জম্মু অমসুং কশ্মিরগী গুল্মার্গতা পাংথোকপা ২শুবা খেলো ইন্দিয়া নেস্নেল ৱিন্তর গেমসপু ভারতকী প্রধান মন্ত্রী, শ্রী নরেন্দ্র মোদীনা ইরাই নুমিত্তা ভর্চুএলগী খুত্থাংদা হৌদোকপগা লোয়ননা পুক্নিং হুনিংঙাই ওইরবা থৌদোক অমা ওইখ্রে। কেন্দ্রগী য়ুথ এফিয়র্স অমসুং স্পোর্ত মন্ত্রী, শ্রী কিরেন রিজিজুনা গুল্মার্গকী গোল্ফ ক্লবতা পাংথোকখিবা থৌরম অদুদা জম্মু কশ্মিরগী লেফতনেন্ত রাজ্যপাল, শ্রী মনোজ সিনহা অমসুং অতোপ্পা মীথুংলেনশিংগা লোয়ননা শরুক য়াখি। লদাখ অমসুং জম্মু কশ্মিরদা মমাংগী চহিদগী হৌদোকখিবা চহিগী ওইবা থৌরম অসি জে. অমসুং কে.গী স্পোর্ত কাউন্সিল অমসুং জে. অমসুং কে.গী ৱিন্তর গেম্স এসোসিএসন্না য়ুথ এফিয়র্স অমসুং স্পোর্ত মন্ত্রালয়গী লমজিং মখাদা শিন-লাঙদুনা পাংথোকপনি। শান-খোৎনবগী থৌরম অসি মার্চ ২ ফাওবা চত্থগনি।

প্রধান মন্ত্রী, শ্রী নরেন্দ্র মোদীনা ভিদিও কনফরেন্সকী খুত্থাংদা ২শুবা খেলো ইন্দিয়া নেসনেল ৱিন্তর গেমসতা  হৌদোকপগী ৱারোল পীখ্রে। থৌরম অদুদা মহাক্না হায়খিবদা ঙসিদগী খেলো ইন্দিয়া ৱিন্তর গেমসকী অনিশুবা ইদিসন হৌরে। মসি জম্মু অমসুং কাস্মিরবু ভারতকী ৱিন্তর গেমশিংগী মরুওইবা মফম অমা ওইনা শেমগৎনবা অচৌবা খোঙথাং অমনি। জম্মু অমসুং কাস্মিরগী শান্নরোইশিং অমসুং লৈবাক্কী মফম কয়াদগী লাকপা শান্নরোইশিংদা মহাক্না য়াইফ-পাউজেল পীখি। মহাক্না হায়খিবদা ৱিন্তর গেমশিংদা থৱায় য়াওবা হেনগৎলত্তুনা পাংথোক্লিবা ৱিন্তর গেমস অসিদা তোঙান-তোঙানবা রাজ্যশিংদগী শরুক য়াবা শান্নরোইগী মশিং শরুক অনি হেনগৎলে। মহাক্না হায়খি মসিগী ৱিন্তর গেমস অসিদগী ফংলকপা লৌশিং অদু শান্নরোইশিংনা ৱিন্তর ওলেম্পিক্সতা শরুক য়াবদা মতেং পাংগনি। জম্মু অমসুং কাস্মিরগী ৱিন্তর গেমস অসিনা শান্ন-খোৎনবগী অনৌবা ফিভম অমা শেমগৎপদা মতেং পাংগনি। মসিগী থৌরম অসিনা জম্মু অমসুং কাস্মিরদা তুরিজমগী লমদা অনৌবা থৌনা অমসুং হরাও-তয়াম্বা অমা পীরগনি। শান্ন-খোৎনবা অসি মালেমগী লৈবাকশিংনা মখোয়গী সোফ পৱার উৎথোক্নবগী মফম অমা ওইরক্লে।

