প্রেস ইনফোর্মেসন ব্যুরো সিংলোংনা ঙসি লৈবাক শিনবা থুংনা পাঙথোক্লিবা অজাদি কা অমৃত মহোতসবকী শরুক অমা ওইনা ‘অনসং হিরোজ ওফ মেঘালয়া’ হায়বা হীরমবা ভর্চুএল ওইনা খন্ন-নৈনবগী থৌরম অমা পাঙথোকখ্রে‍।

ভারতনা নীংতম্বগী ৭৫শুবা চহিগী থৌরম পাঙথোকপগা লোয়ননা খন্ন-নৈনবগী থৌরম অসিদা নীংতম লান্মী, পুৱারী নৈনবা মীওইশিং, অইবা অমদি ব্রিতিসকী মায়োক্তা মীয়ামগী ৱাখল্লোন শাগত্তুনা নীংতম্না হিংগনি হায়না লেপখিবা মীয়ামগী থৌদাংশিংগী মরমদা পুখৎনরকখি‍। ঙসিগী ৱেবিনার অসিনা লৈবাকসিগী নীংতম্ববু নীংশিংলদুনা মেঘালয়াগী শিংথানবিদ্রবা হিরোশিংগী মরমদা ৱাফমশিং ফোঙদোক্নবনা অজাদি কা অমৃত মহোতসবকী থৌরমগী মপুং ওইবা মশক ওইখি‍।

সিনিয়র জর্নেলিস্ত অমসুং সিলোং প্রেস ক্লবকী প্রেসিদেন্ত শ্রী দেবিদ লাইফ্লাংনা তরাম্না ওকপা ৱারোলগা লোয়ননা ৱেবিনার অদু হৌদোক্লদুনা সেসন অদুগী ৱাঙাঙলোয়শিং – ঐস.ও.দি. হিস্তরী, নোর্থ ইস্তর্ন হিল য়ুনিভর্সিতী (নেহু), প্রোফেসর সি.এ. মোলোং, প্রোফেসর এস লমারে, হিস্তরী দিপার্তমেন্ত, নেহু অমসুং ৱিং কমান্দর শ্রী রত্নাকর সিংহ, পি.আর.ও. দিফেন্স, সিলোংবু শক্তাকখি‍।

প্রোফেসর (দোক্তর) মোলোংনা শিংথানবিদ্রবা খাসিগী হিরোশিংগী নীংতম খোঙজঙগী মরমদা মচা খায়না ফোঙদোকখি‍। মহাক্না খাসিগী লমগী চুপ্লি পায়শিল্লক্নবা হোৎনরকখিবা ব্রিতিসশিংগী মায়োক্তা লান লাউথোক্তুনা লান্থেংনখিবা খাসি চীংগী অথোইবা নীংতম লান্মী উ তিরোত সিংগী মথৌনা শিংথাখি‍।

মহাক্না খাসি নীংতম লান্মীশিংবু তোঙান তোঙানবা অইবা অমদি পুৱারী নৈনবশিংনা পুখৎনবা হোৎনখিবশিং পনখি‍। হায়রিবা অইবশিং অসিনা খাসিশিংবু মপাঙ্গল কলহন্দুনা অমদি খাসিশিং অসি কনানো হায়বা শক্তাকপদা কমদৌনা মায় পাকখিবগে হায়বা ৱাফমসি ফোঙদোকখি‍।

‘দি খাসিস অন্দর ব্রিতিস রুল (১৮২৪-১৯৪৭)’ হায়বা লাইরিক ইখিবা প্রোফেসর হেলেন গিরিগী মতাঙদা মহাক্না পনখি‍। পুৱারী নৈনবা অমদি অইবা অসিনা উ তিরোত সিং অমসুং এঙ্গলো-খাসি লানগী মরমদা শুগাইনা ইরম্মি হায়না ফোঙদোক্লদুনা মহাক্না ১৮২৯গী লানগী মরমদা, খাসি হিল্সকী খুল্লাকপশিং অমসুং ব্রিতিসকী মরক্তা মুক্নখিবগী মরমদা য়াম্না শুগাইনা ইরি হায়না মখা তাখি‍।

