লৈবাক অসিদা সাইন্স, তেক্নোলোজি অমসুং ইন্নোবেসন চাউখৎহন্নবা খুদোংচাবা কয়া বজেত ২০২১-২২দা য়াওরে। লৈবাক অসিনা য়াম্না মরুওইবা মশক খঙদোক্লবা হিরমশিংদা রিছর্স অমসুং দিবলপমেন্তগী থবকশিং য়োকখৎনবা মাঙলোমদা য়েংলিবা বজেত অমনি। দ্রাফ তৌরবা সাইন্স, তেক্নোলোজি অমসুং ইন্নোবেসন পোলিসি ২০২১ মীয়ামগা ৱা খন্ননবা থৌরাং তৌদুনা লৈরে।

য়ুনিভর্সিতিশিংদা মিৎয়েং থমদুনা সাইন্স অমসুং তেক্নোলোজিগী তোঙান-তোঙানবা হিরমশিংদা থিজিল্লিবশিং মতেং পাংনবা লৈরিবা ওতোনোমস বোদি অমা ওইরিবা নেসনেল রিছর্স ফাউন্দেসনগী চহি ৫গী ওইনা লুপা কোতি ৫০,০০০ হেন্না বজেত অসিদা য়াওরে। মসিনা লৈবাক অসিনা মরুওইবা মশক খঙদোক্লবা হিরমশিংদা রিছর্সকী থবক মপাঙ্গল কনখৎহনবা ঙমগনি।

হেল্থ অমসুং ফেমিলি ৱেলিফয়ার, সাইন্স অমসুং তেক্নোলোজি অমসুং আর্থ সাইন্সেসকী য়ুনিয়ন মিনিস্তর দোক্তর হর্স ভর্ধন্না হায়খি মমাঙগী চহিগা চাংদম্নবদা হন্দক্কী বজেত অসিদা সাইন্স অমসুং তেক্নোলোজি অমসুং আর্থ সাইন্সেস মিনিস্ত্রিগী শেনফম চাদা ৩০ হেনগৎলে। কোবিদ-১৯ লাইচৎনা মরম ওইদুনা মমাঙগী চহিদা খুদোংচাদবা কয়া থেংনখি অমসুং কোবিদ-১৯না থোকহনবা অৱাবশিং থেংন্নবা সাইন্স অমসুং তেক্নোলোজিনা মরুওইবা থৌদাং অমা লৌখি। লৈবাক অসিদা মখা তানা সাইন্স অমসুং তেক্নোলোজিগী থবকশিং ফগৎহনগদবা তোঙান-তোঙানবা অনৌবা স্কিমশিং অনৌবা বজেত অসিদা য়াওরে অমসুং মালেমগী ওইনা সাইন্স অমসুং তেক্নোলোজদা লৈবাক অসি অচৌবা মফম অমা ওইহনবদা মতেং পাংলগনি।

চহি ৫ হেন্না চঙনা পায়খৎকদবা লুপা কোতি ৪,০০০ হেনবগী দিপ ওসিন মিসন অমা বজেত অসিদা লাউথোক্লে অমসুং মসিনা মেপ লৌবা, থিজিনবা অমসুং সমুদ্রগী লন-থুমশিং লৌনবগী খুদোংচাবশিং ফংহনগনি। আর্থ সাইন্সেস মিনিস্ত্রিগা লোয়ন্না পায়খৎকদবা মিসন অসিদা সমুদ্রগী অরুবা শরুকশিং থিজিনবা, সমুদ্রগী লন-থুমশিং লৌনবা তেক্নোলোজিশিং শেমগৎপা অমসুং সমুদ্রগী ফিবম ঙাক-শেন্নবা প্রোজেকশিং পায়খৎপা য়াওগনি।

মখোয়গী ওতোনোমিশিং লেংদনা লৈহল্লগা সরকারনা মতেং পাংলিবা রিছর্স অমসুং দিবলপমেন্ত ইন্সতিতুৎশিং, য়ুনিভর্সিতিশিং অমসুং কোলেজশিংগী মরক্তা হেন্না মতেং পাংন্নবা সহর ৯দা অপুনবা থৌরাং অমা পায়খৎনবা বজেত অসিদা লাউথোক্লে। মসি ইজুকেসন মিনিস্ত্রিগা পুন্না চৎমিন্নগনি অমসুং মসিগীদমক গ্লু গ্রান্ত অমা তোঙান্না লিংখৎলগনি। ফেব্রুৱারি ২০২০গী বজেত্তা লাউথোকখিবগী মতুংইন্না মফম ১০দা বাইওতেক্নোলোজি দিপার্তমেন্তনা উরজিত ক্লস্তরশিং(য়ুনিভর্সিতি রিছর্স জোইন্ত ইন্দস্ত্রি ত্রান্সলেসন ক্লস্তর)পায়খৎলগনি।

