স্তীল মন্ত্রালয়

মিসন পুর্বোদয়ানা নোংপোক ভারতপু মরোমদোম লেপচবগী মায়কৈদা থৌগনি অমদি আত্মনিরভর ভারত শেমবদা থৌদাং য়াগনি হায়না শ্রী ধর্মেন্দ্র প্রধান্না মর্চেন্তস চেম্বর ওফ কম্মর্স এন্দ ইন্দস্ত্রীগী এ.জি.এম.দা হায়খ্রে

Posted On: 19 NOV 2020 1:50PM by PIB Imphal

‘আত্মনিরভর ভারত’ অসি ভারতপু মতু শোনবা কৈথেল অমদগী মালেমগী ভেল্যু চেনগী ময়ায় চবুক্তা লৈবা ইচঙ থৌবা পোত্থোক পুথোকফমগী মফম অমা ওন্থোক্নবগীদমক্তনি হায়না ঙসি পেত্রোলিয়ম অমসুং নেচরেল গ্যাসকী কেন্দ্র মন্ত্রী শ্রী ধর্মেন্দ্র প্রধান্না হায়খ্রে‍। মর্চেন্তস চেম্বর ওফ কম্মর্স ইন্দস্ত্রীগী ঙসি পাঙথোকখিবা ১১৯শুবা চহীগী জেনেরেল মীফমদা ৱা ঙাঙলদুনা মহাক্না হায়খিবদা আত্মনিরভর ভারত অমা হায়বসি চাউরবা পোত্থোক পুথোকপগী সেক্তর লৈবা, মরোমদোম লেপচবা ঙমবা অদুগা মালেমগী শেন্মিৎলোনগসু পুনশিনবা মপাঙ্গল কনবা ভারত অদুবুনি‍। মরোমদোম লেপচবা ঙমবা ভারত অমা ওইবনা মালেমগী শেন্মিৎলোনগীদমক মপাঙ্গল কল্লবা শাফু অমা ওইগদৌরিবনি হায়না মহাক্না মখা তাখি‍। ভারতনা মরোমদোম লেপচবা হায়বা ৱাফমসিদা মশা মথন্তগী খনবা থৌওংগী ৱাফম নত্তে‍। ভারতকী মরোমদোম লেপচবা হায়বসিদি মালেম পুম্বগী নুংঙাইনবা, তেংবাংনবা অমদি ইং চিকপগী ৱাখল্লোনশিং য়াওরি হায়না মন্ত্রীনা হায়খি‍।

নোংপোক ভারত মরোমদোম লেপচবা ঙমদনা ভারতনা আত্মনিরভর ওইবা ঙম্লোই হায়না মন্ত্রীনা ফোঙদোকখি‍। পুর্বোদয়া-নোংপোক ভারতনা লৈবাক্কী চাউখৎ লমজেলবু থৌগদৌরিবনি‍ হায়না মহাক্না হায়খি‍। “ইকায়খুম্নরবা প্রধান মন্ত্রী শ্রী নরেন্দ্র মোদীনা লমদমল অসিগী লোকশিন্দনা লৈরিবা মঙমবু লোকশিন্দুনা লৈবাক্কী চাউখৎ লমজেলগী মথংগী ইথক্তা ইনোৎ পীনবগীদমক্তা নোংপোক ভারত্তা চাউখৎপা পুরক্নবা অখন্নবা মীৎয়েং চঙলি‍। মসি মিসন পুর্বোদয়াগী নুংগী ৱাখল্লোন্নি‍। পেত্রোলিয়ম অমদি স্তীল সেক্তর অনিমক্না মিসন পুর্বোদয়াদা মরুওইবা থৌদাং য়াগদৌরিবনি”, হায়না মহাক্না হায়খি‍।

