নাগেলেন্দগী মুখ্য মন্ত্রী নেফ্যু রিওনা সাইন্স ওফ তেক্নোলোজীগী কেন্দ্রগী রাজ্য মন্ত্রী (ইন্দিপেন্দেন্ত চার্জ); আর্থ সাইন্সেসকী রাজ্য মন্ত্রী (ইন্দিপেন্দেন্ত চার্জ); এম.ও.এস. পি.এম.ও., পর্সনেল, পব্লিক গ্রীভান্সেস, পেনসন্স, এতোমিক ইনর্জী এন্দ স্পেস, দা. জিতেন্দ্র সিংহগা উনখ্রে অমসুং চাউখৎ-থৌরাংদগী হৌরগা ওল ইন্দিয়া সর্ভিসেস ওফিসরশিংগী প্লেসমেন্ত য়াওনা রাজ্য অসিগা মরী লৈনবা সমস্যা কয়ামরুমগী মতাংদা খন্নখ্রে।

নেফ্যু রিওনা দা. জিতেন্দ্র সিংহনা থৱায় য়াওবীবা অমসুং অৱাং নোংপোক্কী চাউখৎ-থৌরাংদা মীৎয়েং চংবা অসিবু থাগৎখি অমসুং রাজ্য অসিগী মীয়াম্না মহাকপু মখোয়গী অৱাবগী মতাংদা লৈরিবা সমস্যাশিং অসি মতম চুপ্পদা ফোলো অপ তৌনবা শেম-শাদুনা লৈরিবা, লৈবাক অসিগী কেপিতেলদা মখোয়গী পাউজেল পুবীবরিবা মীশক অমা ওইনা লৌই হায়না ফোঙদোকখি।

নাগালেন্দগী মুক্য মন্ত্রীনা দিপার্তমেন্ত ওফ পরস্নেল এন্দ ত্রেনিং (দি.ও.পি.এন্দ তি)গী ইনচার্জ মন্ত্রীসু ওইরিবা দা জিতেন্দ্র সিংহদা নাগালেন্দদা আই.এ.এস. ওফিসরশিংগী দিপুতেসন অমসুং প্লেসমেন্তকা মরী লৈনবা ইসু খরা য়েংশিনবীনবা মীৎয়েং চিংশিনখি। মসিগী ইসু খুদিংমক অসি মহাক্না দিপার্তমেন্ততা খন্ননবা হংগৎকে অমসুং করি তৌবা য়াবগে হায়বদু য়েংশিন্নবা খংহনগে হায়না মসিগী পাউখুম ওইনা দা. জিতেন্দ্রনা ফোঙদোকখি।

মুখ্য মন্ত্রীনা কেন্দ্রগী মন্ত্রীদা নাগালেন্দদা পাইখৎকদবা অতোপ্পা প্রোজেক্তশিংগী প্রপোজলশিং অদু কদাই ফাওবা য়ৌরবগে হায়বগী মতাংদা কেন্দ্র সরকার তানবীনবা হায়জখি। মসিগী পাউখুম ওইনা কেন্দ্রগী মন্ত্রীনা হায়, মহাক্কী ওফিসনা মসিগী মতাংদা খন্নগনি। 

প্রধান মন্ত্রী শ্রী নরেন্দ্র মোদীনা অৱাংবা থাক্তা মীৎয়েং চংবনা মরুওইবা মরম ওইরগা অৱাং নোংপোক অসি থাজবগী ৱাংমদা অঙকপা ফংনা অহোংবা পুরকখ্রে অমসুং অৱাং নোংপোক্কী চাউখৎ থৌরাংগী মোদেল অসি লৈবাক অসিগী অতোপ্পা মফমশিংদা হৌজিক চাউখৎ থৌরাংগী মোদেল অমা ওইনসু লৌনরি হায়না দা. জিতেন্দ্রনা ফোঙদোকখি। প্রধান মন্ত্রী নরেন্দ্র মোদীনা অহেনবা মীৎয়েং চংবগী য়াম্না মতিক চাবা খুদম অমা হায়রবদি কোবিদ লাইচৎ মমাংদা মহাক্না প্রাধান মন্ত্রী ওইনা অহানবা চহি তরুক পুরিঙৈ মতমদা নাগালেন্দদা তোইনা লাকখিবা অদু য়াওরগা অৱাং নোংপোক লমদমদা মহাক্না খোংচৎ ৫০ হেন্না লাকখিবা অদুনি হায়না মহাক্না ফোঙদোকখি। মসি মমাংগী প্রধান মন্ত্রী পুম্নমক্না অৱাং নোংপোক রাজ্যশিংদা লাকখিবা অপুনবা মশিং অদুদগী হেল্লম্বা য়াই হায়না মহাক্না ফোঙদোকখি।

প্রধান মন্ত্রী নরেন্দ্র মোদীনা মীয়ামগী খন্দুনা অমসুং চেকশিন্না অৱাং নোংপোক লমদমদা হীরম খুদিংমক্তা চাউখৎপা পুরকপা খক্তা নত্তনা লৈবাক শেম্বগী শরুক য়াবদা অৱাং নোংপোক লমদমগী মীয়াম্বু মরুওইবা থৌদাং লৌহল্লি হায়না দা. জিতেন্দ্র সিংহনা ফোঙদোকখি। মসিগী ফল ওইনা অৱাং নোংপোক লমদমগী নহারোলশিংনা অখন্ননা তুরিজম অমসুং এভিএসন ইন্দস্ত্রীদা লৈবাক পুম্বদা লুচিংবগী থৌদাং লৌবা ঐখোয়না উরে অদুগা লৈবাক অসিগী অতোপ্পা মফমশিংদগী লাকপা নহারোলশিংনা হীংনবগী অনৌবা পাম্বৈ অমসুং স্তার্ত অপশিং থীবদা অৱাং নোংপোক লমদম তম্না লাক্নরি।

<><><><><>