লৈবাক নিংবগী ইহুলগী মৈরি চুখৎপদা লুচিংবশিংগী থৌদাং – হায়বা নুংঙাইরবা হীরমসিদা মহাক্না নীংথিনা পনখি‍। ভারতকী ইপিকশিংবু খাসি লোন্দা হন্দোকপনা পুৱারী নৈনবশিংদা খাসিশিংবু লৈবাকসিগী অতৈ মফমশিংগী নাৎ অমসুং চৎনবীদা মান্নবা মশক পুথোকপদা কমদৌনা মতেং ওইবগে হায়বগী মতাঙদসু মহাক্না পাউদমখি‍।

মহাক্না অকক্ননা ‘ফাদর ওফ মোদর্ন খাসিস’ হায়না খঙনরিবা বাবু জিবোন রোইগী মচানুপা অহল উ সিব চরন রোইনা হোৎনরম্বশিংগী মরমদা পনখি‍। মহাক্কী পুন্সিগী মরমদা মহাক্না কমদৌনা ব্রিতিসকী মায়োক্তা ইহৌ শাগৎপদা মরু ওইবা থৌদাং লৌখি হায়বগী মতাঙদা ফোঙদোকখি‍। শোত্থহৌরবা খাসি মহৈরোয়শিংদা মহৈ মশিং তমবিনবা মোখারদা লিংখৎখিবা স্কুলগী মতাঙদা প্রোফেসর মোলোংনা অকক্ননা পনখি‍। মহৈ তম্ফমশঙদুগী করিকুলমগী মতাংদা য়ানদবা অমা লৈবদগী অপীকপা শেন্ফম খরনা রোইনা মহৈ তম্ফমশঙ অদুগী অহানবা হেদমাস্তর ওইনা চলাইখিবা অদুবু মহাক্না পনখি‍।

মহাক্না মহাত্মা গান্ধিদা মহাক্না থেংনরিবা ৱাফমশিং ফোঙদোক্লদুনা ফাওনচে অমা ইখি‍। মদুগী পাউখুম ওইনা গান্ধিনা মহাক্কী পাউখুম মহাক্কী চেফোং হরিজনদা ফোঙলবা মতুংদা মহৈ তম্ফমশঙ অদু নীংথিনা মথৌ তৌবা য়ানবা গ্রান্ত ফংহনবদা মতেং পাংখি‍। মহাক্না লালা লাজপত রাইনা ১৯৩৯দা সিলোংদা লাক্লমবা অমদি মহৈতম্ফমশঙদুদা অপীকপা শেন্ফম অমা মতেং পাংলম্ববুসু পনখি‍।

জেনসিয়াশিংগী পুন্সি অমসুং পুৱারীগী মরমদা থীজিনবা অমদি থবক কয়া তৌবগীদমক মমিং লৈরবা প্রোফেসর সোভন এন. লামারে, দিপার্তমেন্ত ওফ হিস্তরী, নোর্থ ইস্তর্ন হিল্স য়ুনিভর্সিতীনা লোইলমগী ৱাখল্লোন অমসুং জেনসিয়া রেজিসতেন্সকী মরমদা হেন্না খঙননবা জেনসিয়াশিংগী নীংতম ইহৌগী মরমদা মচা খায়না থমখি‍।

প্রোফেসর লমারেনা ব্রিতিসকী মায়োক্তা লালহৌ শন্দোকখিবগী খুদম পীখিবা মার্চ ২২, ১৯৮০দা জোৱাইদা লৈবা ব্রিতিস কেম্পতা লান্দাখিবগী মতাঙদা পনখি‍। মে থা ফাওবদা রোলতনা চেরাপুঞ্জিদা লান্ফা কয়া পুখি‍। মখোয়শিংদুদি দলোই, পাতোর অমদি লান অদুদা ইচঙ থৌনা শরুক য়াখিবা মীওইশিংনি‍। মখোয়গী মরক্তা মমিং পনবা য়াবা খরদি রালিয়াংগী হান্নগী দালোই উ নাই; রালিয়াংগী হান্নগী পাতোর উ কত; চংপুংগী হান্নগী দালোই উ স্কাম; চংপুংগী হান্নগী দালোই উ চান; নোংবাহগী হান্নগী পাতোর উ লোং; নরতিয়ংগী হান্নগী দালোই উ মোন; নর্তিয়ংগী উ লোং সুতঙা; নংজঙিগী হান্নগী দালোই উ লোং; সতপত্তোরগী উ পর্বত, উ রিমবাই, উ বিয়োংনচিংবনি‍।