শ্রী প্রধান্না হায়খিবদা মিসন পুর্বোদয়াগী মখাদা ঐখোয়না স্তীল সেক্তরগী হিদান্নবা হেনগৎহনগদবা অমদি থবক পীদুনা লমদমসিদা চাউখৎপা পুরক্কদবা ইন্তিগ্রেতেদ স্তীল হব অমা নোংপোক ভারত্তা শেমগৎলি‍। “স্তীল ক্লস্তর অসিনা ভেল্যু চেন শিনবা থুংনা থবক্কী খুদোংচাবা পুরক্তুনা হকথেংননা অমদি নাকোইননা থবক পীগনি অমদি চাউখৎপা ৱাৎলিবা মফমশিং য়াওনা এন্ত্রপ্রিন্যুরসিপকী ময়োল চোংহনগনি‍। মসিনা অতোপ্পা পোত্থোক পুথোকপগী ইন্দস্ত্রীশিং ময়োল চোংহনগনি অমদি ময়োল্লমশিং, মহৈ তম্ফমশঙশিং, অনা লাইয়েংশঙশিং, স্কিলিং সেন্তরনচিংবশিংগী মওংদা খুন্নাইগী মচাক মথুমশিংসু শেমগৎলক্কনি”, হায়না মহাক্না মখা তাখি‍।

শ্রী প্রধান্না হায়খিবদা ইন্দ্রধনুশ নোর্থ ইস্তর্ন গ্যাস গ্রিদ প্রোজেক্তশিংগী মখাদা লৈঙাক্না কেপিতেল গ্রান্তকী চৈঙাক পীদুনা লৈবাকসিগী নোংপোক অমদি অৱাং-নোংপোকথংবা শরুক্কী কৈথেলশিংদা ইন্দিয়ন গ্যাস গ্রিদ পাকথোক চাউথোক্লি‍। প্রধান মন্ত্রী উর্জা গঙ্গা (পি.এম.য়ু.জি.) প্রোজেক্ত অসি নোংপোকথংবা স্তেতশিংদা লৈবা য়ুমথোং মিলিয়ন কয়াদা চাকথোং গ্যাস পাইপ শম্ননবগীদমক্তা পায়খৎপনি‍।

কোবিদ-১৯ লাইচৎনা মালেমগী শেন্মিৎলোনদা দিমান্দগী ফীভম মাঙ তাকহন্দুনা অমদি সপ্লাই চেনসু অৱাবা তাহন্দুনা মফম খুদিংমক্তা শোত্থহল্লি হায়না মন্ত্রীনা হায়খি‍। লাইচৎ অসিনা হান্নগী থবক থৌরমশিংদা অপনবা পীরবসু লৈবাকসিগী শেন্মিৎলোনগী মফম মফমগী থবক থৌরমশিংদা তপ্না তপ্না ফীভম ফগৎলকপা কয়া উবা ফংলি হায়না মহাক্না ফোঙদোকখি‍। লোকদাউনগী অথিংবা পাক শন্না কোমথোক্নরকপগা লোয়ননা খুমাঙ চাউশিনবা ফীভম লাক্লবা য়াই অমদি মসিনা লৈবাক অসিবু অমুক হন্না চাউখৎপগী লম্বী পরিংদা পুরক্লগনি হায়না মহাক্না হায়খি‍। শ্রী প্রধান্না হায়খিবদা আত্মনিরভর ভারত পেকেজ অমদি প্রধান মন্ত্রী গরীব কল্য়ান য়োজনানা কোবিদ-১৯ লাইচৎ মনুংদা মফম খুদিংমক্তা মথৌ তাবা ঙাক্লৌ খুন্নাইগী শরুক খুদিংমক্তা পীখি‍। মসিনা ভারতপা থুনা হান্নগী ফীভমদা হঞ্জিল্লকপা ঙমহন্দুনা ভারতকী চাউখৎপগী ৱারীগী অনৌবা পন্দুপ অমা ইবা হৌহল্লগনি‍।

ভারতকী মরা চেৎপা দিমোক্রেসী অমসুং মপাঙ্গল কল্লবা রাজনিতিগী লুচিংবা অমদি অচৌবা লমদমসিগী কৈথেল অমসুং নহা ওইরিবা মীশিং অসি অশানবা মীৎয়েঙদা লৈবাকসিগী চাউখৎপগী মতিংবু মতেং পাংশিনগদবা হীরমশিংনা হায়না লৌনরি হায়না শ্রী প্রধান্না হায়খি‍।

