ঙসি ভিদিও কনফরেন্সকী খুৎথাংদা প্রধান মন্ত্রী শ্রী নরেন্দ্র মোদীনা লুচিংদুনা নিতি অয়োগকী ৬শুবা গভর্নিং কাউন্সিলগী মীফম পাংথোকখ্রে। মীফম অদুদা এক্স-ওফিসিও মেম্বরশিং অমসুং অখন্নবা মীওইশিংগী মথক্তা চীফ মিনিস্তর ২৬, লেপ্তনেন্ত গভর্নর ৩ অমসুং এদমিনিস্ত্রেতর ২ শরুক য়াখি। মীফম অদুদা নিতি অয়োগকী ভাইস চিয়রমেন, মেম্বরশিং অমসুং সি.ই.ও অমসুং প্রধান মন্ত্রীগী প্রিন্সিপাল সেক্রেতরি অমসুং প্রধান মন্ত্রী ওফিসকী সেনিরয় ওফিসারশিং শরুক য়াখি। মীফম অদু দিফেন্স মিনিস্তর শ্রী রাজনাথ সিংহনা ৱাতেমখি।

মীফম অদুদা প্রধান মন্ত্রীনা হায়খি কোওপেরেতিপ ফেদেরেলিজম অসি ভারতকী চাউখৎপগী য়ুম্ফম্নি। কোওপরেতিপ অমসুং কম্পিতিতিপ ফেদেরেলিজম অসি হেন্না কান্নবা ওইহনগদবনি অমসুং জিলা থাক ফাওবা য়ৌহনগদবনি। কেন্দ্র অমসুং রাজ্যশিং পুন্না থবক তৌমিন্নবদগী কোবিদ-১৯ লাইচৎকী অৱাবশিং মাইপাক্না কোকহনবা ঙম্বনি।

প্রধান মন্ত্রীনা হায়খি ভারতনা নিংতম্বা চহি ৭৫ মপুংফাগদবা নকশিল্লকপদা মীফম অসিনা কোক চুংশিন্ননবা খুদোংচাবা পীরে অমসুং লৈবাক্কী অপাম্বশিং থুংহন্নবা তঙাইফদবা য়ুম্বীশিং ওইরিবা কোওপরেতিপ অমসুং কম্পিতিতিপ ফেদেরেলিজম মখা তানা মপাঙ্গল কনখৎহনবা ঙমগনি।

প্রধান মন্ত্রীনা হায়খি লায়রবশিংগী ফিবম ফগৎনবা অমসুং মখোয়গী পুন্সিদা মশক থোকপা অহোংবশিং পুরক্নবা থবক কয়া পায়খৎলে। ২০১৪দগী সহরশিং অমসুং খুঙ্গংশিংদা য়ুম কোতি ২.৪০ হেন্না শাখ্রে। জল জিবন মিসন হেক হৌদোকপদগী থা ১৮গী মনুংদা খুঙ্গংগী য়ুমথোং লাখ ৩.৫ হেনবদা তোতি ঈশিং ফংহনখ্রে। খুঙ্গংশিং শম্ননবা পায়খৎলিবা ভারত নেত স্কিম্না অহোংবশিং পুরক্লে। অসিগুম্বা স্কিমশিংনা মীয়ামগী পুন্সি হিংবদা লাইবা হেনগৎহন্নবা কেন্দ্র অমসুং রাজ্যশিং পুন্না থবক তৌমিন্নগদবনি।

প্রধান মন্ত্রীনা হায়খি চহি অসিগী কেন্দ্রগী বজেত্তা মীয়াম্না থাজবা থম্লিবা অসিদা লৈবাক অসিগী মীয়ামগী অপাম্বা মমি তারে। শেন-থুম চাউখৎনবা খৌরাংবা লৈরে। লৈবাক অসিগী চাউখৎপগী খোঙজেলদা শরুক য়ানবা প্রাইভেদ সেক্তর থোরক্লে অমসুং অত্মানির্ভর ভারত অভিয়ান থবক ওইনা পাংথোক্নবা প্রাইভেস সেক্তরশিংদা খুদোংচাবা কয়া পীদুনা সরকারনা ইকায়খুম্নবা উৎকদবনি। অত্মানির্ভর ভারত অভিয়ান অসি মী খুদিংমক খুদোংচাবশিং ফংহন্নবা খোঙথাং অমনি।

