প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্স অমগী খুত্থাংদা অথোইবা মীথুংলেন ওইনা আই.আই.তি. খরগপুরগী ৬৬শুবা কনভোকেসন্দা ৱা ঙাংখ্রে। থৌরম অদুদা কেন্দ্রগী এজুকেসন মন্ত্রী শ্রী রামেশ পোখ্রিয়ল ‘নিশঙ্ক’ অমসুং এজুকেসনগী কেন্দ্রগী রাজ্য মন্ত্রী শ্রী সঞ্জে ধোত্রেনা ইকাই খুম্নরবা মীথুংলেনশিং ওইনা শরুক য়াখ্রে।

প্রধান মন্ত্রীনা হায় নুমিৎ অসি আই.আই.তি.গী মমা-মপাশিং অমসুং ওজাশিংগী মরু ওইবা নুমিৎ ওইবা খক্তা নত্তনা ন্যু ইন্দিয়াগীসু মরু ওইবা নুমিৎ ওইরি মরমদি মহৈরোইশিংনা অপুনবা লৈবাক অসিগী মহুৎ শিল্লি। মহাক্না তম্বা লোইখ্রবা মহৈরোইশিংদা মখোয়না অনৌবা পুন্সিগী খোঙচৎ অমা হৌবা অসিদা স্তার্তঅপশিং লিংখৎনবা অমসুং লৈবাক অসিগী মীওই করোর কয়াগী পুন্সিশিংদা অহোংবা পুরকপা ঙমগদবা অনৌবা পোৎলমশিং পুথোক্নবা হায়খ্রে। মহাক্না হায় ঙসি মখোয়না ফংলিবা দিগ্রী অসি মীওই মিলিয়ন কয়াগী অনীংবা-অপাম্বশিং অদু তাক্লি অমসুং মখোয়না মসি মঙফাওনবা ঙম্নবা হোৎনগদবনি।

প্রধান মন্ত্রীনা হায় ঙসি মথৌ তারিবা অসি হয়েংগী ইন্নোবেসনশিং পুথোক্নবা তুংলমচৎকী মথৌ তারিবশিং অদু খঙনা থবক পাঙথোকপনি। মহাক্না হায় ইঞ্জিনীয়র অমনা পোৎশিং অসি হেন্না কুপথনবা উবা ঙম্মি অমসুং মসিগী ৱাখল্লোন অসিনা তুংলমচৎতা অনৌবশিং পুথোক্নবা অমসুং অনৌবশিং পাঙথোক্নবা য়ুম্ফম ওইরি। মহাক্না মহৈরোইশিংদা পুন্সি মিলিয়ন কয়া চাউখৎহন্নবা অমসুং কন্নবা অমদি লৈবাক অসিগী রিসোর্সশিং কন্নবা পাম্বৈশিং পুথোক্কদবনি হায়না ফোঙদোকখ্রে।

শ্রী নরেন্দ্র মোদীনা মহৈরোইশিংদা মখোয়গী মশাগী চিংনবা অমসুং তুংলমচৎতা অপনবশিং কোকহন্নবা ইশাগী ওইবা লাইৱা ৩ শিজিন্ননবা হায়খ্রে। মহাক্না হায় ইশাগী ৩ মদুদি ইশা-ভাব তাজবা, ইশাদা থাজজবা অমসুং ইশাগী ওইজবা থিদবা অসিনি। মহাক্না মহৈরোইশিংদা মখোয়না তৌবা ঙম্বা অদু খঙজনবা অমসুং মপুং থানা থাজবা থম্বগা লোইননা মাংদা চংশিন্নবা, ইশাগী ওইজবা থীদনা মাংদা চংশিন্নবা পাউতাক পীখ্রে।

প্রধান মন্ত্রীনা হায় সাইন্স অমসুং তেক্নোলোজীগী লমদা হাথু-হাথু তৌরোইদবনি। মহাক্না মখা তারদুনা হায় অদুম্না তৌবনা অদোমনা চত্থরিবা ইন্নোবেসনদা মাইপাকপা ঙমলোই। অদুবু মদুদা নহাক্না মাইথিবা অদু মাই পাকপা অমা ওইনা লৌবা য়াই মরমদি মদুদগী অদোমনা করিগুম্বা খরদি তমশিনবা ঙমহৌগনি। মহাক্না হায় ন্যু ইন্দিয়াগী হোংলক্লিবা দিমান্দশিং অমসুং অনীংবা-অপাম্বশিং থুংহন্নবা ২১শুবা চহিচা অসিদা আই.আই.তি.শিং অসি ইন্দিয়ন ইন্সতিত্যুতস ওফ তেক্নোলোজীদগী ইন্সতিত্যুতস ওফ ইন্দিজিনস তেক্নোলোজিজগী অনৌবা থাক্তা পুখৎপা মথৌ তাই।

