হর হর মহাদেব ! হর হর মহাদেব ! থৌরমসিদা ঐগা লোয়ননা শরুক য়ামিন্নরিবা উত্তর প্রদেশকী গভর্নর শ্রীমতি আনন্দিবেন পতেল জী, ইচঙ থৌবা অমদি মীয়াম্না পাম্নবা মুখ্য মন্ত্রী শ্রীমান য়োগী অদিত্যনাথ জী, ভারত্তা লৈবা জপানগী এম্বেসেদর শ্রীমান সুজুকী সাতোসী জী, পার্লিয়ামেন্ততা ঐগী খোঙবু ওইরিবা রাধা মোহন সিংহ জী, কাসীমী মীয়াম পুম্বা অমদি ইকায়খুম্নরবা মরূপশিং!

মমাঙগী থৌরম অমদা ঐনা কাসী মীয়ামদা হায়খিবদুনি হন্দক্কী অসিদি মতম কয়াগী মতুংদা ময়ামগী মরক্তা তিনবগী তাঞ্জা ফংলে‍। অদুবু বনারসকী মওং মতৌগী হায়রুরগদি চহি কয়াগী মতুংদা লাকপা ওইরবসু সহর অসিনা খোয়থুম্লবা মহাউ ময়াম অমা মপুং ফানা পীরি‍। ময়ামসু য়েংবিয়ু, নুমিৎ ফনা থেংলবসু কাসীনা কৌরকপা মতমদা বনারসকী মীয়াম্না অমত্তা ওইনা চাউখৎপগীদমক লেপ্লি‍। মওং অমদা মহাদেবকী থৌজালদগী কাসী মীয়াম্না চাউখৎপগী গঙ্গা অমা চেন্থহল্লি‍। ঙসিমক লুপা করোর কয়াগী প্রোজেক্ত কয়া মীয়ামদা কত্থোকপা অমদি উরেপ উয়ুং তম্বগী থৌরম পাঙথোক্লি, অদুগা হৌজিক রুদ্রক্স কনভেন্সন সেন্তর অসি কাসীগী লিরবা নাৎ অমদি অনৌবা মতমগী মওং মতৌ হায়বদি অরিবা অমদি অনৌবা অনিমক পুল্লবা পোৎশক অমা ওইরে‍। কাসীগী মরমদদি হায়নরিবনি, বাবাগী মফম অসি কৈদৌঙৈদসু পোত্থাদে, কৈদৌঙৈদসু চোকথদে, কৈদৌঙৈদসু লেপ্তে! চাউখৎপগী অনৌবা পন্দোল অসিনা কাসীগী মশক অসিবু হেন্না মপুং ফাহল্লে‍। কোরোনাগী মতমসিদা মালেম পুম্বনা লেপ্তুনা লৈরিবসিদা কাসীদসু মসিগী মমি তারি অমদি চৈথেং ফংলি অদুম ওইনমক চাউখৎপগী ইচেলদি লেপ্তনা চেন্থরি‍। কাসীগী চাউখৎপগী মতৌ অসিগী মহৈনি ঙসি শঙ্গারিবা ‘ইন্তরনেসনেল কো-ওপরেসন এন্দ কনভেন্সন সেন্তর – রুদ্রাক্স’‍। ময়ামগী মফমগী, কাসীগী মীপুম খুদিংমক্কী মফমদা খুদোংচাবা অসি ফংবসিদা ঐনা নুংঙাইবা ফোঙদোকচরি‍। মরু ওইনা ভারতকী অথোইবা মরূপ জপানবু, জাপানগী মীয়ামবু, প্রধান মন্ত্রী শ্রী শুগা য়োশীহিদেবু অমদি এম্বেসেদর শ্রী সুজুকী সাতোশী জীবু হন্না-হন্না থাগৎপা ফোঙদোকচরি‍। অদুগা হৌজিক্তা ঐনা প্রধান মন্ত্রীগী ভিদিও পাউজেলসু য়েংলম্মি‍। মহাক্কী হোৎনজমলনা কাসীনা খুদোল অসি ফংলিবনি‍। প্রধান মন্ত্রী শ্রী শুগা য়োশীহিদে মতমদুদা চীফ কেবিনেত সেক্রেতরী ওইরম্মি‍। মতমদুদগী হৌরগা পি.এম. ওইরবা ফাওবদা লেপ্পা লৈতনা মহাক্না প্রোজেক্ত অসিদা হকথেংননা য়েংশিন্দুনা লাক্লি‍। ভারতপু মহাক্না নুংশিজবা অসিগীদমক লৈবাক মীয়াম পুম্বদা মহাক্কী লমন তোনশিল্লবনি‍।