মীচম মরক্তগী উ কিয়াং নংবাহবু নরতিয়ংগী দালোইনা ব্রিতিস ইম্পেরিলিজমগী মায়োক্তা চত্থরিবা লালহৌ লুচিংনবা খন্দুনা লৈ হুকখি‍। উ কিয়াং নংবাহ অমদি মহাক্কী খ্বাইদগী থাজরবা লেফ্তনেন্ত উ চে রংবাহনা কোয়না চত্তুনা মীয়ামবু পুক্নিং থৌগৎখি‍। উ কিয়াং নংবাহগা লোয়ননা থবক তৌমিন্নখিবা লুচিংবশিংদি উ লোং পাদু, উ স্বর সুতঙা, উ মোন রিমবাই, উ বাং, উ বখের, উ মুলোন মিনসো, উ কিয়াং সুলে, উ কত চংপুং অমসুং উ ৱোহ রিয়ংনি‍।

উ কিয়াং নংবাহ হাৎখ্রবা মতুংদা মিনসোগী হান্নগী দালোই অমসুং মরুওইবা লুচিংবা উ মুলোন্না লান অদু মখা চত্থনবা ফিরেপ লৌখি‍। মহাকপু উ কিয়াংগী মহুৎ শিলহৌবা ওইনা লৌনৈ‍। মতম অদুদা রিমবাইগী উ কতকী মচানুপা উ সা নর্তিয়াং ফাখি অমদি জনুৱারী ১৬, ১৮৬৩দা কেপ্তেন মোর্তোন্না ৱায়েল চত্থখি‍। মহাকপু ব্রিতিসকী মায়োক্তা লাল হৌবগী মরাল লৈরে হায়দুনা থৌরি য়ান্দুনা হাৎখি‍।

প্রোফেসর লমারেনা নুপা, নুপী অঙাং ১০৬ ফাখিবা, মখোয়গী মরক্তগী তরানিথোই হাৎখিবা অমদি কয়া অমনা অশোক অপন নংখিবা জোৱাই মনাক্তা জনুৱারী ২৯ অমসুং ৩০, ১৮৬৩দা থোকখিবা নোংমৈ কাপ্নবগী থৌদোক্কী মতাঙদা পনখি‍। ব্রিতিস লান্মীগী মখুত্তগী নান্থোক্নবা মুঙোত তুরেল লানবদা নুপী অমসুং অঙাঙ কয়া ইরাক্নদুনা শীখি হায়বা ৱাফমসু লৈরি‍। ইহৌ খুদিংমক্তা নুপী অমসুং অঙাঙশিংসু য়াওখি অমদি মীশি মীনা য়াম্না থোকখি হায়বা ৱাফমসু পনখি‍।

প্রোফেসর লমারেনা পনখিবদা দিসেম্বর ১দা রেজিস্তেন্স অদুদা শরুক য়াখিবা জেন্সিয়া কয়াসু সুতঙাদগী ফাখি‍। দিসেম্বর ১১দা উ কিয়াং ভৈন ফাখি‍। লান্মীশিংগী খুৎ থোক্নবদা সুতঙাগী দালোই উ সৱর শিখি‍। নোংবাহগী মীয়ামগী খুৎ থোক্নবদা উ কিয়াং নংবাহগী লেফ্তনেন্ত উ চে রংবাহ শিখি‍। মার্চ ২৩, ১৮৬৪দা কম্মিস্নর হোতন্না বেঙ্গল লৈঙাক্তা থাখিবা ফাওনচেদা ইখি: “মীয়াম তমথিনা চৈরাক পীরে অমদি লালহৌদা শৌগৎলম্বা পুম্বা লোইখ্রে”‍।

