রোদ ত্রানস্পোর্ত অমসুং হাইৱে অমসুং এম.এস.এম.ই.গী কেন্দ্রগী মন্ত্রী শ্রী নীতিন গদকারীনা হৌখিবা নুমিৎ খরনিসিদা ৱেবিনার, ভিদিও কনফরেন্স, অমসুং অতোপ্পা সোসিএল মীদিয়াগী খুত্থাংদা সমাজ অসিগী তোঙান তোঙানবা কাংলুপ অমসুং সেক্তরগা পাউ ফাওননবা অচৌবা থৌরাং অমা লৌখৎলি। মসিনা মরম ওইদুনা মীওই করোর ১.৩০ রোমগা পাউ ফাওনবা ঙমখ্রে।

মসিগী মখা চৎথরকপদা, মহাক্না য়ু.কে., কনাদা. সিংঙ্গাপুর, অতোপ্পা য়ুরোপকী লৈবাকশিং অমসুং ওস্ত্রেলিয়াগুমবা  মপান লৈবাক্তা লৈবা ভারতকী মহৈরোইশিংগা, ইন্দিয়ন  রেস্পোন্স তু গ্লোবেল পেন্দেমিক: রোদমেপ ফোর ইন্দিয়া হায়বা থীম অসিদা ৱারী ৱাতাই তৌখি। মহৈরোইশিং অসিবু পুক্নিং চিংশিল্লদুনা মহাক্না হায়, হৌজিক ভারতনা তৌগদবশিং অসি ঐখোয়না অফবা ৱাখল খনবা অমসুং অসিগুম্বা অৱাবা তারবা মতম অসিবু খুদোংচাবা অমা ওইনা ওন্থোক্নবা হোৎনবনি। অদুগা অমুক্তদা, ঐখোয় থবক কয়া অমুক নৌনা পায়খৎপা হৌরদুনা মাং থানা চংশিল্লি, অমসুং ঐখোয় খুদিংমক্না কোবিদ-১৯ ভাইরস শন্দোক্তনবা পীরিবা হেল্থ প্রোতোকোলশিং ঙাক্না চৎকদবনি। ঐখোয়গী ইন্দস্ত্রীশিং- অচৌবা, য়াইমরপ ওইবা, মচা নত্ত্রগা অকুপ্পশিং অসি মাস্ক, সেনিতাইজর, অমসুং সোসিএল দিস্তেন্সিংগী কাংলোনশিং ইন্দুনা অমসুং শিন্মীশিংগী লৈফম-চাফম পীবীদুনা শুবগী মথক্তা মখোয়না শুরিবা মওং অদু হান্নদগী অফবা মওং অমদা হোংদোকপা মথৌ তাই, মখোয়না মপাল লমদগী পুশিল্লকপা পোৎলমশিংগী মহুৎ শিনবা য়াবশিং হেন্না পুথোকপা, করবার অমসুং ইন্দস্ত্রীশিং শহরদগী লাপ্না অনৌবা মফমশিংদা হৌদোকপা মথৌ তাই, মসিনা মেত্রো তাউনশিংদা মী চিনবা হন্থহনগনি। কম্পেনীশিংনসু মালেমগী ফার্মশিংগা মরী থমনদুনা ভারত্তা জোইন্ত ভেনচরনচিংবশিং হাংনবা পুক্নিং চিংশিন্নবা হোৎনগদবনি হাইনা মহাক্না মখা তাখি। ঐখোয়না ভারতকী খক হোৎনবগী মহুত্তা হৌজিক কম্পেনী অমসুং লৈবাকশিংনা চাইনাদগী লাপথোকপা হৌরকপা মতম অসিদা মালেমগী মার্কেত্তা ঐখোয়না পীবা ঙম্নবা হোৎনগদবনি হায়না শ্রী গদকারীনা ফোংদোকখি। মহাক্না ভারতকী মপান লৈবাক্তা মহৈ তম্লিবা মহৈরোইশিংগী পুক্নিং চিংশিল্লদুনা মালেম পুম্ববু লমজিংনবগী খৌরাংলবা নহা কয়া ভারত্তা লৈবনা মখোয়না হায়রিবা পন্থুং অসি য়ৌবদা অদুক্কী মতিক মতেং পাংবা ঙমগনি হায়খি।

