা ভারতকী সাইন্তিস্ত, রিসর্চ তৌরীবা মীওই অমসুং পোলিসী শেম্বশিংদা লৈবাক অসিদা নেচরেল ফার্মিংবু হেন্না খুমাং চাউশিলহন্নবা কেপাসিতী বিলদিং তৌবদা তেংবাংগনি হায়না মহাক্না ফোংদোকখি।

নিতি আয়োগকী সি.ই.ও., শ্রী অমিতাব কন্তনা মহাক্কী ৱারোল মনুংদা “নেচরেল ফার্মিং অসি হৌজিক্কী মতমগী খ্বাইদগী তঙাইফদবনি অমসুং লৌমীশিংনা নেচরেল ফার্মিংদগী অহেনবা চাগা অমসুং কান্নবা কয়া হকথেংননা ফংহন্নবগীদমক্তা সাইন্তিফিক ওইবা পাম্বৈ মশক খোঙদোকপা অসি য়াম্না মরু ওইবনি” হায়না ফোংদোকখি।

নিতি আয়োগকী মেম্বর, প্রোফঃ রমেশ চন্দনা ৱর্কশোপ অসিদা ৱা ঙাংবদা অসুম্না হায়খি, “ঐখোয়গী চিঞ্জাক লেম্না-পানা লৈবনিনা ঐখোয়না চিঞ্জাক্কী মতাংদা অরুবা শিংনবা থেংনদবনা মরম ওইরগা অসিগুম্বা মহুৎ শিনবা য়াবশিংদা ঐখোয়না খুদোংচাবা অমা পীফম থোকই”। মহাক্না নেচরেল ফার্মিংগী খোঙ্কাপ লাইনা শিজিন্নবা হৌনবা ৱাফমসু থমখি।

ফিশরিজ, এনিমেল হসবেন্দরী অমসুং দাইরীগী কেন্র মন্ত্রী, শ্রী পর্শোত্তম রানানা মচি লৈবা চিঞ্জাক, হকশেল ফবা অমসুং ইম্যুনিতীগী মতাংদা খঙবগী চাংনা লাইচৎ মনুংদা হেনগৎখি হায়না ফোংদোকখি। হীরম অসিগা মরী লৈননা, নেচরেল ফার্মিংনা মচি লৈবা চিঞ্জাক ফংহনবা ঙম্বদা লৌগদবা থৌদাংগী মতাংদা মহাক্না পনখি। চিঞ্জাকশিংবু হেন্না মচি লৈহন্নবগীদমক্তা শা-শনগী মরু ওইবদসু মহাক্না মিৎয়েং চঙখি।

লৌউ-শিংউ অমসুং লৌমীশিংগী য়াইফ য়ুম্বালগী কেন্দ্র মন্ত্রী, শ্রী নরেন্দ্র সিংহ তোমারনা মহৌশাগা চুনবা মওংদা লৌউ-শিংউগী থবক পায়খৎপা, পোত্থোক পুথোকপদা শেল চঙবা হন্থহনবা অমসুং লৌমীশিংদা মগুন লৈবা পোত্থোক্কা লোয়ননা শেন্দোং য়াম্না পীবা থৌওংশিংবু সরকারনা পুক্নিং থৌগত্তুনা লাক্লি হায়না ৱর্কশোপ অসিদা ৱা ঙাংবদা মহাক্না ফোংদোকখি। নেচরেল ফার্মিংদা সাইন্স অমসুং তেক্নোলোজীগী মরু ওইবদসু মহাক্না মিৎয়েং চঙখি।

গুজরাতকী রাজ্যপাল, শ্রী অচার্য়া দেবরতনা নেচরেল ফার্মিংদা মাই ওনশিল্লবা তুংদা মহৈ-মরোং পুথোকপদা শেল চঙবা হন্থহনবা, লৈহাও হেন্না ফগৎপা অমসুং মহৈ-মরোং হেন্না পুথোকপা ঙম্বগী মতাংদা মহাক্না খঙবা অমসুং থেংনখিবশিংবু মীয়ামদা পাউদমখি। নেচরেল ফার্মিং পাংথোকপনা লৌমীশিংগী থবক্না কান্নবা হেন্না পীবা অমসুং অকোয়বগী ফিভম হেন্না ফগৎহনবদা, ঈশিং শিজিন্নবগী হীরমদা মরু ওইনা, তেংবাংগনি হায়না মহাক্না মখা তাখি। “নেচরেল ফার্মিংগী খুত্থাংদা লৌউ-শিংউগী সেক্তরদা ইন্নোভেসন পুরকপা য়াবগী চাউরবা খুদোংচাবা লৈ”, হায়না মহাক্না মখা তাখি।

