থৌরম অসিদা ঐহাক্কী নাক্তা  তিনবীরিবা পঞ্চায়তী রাজ মন্ত্রী, শ্রী নরেন্দ্র সিংহ তোমারজী, রাজস্থান, মধ্য প্রদেশ, করনাতকা, হরিয়ানা, অরুনাচল প্রদেশ, উত্তর প্রদেশ, অরুনাচল প্রদেশ, অন্ধ্র প্রদেশ অমসুং উত্তরাখন্দগী ইকায় খুম্ননীংঙাই ওইরবা মুখ্য মন্ত্রীশিং, হরিয়ানগী হান্নগী মুখ্য মন্ত্রীজী, রাজ্য কয়াগী পঞ্চায়তী রাজ মন্ত্রী, খুঙ্গং চাউখৎপগী মন্ত্রী, লৈবাক অসিগী গ্রাম পঞ্চায়ৎ কয়াগা মরী লৈনবা শক্নাইরবা মীওইশিং অমসুং হৌজিক্তা নরেন্দ্র সিংহনসু হায়বীখিবগুম্না চাউরাকপা মীওই করোর ৫না থৌরম অসিদা শরুক য়ানবা রেজিস্তর তৌরকখি হায়খ্রিবশিং। অশুক য়াম্বা মীয়াম্না খুঙ্গংশিংগী ওইবা অসিগুম্বা থৌরম অসিদা শরুক য়াবা অসিনা খুঙ্গং চাউখৎনবা পায়খৎলিবা খোঙথাংশিংদা অনৌবা মপাঙ্গল অমসু হাপ্পীরে। অদুগা অদোমগুম্বা য়াম্লবা ইচিল-ইনাও করোর ৫বু ঐহাক্না খুরুমজরি।

ইচিল ইনাওশিং,

পঞ্চায়তী রাজ নুমিৎ অসি ভারতকী খুঙ্গংশিংগী নবনির্মানগী ৱারেপশিংবু অমুক হন্না নীংশিংনবা মরু ওইবা তাঞ্জা অমনি। নুমিৎ অসি ঐখোয়গী গ্রাম পঞ্চায়ৎশিংগী কত্থোকপা, মখোয়না পাংথোকখিবা মশক থোকপা থৌওং কয়াবু নীংশিংবা, মনুং হুৎনা খঙবা অমসুং থাগৎপগী নুমিৎ অমসু ওইরিবনি।

ঐহাক্না ঙসি খুঙ্গং চাউখৎনবগীদমক্তা থাগৎনীংঙাই ওইরবা থবক কয়া পায়খৎখিবা পঞ্চায়ৎ কয়াবু ইকায় খুম্নবা অমসুং মনা পীবগী খুদোংচাবা অমা ফংজরে। ঐহাক্না অদোম খুদিংদা “পঞ্চায়তী রাজ নুমিত”কী য়াইফ-পাউজেল পীজরি। হন্দক্তা ইকুই কুইদনা, রাজ্য কয়াদা পঞ্চায়ৎকী মীখল পাংথোকপা হৌখ্রে অমসুং মফম কয়া অমদা হৌজিকসু পাংথোক্লি, মরম অদুনা ঐখোয়গী নাক্তা অনৌবা মরুপ কয়া অমসু লৈরে। মীয়ামগী অনৌবা মীহুৎশিংবুসু ঐহাক্না থাগৎপা অমসুং য়াইফ-পাউজেল পীজরি।

