ভারত সরকারগী ইলেক্ত্রোনিক্স অমসুং ইনফোর্মেসন তেক্নোলোজী, স্কিল দিভেলপমেন্ত অমসুং ওন্তোপ্রিনর্শিপ মন্ত্রালয়গী কেন্দ্রগী রাজ্য মন্ত্রী, শ্রী রজীব চন্দ্রসেখরনা ঙসি মনিপুরগী চুরাচান্দপুরদা পাংথোকপা থৌরম অমদা নেস্নেল ইন্সতিত্যুৎ ওব ইলেক্ত্রোনিক্স অমসুং ইনফোর্মেসন তেক্নোলোজী (এন.আই.ই.এল.আই.তি.) সেন্তর ৫ শঙ্গাখ্রে। সেন্তরশিং অসি রাজ্য ৩গী মফম ৫, ইম্ফাল অমসুং চুরাচন্দপুর (মনিপুর), আইজোল (মিজোরম), কোক্রাঝার অমসুং তেজপুর (অসম)দা লৈবনি অমসুং মখোয়শিং অসি শঙ্গাবগীদমক্তা ইলেক্ত্রোনিক্সকী খুত্থাংদা শম্নখি।

শঙ্গাবগী থৌরমদা ৱা ঙাংবদা, কেন্দ্র মন্ত্রীনা হায়রিবা সেন্তরশিং অসি শুপ্নগী ত্রেনিং সেন্তরতমক ওইরোই, মখোয়না ঐখোয়গী নহাশিংদা স্কিল পীবা অমসুং থবক অমদি অতোপ্পা খুদোংচাবা কয়া পীবা মফম ওইগনি হায়খি। ভারতনা মালেমগী তেক্নোলোজীগী তঙাই ফদবশিং পীবা ঙম্বা মকোক থোংবা হ্যুমেন রিসোর্স পীবা লৈবাক অমা ওইনবা শেম শাদুনা লৈরবনি হায়না মহাক্না মখা তানা হায়খি। অমসুং এন.আই.ই.এল.আই.তি. অসিনা পি.এম. মোদীগী নহাশিংবু মপাঙ্গল হাপ্পা অমসুং মশাগী কান্ননবা স্কিল পীবগী মঙলানগী লমজিং মৈরানি হায়নসু মখা তাখি।

তোঙানবা সেন্তরশিংগী মহৈরোইশিংগা ৱারী শাবদা, মহাক্না মফম অসিদা লাক্লিবসি মহৈরোইশিংনা এন.আই.ই.এল.আই.তি. সেন্তরশিংবু মওং চুম্না শিজিন্নবনা মখোয়গী তুংগী পুন্সিদা করি কান্নবা পীগনি হায়বগী মতাংদা ৱারী শান্ননীংবগী লাকপনি হায়না ফোংদোকখি।

এম. রামেশ্বর সিংহ, এম.এল.এ., ককচিং এ.সি., দাঃ জয়দীপ কুমার মিশ্রা, দাইরেক্তর জেনেরেল এন.আই.ই.এল.আই.তি. অমসুং পৱন য়াদব, দি.সি. চুরাচান্দপুরনা শঙ্গাবগী থৌরমদা শরুক য়াখিবশিংগী মনুং চনখি।

ঙসিগী অঙনবদা, মহাক্না প্রধান মন্ত্রী কৌশল কেন্দ্র, ইম্ফাল সেন্তর্দসু চত্তুনা সেন্তর অসিগী মহৈরোইশিংগা ৱারী শাখি।

*****

(Release ID: 1755662) Visitor Counter : 207