ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ରେଡିଓ ଜକି (ଆରଜେ) ମାନଙ୍କ ସହ ଭିଡିଓ କନଫରେନ୍ସ ମାଧ୍ୟମରେ ମତ ବିନିମୟ କରିଛନ୍ତି ।

କୋଭିଡ-19 ସମ୍ପର୍କରେ ସଚେତନତା ସୃଷ୍ଟି କରିବାରେ ଆରଜେ ମାନଙ୍କ ଭୂମିକାକୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ । ସେ କହିଥିଲେ ଏହା ପ୍ରଶଂସାଯୋଗ୍ୟ ଯେ ଲକଡାଉନ ସମୟରେ ମଧ୍ୟ ଆରଜେମାନେ ସେମାନଙ୍କ ଦାୟିତ୍ଵ ନିର୍ବାହ କରୁଛନ୍ତି ଏବଂ ଘରୁ କାର୍ଯ୍ୟକ୍ରମ ରେକର୍ଡ କରୁଛନ୍ତି ।

ପ୍ରଧାନମନ୍ତ୍ରୀ କହିଥିଲେ, ସେମାନଙ୍କ କାର୍ଯ୍ୟକ୍ରମର ଲୋକପ୍ରିୟତା ପାଇଁ ସେମାନେ ଘରେଘରେ ଜଣେ ପରିବାର ସଦସ୍ୟ ଭଳି ପରିଚିତ । ଅନ୍ଧବିଶ୍ଵାସ ଦୂରକରିବାରେ ଏବଂ ଲୋକମାନଙ୍କୁ ପ୍ରେରିତ କରିବାରେ  ଆରଜେ ମାନଙ୍କ ଭୂମିକା ଅତି ଗୁରୁତ୍ଵପୂର୍ଣ ।  

ବିଶେଷଜ୍ଞ ମାନଙ୍କ ମତ ଏବଂ ସରକାରଙ୍କ ଦ୍ଵାରା ନିଆଯାଉଥିବା ପଦକ୍ଷେପର ପ୍ରସାର ଛଡା ଲୋକମାନେ ସମ୍ମୁଖୀନ ହେଉଥିବା ବିଭିନ୍ନ ସମସ୍ୟା ଓ ଆହ୍ଵାନ ସମ୍ପର୍କରେ ମଧ୍ୟ ମତାମତ ଦେବାପାଇଁ ଆରଜେ ମାନଙ୍କୁ ପ୍ରଧାନମନ୍ତ୍ରୀ ଅନୁରୋଧ କରିଥିଲେ ଯାହାଫଳରେ ସରକାର ସେଗୁଡିକର ସମାଧାନ କରିପାରିବେ ।  

କରୋନା ସଂକ୍ରମଣରୁ ସମ୍ପୂର୍ଣ ମୁକ୍ତି ଲାଭ କରିଥିବା ରୋଗୀଙ୍କ ବିଷୟରେ ସକାରାତ୍ମକ ଖବର ପରିବେଷଣ କରିବା ପାଇଁ ପ୍ରଧାନମନ୍ତ୍ରୀ ଆରଜେ ମାନଙ୍କୁ ପରାମର୍ଶ ଦେଇଥିଲେ । ସ୍ଥାନୀୟ ହିରୋ ଯେପରିକି ପୁଲିସ ଅଧିକାରୀ, ଡାକ୍ତର, ନର୍ସ, ୱାର୍ଡ ବଏ ଆଦିଙ୍କ ଯୋଗଦାନକୁ ବିଶେଷଭାବେ ଉଲ୍ଲେଖ କରିବା ପାଇଁ ମଧ୍ୟ ସେ କହିଥିଲେ ।