নিতি আয়োগকী ভাইস চেয়রমেন, দাঃ রজীব কুমারনা নেচরেল ফার্মিংবু পুক্নিং থৌগত্তুনা য়াম্লবা মীয়ামগা, লৌমীশিংগা মরু ওইনা, মসিগী কান্নবা ফংমিন্নবগী মতম অসি চপ চারে হায়না পনখি। রাজ্যশিংনা মখোয়গী লৌশিং অমসুং থেংনখিবশিংগী ৱাফম লান্নবনা লৈবাক শিনবা থুংবদা অনৌবা থৌওং চেনবা লৌউ-শিংউগী থবক পায়খৎপা হৌনবা চাউরবা থৌরাং অমা য়াৎপদা য়াম্না তেংবাংগনি। ৱর্কশোপ অসিগী মতুংদা ভারত্তা নেচরেল ফার্মিং পাংথোকপগী অচৌবা থৌরাং শেমগদবা অসিদা মহাক্না নুংঙাইবা ফোংদোকখি।

ভারত শিনবা থুংবগী রাজ্য ১৩দগী খোমজিনবা মায় পাকপগী ৱারী কয়া মনুং চনবা মায় পাকপগী ৱারী কয়া খোমজিনদুনা লোল অনিদা ফোঙবা চেফোঙ অমসু থৌরমসিগী মনুংদা ফোঙখি।

ৱর্কশোপ অসিদা তেক্নিকেল সেসন মরি য়াওখিঃ ১) রাজ্যশিংদা নেচরেল ফার্মিং পাংথোকপগী পেনেল দিস্কসন, ২) লৈহাও ফববু হঞ্জিলহল্লক্নবা অমসুং অইং-অশা হোংবগী চৈথেং হন্থহন্নবা নেচরেল ফার্মিং পাংথোকপা, ৩) নেচরেল ফার্মিং পুক্নিং থৌগৎপা অমসুং ৪) নেচরেল ফার্মিংদা অনৌবা থৌওং শিজিন্নবা।

উত্তর প্রদেশকী মুখ্য মন্ত্রী, শ্রী য়োগি অদিত্যনাথনা অহানবা তেক্নিকেল সেসনগী মনুংদা ৱর্কশোপ অসিদা ভর্চুএলগী খুত্থাংদা শরুক য়ারকখি অমসুং কার্বন কন্দুনা লৈহাও ফবগী চাং হেনগৎহনবদা তেংবাংবা শন্দা য়ুম্ফম ওইবা লৌউ-শিংউগী পথাপকী মরু ওইবা অমসুং নাৎকী ওইনা মরী লৈনবগী মতাংদা মিৎয়েং চঙখি। মধ্য প্রদেশকী মুখ্য মন্ত্রী, শ্রী শিবরাজ সিংহ চাউহান্না রাজ্যসিনা নর্মদা তুরেলগী তোর্বান অনিমক অমসুং খুঙ্গং ৫২০০দা নেচরেল ফার্মিং পাংথোকহন্নবা থৌরাং য়াৎলিবা অসিগী মতাংদা পনখি। আন্ধ্র প্রদেশকী মুখ্য মন্ত্রী, শ্রী ৱাই.এস. জগন মোহন রেদ্দীনা নেচরেল ফার্মিংদা রিসর্চ পাংথোকপা হেনগৎপগী তঙাই ফদবগী মতাংদা মিৎয়েং চঙলদুনা নেচরেল ফার্মিংগা মরী লৈননা কেন্দ্র সরকারদগী ৯০:১০গী রেসিওদা তেংবাংলকপগী তঙাই ফদবা লৈ হায়না ফোংদোকখি। উত্তরাখন্দগী মুখ্য মন্ত্রী, শ্রী পুশকর সিংহ ধামীনা নেচরেল ফার্মিংগা মরী লৈননা উত্তরাখন্দদা হৌজিক ওইরিবা ফিভম, খুমাং চাউশিনবগী চাং অমসুং শিংনবা কয়াগী মতাংদা পাউদমখি।