শ্রী মোদীনা হায় মালেম অসিনা অইং-অশাগী অহোংবগী শিংনবশিংগা মায়োক্নরিঙৈ মনুংদা ভারতনা ইন্তরনেস্নেল সোলার এলাইএন্স (আই.এস.এ.)গী ৱাখল্লোন হৌদোকখি অমসুং শিজিন্নবা হৌখি। মহাক্না হায় ঙসি ভারত অসি সোলার পাৱর য়ুনিৎ অমগী মমল য়াম্না তাবা লৈবাকশিংগী মনুংদা অমা ওইরি। অদুবু, য়ুমথোং খুদিংদা সোলার পাৱর য়ৌহনবদা শিংনবা কয়া অদুমক লৈরি। মহাক্না মখা তারদুনা হায় ভারতনা অকোইবদা অকাইবা পীবা হন্থবা, মতম কুইনা শিজিন্নবা য়াবা অমসুং য়ুজর ফ্রেন্দলী ওইবা তেক্নোলোজীগী তঙাই ফদবা লৈ।

প্রধান মন্ত্রীনা দিজাজতর মেনেজমেন্ত হায়রিবা হিরম অসি মালেম্না ভারত্তা তমজনীংঙাই ওইনা য়েংলিবা হিরম অমা ওইরি হায়না হায়খ্রে। অচৌবা খুদোংথিবা থোকপা মতমদা, পুন্সিদা নত্তনা ইনফ্রাস্ত্রকচরদসু চাউনা অকাইবা পীখি। মহাক্না মখা তারদুনা হায় চহি অনিগী মমাংদা মহাক্না ৱাফম অসি খঙলকপদগী ভারতনা য়ুনাইতেদ নেসন্সতা কোএলিসন ফোর দিজাজতর রেজিলিএন্ত ইনফ্রাস্ত্রকচর অমা লিংখৎনবা ৱাফম পুখৎখি।

ফোঙদোকখ্রে। মহাক্না আই.আই.তি. খরগপুরনা একাদেমিক রিসর্চপু অওনবা পুরক্নবা ইন্দস্ত্রীগী থাক্কা মরী লৈনবা এ.আই., ইন্তর্নেৎ ওফ থিংস অমসুং মতমগা চুন্নবা কনস্ত্রক্সন তেক্নোলোজীগীদমক হোৎনরিবশিং অসিবু থাগৎপা ফোঙদোকখ্রে। মহাক্না আই.আই.তি. খরাগপুরগী সোফৱেয়র সোল্যুসনশিং অসিসু কোরোনাগা লান্থেংনবদা য়াম্না কান্নবা ওইখি হায়না ফোঙদোকখ্রে। মহাক্না ইন্সতিত্যুৎ অসিনা হেল্থ তেক্নোলীজীগী মতাংদা ফ্যুচরিস্তিক সোল্যুসন পুরক্নবগীদমক্তা ৱাফম কয়াসু থমখি। পর্সনেল হেল্থকেয়র ইক্বিপমেন্তকী মতাংদা অচৌবা কৈথেল অমা লৈরক্লে হায়না মহাক্না ফোংদোকখি। হেল্থ অমসুং ফিৎনেসকা মরী লৈনবা খুৎলায়শিংগী কৈথেলসু য়াম্না চাওখৎলক্লি হায়না মহাক্না হায়খি। মহাক্না হায় ভারত্তা শেল য়াম্না চঙদবা অমসুং অফবা মখলগী পর্সনেল হেল্থকেয়র ইক্বিপমেন্ত পীবা ঙম্নবা তেক্নোলোজীসু পুথোক্কদবনি।

প্রধান মন্ত্রীনা হায় কোরোনাগী মতুংদা ভারত অসি সাইন্স, তেক্নোলোজী, রিসর্চ অমসুং ইন্নোবেসনগী লমদা গ্লোবেল প্লেয়র অমা ওইরক্লে। মহাক্না হায় ইথিল অসিগা লোইননা সাইন্স অমসুং রিসর্চকী লমদা বজেৎ অসিসু চাউনা হেনগৎখ্রে। হৌখিবা নুমিৎ খরনিগী মমাংদা, সরকারনা মেপ অমসুং জিওস্পেসিএল দেতাবু কন্ত্রোলদ তৌরম্বা অদুদগী মনিং তমহনখ্রে হায়না ফোঙদোকখ্রে। খোঙথাং অসিদগী তেক স্তার্ত-অপ ইকোসিস্তেমদা মপাঙ্গল হেন্না হাপ্লগনি, মরোমদোম লেপচবা ঙম্বা ভারতকী কেম্পেনগী খোঙজেলসু হেন্না য়াঙশিহল্লগনি অমসুং লৈবাক অসিগী নহা ওইরিবা স্তার্ত-অপশিং অমসুং ইন্নোবেতরশিংদসু নৌনা মনিং-মখা তম্বা ঙমহল্লগনি।

