অৱাং-নোংপোক থংবা লমদমগী চাউখৎ-থৌরাং (দোনর), তুরিজম অমসুং কলচরগী কেন্দ্র মন্ত্রী শ্রী জি কিশন রেদ্দীনা ঙসি হোরিকলচর, ওইল পাম, ওর্গানিক ফার্মিং অমসুং বেম্বু দিবেলপমেন্তগুম্বা সেক্তরশিংদা অখন্নবা মীৎয়েং থম্বগা লোইননা অৱাং-নোংপোক্কী লৌউ-শিংউগী চাউখৎ-থৌরাংদা মপুং ওইবা মীৎয়েং থম্বা ভর্চ্যুএলগী মীফম অমা নই দিল্লীদা অৱাং-নোংপোক থংবা রাজ্য নিপানমক্কী মুখ্য মন্ত্রীশিং, লৌউ-শিংউগী মন্ত্রীশিং, চীফ সেক্রেতরীশিং অমসুং অতৈ মকোক থোংবা ওফিসিএলশিংগা লোইননা পাঙথোকখ্রে। মীফম অসিদা লৌউ-শিংউ অমসুং লৌমীশিংগী য়াইফ-থৌরাংগী কেন্দ্রগী মন্ত্রী শ্রী নরেন্দ্র সিংহ তোমর অমসুং অৱাং-নোংপোক থংবা লমদমগী চাউখৎ-থৌরাং(দোনর) অমসুং কো-ওপরেসন মন্ত্রালয়গী রাজ্য মন্ত্রী শ্রী বি.এল. ভর্মা অমদি দোনর মন্ত্রালয়গী অতৈ মকোক থোংবা ওফিসিএলশিংনা শরুক য়াখি।

মীফম অসিগী পান্দমদি হন্দক্তা নীবা হৌদোকখিবা নেস্নেল মিসন ওন ইদিবল ওইল্স, অৱাং-নোংপোক থংবা লমদমগী বেম্বু দিবেলপমেন্ত পলান, অৱাং-নোংপোক থংবা লমদমগী হোলিস্তিক দিবেলপমেন্ত প্লান অমসুং ওর্গানিক ফার্মিং প্লানগী দিবেলপমেন্ত অসিগুম্বা লৌউ-শিংউ অমসুং লৌমীশিংগী য়াইফ-থৌরাং মন্ত্রালয়গী মখাদা লৈরিবা অখন্নবা স্কীমশিং য়েংশিনবনি। মীফম অসিনা লৌউ-শিংউ অমসুং লৌমীশিংগী য়াইফ-থৌরাং মন্ত্রালয়গী গ্রোস বজেদতরী সপ্পোর্তকী ১০%গী মখাদা পীথখিবা এলোকেসনশিং য়েংশিনবদসু মীৎয়েং চংখি।

অৱাং-নোংপোক থংবা লমদমগী সেক্রেতরী শ্রী ইন্দরজিৎ সিংহনা হৌদোকপগী ৱারোল পীবগা লোইননা মীফম অসিগী হিরমগী মতাংদা ফোঙদোকখি অমসুং নন-এগজেম্পতেদ মন্ত্রালয় ৫৪দগী অৱাং-নোংপোক থংবা রাজ্যশিংগী গ্রোস বজেদতরী সপ্পোর্ত (জি.বি.এস.)গী ১০% অসি অপনবা লৈতনা শীজিন্ননবা খঙহনখ্রে।

মসিগী মতুংদা মীফম অসি ভর্চ্যুএল ওইনা শরুক য়াখিবা লৌউ-শিংউ অমসুং লৌমীশিংগী য়াইফ-থৌরাং মন্ত্রী শ্রী নরেন্দ্র সিংহ তোমরনা ৱারোল পীখি অমসুং মহাক্না কেন্দ্রগী মন্ত্রী শ্রী জি কিশন রেদ্দীনা য়েংশিন মীফম অসি পাঙথোকখিবগীদমক্তা থাগৎখ্রে অমসুং মহাক্না ঐখোয়গী লৈবাক্কী চাউখৎ-থৌরাংগীদমক্তা অৱাং-নোংপোক থংবা লমদম অসি মরু ওই হায়না ফোঙদোকখি। প্রধান মন্ত্রীনা মতম চুপ্পদা লমদম অসিগী চাউখৎ-থৌরাং অমসুং য়াইফ-থৌরাংগী মতাংদা মতম চুপ্পদা থৱাই য়াওনা হোৎনখি হায়নসু প্রধান মন্ত্রীনা ফোঙদোকখি।  “পাম ওইল থাবদা শীংনবশিং লৈ অদুবু নৌনা হৌদোকখিবা নেস্নেল মিসন ওন ইদিবল ওইল্স -ওইল পাম অসিনা পাম ওইল পুথোকপগী মতাংদা গেম চেঞ্জর অমা ওইরগনি। কেন্দ্র সরকারগী স্কীমশিং ইমপ্লিমেন্ত তৌবদা লৈরিবা অপনবশিং অসি খঙদোক্নবা অমসুং মখোয়বু মপুং ফানা ইমপ্লিমেন্ত তৌনবা রাজ্যশিংদা ঐহাক্না হায়জখি”, হায়না মহাক্না মখা তাখি। মন্ত্রীনা লৌউ-শিংউ অমসুং দোনর মন্ত্রালয়শিংগী মরক্তা অৱাং-নোংপোক থংবা লমদমদা লৌউ-শিংউগী ওইবা বিজিনেস সম্মিত অমা পুন্না পাঙথোকমিন্ননবা আশা তৌরি হায়নসু ফোঙদোকখি।