মরূপশিং,

খুঙ্গং অমসুং লায়রবশিংদা মখোয়গী ময়ুমগী আইনগী ওইবা চে-চাং পীবগী য়াম্না চাউবা অমসুং মরু ওইবা য়োজনা, ‘স্বামিত্ব য়োজনা’ অসি লৈবাক শিনবা থুংবদা ঙসি চৎনবা হৌখ্রে। মমাংগী চহিদগী ময়োজনা অসিবু হৌদোকখিবা মফমশিংগী মরুপ কয়া অমদা প্রোপর্তী কার্দ পীখ্রবনি। মসিগীদমক্তসু, ঐহাক্না থবক অসিগা মরী লৈনবা অমসুং অকক্নবা মতমগী মনুংদা থবক অসিবু মখা তানা পায়খৎনবা হোৎনখিবা মরুপ খুদিংবু ঐহাক্না অমুক্কা হন্না থাগৎচনীংই অমসুং মখোয়গী মফমদা য়াইফ-পাউজেল কয়া অমসু পীজরি। স্বামিত্ব য়োজনা অসিনা খুঙ্গং অমসুং মফমদুগী লায়রবশিংগী মশাদা থাজবা, অমনা অমদা থাজবা অমসুং চাউখৎপগী অনৌবা ইনোৎ অমা হাপকনি। মসিগীদমক্তা ঐহাক্না লৈবাক মীয়াম খুদিংবু থাগৎচরি।

মরূপশিং,

ঐখোয়না চহি অমগী মমাংদা পঞ্চায়তী রাজ নুমিৎকীদমক্তা উন্নখিবা মতমদুদা লৈবাক পুম্বনা কোরোনাগা লান্থেংনখিবনি। মতম অদুদা, ঐহাক্না অদোম খুদিংনা কোরোনাবু অদোমগী খুঙ্গংদা শন্দোরক্তনবা ইশাগী থৌদাং লৌখৎপীয়ু হায়খিবনি। অদোম খুদিংনা কোরোনাবু খুঙ্গংদা শন্দোরকপা থিংবতা নত্তনা মসিগী মরী লৈনবা ৱাফম কয়া খুঙ্গং খুদিংদা খঙহনবগী থৌদাং কয়া নীংথিজনা পাংথোকখি। হন্দক্কী চহিসিদা ঐখোয়গী মাংদা লৈরিবা শিংনবা অসি মমাংগী চহিদগী খরা হেল্লে মরমদি ঐখোয়না লাইচৎ অসিবু খুঙ্গংশিংদা হীরম অমত্তদা য়ৌরক্তনবা হোৎনগদবনি অমসুং মসিবু মপুং ওইনা মাইথীবা পীগদবনি।

মমাংগী চহিদা অদোম্না হোৎনখিবা, লৈবাক্কী খুঙ্গংনা লুচিংবগী থৌদাং লৌখিবা, মসিগী থবক অসিমক হন্দক্কী মতাং অসিদসু থৱাই-হকচাং য়াওনা, লিচৎ-শাজৎ নাইনা অমসুং মীওই কয়া অমগা পুন্দুনা শোইদনা পাংথোক্লবদি শোইদনা মায়-পাকপা ফংগনি। মরমদি, অদোম্না মমাংগী চহিদা পাংথোকখিবা অদু অদোমগী চহি অমগী থবক্তা হৈ-শিংবগী লন্নি। ইরাং অমগী মরমদা ই-পাউ খঙবা হেল্লিবমখৈ মদুদগী নান্থোকপা য়াবগী লৌশিং খঙগনি। মরম অদুনা, ঐহাক্কী লৈবাক্কী, ঐহাক্কী খুঙ্গংগী মীয়াম খুদিংমক, খুঙ্গংদা লুচিংলিবা মীওইশিংনা খুঙ্গংদা কোরোনা থিংবদা মায়-পাক্কনি অমসুং মসিবু নীংথিজনা শেন্নবা ঙমগনি হায়বগী ঐহাক্না থাজবা থম্লি। মতম-মতমগী মতুং ইন্না থোকপা চৎন-কাংলোনশিংবু খুঙ্গংশিংদা নীংথিজনা ইলহন্নবা ঐখোয়না হোৎনগদবনি।