মরূপশিং,

ঙসি শঙ্গাবগী থৌরমসিদা মহাক্কী মমিং পনবা কাউফদবা মীওই অমসু য়াওরি‍। জাপানদগী ঐগী মরূপ – শিঞ্জো আবে জী‍। ঐ নীংশিংলি, শিঞ্জা আবে জীনা প্রধান মন্ত্রী ওইনা কাসীদা লাক্লম্বদা রুদ্রাক্সকী মতাঙদা মহাক্কা ঐগা য়াম্না শাংনা খন্নখি‍। মহাক্না মহাক্কী থৌমীশিংদা ৱাখল্লোন অসিদা থুনা থবক পায়খৎনবগীদমক হায়খি‍। মদুগী মতুংদা মওং চুম্বা অমদি থৌরাং য়াৎপদা মমিং লৈরবা জাপানগী লৈরিবা চৎনবীদুগা লোয়ননা থবক হৌখি অদুগা ঙসিদি হায়রিবা মমিং লৈরবা শঙলেন অসিনা কাসীগী ফজবা হেনগৎহল্লে‍। শঙলেন অসিদা অনৌবা মতমগী মশকসু য়াওরে অমদি নাৎকী শক্তমসু উরে‍। মসিনা ভারত জাপানগী মরীসু শম্নহল্লে, অমদি তুংদা মরীসিবু পাকথোক চাউথোক্নবগী লম্বীসু য়াৎলে‍। ঐগী জাপান খোঙচত্তা ঐখোয়না লৈবাক অনিগী মরী, মীয়ামগী মরী অমদি অমত্তা ওইবগী ৱাখল্লোনগী মতাঙদা ৱারী শানখি, ঐখোয়না অসিগুম্বা নাৎ অমসুং চৎনবীগী মতাঙদা জাপানগা মরী থম্বগী মওং মতৌ য়াৎখি‍। ঙসি লৈবাক অনিগী হোৎনজমলনা চাউখৎপগা লোয়ন-লোয়ননা অফবা মরীগী অনৌবা পন্দুপ অমা হাংদোকপসিদা নুংঙাইবা ফাওই‍। কাসীগী রুদ্রাক্সকুম্না চয়োল খরগী মমাঙদা গুজরাত্তা জাপানগী জেন লৈকোল অমসুং কাইজেন একাদমীসু মীয়ামদা কত্থোকখি‍। রুদ্রাক্সনা জাপানগী মায়কৈদগী ভারত্তা তম্লকপা নুংশিবগী লৈ পরেংগী খুদোল ওইবগুম জেন লৈকোলনসু লৈবাক অনিগী নুংশিনবগী মরীগী নুংশিরবা লৈনম য়েল্লি‍। মতৌ অসুম্না স্ত্রেতেজিক এরিয়াদা ওইরবসু নৎত্রগা শেন্মিৎলোনগী লমদা ওইরবসু জাপান ঙসিদি ভারতকী খ্বাইদগী নক্নবা মালেমগী মরূপশিংগী মরক্তা অমা ওইরে‍। ঐখোয়গী মরূপ মপাং ওইবগী মরী অসি লমদম অসোমগী মহৌশাগী ওইবা খ্বাইদগী ফবা খোঙবুনি হায়না লৌনরি‍। অনৌবা মতমগী মচাক মথুমশিং অমসুং চাউখৎপগী মতাঙদা য়াম্না মরুওইবা অমদি খ্বাইদগী চাউবা প্রোজেক্তশিংদা জাপান্না ঐখোয়গী ৱাতানফম ওইরি‍। মুম্বাই-অহমদবাদ হায় স্পীদ রেল ওইরবসু, দিল্লী-মুম্বাই ইন্দস্ত্রিএল কোরিদোর ওইরবসু, নৎত্রগা দেদিকেতেদ ফ্রৈত কোরিদোর ওইরবসু জাপানগী মতেংগা লোয়ননা শাগৎলিবা প্রোজেক্তশিং অসিনা অনৌবা ভারতকী থৌনা ওইগদৌরিবনি‍।