প্রধান মন্ত্রীনা হায়খি এম.এস.এম.ইশিং অমসুং স্তার্দ-অপশিং মপাঙ্গল কনখৎহনগদবনি। রাজ্য খুদিংমক, জিলা খুদিংমক মশাগী তোপ-তোপ্পা মগুনশিং লৈজরি। জিলা খুদিংমক্তা ফংলিবা পোৎথোকশিং খঙদোক্কদবনি অমসুং জিলাশিং অমসুং রাজ্যশিংগী মরক্তা চাংদম্নবা লৈহনবনা মপান্দা পোৎ-চৈ থাদোকপা হেনগৎহনবদা মতেং পাংগনি। রাজ্যশিংগা লোয়ন্না পায়খৎলিবা এস্পিরেসনেল দিস্ত্রিক প্রোগ্রাম অসি হিরম অসিগী ময়েক লারবা খুদম অমনি।

নিতি অয়োগকী ভাইস চিয়রমেননা হায়খি মীফম অসিনা অপুনবা থবকশিং পায়খৎনবা মরুওইবা লাল্লোংশিং মশক খঙদোকপা ঙমহল্লে। কোওপরেতিপ ফেদেরেলিজমগী ৱাখল্লোন্দা নিতি অয়োগনা রাজ্যশিং অমসুং য়ুনিয়ন তেরিতোরিশিংগা থবক তৌমিন্নরি। গভর্নিং কাউন্সিলগী ৬শুবা মীফম অসিনা লৈবাক অসিগী খ্বাইদগী ৱাংবা ৱারেপ লৌবা ঙম্বা মীওইশিং মফম অমদা পুনহল্লে। ফেব্রুৱারি ৬,২০২১দা রাজ্যশিংগী সেনিয়র ওফিসিএলশিংগা অকুপ্পা ৱাফমশিং খন্নদুনা গভর্নিং কাউন্সিলগী ৬শুবা মীফম মাঙজৌন্না হৌখ্রে অমসুং মদুদগী ফংলকপশিং মীফমগী এজেন্দা ওইখি।

গভর্নিং কাউন্সিলগী ৬শুবা মীফমগী এজেন্দাশিং মখাদা পীরি:

১. ভারত মেনুফেকচরিং মফম অমা ওইহনবা

২. লৌউ-শিংউ অমুক হন্না শেমগৎপা

৩. ফিজিকেল ইনফ্রাস্ত্রকচর ফগৎহনবা

৪. হুমেন রিছোর্স দিবলপমেন্ত য়াংখৎহনবা

৫. মীচম মীয়ামদা সরকারগী খুদোংচাবশিং ফংবা হেনগৎহনবা

৬. হকশেল অমসুং মচি ওইবা চীঞ্জাক

ভারত মেনুফেকচরিংগী মফম অমা ওইনা শেমগৎনবা থবক কয়া পায়খৎনবা কাউন্সিলনা কুপ্না খনখ্রে অমসুং রাজ্য অমসুং জিলা থাক্তা মপান্দা পোৎ-চৈ থাদোকপা হেনগৎহন্নবা অমসুং থবক পীনবা অওনবশিং পুরক্নবা খন্নখি। নেসনেল ইনফ্রাস্ত্রকচর পাইপলাইনগী মখাদা সরকার অমসুং প্রাইভেদ সেক্তর পুন্না চৎমিন্নদুনা ইনফ্রাস্ত্রচর শেমগৎনবা পব্লিক কেপিতেল ইনভেস্তমেন্ত হেনগৎনবা অমসুং প্রোজেকশিং লোইশিন্নবা চীফ মিনিস্তরশিংনা ফোঙদোকখি।