মরূপশিং,

হন্দক্কী মতাং অসিদদি ঐখোয়বু ঙাকথোক্তুনা থম্বীনবা ভেক্সিন লৈরে। মরম অদুনা ঐখোয়না চেকশিন-থৌরাং খুদিংমকসু ইনগদবনি অমসুং খুঙ্গংগী মীওই খুদিংদা ভেক্সিনগী দোজ অনি শোইদনা কাপহন্নবা হোৎনগদবনি। ভারত সরকারনা চহি ৪৫গী মথক্কী মীওই খুদিংদা লেম্না তীকা থাহল্লি; ভারতকী রাজ্য খুদিংদা পাংথোক্লি। হৌজিক্তি, মে ১দগী হৌদুনা চহি ১৮গী মথক্কী মীওই খুদিংসু তীকা কাপ্পা য়ারগনি। অদোম্না তেংবাংবদগী মসিগী খোঙথাং অসি মায়-পাক্লিবনি।

লুরবা তাঞ্জাদা ইমুং অমত্তবু চরা হেন্দুনা তুমহন্দবা, ইমুং খুদিংগী চাকশঙদা মৈ থাহনবা হায়বসি ঐখোয়গী থৌদাংনি। ঙরাংদসু, ভারত সরকারনা প্রধান মন্ত্রী গরীব কল্যানগী খুত্থাংদা চেং-হৱাই লেম্না পীবগী থৌওংবু অমুক হন্না মখা চত্থখ্রে। মে অমসুং জুন থাদা লায়রবা মীওই খুদিংদা চেং-হৱাই লেম্না ফংহল্লগনি। মসিনা করোর ৮০দগী হেনবা লৈবাক মীয়ামদা কান্নবা ফংহনগনি। মসিগীদমক্তা কেন্দ্র সরকারনা লুপা করোর ২৬ হেনবগী শেনফম থাদগনি।

মরূপশিং,

মসিগী হৱাই-চেংৱাই অসি লায়রবশিংগীনি, লৈবাক্কীনি। মসিবু তঙাই ফদবা ইমুং খুদিংদা য়ৌহনবা, খোঙজেল য়াঙনা য়ৌহনবা, মতম চানা য়ৌহনবা হায়বা অসিসু ঐখোয়গী ইথৌদাং ওইগদবনি অমসুং ঐখোয়গী রাজ্য সরকার অমসুং পঞ্চায়ৎকী মরুপশিংনা মসিগী থৌদাং অসি নীংথিজনা পাংথোক্কনি হায়বগী ঐহাক্না থাজবা থম্মি।

মরূপশিং,

গ্রাম পঞ্চায়ৎশিংগী মীহুৎ অমা ওইনা অদোমগী পাংথোকফম থোকপা থৌদাংদি গনতন্ত্রগী মপাঙ্গল হেন্না হাপ্পনি অমসুং খুঙ্গংগী অপাম্বশিংবু ওইথোকহনবনি। ঐখোয়গী খুঙ্গং অমসুং লৈবাক চাউখৎপগীদমক্তা মরোমদোম লেপচবা ঙম্বা অসি য়াম্না মরু ওইবা হীরম অমনি। লৈখিদ্রবা মহাত্মা গান্ধীজী অসুম্না হায়বীরম্মিঃ “আত্মানির্ভর্তাগী ঐহাক্কী ওইবা ৱাহন্থোক্তি মশাগী তঙাই-ফদবা হীরমশিংবু পীবা ঙমজদুনা মরোমদোম লেপচবা ঙম্নবা হোৎনরিবা খুঙ্গং অদুবুনি। অদুবু মরোমদোম লেপচবা ঙম্বা হায়রগা ইশাগী ঙমখৈদগী হেন্দোক্লোই হায়বসু নত্তে”। মহাক্কী ৱাখল্লোন অসি য়াম্না ময়েক শেংই মরমদি অনৌবা খুদোংচাবা কয়া থিদুনা ইশাগী খুঙ্গংবু চাউখৎপগী লম্বীদা পুদুনা তুংলমচৎকীদমক্তা চৎকদবনি।