থাউ অমসুং গ্যাস সেক্তরগী মতাঙদা ঙাঙলদুনা, শ্রী প্রধান্না হায়খিবদা ঐখোয়না থুনা হোংলক্লিবা ইনর্জীগী ফীভম অমা উরি‍। “ইকায়খুম্নরবা প্রধান মন্ত্রী শ্রী নরেন্দ্র মোদীগী মতিং লৈবা অমদি মীৎয়েঙ শানবা লুচিং মখাদা ভারত লৈঙাক্না চাউরবা শেন্মিৎলোনগী চাউখৎপা পুরক্কদৌরিবা অসিগী মৈচাক ওইননবা হেন্না শাফবা, পু-থাংবা ঙমবা অমদি তুং ক,ইগদবা ইনর্জী সিস্তেম অমগীদমক পুম্নৌ নৌবা অহোংবা ফীভম পুরক্লে‍। ভারত হৌজিক মালেমগী ইনর্জী খ্বাইদগী য়াম্না শীজিন্নবা অহুমশুবা লৈবাক ওইরি‍। “প্রধান মন্ত্রীনা ভারতকী ইনর্জীগী তুংগীদমক তশেং তশেংবা লম্বী পরিং য়মা য়াত্থোক্তুনা থম্লে অমদি মসি মীপুম খুদিংদা ইনর্জী ফংহনবা, লায়রবদগী লায়রবা ফাওবনা ইনর্জী শীজিন্নবা ঙমগদবা, মতিক চানা ইনর্জী শীজিন্নবা, অইং অশাগী খল কায়থরকপা থেংননবা তুং কোইগদবা ইনর্জী, অমদি মালেমগী তমবা ঙমদবা ফীভমশিং হন্থহন্নবা ইনর্জী সিক্যুরিতী হায়রিবা ৱাফম মঙাসিদা য়ুম্ফম ওইরি‍।” থাসিদা চয়োলমুক্কী মমাঙদা সি.ই.আর.এ.না শীন্দুনা পাঙথোকখিবা মরিশুবা ইন্দিয়া ইনর্জী ফোরমদা প্রধান মন্ত্রীনা ৱা ঙাঙখিবা, মদুদা মহাক্না ভারতকী ইনর্জীগী মাঙদা চঙশিনগদৌরিবা মরুওইবা য়ুম্বী তরেৎ অমদি ভারতনা মালেমগী ওইনা ইনর্জী চাউনা শীজিন্নবা লৈবাক অমা ওইরকপগী মতাঙদা হায়খিবা ৱাফমসু মহাক্না পনখি‍। মরুওইবা য়ুম্বী তরেৎ অদুদা গ্যাসতা য়ুম্ফম ওইবা শেন্মিৎলোন অমগী মায়কৈদা চঙশিনবা, ফোসিল থাউশিং তরু তরুনা শীজিন্নবা, বাইওফ্যুলগীদমক লমদমসিদা ফংবা থাউশিং হেন্না শীজিন্নবা, ২০৩০ ফাওবগী মনুংদা রিন্যুএবল ইনর্জী গিগাৱাত ৪৫০গী পান্দম ফংবা, চত্থোক চৎশিনগী পাম্বৈদগী কার্বোন থাদোকপা হন্থহন্নবা ইলেক্ত্রিসিতী শীজিন্নবগী চাং হেনগৎহনবা, নৌনা শীজিন্নরক্লিবা থাউ হাইদ্রোজেনগুম্বদা মায় ওনশিনবা অমদি ইনর্জী সিস্তেম পুম্নমক্তা দিজিতেল ইনোভেসন পুরকপা য়াওরি‍।

