কেন্দ্রগী স্কিল দেবেলপমেন্ত অমসুং ওন্তোপ্রিনোরশিপকী মন্ত্রী দা. মহেন্দ্র নাথ পেন্দেনা ঙসি লোক সভাদা পুথোকখিবা জেনরেল বজেৎ প্রপোজেলশিংবু তরাম্না ওক্লদুনা হায়, মসিনা ‘আত্মানির্ভর ভারত’ অমা শেমগৎপগী য়ুম্ফম হুনখ্রে। মহাক্না হায় বজেৎ অসি ত্রান্সপরেন্ত ওই অমসুং মীপুম খুদিংমক্তা মরু ওইনা অচৌবা লৈবাক অসিগী য়াংলেন শরু ওইরিবা নহারোল, নুপীশিং অমদি লৌমীশিংদা অফবা খুদোংচাবশিং পীনবা পান্দম থমখি।

ঙসি থোকখিবা চেরোল অমদা মহাক্না হায়, ভারতনা অৱাবা তারকপা মতমদা অখাং কনবা উৎখ্রে অমদি অওনবা পুরক্কদবা বজেৎ অসিগা লোইননা ঐখোয়গী হ্যুমেন রিসোর্সশিংগী তৌবা ঙম্বা হেনগৎহনবদগী ইনফ্রাস্ত্রকচর অমসুং মেন্যুফেকচরিং মপাঙ্গল কনখৎহনবা, অপীকপা এন্তর্প্রাইসশিং থৌগৎপদগী লৌউ-শিংউগী ইনকম হেনগৎহনবা হায়রিবা অপুনবগী দেবেলপমেন্তদা মীৎয়েং চংদুনা সরকারনা শেন্মীৎলোন ফগৎহন্নবা অমসুং চাউখৎনবা লম্বী অদু য়াৎখ্রে।

মন্ত্রীনা মখা তারদুনা হায় মসি অৱাং থংবা প্লেনশিংদগী সমুদ্র পলামগী রাজ্যশিং, অৱাং নোংপোক্তগী লদাখ ফাওবা লৈবাক পুম্বী বজেৎ অমনি। মহাক্না হায় এম.এস.এম.ই. সেক্তর অমসুং হেল্থকিয়রদা তেংবাং পীবনা লৈবাক অসিনা মরোমদোম লেপচনবা অমসুং লোকেলগী থাক্তা চাউখৎনবা মাংদা চংশিনবদা অনৌবা দাইমেনসন অমা হাপকৎলগনি। মহাক্না অরোইবদা অসুম্না হায় মালেমগী থাক্তা পার্তনরশিপশিংদা মীৎয়েং চংদুনা ২০২১গী কেন্দ্রগী বজেৎনা ভারতপু মালেমগী স্কিল কেপিতেল ওইহন্নবা অতোপ্পা লৈবাকশিংগা লোইননা ভোকেস্নেল স্কিলশিং অমসুং লৌশিং এক্সচেঞ্জ তৌনবা খুদোংচাবা পীবা চুংশিন্নবা ত্রেনিং প্রোগ্রামদা থৌনা হাপখ্রে।

দা. পান্দেনা এপ্পরেন্তিসশিপ ত্রেনিংদা মীৎয়েং চংবনা সরকার অসিনা ইন্দস্ত্রীশিংদা নহারোলশিংদা এপ্পরেন্তিসশিপকী খুদোংচাবশিং হেনগৎহন্নবা অমসুং স্কিল দেবেলপমেন্ত থৌগৎতুনা দিমান্দদা য়ুম্ফম ওইবা ইকোসিস্তেম অমা ওইহন্না হোৎনরিবা অদু উবা ফংখি হায়না ফোঙদোকখ্রে।

*****