କରୁଣା ଭାବର ଗୁରୁତ୍ଵ ସମ୍ପର୍କରେ ପ୍ରଧାନମନ୍ତ୍ରୀ କହିଲେ ଯେ, ଡାକ୍ତର, ସ୍ୱାସ୍ଥ୍ୟକର୍ମୀ ଓ ଏୟାରଲାଇନ ଷ୍ଟାଫଙ୍କ ପ୍ରତି ହେଉଥିବା ଖରାପ ବ୍ୟବହାର ବିଷୟରେ ଖବର ପରିବେଷଣ ଅତି ଜରୁରୀ ଯାହାଫଳରେ ଲୋକଙ୍କ ମନରୁ ଭୟ ଦୂର ହେବ ଓ ଏହି ଆହ୍ଵାନର  ସଫଳ ମୁକାବିଲା କରାଯାଇପାରିବ । ଉତ୍ସର୍ଗୀକୃତ ଭାବେ କାର୍ଯ୍ୟ କରୁଥିବା ପୁଲିସ ଅଧିକାରୀଙ୍କ ବିଷୟରେ ମଧ୍ୟ ଚର୍ଚ୍ଚା ହେବ ଆବଶ୍ୟକ । ଲୋକମାନେ ସମସ୍ତ ନିୟମର ଅନୁପାଳନ କରିବା ଓ ପୁଲିସକୁ ସାହାଯ୍ୟ କରିବା ଏକାନ୍ତ ଜରୁରୀ । ଏହି ମହାମାରୀ ମୁକାବିଲାରେ ସମସ୍ତ 130 କୋଟି ଭାରତୀୟ ଏକାଠି ପ୍ରୟାସ କରିବା ପାଇଁ ସେ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ, ସରକାର ଗରିବ ଲୋକଙ୍କ ସୁବିଧା ପାଇଁ ଅନେକ ଯୋଜନାର ଘୋଷଣା କରିଛନ୍ତି । ଏହି ଯୋଜନାଗୁଡିକ ବିଷୟରେ ସମସ୍ତ ସୂଚନା ସଠିକ ହିତାଧିକାରୀଙ୍କ ପାଖରେ ପହଞ୍ଚିବା ଆବଶ୍ୟକ । ଗଣ ଯୋଗାଯୋଗ କର୍ମୀ ଭାବେ ଆରଜେ ମାନେ ସରକାରଙ୍କ ଦ୍ଵାରା ଘୋଷଣା କରାଯାଇଥିବା ପଦକ୍ଷେପ ଓ ସାମାଜିକ ଦୂରତା, ସଙ୍ଗରୋଧ ଆଦି ସମ୍ପର୍କରେ ସଚେତନତା ସୃଷ୍ଟି କରିବା ଉଚିତ ।   

ପ୍ରତ୍ୟୁତରରେ ଆରଜେ ମାନେ ପ୍ରଧାନମନ୍ତ୍ରୀଙ୍କୁ ସେମାନଙ୍କ କ୍ଷେତ୍ରର ଅଂଶବିଶେଷ ବୋଲି କହିଥିଲେ ଯେହେତୁ ସେ 2014 ମସିହାରୁ  ସଫଳତାପୂର୍ବକ ମନ କି ବାତ ରେଡିଓ କାର୍ଯ୍ୟକ୍ରମ କରିଆସୁଛନ୍ତି । ସେମାନେ ଜନତା କର୍ଫ୍ୟୁର ଅଭୂତପୂର୍ବ ସଫଳତା ତଥା କୋଭିଡ19 ଯୋଦ୍ଧାମାନଙ୍କୁ ସମ୍ମାନ ପ୍ରଦର୍ଶନ କରିବା ଦିଗରେ ପ୍ରଧାନମନ୍ତ୍ରୀଙ୍କ ଅଭିନବ  ଚିନ୍ତା ଓ ନେତୃତ୍ଵର ପ୍ରଶଂସା କରିଥିଲେ । ଏହି ମହାମାରୀ ବିରୋଧୀ ଲଢେଇରେ ସାମିଲ ହେବା ସେମାନଙ୍କ ପାଇଁ ଅତି ଖୁସିର ବିଷୟ ବୋଲି  ଆରଜେ ମାନେ ପ୍ରକାଶ କରିଥିଲେ ।

ମିଥ୍ୟା ଓ ଗୁଜବ ପ୍ରସାରଣକୁ ରୋକିବାରେ ଆକାଶବାଣୀ ଅତି ଗୁରୁତ୍ଵପୂର୍ଣ ଭୂମିକା ତୁଲାଉଛି ବୋଲି ପ୍ରଧାନମନ୍ତ୍ରୀ କହିଥିଲେ । ସେ ସମସ୍ତ ଆରଜେ ମାନଙ୍କୁ ମଧ୍ୟ ଏ ଦିଗରେ କାର୍ଯ୍ୟ କରିବାକୁ କହିଥିଲେ ।

ପ୍ରଧାନମନ୍ତ୍ରୀ ଆରଜେ ମାନଙ୍କୁ ସକାରାତ୍ମକ ଓ ଗଠନମୂଳକ ମନୋଭାବ ନେଇ କାର୍ଯ୍ୟ କରିବା ପାଇଁ ପରାମର୍ଶ ଦେଇଥିଲେ । ଆମେ ସମସ୍ତେ ସକାରାତ୍ମକ ଓ ଏକତାର ଭାବନା ସହ କୋଭିଡ19 ଚାଲେଞ୍ଜର ସମ୍ମୁଖୀନ ହେବା ଆବଶ୍ୟକ ବୋଲି ପ୍ରଧାନମନ୍ତ୍ରୀ କହିଥିଲେ ।

ଏହି ଅବସରରେ ସୂଚନା ଓ ପ୍ରସାରଣ ମନ୍ତ୍ରୀ ପ୍ରକାଶ ଜାଭଡେକର ଓ ସଚିବ ଉପସ୍ଥିତ ଥିଲେ ।

*****

 

(Release ID: 1608739) Visitor Counter : 185