প্রধান মন্ত্রীনা হায়খি শান্ন-খোৎনবদা মালেমগী ওইবা শক্তম অমা লৈজরি অমসুং মসিগী পান্দম অসিনা শান্নবগী লমদা অওনবশিং পুরক্লে। খেলো ইন্দিয়া কেম্পেন্দগী হৌরগা ওলেম্পিক পোদিয়ম স্তেদিয়ম ফাওবগী অচুম্বা পান্দম অমা লৈরি। শান্নরোইশিংনা খ্বাইদগী ৱাংবা মালেমগী ফম্বাক ফাওবা পুখৎনবা মখোঙদগী হৌনা হৈথোই-শিংথোইবা মশক খঙদুনা শান্নরোইশিংবু মতেং পাংলি। হৈ-শিংবা মশক খঙদোকপদগী হৌরগা তীম খনবা ফাওবদা, অরোন-অথুপ লৈহন্দনবা সরকারনা মরু-ওইবা মিৎয়েং চঙলে। শান্নরোইশিং ইকায়খুম্নবা উৎপা অমসুং মখোয়না পাংথোকখিবা থবকশিং শকখঙনবা সরকারনা মতিক চাবা থবক পায়খৎলি।

প্রধান মন্ত্রীনা হায়খি নেসনেল ইজুকেসন পোলিসিদা শান্ন-খোৎনবগী চাউথোকচনিংঙাই ওইবা মফম অমা পীরে। মমাঙদা শান্ন-খোৎনবা অসি অহেনবা ওইনা খন্নরম্বা অদু হৌজিক করিকুলমগী শরুক অমা ওইনা লৌরে অমসুং অঙাংশিংগী লাইরিক তম্বীবগী পথাপ্তা শান্ন-খোৎনবগীসু গ্রেদ পীরগনি। প্রধান মন্ত্রীনা শান্নবগীদমক অৱাংবা থাক্কী মহৈলোয়শঙশিং অমসুং স্পোর্তস য়ুনিভর্সিতীশিং লিংখৎপা হৌরে হায়খি। নহারোলশিংগী শীনফম অমা ওইনবা অমসুং শান্ন-খোৎনবগী ইকোনোমিদা ভারতকী মফম অমা কনবা হেনগৎনবা স্কুলগী থাক্তা স্পোর্তস সাইন্স অমসুং স্পোর্তস মেনেজমেন্ত য়াওহনবগী তঙাই-ফদবা লৈরে হায়না মহাক্না মখা তানা ফোংদোকখি।

মখোয় মশাবু অত্মানির্ভর ভারতকী ব্রান্দ এম্বেসেদরশিংনি হায়না নিংশিংনবা নহা ওইরিবা শান্নরোইশিংদা শ্রী মোদীনা তকশিনখি। শান্ন-খোৎনবগী লমদা শান্নরোইশিংগী হৈ-শিংবগী মতৌ উৎপা য়েংলগা মালেম্না ভারতকী মগুন য়েংলি হায়না প্রধান মন্ত্রীনা মহাক্কী ৱারোল লোইশিনখি।

থৌরম অসিদা, কেন্দ্রগী স্পোর্ত মন্ত্রী, শ্রী কিরেন রিজিজুনা জম্মু অমুং কশ্মিরদা স্পোর্তকী ইকোসীস্তেম্বু মখা তানা চাউখৎহন্নবা তোঙান-তোঙানবা থৌরাং কয়া লাউথোকখি। “ঐখোয়না মফম অসিদা মতমগা চান্নবা খ্বাইদগী ফবা নিংথমথগী স্পোর্ত একাদমী অমা লিংখৎকনি হায়না মমাংদা লাউথোককিহিরবনি। হৌজিক্তি, য়াম্না অথুবগী মনুংদা মালেমগী থাক্তা লৈগদবা ইন্সতিত্যুৎ অসি শানবা থবক-থৌরম খুদিংমক মফম চানা লৈরে হায়না পাউদম্বদা ঐহাক্না হরাওবা ফাওজৈ। মসিগীদমক্তা তঙাই ফদবা শেলসু কায়থখ্রে”।