মরূপশিং,

মমাংগী চহিদা স্বামিত্ব য়োজনা হৌদোকখিবা রাজ্য ৬তা চহি অমগী মনুংদা মসিনা পুরকপা অফবা অহোংবা হৌজিক উবা ফংলে। মসিগী খোঙথাং অসি খুঙ্গংগী লমশিংগী পাক-চাউববু দ্রোন শিজিন্নদুনা ওল্লি অমসুং মশাগী লম লৈজবশিংদা প্রোপর্তী কার্দ “লন থুমগী চে-চাং”সু পীরি। পুংশিং খরা মমাংদসু খুঙ্গং লিশিং ৫গী মীওই লাখ ৪দগী হেনবশিংদা মখোয়গী লমগী “ই.-প্রোপর্তী কার্দ” য়েন্থোকখ্রে। য়োজনা অসিগী মতেংদগী খুঙ্গংশিংদা মশাদা থাজবগী ইথিল অমসুং ঙাক-শেনবীবগী অনৌবা ৱাখল্লোন অমা লাক্লে।

খুঙ্গংগী য়ুমশিংগী মেপ, মশাগী লমগী চে-চাং মখুত্তা পায়জবা মতমদা খুদোংচাদবা লৈবা কয়া অমা অদুমক মাঙখি। মসিনা মরম অদুনা লন-থুমগী মতাংদা খুঙ্গংশিংদা খৎন-চৈনবা থোকপশিংসু হন্থরক্লে, করিগুম্বা মতমদদি ইমুং-মনুং খৎনবগী ৱাথোকসু লৈত্রে। লায়রবা দলিৎশিংদা তাথী-তাওই তৌবীবসু লেপ্লে অমসুং শেঞ্জা থুমজাগী অচৌবা লম্বী অমসু থিংজিল্লে। কোর্ত্তা কাবগী থৌওং কয়াসু হন্থরক্লে, লোইশিল্লক্লে। মশাগী লমগী চে-চাং ফংলবশিংনা বেঙ্কতগী লোন লৌবদসু লায়রগনি।

মরূপশিং,

স্বামিত্ব য়োজনাগী মরু ওইবা ৱাফম অমসু লৈ। য়োজনা অসিগী মনুং চন্না, দ্রোন্না লম অমা ইয়েংশিল্লবা তুংদা, খুঙ্গং পুম্বগী মেপ অমা, লমগী ৱারোল খুদিংমকসু শেমগৎ শাগৎলি। মসিগী মেপশিং অসি শিজিন্নদুনা পঞ্চায়ৎশিংনা খুঙ্গং চাউখৎহন্নবা থবকশিংবু মিৎয়েং শান্না য়েংদুনা, পান্দম অমা থমদুনা অমসুং নুংঙাইগদবা মওংদা পাংথোকপদসু য়াম্না কান্নবা পীরগনি। খুঙ্গংশিংনা কাঙলোন নাইবা মওংদা চাউখৎক্নবগীদমক্তা মসিবু ৱাখল তানা শিজিন্নদুনা তুংলমচৎকীদমক্তা চৎপীয়ু হায়না ঐহাক্না খুঙ্গংগী সর্পঞ্চশিংদা হায়জনীংই।

য়োজনা অসিনা লায়রবশিংগী তেক্ত-কায়দবা , খুঙ্গং অমসুং মখোয়গী শেন্মিৎলোনবু চাউখৎনবা থৌরাং য়াৎপগী থৌওং কয়া মওং অমদা শোইদনা লৈহল্লগনি। ঐহাক্না লৈবাক্কী অতোপ্পা রাজ্যশিংদসু সর্ভে ওফ ইন্দিয়াগা অথুবা মতমদা এম.ও.য়ু.গী খুৎয়েক পীনবগী থবকশিংসু অথূবা মতমদা লোইশিন্নবা তৌরো হায়না হায়জনীংই। মসিগীদমক্তা রাজ্য কয়া অমদা লৈরিবা ভুমীগী আইনশিংদা অহোংবা পুরকপগী মথৌ তাবসু লৈরে। খুঙ্গংগী য়ুম অমগী চে-চাং ফংলবা মতুংদা মীওই অমনা বেঙ্কতগী লোন লৌবা পাম্লকপা মতমদা, বেঙ্কশিংগী মাইকৈদগী মহাক্কী মফমদা খুদোংচাদবা অমত্তা থেংনহন্দনবা রাজ্যশিংনা লৌখৎফম থোকপা থবক কয়াসু লৌখৎলো হায়না ঐহাক্না রাজ্যশিংদা হায়জনীংই। বেঙ্কতগী লোন পীবদা মতিক চারে হায়বগী মওংদা প্রোপর্তী কার্দকী ফোর্মেৎ অমা শেম্নবা ঐহাক্না বেঙ্কশিংদসু হায়গনি। পঞ্চায়ৎকী মীহুৎশিংনসু মফম-মফমগী লৈঙাক্লোইশিংগা পাউ ফাওনদুনা থবক তৌমিন্নবা অমসুং খুঙ্গংগী মীওইশিংদা অচুম্বা ই-পাউ পীবগী থৌদাংসু পাংথোকপা তাই।

