ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀସ୍ଥିତ ଲୋକ କଲ୍ୟାଣ ମାର୍ଗଠାରେ ଶ୍ରୀ ଅଲତାଫ ବୁଖାରୀଙ୍କ ନେତୃତ୍ଵରେ ଆସିଥିବା ଜମ୍ମୁ-କଶ୍ମୀର ଆପନୀ ପାର୍ଟିର ଏକ 24ଜଣିଆ ପ୍ରତିନିଧି ଦଳ ସହ ସାକ୍ଷାତ କରିଛନ୍ତି ।

ଏହି ଅବସରରେ ଅନୁଷ୍ଠିତ ଆଲୋଚନାରେ ପ୍ରଧାନମନ୍ତ୍ରୀ ଜମ୍ମୁ-କଶ୍ମୀରର ପରିବର୍ତ୍ତନ ପାଇଁ ଜନଭାଗିଦାରୀ ନିମନ୍ତେ ଆହ୍ଵାନ କରିଥିଲେ ଏବଂ ଲୋକଙ୍କ ସ୍ଵରକୁ ଶୁଣୁଥିବା ଏକ ପ୍ରଶାସନ ପାଇଁ ଗୁରୁତ୍ଵାରୋପ କରିଥିଲେ । ରାଜନୈତିକ ଏକୀକରଣ ଜରିଆରେ ଏହି କ୍ଷେତ୍ରରେ ଗଣତନ୍ତ୍ର ସୁଦୃଢ ହୋଇପାରିବ ବୋଲି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ।

ଯୁବ ସଶକ୍ତିକରଣ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ, ଜମ୍ମୁ-କଶ୍ମୀରର ଯୁବକମାନେ ବିକାଶର ପ୍ରତିନିଧି ସାଜିବା ଆବଶ୍ୟକ । ଜମ୍ମୁ-କଶ୍ମୀରର ସାମଗ୍ରିକ ପରିବର୍ତ୍ତନ ନିମନ୍ତେ ଯୁବକମାନଙ୍କ ପାଇଁ ଦକ୍ଷତା ବିକାଶ ଓ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବା ଉପରେ ସେ ଗୁରୁତ୍ଵାରୋପ କରିଥିଲେ ।

ଭିତ୍ତିଭୂମି ବିକାଶ ଉପରେ ବ୍ୟାପକ ଗୁରୁତ୍ଵ ପ୍ରଦାନ କରିବା ସହିତ ପର୍ଯ୍ୟଟନ ଭଳି କ୍ଷେତ୍ରରେ ନୂଆ ନିବେଶ ସମ୍ଭାବନା ସୃଷ୍ଟି କରିବା ଜରିଆରେ କ୍ଷେତ୍ରର ଅର୍ଥନୈତିକ ବିକାଶ ପ୍ରତି ସରକାର ସମର୍ପିତ ବୋଲି ଏହି ପ୍ରତିନିଧି ଦଳକୁ ପ୍ରଧାନମନ୍ତ୍ରୀ ଆଶ୍ଵାସନା ଦେଇଥିଲେ । ଜମ୍ମୁ-କଶ୍ମୀରର ସମସ୍ତ ସମସ୍ୟାର ସମାଧାନ ଲାଗି ସରକାରଙ୍କ ପକ୍ଷରୁ ସବୁ ପ୍ରକାର ସାହାଯ୍ୟ ପାଇଁ ସେ ପ୍ରତିଶ୍ରୁତି ଦେଇଥିଲେ ।

ପ୍ରଧାନମନ୍ତ୍ରୀ ଏହି ପ୍ରତିନିଧି ଦଳ ସହିତ ଜନସାଂକ୍ଷିକ ପରିବର୍ତ୍ତନ, ସୀମା ନିର୍ଦ୍ଧାରଣ ଏବଂ ରାଜ୍ୟ ବାସସ୍ଥାନ ଅନୁମତି ଆଦି ବିଭିନ୍ନ ପ୍ରସଙ୍ଗ ଉପରେ ଆଲୋଚନା କରିଥିଲେ । ଯଥାଶୀଘ୍ର ସମ୍ଭବ ଜମ୍ମୁ-କଶ୍ମୀରକୁ ରାଜ୍ୟ ମାନ୍ୟତା ପ୍ରଦାନ କରିବା ଲାଗି ସମାଜର ସବୁ ବର୍ଗଙ୍କ ସହିତ ସରକାର କାର୍ଯ୍ୟ କରିବେ ବୋଲି ପ୍ରଧାନମନ୍ତ୍ରୀ ରେଖାପାତ କରିଥିଲେ । ଏନେଇ ସଂସଦରେ ସେ ଦେଇଥିବା ବିବୃତି ସମ୍ପର୍କରେ ଉଲ୍ଲେଖ କରିଥିଲେ ।

ଆପନୀ ପାର୍ଟିର ସଭାପତି ଶ୍ରୀ ଅଲତାଫ ବୁଖାରୀ ଉଲ୍ଲେଖ କରିଥିଲେ ଯେ, 5 ଅଗଷ୍ଟ 2019ରେ ଧାରା 370 ଉଚ୍ଛେଦ ଲାଗି ଯେତେବେଳେ ନିଷ୍ପତ୍ତି ନିଆଗଲା ତାହା ଜମ୍ମୁ-କଶ୍ମୀର ପାଇଁ ଏକ ଐତିହାସିକ ମୂହୁର୍ତ୍ତ ଥିଲା ।

ଜମ୍ମୁ-କଶ୍ମୀରର ବିକାଶ ପାଇଁ ଅସୀମିତ ସମର୍ଥନ ଓ ଅବିରାମ ପ୍ରୟାସ ଲାଗି ପ୍ରଧାନମନ୍ତ୍ରୀଙ୍କୁ ଏହି ପ୍ରତିନିଧି ଦଳ ଧନ୍ୟବାଦ ଜଣାଇଥିଲେ । ଏହି କ୍ଷେତ୍ରରେ ଶାନ୍ତି ଓ ନିରାପତ୍ତା ବଜାୟ ରଖିବା ଦିଗରେ ସରକାର, ସୁରକ୍ଷା ଏଜେନ୍ସି ଓ ଜମ୍ମୁ-କଶ୍ମୀରର ଲୋକମାନଙ୍କ ଉଦ୍ୟମକୁ ସେମାନେ ମଧ୍ୟ ପ୍ରଶଂସା କରିଥିଲେ ।

 

**********

 

 

(Release ID: 1606639) Visitor Counter : 120