লৌউ-শিংউগী মন্ত্রীনা ৱারোল পীখ্রবা মতুংদা মন্ত্রী শ্রী জি. কিশন রেদ্দীনা ৱরোল পীখি। থৌরম অদুদা ৱা ঙাংলদুনা অৱাং-নোংপোক থংবা লমদমগী চাউখৎ-থৌরাং মন্ত্রালয় (দোনর), তুরিজম অমসুং কলচরগী মন্ত্রীনা ইং কুমজা ২০১৬দা নোর্থিস্তর্ন কাউন্সিল (এন.ই.সি.)দা প্রধান মন্ত্রী শ্রী নরেন্দ্র মোদীনা পীখিবা ৱারোল অদু পনখি “লৈবাক অসিগী নোংচুপ থংবা শরুক্না করিগুম্বা চাউখৎপা ঙম্লবদি, লৈবাক অসিগী অতৈ শরুকশিংনা চাউখৎপা ঙম্লবদি লৈবাক অসিগী অৱাং-নোংপোক থংবা লমদমনা চাউখৎপা ঙম্লোইদবগী মরম অমত্তা লৈতে। অৱাং-নোংপোক লমদম য়াওনা করিগুম্বা লমদম পুম্নমক্না খুমাং চাউশিল্লবদি ভারতনা শোইদনা মাংদা চংশিনবা ঙমগনি হায়নসু ঐহাক্না থাজৈ।” অৱাং-নোংপোক থংবা রাজ্যশিংদা পীথখিবা এলোকেসনশিং অসি নীংথিনা শীজিন্ননবা প্রোএক্তিব ওইবা খোঙথাংশিং পাইখৎপা মথৌ তাই অমসুং নোদেল মিনিস্ত্রী অমা ওইনা দোনর মন্ত্রালয়না মথৌ তাবা তেংবাং পুম্নমক পীগনি হায়নসু মন্ত্রীনা ফোঙদোকখি। “হন্দক্তা প্রধান মন্ত্রীনা লুপা করোর ৭৮ কাইথদুনা নোর্থ ইস্তর্ন রিজনেল এগ্রিকলচরেল মার্কেতিং কোর্পোরেসন (এন.ই.আর.এ.এম.এ.সি.) নৌনা হিংগৎহন্নবা অয়াবা পীখি। প্রধান মন্ত্রী শ্রী নরেন্দ্র মোদীনা লুচিংবা কেন্দ্র সরকারনা অৱাং-নোংপোক থংবা লমদমগী ইচিল-ইনাওশিংগা লোইননা মতম চুপ্পদা অমত্তা ওইনা লেপকনি”, হায়না মহাক্না মখা তাখি। মন্ত্রীনা কোল্দ স্তোরেজ, সপ্লাই চেনশিং চাউথোকহনবা অমসুং বেম্বু অমসুং হনীগী নেস্নেল মিসনশিং অসি মখা তানা খুমাং চাউশিনহনবনা অৱাং-নোংপোক থংবা রাজ্যশিংগী পোতেন্সিএক মপুং ফানা শীজিন্নবা ঙমহনগনি।

মন্ত্রীশিংনা ৱারোলশিং পীখ্রবা মতুংদা দোনর মন্ত্রালয়গী ওফিসিএলশিংনা ভারত সরকারগী লৌউ-শিংউগা মরী লৈনবা তোঙান-তোঙানবা স্কীমশিং অমসুং গ্রোস বজেদতরী সপ্পোর্ত (জি.বি.এস.)কী ১০%গী মখাদা লৌউ-শিংউ মন্ত্রালয়না পীথখিবা ফন্দশিং অসি চহি-চহিগী ওইনা শীজিন্নখিবগী মতাংদা শরুক য়ারিবশিংদা প্রজেন্তেসন অমা পীখি। প্রজেন্তেসন অদুনা লৈবাক্কী অপুনবগী ওইনা পুন্না লুপা করোর ১১,০৪০গী মনুংদা অচাথাওগীদমক্তা অৱাং-নোংপোক থংবা লমদমদা লুপা করোর ৫,৮০০ কাইথখি হায়নসু উৎখি।

মীফম অসিদা অরুনাচল প্রদেশকী মুখ্য মন্ত্রী শ্রী পেমা কান্দু, অসামগী মুখ্য মন্ত্রী শ্রী হিমন্তা বিস্বা সর্ম, মনিপুরগী উপ মুখ্য মন্ত্রী শ্রী ৱাই জোয়কুমার, মেঘালয়গী মুখ্য মন্ত্রী শ্রী কোনরাদ সংমা, মিজোরামগী মুখ্য মন্ত্রী জোরামথাং, নাগালেন্দগী উপ মুখ্য মন্ত্রী শ্রী ৱাও পেত্তোননা শরুক য়াখি। সিক্কিমগী ওইনদি তুরিজম অমসুং সিবিল এভিএসন মন্ত্রী শ্রী বেদু সিংহ পান্থনা শরুক য়াখি অমসুং ত্রিপুরাগীনা লৌউ-শিংউ অমসুং তুরিজম মন্ত্রী শ্রী প্রনাজিৎ সিংহা রোইনা শরুক য়াখি। অতৈ রাজ্যশিংগী লৌউ-শিংউ মন্ত্রীশিংসু শরুক য়াখি।

অৱাং-নোংপোক থংবা রাজ্যশিংগী চীফ সেক্রেতরীশিং অমসুং নোর্থইস্তর্ন কাউন্সিল (এন.ই.সি.)গী সেক্রেতরী অমসুং লৌউ-শিংউ মন্ত্রালয়গী মকোক থোংবা ওফিসিএলশিং অমসুং রাজ্যশিংগী অতৈ মকোক থোংবা ওফিসরশিংনসু শরুক য়াখি।

***

(Release ID: 1750963) Visitor Counter : 226