মরূপশিং,

ঐখোয়গী খুঙ্গংনা মতম পুম্বদা লৈবাক চাউখৎপা অমসুং নাৎপু য়োকখৎপগী থবকশিংদা লুচিংদুনা লাক্লি। মরম অদুনা, কেন্দ্র সরকারনা ঙসিদি চাউখৎপগী পোলিসী নত্ত্রগা খোঙথাং কয়া পায়খৎপদা খুঙ্গংশিংদা মরু ওইবা পীদুনা তুংলমচৎকীদমক্তা চৎলি। হৌজিক্কী মতমগী ভারতকী খুঙ্গংশিংনা মপাঙ্গল লৈনবা অমসুং মরোমদোম লেপচবা ঙমহন্নবগীদমক্তা ঐখোয়না হোৎনরি। মসিগীদমক্তা পঞ্চায়ৎকী থৌদাং কয়া অমসু হেনগৎলে, মখোয়দা অনৌবা হক কয়া পীবগী থবকসু পাংথোক্লি। পঞ্চায়ৎশিংবু দিজিতেল ওইহন্নবগীদমক্তা খুঙ্গং খুদিংবু ফাইবর নেৎনা শম্নহন্নবা থবকসু কন্না চত্থরিবনি।

য়ুম্থোং খুদিংদা অশেংবা থক্নবা ঈশিং পীনবগীদমক্তা পায়খৎলিবা ‘জল জীবন মিসন’গুম্বা নীংথিরবা য়োজনাবু চলায়বগী থৌদাংসু পঞ্চায়ত্তা পীরিবনি। অসিগুম্বা চাউরবা থবক অসি অদোমগী তেংবাংদগী ঐখোয়না মায়-পাক্না মখা তানা চত্থবা ঙম্লিবনি। খুঙ্গংশিংদা ঙসিদি থবক পীবদগী হৌরগা পক্কাগী য়ুম পীবা ফাওবগী কেন্দ্র সরকারনা চলায়রিবা খোঙথাংশিং অসি গ্রাম পঞ্চায়ৎকী খুত্থাংদগী মখা তানা চত্থরিবনি।

খুঙ্গং চাউখৎপগী হীরমদা অহানবা মিৎয়েং য়েংগদবনি, মসিগা মরী লৈনবা ৱারেপ লৌগদবনি, মতাং অসিদসু পঞ্চায়ৎকী থৌদাং হেনগৎখ্রবনি। অদোম্না অদোমগী খুঙ্গংগীদমক্তা ৱাখল খনগদবনি, খুঙ্গংগী অপাম-পামদবশিংদা য়ুম্ফম ওইদুনা চাউখৎপগী খোঙজেল হাপকদবনি, মসিগীদমক্তা লৈবাক্না অদোমগী পুক্নিং থৌগৎলি অমসুং তেংবাং কয়া অমসু পীরি। খুঙ্গংদা তৌগদবা চাদিংগা মরী লৈনবা পাঙ্গল কয়া অমসু পঞ্চায়ৎশিংদা হকথেংননা পীরিবনি। অপিক-অপিকপা থবক্কীদমক্তা সরকারগী ওফিসশিংদা য়াম্না তোয়না চৎপসু পামদে, মসিগীদমক্তা নখোয়না ৱাখল ৱারি। অদুগা হৌজিক, হৌজিক অদোমদা শেল মনা পীরিবা অসিসু পঞ্চায়ৎকী বেঙ্ক একাউন্ততা হকথেংননা হাপখ্রবনি।