মরূপশিং,

ভারত অমসুং জাপানগী ৱাখল্লোনদি ঐখোয়গী চাউখৎপা ঐখোয়গী শক্তমগা লোয়ননা চৎকদবনি হায়বসিনি‍। চাউখৎপা অসি অথোইবা ওইগদবনি, মীয়াম পুম্বগী ওইগদবনি অমদি মীয়াম পুম্নমক অমত্তা ওইনা পুনশিনবা ঙম্বা ওইগদবনি‍। ঐখোয়গী পুরোনশিংদা হায়বিরম্মি –

তত্ত অক্সু বিন্দুতো জাতা, মহা রুদ্রাক্স বৃক্সাকা:‍। মম আগ্যা মহাসেন, সর্বোষাম্ হিত কাম্যয়া‍।‍।

ৱাহন্থোক্তি, পুম্নমক্কী কান্ননবগীদমক, পুম্নমক্কী য়াইফনবগীদমক লাই ইবুংঙো শিবগী মীত্তগী শিন্থরকপা পিরাং মরীক্কী মতৌ লৌদুনা রুদ্রাক্স থোক্লকখি‍। শিবদি পুম্নমক্কীনি, মহাক্কী মিরাং মরীক মীওইবা খুন্নাইগীদি নুংশিনবগী মশক্নি‍। মতৌ অসুম্না ইন্তরনেসনেল কনভেন্সন সেন্তর – রুদ্রাক্সসু মালেম পুম্ববু অমগা অমগা নুংশিননা, নাৎ অমসুং চৎনবীগী লিপুন্না পুনশিন্নবা পাম্বৈ অমা ওইগদৌরিবনি‍। কাসীগী ৱাদি, কাসীদি মালেমগী খ্বাইদগী লিরবা অহিংবা ময়োল্লম্নি‍। শিবদগী হৌরগা সারনাথতা লৈরিবা লাই ইবুংঙো বুদ্ধ ফাওবা, কাসীনা অমত্তা ওইনা নাৎ অমসুং চৎনবীবু চহিচা কয়া য়োকখত্তুনা লাক্লি‍। ঙসিসু তবলাদা ‘বনারসবাজ’কী মতাঙদা ওইরবসু থুমরী, দাদরা, খয়ালতপ্পা অমদি ধ্রুপদ ওইরবসু, ঘমার, কজরী, চৈতী, হোরীনচিংবা বনারসকী মমীং চৎলবা অফাওবা ঈশৈগী মওং মতৌশিং ওইরবসু, সারঙ্গি অমসুং পখাৱজ ওইরবসু, নৎত্রগা শহনাই ওইরবসু, ঐগী কাসীদদি মচি মচিদা ঈশৈ নোংমাইগী মতিক ময়াইনা য়োম্মি‍। মফমসিদা গঙ্গাগী তোর্ব্বান্দা কলা কয়া হৌরকখি, লৌশিংগী পন্দোল লোমখি, অমদি মীওইবা খুন্নাইগী ওইবা মশক মওং কয়া নৈনদুনা লাকখি‍। মরম অসিনা বনারস ঈশৈ-নোংমাইগী, লাইনিং লম্বী পরিংগী, অমদি ৱাখল লৌশিংগী তুংনফম ওইবা মালেমগী চাউরবা মফম অমা ওইহনবা য়াই‍।