প্রধান মন্ত্রীনা অনৌবা এজুকেসন পোলিসী অসিবু ইমপ্লিমেন্ত তৌখিনবা আই.আই.তি. খরগপুরনা হোৎনরিবা অসিগীদমক থাগৎখ্রে। মহাক্না ইন্সতিত্যুসন অসিনা ঐখোয়গী তুংলমচৎকী ওইবা ইন্নোবেসন মপাঙ্গল কনখৎহন্নবা লৌশিং অমসুং সাইন্সতা থিজিল-হুমজিলবগী মওং-মতৌ অসিসু থাগৎখ্রে। মহাক্না হায় ভারতকী নীংখা-তমখিবগী চহি ৭৫ শুরকপা অসিগা মপা- চান্ননবা ইন্সতিত্যুত অসিনা পুথোকখিবা মরু ওইবা ইন্নোবেসন ৭৫ কম্পাইল তৌনবা অমসুং মখোয়বু লৈবাক অমদি মালেম পুম্বদা য়ৌহন্নবা ফোঙদোকখ্রে। মহাক্না হায় ইথিলশিং অসিনা লৈবাক অসিদা অনৌবা ইনোৎ অমা হাপলগনি অমসুং থাজবগী ইথিল পীগনি।

কেন্দ্রগী এজুকেসন মন্ত্রী শ্রী রামেশ পোখ্রিয়ল ‘নিশঙ্ক’না থবক থিরিবশিং ওইবগী মহুৎ ওন্তোপ্রিনোরশিং অমসুং থবক পীরিবশিং ওইহন্নবা পান্দম থম্লিবা মহৈরোইশিংগী মতাংদা ৱা ঙাংখ্রে। মহাক্না নেস্নেল তেক্নোলোজী ফোরম অসিনা করম্না লৈবাক অসিগী রিসর্চ ইনফ্রাস্ত্রকচর ফগৎহনগনি হায়বগী মতাংদা ফোঙদোকখ্রে। মহাক্না মহৈরোইশিংদা মরোমদোল লেপচবা ঙম্বা ভারতকী মঙলান অসি মঙ ফাওনবা ঙম্নবা হোৎননবা হায়খ্রে।

এজুকেসনগী কেন্দ্রগী রাজ্য মন্ত্রী শ্রী সঞ্জে ধোত্রেনা লৌউ-শিংউ, ইনর্জী, ঈশিং অসিগুম্বা লমশিং অসি আর এন্দ দি চাউখৎহনবদা মরু ওই হায়না ফোঙদোকখ্রে। মহাক্না আত্মানির্ভর ভারতকী পান্দম মপাঙ্গল কনখৎহন্নবা তেলিকোম, ওতো-তেক, সোলর সেলশিং, ঙাকশেলগুম্বা তেক্নোলোজীগী সেক্তরশিংদা আইদিয়েসন, ইন্নোবেসন, ইনক্যুবেসন অমসুং তেক্নোলোজিকেল সোল্যুসনশিং দিবেলপ তৌনবা ফোঙদোকখ্রে।
ঙসি মহৈরোই ২৮১৫দা দিগ্রীশিং পীখ্রে মসিগী মনুংদা মহৈরোই ৭৫দি ইন্সতিত্যুত অসিনা পীবা গোল্দ অমসুং সিলবর মেদলশিং লৌনবা বর্তন তৌখি। মসিগী মথক্তা দোক্তরেৎ ইন সাইন্স (ওনোরিস কাউজা), লাইফ ফেল্লো অমসুং দিস্তিঙ্গুইজ এলুমনস এৱার্সশিং লৌনবা তোঙান তোঙানবা দিগ্নিতরীশিং শরুক য়াখ্রে।

দিরেক্তর প্রোফেসর ভি.কে. তিৱারিনা রিপোর্ত অদু প্রজেন্ত তৌবদা লৈবাক অসিগী মীওই কয়াগী পুন্সিদা মঙাল পীরিবা কোবিরেপ অমসুং তেলিমেদিসিন এপ্লিকেসন অসিগুম্বা হন্দক্কী অনৌবা ইন্নোবেসনশিং অসিদা চাউথোকচবা পোকখ্রে। 
মহাক্না আত্মানির্ভর ভারত ওইনবা হোৎনরিবা অসিদা মতেং পাংনবা প্রদক্ত-দিবেলপমেন্ত-ওরিয়েন্তেদ প্রোজেক্তদা হেন্না মাই ওনশিন্দুনা হোৎনগনি হায়না ৱাশকখ্রে। মহাক্না ফেকল্তী অমসুং স্তাফনা এক্সিলেন্স ফংবা ঙম্নবা অহেনবা এৱার্দ কয়া লৈহন্নবগী মতাংদসু ৱা ঙাংখ্রে।

*****