শ্রী গদকারীনা গ্রীন এক্সপ্রেস হাইৱে ২২ শেমগৎলি, অমসুং দিল্লী-মুম্বাই এক্সপ্রেস হাইৱেগী অনৌবা এলাইন্মেন্তকী থবক পায়খৎপা হৌখ্রে হায়না ফোংদোকখি। মসিনা ইন্দস্ত্রীশিংনা ইন্দস্ত্রিএল ক্লস্তর, ইন্দস্ত্রিএল পার্ক, লোজিস্তিক্স পার্কনচিংবশিংদা তুংদা শেল থাদনবগী তাঞ্জা অমা পীরগনি। হায়রিবা হাইৱেশিং অসিগী নাকন্দা রোদসাইদ এমনিতী ২০০০ মুক শেমগৎখ্রে অমসুং লৈবাক অসিদা বস পোর্ত ২০০০ শেমগৎনবা থৌরাং লৈ হায়না মহাক্না হায়খি।

শ্রী নীতিন গদকারীনা ভারত্তগী হৌখিবা মপান্দা লৈবা নহা ওইরিবা মহৈরোইশিংগী অমসুং সাইন্তিস্তশিংগী মতিক লৈরবা ৱাখলশিংবু ভারতকী চাউখৎপগী ৱারীদা অমসুং রিসর্স, ইনোবেসন, মেনেজমেন্ত, মেদিসিন, অৱাংবা থাক্কী মহৈ অসিনচিংবদা শরুক য়ানবা পুক্নিং চিংশিনখি। তোঙান তোঙানবা লৈবাক্কী য়ুনিবর্সিতী ৪৩দা লৈরিবা ভারতকী মপান্দা লৈবা মহৈরোইশিংগা ভিদিও কনফরেন্সিংগী খুত্থাংদা ৱারী শানরদুনা মহাক্না থাজবা পীখি মদুদি, সরকার অসিনা পি.পি.পি.বু ওইরো নত্ত্রগা জোইন্ত ভেনচরবু ওইরো, অসিগুম্বা ভেনচরশিংগী তোঙান তোঙানবা মওংশিংবু অৱাংবা থাক্তা শৌগৎলি।

শ্রী গদকারীনা কর্বারগী লুচিংবা, ইন্দস্ত্রিএলিস্ত, ওন্ত্রপ্রিনর ৮০০০লোমগা হৌজিক ফাওবদা ৱারী শাদুনা মখোয়গী খুদোংচাদবশিং তাদুনা শেল-থুম, কমর্স অমসুং ইন্দস্ত্রী, রেলৱে, লেবর অমসুং ইম্প্লোইমেন্ত অসিনচিংবা য়াওনা মরী লৈনবা মন্ত্রালয় অমসুং দিপার্তমেন্তশিংদা মখোয়গী ৱাফমশিং তমখি।

ভেনচরশিংগী তঙাইফদবা ক্লিয়রেনশিংসু থা ৩গী মনুংদা ফংনবা হোৎনবদা মহাক্কী মন্ত্রালয়না মতেং পাংগনি হায়না ফোংদোকখি। মহাক্না হায়খি, ইনফ্রাস্ত্রকচর চাউখৎনবা অমসুং খুঙ্গং, ত্রাইবেল অমসুং লৌউ-শিংউগী হীরম/লমশিং চাউখৎনবা অচৌবা শাফু অমা পীখ্রে। মন্ত্রীনা স্তেকহোলদর খুদিংমক্না পুন্না থবক শুমিন্নবা মথৌ তারিবসি ফোংদোকখি অমসুং শেন্মিৎলোনগী লান য়াওনা কোরোনাগী মাইয়োক্তা শোক্নরিবা লান অসি ঐখোয়না মায় পাক্কনি হায়বগী থাজবা ফোংদোকখি।

শ্রী নীতিন গদকারীনা নাসাদা লৈবা ভারত্তগী হৌখিবা সাইন্তিস্তশিংগী মথক্তা তোঙান-তোঙানবা লৈবাক্তা লৈবা য়ুনিবর্সিতী ৪৩দা লৈরিবা মহৈরোইশিংগসু ৱারী শান্নখি। শ্রী গদকারীগা মমাংদা ৱারী শাখিবা মেম্বরশিং অমসুং মীহুৎশিংগী মনুংদা এফ.আই.সি.সি.আই., এস.এম.ই., ক্রেদাই মুম্বাই, এস.এম.ই.শিং, ভারতকী সি.ই.ও.শিংগী ক্লব, এ.আই.পি.এম.এ., ভারতীয় শিক্ষা মনল, য়ং প্রেজিদেন্তস ওর্গানাইজেসন, মহারাস্ত্রা ইকনোমিক দিবেলপমেন্ত কাউন্সিল, এ.এস.এস.ও.সি.ঐচ.এ.এম., পি.ঐচ.দি. চেম্বর ওফ কমর্স, ভারত চেম্বর ওফ কমর্স অসিনচিংবনি।