অনিশুবা তেক্নিকেল সেসনগী মনুংদা একাদমিসিয়ন, সাইন্তিস্ত, রিসর্চ তৌরিবশিং অমসুং মীথুংলেনশিংনা রিজেনেরেতিব এগ্রিকলচর খুমাং চাউশিলহনবা, নাৎকী ওইবা লৌউ-শিংউগী পথাপকী মতেংনা অইং-অশা হোংবগী চৈথেং হন্থহনবা, ২১শুবা চহি-চা অসিদা তুং কোইনা চৎপা এগ্রো ইকোলোজিকেল ফুদ সীস্তেমগী মরু ওইবা, লৌউ-শিংউবু ক্লাইমেত রেজিলিএন্ত ওইহন্নবা নেচরেল ফার্মিংনা লৌরিবা থৌদাং অমসুং অনৌবা ভারত অমগীদমক্তা গ্রীন ইকোনোমিক্সকী তঙাই ফদবগী মতাংদা খন্ন-নৈনখি।

নেচরেল ফার্মিংবু পাক শন্না পাংথোকপগী তঙাই ফদবা, নেস্নেল রুরেল লাইবলিহুদ মিসন (এন.আর.এল.এম.) রিসোর্সশিং পুন্সিনবা অমসুং মার্কেতিং নেতৱর্ক চাউখৎহনবা অমসুং পাকথোক চাউথোকহনবদা কোওপরেতিব অমসুং এফ.পি.ও.শিংনা লৌবা থৌদাংগা লোয়ননা নেচরেল ফার্মিংগীদমক্তা ক্রেদিত পীবগী ৱাফমশিং অহুমশুবা তেক্নিকেল সেসনগী মনুংদা খন্ন-নৈনখি। দাঃ রাজেশ্বর চান্দেল ( হিমাচল প্রদেশকী প্রকৃতিক খেতী খুসহাল কিসান য়োজনাগী একজেক্যুতিব দাইরেক্তর)না নেচরেল ফার্মিংদা কম্ম্যুনিতীদা য়ুম্ফম ওইবা সর্তিফিকেসন তৌবগী থৌওংগী মতাংদা ৱাফম থমখি। দাঃ বলজিৎ শাহরন (হরিয়ানা এগ্রিকলচর য়ুনিভর্সিতীগী এসোসিএত প্রোফেসর)না “হেন্না ফগৎলবা সোইল বাইওলোজী অমসুং বাইওদাইবর্সিতীনা নেচরেল ফার্মিং খুমাং চাউশিলহনবদা মরু ওইবা থৌদাং য়ারি” হায়না ফোংদোকখি।

খ্বাইদগী অকোনবা তেক্নিকেল সেসন মনুংদা প্রী-মোন্সুন দ্রাই সোৱিংগুম্বা অনৌবা থৌওং, নেচরেল ফার্মিং পাংথোক-পাংথোক্না লৌরোক্কী অরেম-অখাক শেন্নবগী এক্সপেরিএন্স অমসুং নেচরেল ফার্মিংদা ইনপুৎ শেম-শাবগীদমক্তা মেকানাইজ অমসুং ওতোমেতিক ওইহন্দুনা শিজিন্নবগী মতাংদা ৱাফম কয়া খন্ন-নৈনখি। 

কেন্দ্রগী মন্ত্রালয়, রাজ্য সরকার, ইন্দস্ত্রী, লৌমী, একাদমিসিয়ন অমসুং রিসর্চ ইন্সতিত্যুসন, কে.ভি.কে. অমসুং এন.জি.ও., লৈবাক্কী অমসুং মালেমগী লৌউ-শিংউ অমদি মরী লৈনবা সেক্তরশিংগী লুপশিংগী মীহুৎ, ফ্রান্স, ওস্ত্রেলিয়া অমসুং জর্মনীদগী লাকপা মালেমগী দেলিগেৎশিংনা ৱর্কশোপ অসিদা মশানা শরুক য়াবগা লোয়ননা ভর্চুএলগী খুত্থাংদসু শরুক য়ানখি। ৱর্কশোপ অসি য়ুত্যুবতা লিঙ্ক, https://youtu.be/sq2BXK3RFY0 অসিগী খুত্থাংদা লাইব স্ত্রীম তৌখি।

*******************