এ.আইদা য়ুম্ফম ওইবা মেছিন ত্রান্সলেসন তেক্নোলোজিশিং অমসুং মহৌশাগী পাম্বৈশিং পুন্না শীজিন্নদুনা ভারতকী মরুওইবা লোলশিংদা ইন্তরনেত্তা সরকারগী থৌশিলশিং হন্দোক্নবা নেসনেল লেঙ্গোইজ ত্রান্সলেসন মিসন(এন এল তি এম) লাউথোক্লে।

নিউ অমসুং রিনিউয়েবল ইনর্জি মিনিস্ত্রিনা হৌদোক্লিবা হায়দ্রোজেন মিসন অসিনা মৈখু থোক্তবা পৱারশিং ফংফমদগী হায়দ্রোজেন শুংনবা, লিদুনা থম্নবা, পুথোক-পুনশিন তৌনবা অমসুং শীজিন্ননবা থবক পায়খৎনবা লাউথোক্লে। রিছর্স অমসুং দিবলপমেন্তদা য়াম্না কান্নগদবা হায়দ্রোজেন মিসনগী বাইওমাস অমা বাইওতেক্নোলোজি দিপার্তমেন্তনা পুথোক্লে। সাইন্স অমসুং তেক্নোলোজি দিপার্তমেন্ত অমসুং কাউন্সিল ওফ সাইন্তিফিক এন্দ ইন্দস্ত্রিয়েল রিছর্সশু মিসন অসিদা মপাংগনি।

সাইন্স অমসুং তেক্নোলোজি দিপার্তমেন্তগী সেক্রেতরি, প্রোফেসার অসুতোস শর্মনা হায়খি সান্তিফিক পব্লিকেসনদা লৈবাকশিংগী মরক্তা ভারত অহুমশুবদা লৈরে, মালেমগী ওইনা ইন্নোভেতিপ ইকোনোমিগী মকোক ৫০গী মনুংদা য়াওরে অমসুং অৱাংবা থাক্কী মহৈ-মহৈশিংদা পি.ঐচ.দি মশিং য়াম্না পুথোকপদা অহুমশুবদা লৈরি। পুম্নমক্কী ওইনা য়েংবদা ঐখোয় ফিবম ফগৎলক্লি।

আর্থ সাইন্সেস মিনিস্ত্রিগী সেক্রেতরি, দোক্তর এম.রাজিবন্না নোং-চিংগী পাউ মাঙজৌন্না পীবগী থবক ফগৎলকপা, ভারতকী লৌউ-শিংউগী শিন্মীশিং অমসুং ঙামীশিংগী ফিবম ফগৎলকপা, লক্ষদ্বিপ ইথৎশিংদা থক্নবা ঈশিং ফংহনবা, নোংলৈ-নুংশিৎকী মতাংদা মাঙজৌন্না চপ চানা পাউ পীবা, মহৌশানা থোকহনবা অমাঙ-অতাশিংদগী ঙাকথোক্নবা থবকশিং, মুম্বাইদা ঈশিং চাউবা থিংনবা মাঙজৌন্না চেকশিনৱা পীনবা থবক হৌবা, নোর্থ ৱেস্ত ইন্দিয়াদা দোপ্পলর ৱেদর রাদারশিং ফগৎহনবা অমসুং দিল্লিদা অশেংবা নুংশিৎকী মতাংদা মাঙজৌন্না লাউথোক্নবগী মতাংদা পায়খৎলিবা থবকশিংগী মতাংদা ফোঙদোকখি।

বাইও-তেক্নোলোজি দিপার্তমেন্তগী সেক্রেতরি, দোক্তর রেনু শ্বারুপনা হায়খি অশোই-অঙাম থোক্তবা, কান্নবা অমসুং মমল হোঙবা কোবিদ-১৯ তিকা অমা পুথোক্নবা অপুনবা থৌরাং অমা পায়খৎনবদা মতেং পাংনবা লুপা কোতি ৯০০গী মিসন কোবিদ সুরক্ষ লাউথোক্লে। অপুনবা ওইনা তিকা ৩০ শৌগৎপদা তিকা ৬ তোঙান-তোঙানবা তাঙ্ককশিংদা লৈরে।

দি.এস.আই.আরগী সেক্রেতরি অমসুং সি.এস.আই.আরগী দিরেক্তর জেনেরেল দোক্তর সেখর সি মান্দেনা হায়খি কোবিদ-১৯ লাইচৎ মপুংফানা লাকশিনবগীদমক ভারত মালেম্না থাগৎনরে। মসি ভারত সরকারনা অপুনবা ওইনা অমসুং মিৎয়েং চঙদুনা থবক পায়খৎপদগী ওইবনি।

হন্দক্কী বজেত অসিদা বাইও-তেক্নোলোজি দিপার্তমেন্তনা লুপা কোতি ৯০০গী অখন্নবা অত্মানির্ভর পেকেজ অমা মিসন কোবিদ সুরক্ষ-ইন্দিয়ান ভেকশিন দিবলপমেন্ত মিসন লাউথোক্লে।

*****