কোরোনাগী মায়োক্তা লান্থেংনরিঙৈ মনুংদা লৈবাক অসিনা মপুংফানা উৎখিবা মশাগী ওইজবা থাদোকপগী অকনবা থৌনা অদু প্রধান মন্ত্রী শ্রী নরেন্দ্র মোদীনা থাগৎখ্রে। ঙসি ভিদিও কনফরেন্সকী খুৎথাংদা ভারত শীনবা থুংনা কোবিদ-১৯ তিকা থাবগী খোঙজং হৌদোক্লবা মতুংদা ৱা ঙাংবদা শ্রী মোদীনা হায়খি হৌখিবা চহিদা, লনাই মীওইশিং, ইমুং অমসুং লৈবাক অমা ওইনা ভারতমচাশিংনা তম্বা য়াবা তম্লে অমসুং খঙবা য়াবা খঙলে। মমিং লৈরবা তেলুগু কবি গুরাজাদা ভেনকাতা অপ্পারাও পল্লদুনা শ্রী মোদীনা হায়খি ঐখোয়না মতম পুম্নমক্তা ওইজবা থাদোক্তুনা অতোপ্পশিংগীদমক থবক তৌগদবনি। লৈবাক অমা হায়বসি শুপ্নগী লৈবাক-লৈহাও, ঈশিং অমসুং নুঙশিং খক নত্তে, লৈবাক অমা হায়বসি ‘ঐখোয় মীয়ামগী’ লৈরিবনি। মসিগী থৌনা অসিগা লোয়ন্না ভারত্তা কোরোনা লান্থেংনরি।

মখোয় কোবিদ পোজিতিপ ওইবদগী মীয়াম্না মখোয়গী নুংশিরবা ইমুং-মনুংগী মীওইশিং উনবা ফংদবা মতমদা লৈবাক অসিগী মীয়ামগী মরক্তা উপায় লৈতবদগী ককঙাউনখিবা অদু প্রধান মন্ত্রীনা নিংশিংখি। মসিগী লায়না অসিনা নারবা মীওইশিং মথন্থা থমখি অমসুং নাইতোম তাখি, অনাবা অঙাংশিং মখোয়গী মমাশিংদগী তোখাইনা লৈখি অমসুং অহল ওইরবা মমা-মপাশিং হোস্পিতালশিংদা নাইতোম লায়না অসি মায়োক্নখি। লায়না অসিদগী লৈখিদ্রবা মরী-মতাশিংগী অরোইবা মথৌ-মঙম পাংথোকপদা ফাওবা নিংথিনা শরুক য়াবা ফংখিদে। অসিগুম্বা নিংশিংবশিং অসিনা ঙসি ফাওবা ঐখোয় অৱাবা ফাওহল্লে হায়না মাইথোঙদা নুংঙাইতবগী মমি তাখিবা প্রধান মন্ত্রীনা ফোঙদোকখি।  

প্রধান মন্ত্রীনা হায়খি অৱাবা তারিঙৈ মতমদা, মীওই খরনা থাজবা পীখি অমসুং মতেং পাংখি। অতোপ্পশিংগী থৱায় কন্নবা মখোয়গী পুন্সিশিং খুদোংথিবা কয়া মায়োক্নদুনা দোক্তরশিং, নর্সশিং, পেরা-মেদিকেল স্তাফশিং, এমবুলেন্স দ্রাইভরশিং, অসা ৱার্করশিং, সেনিতেসন ৱার্করশিং, পুলিস অমসুং অতোপ্পা মমাঙ থাবা শিন্মীশিংনা মথৌ পাংথোকখি। মখোয় মশাগী য়াইফনবা থবকশিং থাদোক্তুনা মখোয়না মীওইবা খুন্নাইগীদমক মখোয় মশাগী মথৌ পাংথোকখি। ভাইরস অসিগী মায়োক্তা লান্থেংনবদা মখোয়গী পুন্সি মাঙবদগী মখোয়গী মরক্তা খরদি মখোয়গী ময়ুমদা ফাওবা হল্লকখিদে। নিংবা কাইবা অমসুং অকিবা ফিবম অমদা লৈরিঙৈদা মমাঙ থানা থবক তৌরিবা শিন্মীশিংনা থাজবা পুরকখি, ঙসিদি, মখোয় হান্না তিকা থাদুনা মখোয়না পাংথোকখিবা থবকশিং অদুগীদমক লৈবাক অসিনা তৌবীমল খঙবা উৎলি।

*****