শ্রী প্রধান্না হায়খিবদা উজ্বালা য়োজনানা খুন্নাই-শেন্মিৎলোনদা অহোংবা পুরক্তুনা ভারত্তা নুপী মপাঙ্গল কলহনবগী মফম হেন্না কনবা ঙমহল্লে অমদি লৈবাকসিদা এল.পি.জি. কন্নেক্সন মশীং শরুক অনি হেনগৎহল্লে‍। এল.পি.জি.না কোনশিনবগী চাং চাদা ৫৫ ওইরমবদগী চাদা ৯৮ ওইরে‍। এস.এ.তি.এ.তি. (সস্তেনেবল অল্তরনেতিব তুৱার্দ্স এফোর্দেবল ত্রান্সপোর্তেসন)গী মতাঙদা মহাক্না হায়খিবদা মসি গারী শীজিন্নরিবশিং অমদি লৌমী অমসুং ওন্ত্রপ্রিন্যুরশিংদা কান্নবা পীগদবা তুং কোইগদবা পু-থাংবা ঙমগদবা চত্থোক চৎশিনগী পাম্বৈ অমা পুরক্নবা থৌরাংনি‍। থৌরাং অসিদা মতিং লৈবা ম্যুনিসিপাল সোলিদ ৱেস্ত মেনেজমেন্ত অমদি লৌফমদা চরু মৈ থাবা অমদি কার্বোন থাদোকপনা মরম ওইদুনা ময়োল্লমগী নুংশিৎ মোৎশিনহনবগী ৱাফম লাকশিন্নবগী চাউনা থাজবা লৈ‍। সি.বি.জি. শীজিন্নবনা শুংদোক্ত্রিবা থাউ পুশিল্লকপদা তাংদুনা লৈবা হন্থহনবদা অমদি লৌমীশিংগী শেন্থোক হেনগৎহন্নবা, খুঙ্গঙদা থবক পীননবা অমদি ওন্ত্রপ্রিন্যুরসিপ চাউখৎহন্নবা প্রধান মন্ত্রীগী মঙলান মঙফাওনহনবদা মতেং ওইগনি‍। লৌউ-শিংউবদা অহেনবা মীৎয়েঙ থমবগা লোয়ননা মসিদা নোংপোক ভারতকীদমক্তা চাউনা কান্নগদবা ৱাফম লৈ‍। গ্যাসতা য়ুম্ফম ওইবা শেন্মিৎলোনলোমদা মায় ওনশিন্নবগী পান্দম অসি ফংনবগীদমক্তা লৈঙাক অসিনা থাউ অমসুং গ্যাস ইনফ্রাস্ত্রকচর শেমগৎনবগীদমক্তা দোলর বিলিয়ন ১০০গী য়াম্লবা শেন্ফম শীজিন্ননবা পান্দম থম্লি‍। ভারতনা পাইপলাইন, এল.এন.জি. তর্মিনেল অমদি সি.জি.দি. নেতৱর্ক য়াওনা গ্যাস ইনফ্রাস্ত্রকচর শেমগৎলি‍। সিতী গ্যাস প্রোজেক্তনা কোনশিনবগী চাং লৈবাকসিগী মীশিংগী চাদা ৭০ কোনশিন্নবগী মঙমগা লোয়ননা দিস্ত্রিক্ত ৪০০ হেনবদা পাকথোক চাউথোকখ্রে হায়না মহাক্না ফোঙদোকখি‍।

স্তীল ইন্দস্ত্রীগী মতাঙদা শ্রী প্রধান্না হায়খিবদা মসিনা লৈবাকসিগী য়াংলেন শরু ওইরি অমদি ঐখোয়না অনৌবা মতমগী শেন্মিৎলোন শাগৎপা মতমদা ঐখোয়ী লৈবাকসিদা স্তীলনা মরুওইবা থৌদাং অমা য়ারি‍। ভারতকী স্তীল সেক্তর অসিনা লমদমসিগী মথৌ তাবশিং থুংহনবা ঙম্নবা হোৎনরি অমদি মালেমগী ফম্পাক্তা অচৌবা শান্নরোই অমা ওইনা লিৎখৎলক্লি‍। মালেমগী স্তীল খ্বাইদগী য়াম্না পুথোকপা অনিশুবা লৈবাক ওইরবসু, ভারতকী চহীগী পর কেপিতা স্তীল শীজিন্নবগী চাং অসি কে.জি. ৭৪.১ ওইরি অমদি মালেমগী চাংচৎকী (কে.জি. ২২৪.৫) শরুক অহুম থোকপগী অমা ওইরি‍। ভারতনা মশাগী স্তীল শীজিন্নবগী চাং অসি হেনগৎহন্নবগী অফবা তাঞ্জা অমা লৈরি অমদি লাইপ সাইকলগী মমল হন্থহনবা, কুইনা চৎপা হেনবা অমদি অকোয়বগী ফীভমদা তুং কোইনা চৎপা অসিনচিংবা স্তীল হেন্না শীজিন্নবগী কান্নবশিং লৌবা য়ারি হায়না মহাক্না ফোঙদোকখি‍।