প্রোফেসর লমারেনা ব্রিতিশিংগী মায়োক্তা মরৈবাক নীংবগী ইথিল পীদুনা অচৌবা থৌদাং লৌরম্বা জেন্সিয়াগী শিংথানবিদ্রবা হিরো কয়াগী মরমদা মচা খায়বা ৱাফম কয়াসু ফোঙদোকখি‍।

সেনিয়র জর্নেলিস্ত অমসুং সিলোং প্রেস ক্লবকী প্রেসিদেন্ত শ্রী দেবিদ লাইফ্লাংনা মহাক্কী ৱারোলদা নীংতম ইহৌদা ‘শিংথানবিদ্রবা হিরোশিং’ য়াওনা নীংতম লান্মীশিংগী থৌদাংগী মরমদা ময়ামদা পাক শন্না খঙহন্নবা ৱেবিনার অদু পাঙথোকপগীদমক্তা প্রেস ইনফোর্মেসন ব্যুরোবু থাগৎখি‍।

মসিদা খঙহৌরিবশিং অসি স্তেত অসিগী স্কুল অমসুং কলেজকী রিগুলর করিকুলমগী শরুক অমা ওইবা মথৌ তাই‍ হায়না মহাক্না ফোঙদোকখি‍। ৱেবিনার অসিদগী ফংলকপা ৱাফমশিং, পেনেলিস্তশিংগী রিকম্মেন্দেসন য়াওনা, স্তেত এজুকেসন দিপার্তমেন্ততা য়ৌহনগদবনি‍। মসিনা শিংথানবিদ্রবা হিরোশিংগী ৱারীশিং স্তেত অসিগী রিগুলর করিগুলমগী শরুক অমা ওইহনবদা মতেং ওইগনি হায়না মহাক্না মখা তাখি‍।

শ্রী এস.এন. প্রধান, এদিসনেল দাইরেক্তর জেনেরেল, নোর্থ ইস্ত জোন, মিনিস্ত্রী ওফ ইনফোর্মেসন এন্দ ব্রোদকাস্তিংনা প্রেস ইনফোর্মেসন ব্যুরোনা ৱেবিনার অসিগী মচা খায়বা ৱাফমশিং পেনেলিস্তশিংগী রিকম্মেন্দেসনগা লোয়ননা স্তেত লৈঙাক্তা য়ৌহনবা ঙমগনি‍ হায়খি‍। প্রধান মন্ত্রী নরেন্দ্র মোদীগী লুচিং মখাদা লৈঙাক অসিনা ইন্দো-পেসিফিক রিজনদা লৈরিবা লৈবাকশিংগা শেন্মিৎলোনগী তেংবাংনবা, নাৎকী মরি, অমদি চাউখৎ থৌরাংগী মরী য়োকখৎনবগীদমক অৱাংনোংপোক লমদমদা শেন্মিৎলোন মপাঙ্গল কনখৎহন্নবা পান্দম থম্লি‍। মন্ত্রালয়না অৱাং নোংপোক স্তেতশিংগী শিংথানবিদ্রবা হিরোশিংগী মরমদা, মখোয়গী পুন্সি অমসুং থবক্কী মরমদা মীয়াম্না হেন্না খঙনহন্নবা মচা খায়বা ৱাফমশিং খোমজিন তাশিনগনি হায়না মহাক্না মখা তাখি‍।

ৱিং কম্মান্দর শ্রী রত্নাকর সিংহ, পি.আর.ও. দিফেন্স, সিলোংনা অজাদি কা অমৃত মহোতসবকী মতাঙদা ইন্তরেক্তিব ৱেবিনার অসি মায় পাক্না পাঙথোকপগীদমক প্রেস ইনফোর্মেসন ব্যুরোগী কাঙবুদা নুংঙাইবা ফোঙদোকখি‍।

মিদিয়া অমসুং কম্ম্যুনিকেসন ওফিসর, পি.আই.বি. সিলোং, শ্রী গোপজিত দাসনা ‘অনসং হিরোজ ওফ মেঘালয়া’ হায়বা হীরমদা পাঙথোকখিবা ঙসিগী সেসন অদুবু মোদরেত তৌখি‍।

****

(Release ID: 1750246) Visitor Counter : 158