মরূপশিং,

অখঙ অহৈশিংগী ওইবা নৈন-মীফম, অচৌবা সেমিনার অমসুং নাৎকী থৌরমশিংগী মতাঙদদি বনারস মশানা চুনরবা মফম অমনি‍। লৈবাক কয়াদগী মীয়াম্না মফমসিদা লাকপা পাম্মি, মফমসিদা থুংলবা পাম্মি‍। অসিগুম্বা ফীভমসিদা মফমসিদা অসিগুম্বা খুদোংচাবশিং ফংলবদি, মচাক মথুম শেমগৎলবদি কলাগী তাইবংগী য়াম্লবা মীয়াম্না বনারসপু মরুওইবা মফম অমা ওইনা লৌনরকপা হায়বসি মশানা তাবনি‍। রুদ্রাক্সনা হায়রিবা ৱাখল্লোনশিং অদুবু লাক্কদৌরিবা নুমিৎশিংদা অশেংবা ওইহলক্কনি, লৈবাক কয়াগী কল্চরেল এক্সচেঞ্জকী মফম অমা ওইরক্কনি‍। খুদম ওইনা হায়রবদা বনারসতা কবি সম্মেলন পাঙথোকপদা মদুবু ভারত পুম্বদগী অমদি মালেম পুম্বদগী মীওইশিংনা পাম্নরি‍। তুংদদি হায়রিবা কবি সম্মেলনশিং অসি মালেমগী ওইবা থাক্তা সেন্তর অসিদা পাঙথোকপা য়ারগনি‍। মফমসিদা মীওই লিশিং ১২০০গী ফম্ফমগ, লোয়ননা ওদিতোরিয়ম অমসুং কন্ফরেন্স সেন্তরশিংসু য়াওরি, গারী খাম্ফমগী খুদোংচাবা লৈরি, অমদি মীমান্নদ্রবশিংগীদমক্তা অখন্নবা থৌরাং শেম্লি‍। মতৌ অসুম্না, হৌখৎবা চহি ৬-৭সিদা বনারসকী ফিশা-লোনশা অমসুং খুৎ-শা হৈববু য়োকখৎনবা, মপাঙ্গল কনখৎহন্নবা থবক কয়া পায়খৎখ্রে‍। মসিনা মরম ওইরগা বনারসি মুকা অমসুং বনারসিগী খুৎশা হৈববু নৌনা অমুক শকখঙনরক্লি‍, মফমসিদা লল্লোন ইতিক্কী খুদোংচাবসু হেনগৎলক্লি‍। রুদ্রাক্সনা হায়রিবা খুদোংচাবশিং অসিবু হেনগৎহনবদা মতেং ওইরগনি‍। মচাক মথুম অসিবু মওং কয়াদা লল্লোন ইতিক্কী থৌওংশিংদা শীজিন্নবা য়ারগনি‍।

মরূপশিং,

লাই ইবুংঙো বিশ্বনাথ মশানা হায়বিরম্মি –

সর্ব ক্ষেত্রেষু ভূপৃষ্থে কাশী ক্ষেত্রম্ চ মে ৱপু:‍।

ৱাহন্থোক্তি, কাসীগী মফম পুম্বা ঐগী শক্লোন্নি‍। কাসীদি তশেংনমক শিবনি‍। হৌখিবা চহি ৭সিদা য়াম্লবা চাউখৎপগী প্রোজেক্তশিংগা লোয়ননা কাসীবু লৈতেংলিবা অসি রুদ্রাক্স য়াওদনা কমদৌনা মপুং ফাগদৌরি‍? অদুগা হৌজিক রুদ্রাক্সনা কাসীদা ফাওরক্লবা মতমসিদদি কাসীদি চাউখৎ মায়কৈদা হেন্না মচু লংলগনি, অমদি কাসীগী মতিকসু হেনগৎলগনি‍। হৌজিক্তি মসি কাসী মীয়ামগী থৌদাং ওইরে, অদুগা রুদ্রাক্সকী মতিকপু মপুং ফানা শীজিন্ননবা ঐনা অখন্নবা ৱাফম থমজরি‍। কাসীগী নাৎকী ফজববু, কাসীগী ফজবা মতিকপু সেন্তর অসিগা শম্নহনবা তাই‍। অদোম্না মায়কৈ অসিদা থবক তৌরকপা মতমদা কাসীবু লৈবাক পুম্বগা অমদি মালেম পুম্বগা শম্নহনগদৌরিবনি‍। সেন্তর অসিনা অসুম অসুম মমিং চৎলকপগা লোয়ননা মসিনা ভারত-জাপানগী মরীবু মালেমদা অনৌবা মশক অমা উৎকদৌরিবনি‍। মহাদেবকী থৌজালগা লোয়ননা সেন্তর অসি কাসীগী অনৌবা মশক অমা ওইরক্কনিো কাসীনা চাউখৎপগী অনৌবা খোঙজেল অমা ফংলগনি হায়না ঐনা মপুং ফানা ফাজৈ‍। অসিগুম্লবা য়াইফরোল অসিগা লোয়ননা ঐ মতাঙসিদা তেনশিল্লগে‍। ঐনা অমুক্কা হন্না জাপান লৈঙাক্কী জাপানগী প্রধানমন্ত্রী জীবু অখন্ননা তৌবিমল খঙবা উৎচরি, অমদি ময়াম পুম্নমকপু শাফনা, নুংঙাই য়াইফনা, তিঞ্জং কায়জংদনা লৈবা ওইসু হায়না বাবাগী মফমদা থৌনিজরি অমদি কোরোনাগী চৎন-কাঙলোন পুম্নমক ঙাকপগী হৈনবী থম্বিয়ু হায়বা ৱাফম থমজরি‍। ময়াম পুম্নমকপু হন্না হন্না থাগৎচরি! হর হর মহাদেব‍।

***