ঈশিং ফংবা হেনগৎহন্নবা, মৈ মরাংকাইনা ফংহন্নবা, ইন্তরনেত অমসুং ব্রোদবেন্দ, মগুন লৈবা অনা-লায়য়েংগী খুদোংচাবশিং ফংহন্নবা, অইং-অশাগী খল হোঙলকপা থেংন্নবা তুংকোইনা চৎনগদবা লৌউ-শিংউগী থবক পায়খৎনবা, মেনুফেকচরিংগী অনৌবা থবকশিং পায়খৎনবা, জিলা অমা পোৎথোক অমগী থৌরাংগী মখাদা এক্সপোর্ত হেনগৎহন্নবা অমসুং খুদিংমক কোনশিনবা লৈঙাক্কী নমুনা অমা লৈহন্নবা রাজ্যশিং/য়ু.তিশিংনা তকশিনখি। অৱাং-নোংপোক রাজ্যশিং চাউখৎনবা এক্ত ইস্ত পোলিসিগীদা অকনবা মিৎয়েং থমদুনা লমদম অসি শীনবা থুংনা দিজিতেলনা শম্নবা য়াওনা ইনফ্রাস্ত্রকচর চাউখৎহন্নবা চীফ মিনিস্তরশিংনা ফোঙদোকখি।

প্রধান মন্ত্রীনা হায়খি লৈবাক অসিদা অচৌবা অহোংবা পুরকপদা নহারোলশিংনা মরুওইবা থৌদাং অমা লৌরি অমসুং দিজিতেল ইন্দিয়া কেম্পেন্দা মরুওইবা থৌদাং লৌখি। অনৌবা থবক পায়খৎপা পুক্নিং থৌগৎকদবনি অমসুং ইজুকেসন অমসুং স্কিল দিবলপমেন্তদা খুদোংচাবশিং হেন্না পীনবা তেক্নোলোজি শীজিন্নগদবনি।

অমনা অমগী খ্বাইদগী ফবা থবকশিং তম্নবা রাজ্য খুদিংমক শেমগৎনবা কাউন্সিলগী মীফমদা খন্নখি। শিন্মীশিং স্কিল পীনবা, অমসুং অমুক হন্না স্কিল পীনবা অমসুং স্কিল হেনগৎহন্নবা ইন্সতিতুৎশিং শেমগৎনবা কাউন্সিলগী মেম্বরশিংনা ফোঙদোকখি। খুঙ্গংগী লমদমশিংদা দিজিতেলগী মচাক-মথুমশিং শেমগৎতুনা মীচম মীয়ামদা সরকারগী ওইবা থবক-থৌরমশিং ফংবা হেনগৎহন্নবা মীফম অদুদা মিৎয়েং থমখি। লৈবাক শীনবা থুংনা মতৌ তম্বা য়াবা মখোয়গী রাজ্যশিংগী খ্বাইদগী ফবা থবকশিং তোঙান-তোঙানবা চীফ মিনিস্তরশিংনা উৎখি।

প্রধান মন্ত্রীনা হায়খি থৌশিল শেম্বা অমসুং কেন্দ্র অমসুং রাজ্যশিংগী মরক্তা হেন্না মতেং পাংনবা অসি য়াম্না মরুওই। কেন্দ্র অমসুং রাজ্যশিং মখোয়গী বজেতশিং মানহনগদবনি। তেক্নোলোজি অমসুং মীয়াম পুন্না থবক তৌমিন্নবা অসি চপ মান্ননা মরুওই। লৈবাক অসিদা মেনুফেকচরিং হেনগৎহন্নবা খুদোংচাবা পীনবা সরকারনা প্রদক্সন লিঙ্ক ইন্সেন্তিপ(পি এল আই) স্কিম হৌদোক্লে। রাজ্যশিংনা স্কিম অসিগী খুদোংচাবা লৌগদবনি অমসুং কোরপোরেত তেক্স রেতশিং হন্থবগী কান্নবশিং লৌগদবনি।