শ্রী প্রধান্না হায়খিবদা স্তীল মন্ত্রালয়না লৈবাকসিদা মফম চানা স্তীল শীজিন্নবা পুক্নীং থৌগৎনবা পান্দমদা ‘ইস্পাতি ইরাদা’ কৌবা পুন্না পায়খৎমিন্নবা ব্রান্দিং কেম্পেন অমা হৌদোকখ্রে‍। মসিনা স্তীলবু শীজিন্নবদা লায়বা, অকোয়বগী ফীভমদা কায়হন্দবা, মমল ওইজবা, পু-থাংবা ঙমগদবা অমদি মপাঙ্গল পীগদবা মচাক ওইনা শীজিন্নহন্নবা পান্দম থম্লি‍। মহাক্না হায়খি, “ঐখোয়না প্রিফরেন্সকী অকক্নবা ৱাফম থমদুনা কেন্দ্র লৈঙাক্কী লূপশিংনা য়োৎ অমদি স্তীলশিং লমদমসিদগী লৌননবা ৱাফমদা ইনোৎ হাপ্লি‍। হায়রিবা দি.এম.আই. অমসুং এস.পি. পোলিসী অসিগী খুত্থাঙদা লুপা করোর ২০,০০০ হেনবগী স্তীল পুশিল্লকপা থিংহৌরে‍। সেক্তর অসিদা রো মেতরিএল সিক্যুরিতী লৈহন্নবা ঐখোয়না থবক পায়খৎলি‍। ঐখোয়গী কোকিং কোইলা পুশিল্লকপগী হৌরকফমশিং তোঙান তোঙানবা মফমশিংদগী ওইহন্নবা হোৎনরি‍। ভারত্তা তোঙান তোঙানবা হৌরকফমশিংদগী অমসুং পোৎলমশিংদগী থোরকপা ফেরস স্ক্রেপশিং সাইন্তিফিক প্রোসেসিং অমদি রিসাইক্লিং তৌননবা মেতেল স্ক্রেপিং সেন্তরশিং লিংখৎপা য়োকখৎনবা স্তীল স্ক্রেপ পোলিসী অমা ঐখোয়না শেম্লে‍। পোলিসীগী ফ্রেমৱর্ক অসিনা মওং মরিল নাইনা, শাফনা অমদি অকোয়বগী ফীভমদা শোকহন্দনা খোমগৎনবা, শিদোক্নবা অমদি মচেৎ মচেৎ চপখায়নবা মান্নবা চৎন-পথাপশিং পীরি‍।

শ্রী প্রধান্না মর্চেন্তস চেম্বর ওফ কম্মর্স এন্দ ইন্দস্ত্রীগী লুপ্লোয়শিংবু থাউ অমসুং গ্যাস অমদি স্তীল সেক্তরদা লৈরিবা য়াম্লবা খুদোংচাবশিং অসিগী তাঞ্জা লৌহৌনবা, ‘লমদমসিগীদমক খোঞ্জেল থোক্নবা’ অমদি আত্মনিরভর ভারতকী মঙলান মঙফাওনহন্নবগী থৌদাং য়াননবা ৱাফম থমখি‍।

******



(Release ID: 1674239) Visitor Counter : 108