মরূপশিং,

ভারত সরকারনা গ্রাম পঞ্চায়ৎশিংদা লুপা করোর লাখ ১.২৫গী শেনফমসু শিন্নখ্রে। অসিগুম্বা অচৌবা শেনফম অসি পঞ্চায়ৎশিংদা মমাংদা অমুক্তা পীখিদ্রি। শেনফম অসিদগী অহানবা ওইনা পাংথোক্কদবা খুঙ্গংশিংবু লু-নান্না থম্বগী মরী লৈনবা থবকশিং, অশেংবা থক্নবা ঈশিং পীবা অমসুং হকশেলগী সেবাশিংবু হেন্না ফগৎহন্নবা মপুং ওইবা থবকশিং পায়খৎকদবনি। অদুগা, অশুক য়াম্লবা শেনফমশিং অসি খুঙ্গং চাউখৎনবগীদমক্তা থাদরবনিনা পায়খৎলিবা থবক-থৌরম খুদিংমক নুং-পান ফাওনা উবা হায়বসি অদোমগুম্বা খুঙ্গংগী মীওইশিংনা পামগনি। মসিগী থৌদাংশিং অসি অদোমগীনি, অদোম্না পাঙথোক্কদবনি অমসুং অদোম্না য়েংশিনগদবনি।

পঞ্চায়তী রাজ মন্ত্রালয়না মসিগীদমক্তা ‘ই.-গ্রাম স্বরাজ’গী খুত্থাংদা শেল পীথোক-পিশিন তৌববু ওনলাইন্দা পাংথোক্নবা থৌশিল শিন্দুনা থম্লে। শেল পীবা খুদিংমক পব্লিক ফাইনান্স মেনেজমেন্ত সীস্তেম (পি.এফ.এম.এস.)গী খুত্থাংদা পাংথোক্কনি। মসিগা মান্নবা ওইনা, চাদিং তৌবা খুদিংগীদমক্তা ওনলাইন ওদিত তৌদুনা নুং-পান ফাওনা উহন্নবা পথাপ অমসু শেম্লে। পঞ্চায়ৎ কয়ানা মসিগী পথাপশিং অসিবু নীংথিজনা শিজিন্নবা অসিদা ঐহাক্না নুংঙাইবা ফাওই। করিগুম্বা লৈবাক্কী পঞ্চায়ৎশিংগী পরধানশিংনা মসিগী পথাপ অসি শিজিন্নদ্রিবা ওইরগদি, অথুবা মতমদা শিজিন্ননবা ঐহাক্না হায়জনীংই।

মরূপশিং,

হন্দক্কী চহিসিদা ঐখোয়না নীং-তম্বগী চহি ৭৫ ফারগনি। ঐখোয়গী মাংদা শিংনবা কয়া লৈরবসু, ঐখোয়না চাউখৎপগী খোঙজেলদি হেন্না য়াঙখৎহন্নবা হোৎনগদবনি। অদোমসু অদোমগী খুঙ্গংগী চাউখৎপগী পান্দম থম্বীয়ু অমসুং অকক্নবা মতমগী মনুংদা মদুবু মঙফাওনহনবীয়ু। খুদম ওইনা হায়রবদা, অদোম্না গ্রাম সভাশিংদা লু-নান্না লৈবদগী হৌদুনা ঈশিং পীবা, মচি ওইবা চিঞ্জাক ফংহনবা, তীকা থাবা, মহৈ তম্বীবা ফাওবগী খোঙজং অমা পায়খৎপা য়াগনি। ঈশিং পীবগী মরী লৈনবা পান্দম কয়া অদোমগী খুঙ্গংশিংদা থম্বা য়াগনি। অদোমগী খুঙ্গংশিংদা লৈনুংগী ঈশিংগী চাং মতৌ করম্না হেনগৎহনগনি হায়বগী পান্দম থম্বসু য়াই। লৌউ-শিংউববু হার য়াওদনা পাংথোকপা ওইরো, কেমিকেল ফর্তিলাইজর নত্ত্রগা ঈশিং য়াম্না চঙদনা অফবা লৌরোক পুথোকপগী মাইকৈদা খুঙ্গংবু মাং থানা পুবা ওইরো, ঈশিং মরিক-মরিক অমদগী মতৌ করম্না লৌরোক হেনগৎহনগদগে হায়বনচিংবা থৌওং কয়াদা অদোম্না থবক পায়খৎপা য়াই।