প্রধান মন্ত্রীনা হায়খি হন্দক জিওস্পাসিএল দেতা শীজিন্নবা য়াহল্লে অমসুং মসিনা ওন্ত্রেপ্রেনিউয়র, স্তার্দ-অপ ইন্নোবেসন অমসুং তেক সেক্তরদা খুদোংচাবা পীরগনি। মালেমগী ললোনবশিংগীদমক ললোন-ইতিক লাইহন্নবা অমসুং ঐখোয়গী মীয়াম হিংবদা লাইনবা মিৎয়েং চঙগদবনি। ভারত অসি লৌউ-শিংউগী শেন্মিৎলোন্দা হিংবা লৈবাক অমা ওইরবসু, হৌজিক ফাওবা পোৎলম কয়া মপান লৈবাকশিংদগী পুশিল্লক্লি। হিরম অসিদা মশাগী ওক্নবা পুথোক্নবা হোৎনগদবনি। লৈবাক অসিগী পুথোকপা খক নত্তনা মালেমগী মফম কয়াদা পীনবা লৌউ-শিংউগী পোৎথোক কয়া লৈরি। মসিগী রাজ্যশিংনা মখোয়গী ঈশিং-নুংশিৎকী ফিবমগা চুনবা থৌরাং অমা পায়খৎকদবনি।

প্রধান মন্ত্রীনা হায়খি পৎতুনা মাঙবা হন্থহন্নবা লৌউ-শিংউগী পোৎথোকশিং লীদুনা থম্বা অমসুং শেম-শানবা মিৎয়েং চঙগদবনি। দরকার ওইবা লন-থুমশিং, অফবা ইনফ্রাস্ত্রচর অমসুং অনৌবা তেক্নোলোজি ফংনবা অওনবশিং পুরকপা দরকার ওই। কাউন্সিলগী মেম্বরশিংনা অফবা পাউতাকশিং পীগদবনি। অপুনবা থবকশিং পায়খৎতুনা মীয়ামগী অনিংবশিং থুংহনগদবনি।

মসিগী গনর্ভিং কাউন্সিলগী মীফম অসিনা সরকারগী থাকশিংগী মরক্তা মতেং পাংনবা অমসুং অপুনবা ওইনা থবক তৌমিন্নবগী লম্বীশিং শেম্লে। শেন-থুম, খুন্নাই অমসুং মীয়ামগী ফিবম ফগৎনবা পান্দমশিং ফংনবা ৱা খন্ননবা খুদোংচাবা অমা মীফম অসিনা পীরে।

নিতি অয়োগকী গভর্নিং কাউন্সিলগী মরমদা

নিতি অয়োগকী গভর্নিং কাউন্সিলদা ভারতকী প্রধান মন্ত্রী, রাজ্যশিংগী চীফ মিনিস্তরশিং, য়ু.তিশিংগী লেপ্তনেন্ত গভর্নরশিং, এক্স-ওফিসিও মেম্বরশিং অমসুং অখন্নবা ইনভাইতিশিং য়াওরি। কাউন্সিল অসি লৈবাক অসি চাউখৎনবা থৌশিল-থৌরাং পুথোক্নবা অমসুং রাজ্যশিংগা পুন্না থবক তৌমিন্নবা মরুওইবা বোদি অমনি। ঙসিগী মীফম অসি থারগা হৌজিক ফাওবদা কাউন্সিল অসিগী অপুনবা মীফম ৬ পাংথোকখ্রে।

‘সবকা সাথ, সবকা বিকাস, সবকা বিশ্বাস’ হায়বা ৱাখল্লোন্দা চাউখৎপা রাজ্যশিংনা চাউখৎপা লৈবাক অমা শেমগনি হায়বা অসি খঙদুনা রাজ্যশিংগা লোয়্ন্না কোওপরেতিপ ফেদেরেলিজম চাউখৎহন্নবা নিতি অয়োগনা থবক পায়খৎলি। মসিনা লাল্লোংশিং, তুংকোইনা চৎনগদবা থৌশিলশিং অমসুং থবকশিং শেম্লি অমসুং মখোয় ফজনা পায়খৎলিবরা হায়বা য়েংশিনবগী থবকশু পাংথোকলি। কোওপরেতিপ ফেদেরেলিজমগী পান্দমশিং থম্লিবা কাউন্সিল অসিনা সেক্তরশিংগী মরক্তা, দিপার্তমেন্তশিংগী মরক্তা অমসুং ফেদেরেলগী ওইবা ৱাফমশিং থবক ওইনা পাংথোক্নবা মফম অমা পীরে।

*****

(Release ID: 1699732) Visitor Counter : 195