 “ঐখোয়না তম্পাক অসিগীদমক্তা অপিকপা খেলো ইন্দিয়া সেন্তর ১০০ লাউথোকখিবগী মনুংদা, ৪০গী অয়াবদি হৌজিক ফংলে অমসুং লেমহোউরিবা ৬০গী অয়াবা অসিনা মথংগী শেনবা চহিদা জম্মুদা হাংনবা অয়াবা ফংলগনি। পোত্থারবা শান্নরোইশিং, কোচশিং অসিনা সেন্তরশিং অসি চলায়গনি অমসুং শান্ন-খোৎনবদা তেংবাংদুনা মখোয়না মসিদগী ইকায়-খুম্ননীংঙাই ওইরবা পুন্সি মহিংসু তাঞ্জবা ঙমহনগনি। ঐখোয়না জুদো, ফেন্সিং অমসুং রোৱিংগী দিসিপ্লিন্দা মিৎয়েং চঙদুনা কে.আই.এস.সি.ই. ২ অমসু হাংদোকখ্রবনি। এপ্রিল অমসুং মে ফাওবগী মনুংদা লোইশিনবা য়াগদবা ৱাতর স্পোর্ত ফেসিলিতী অমসু ঐখোয়না শ্রীনগরদা হাংদোক্নবা ৱারেপ লৌরে। ঐখোয়না মাতা ভাইশ্নোদেবী স্পোর্ত কমপ্লেক্সপুসু খেলো ইন্দিয়া একাদমীগী থাক্তা পুখৎনবা ৱারেপ অমসু লৌখ্রে”, হায়না শ্রী রিজিজুনা মখা তাখি।

জম্মু অমসুং কশ্মিরগী লেফতেনেন্ত রাজ্যপাল, শ্রী মনোজ জোশীনা থৌরম হৌদোকপা অসিবু নীংথিনা পাংথোকপগীদমক্তা শান-খোৎনবগী বিভাগপু থাগৎলদুনা হায়খি, “ঐখোয়না গুল্মার্গকী নীংথিরবা তম্পাক অসিদা শান্ন-খোৎনবগী খুত্থাংদা অমত্তা ওইবা, নুংশী-চানবা, পাঙ্গল হাপ্পা অমসুং তংদু-লৈতাবগী ৱারোল অমা মীয়ামদা পীজনীংই। ঐখোয় অসি মালেমগী ৱিন্তর স্পোর্তকী পন্থুংশিংগী মনুংদা ১৪শুবা থাক্তা লৈ অমসুং ঐখোয়গী প্রধান মন্ত্রী, শ্রী রিজিজু, কেন্দ্র সরকার, য়ুথ এফিয়র্স অমসুং স্পোর্ত মন্ত্রালয়, য়ু.তি. স্পোর্ত বিভাগ অমসুং স্পোর্ত কাউন্সিল অমসুং জম্মু কশ্মিরগী নহাশিংগী মপাঙ্গলনা মরু ওইনা শৌগত্তুনা জম্মু কশ্মিরনা ৫শুবা থাক্কী মনুং চনবা ঙমগনি”।

গেম্স অসিগী অনিশুবা থৌরম অসিদা রাজ্য অমসুং য়ুনিয়ন তেরিতরী ২৭কী শান্নরোই ৬০০ য়াওনা মীওই ১২০০না শরুক য়াবগী ফিভম উবা ফংগনি। মসিদা শরুক য়ারিবা শান্নরোইশিংগী মনুংদা ইন্দিয়ন আর্মী অমসুং জৱাহর ইন্সতিত্যুৎ ওফ মাউন্তেন্যারিং অমসুং ৱিন্তর স্পোর্তকী শান্নরোইশিং য়াওগনি। মসিদা য়াওগদৌরিবা মশান্না কয়াগী মনুংদা স্প্রিন্ত, স্পীদ স্কেতিং, আইস হোক্কী, ফিগর স্কেতিং, আইস স্তোক, জাইন্ত শালোম, স্নো বোর্দিং, ভর্তিকেল রেস, ক্রোস কন্ত্রী, স্নোশু, লোং দিস্তেন্স রন্নিং, স্কি মাউন্তেন্যারিং, স্কিয়িং অমসুং নোর্দিক স্কি য়াওগনি।

জম্মু কশ্মিরগী লৈঙাক্লোইশিংনা অপুনবা থৌরম মনুংগীদমক্তা অখন্নবা দাক্তর অমসুং এম্ব্যুলেন্সকা লোয়ননা তেংবাংনবা অমসুং পুন্সি কন্নবগীদমক্তা স্তেৎ দিজাজতর রেস্পোন্স ফন্দগী অখন্নবা কাঙবু অমা মতম চুপ্পদা ফংহন্নবা শেম-শাদুনা থম্লি। মমাংগী চহিদা, য়ুম্বু ওইরিবা জম্মু অমসুং কশ্মিরনা অপুনবা সনাগী মেদল ২৬ ফংদুনা মেদল তেলী অসিগী মকোক ওইখিবনি।

*******