খুঙ্গংগী অঙাং খুদিংমক, মরু ওইনা নুপীমচাশিং স্কুল লোইনা চৎপা, কনা অমত্তনা মরক্তা মহৈ তম্বা তোকপা, মসিগী মতাংদা অদোম্না থৌদাং লৌবা য়াই। ওনলাইন্দা মহৈ তম্বদগী হৌদুনা গ্রাম পঞ্চায়ৎনা মশাগী ঙমজবগী মতুং ইন্না লায়রবা ইমুংগী অঙাংশিংবু তেংবাংবা য়াই, মসিদা অদোম্না তেংবাংফম থোকই। ‘মিসন অন্তোদয়া সরৱেক্সন’গী খুত্থাংদা খুঙ্গংগী তঙাই ফদবশিং, মাংদা উরিবা অৱাৎপশিংবু গ্রাম পঞ্চায়ৎ খুদিংনা ৱারোইশিন পীনবা থবক পাংথোকপা য়াই।

অসিগুম্বা তাঞ্জ অসিদা পঞ্চায়ৎশিংগী মন্ত্রা অসি – হিদাকসু, চেকশিনবসু, ওইফম থোক্লে। অদুগা কোরোনাগা মাইয়োক্নদুনা থেংনরিবা লান অসিদা খ্বাইদগী হান্না মায়-পাকপা অসি খুঙ্গংনা ওইগনি, ঐহাক্কী ভারতপু মখোয়না লুচিংগদুনা মায়-পাক্কনি, ঐহাক্কী ভারতকী খুঙ্গংগী লায়রবা মীওই অমসুং মীয়াম খুদিংনা পুন্দুনা মায়-পাক্কনি হায়বগী ঐহাক্না থাজবা থম্লি। অদুগা অদোমগী মায়-পাকপা অসিনা লৈবাক অমসুং মালেমগী মীওইশিংদা লম্বী তাকপীগনি, মসিনি ঐহাক্না অদোমগী মফমদা থম্লিবা থাজবা। মসি, মমাংগী চহিদা অদোম্না থেংনখিবশিং অদুগী মরমদগী ওইগনি। মসিগী থৌদাং অসি অদোম্না নীংথিজনা পাংথোক্কনি অমসুং নুংশী-চান্ননা পাংথোক্কনি, মসিসু অদোমগী তোপ-তোপ্পা মগুন ওইগনি। মীওই অমত্তা চরা হেন্দবা অমসুং কনা অমত্তনা ফত্তনা খন্দবগী মতাংদসু ঐখোয়না খনগদবনি।

কোরোনাগী মাইয়োক্তা থেংনরিবা লান অসিদা অথুবা মতমদা মায়-পাকপা ঙম্বা ওইসনু, অদোমগী খুঙ্গংনা কোরোনা লৈতবা খুঙ্গং ওইবা অমসুং মসিদা অদোম্না মায়-পাকপা ওইসনু হায়না ঐহাক্না য়াইফ-পাউজেল পীজরি। মসিগী থাজবা অসিগা লোয়ননা ঐহাক্না পুম্নমকপু থাগৎচরি। অদোমগী মফমদা অমুক্কা হন্না য়াইফ-পাউজেল পীজরি।

অদোম্বু হন্না-হন্না থাগৎচরি।

*****