نئیدہلی۔22؍جنوری۔پٹرولیم اور قدرتی گیس نیز فولاد کے محکمے کے وزیر جناب دھرمیندر پردھان نےآج اسٹیل اتھارٹی آف انڈیا (سیل)  کی ایک اسکیم  کی شروعات کی جس کا مقصد اس کے ملازمین کی طرف سے رضاکارانہ طور پر انسان دوست سرگرمیوں (وی پی اے) کو فروغ دینا ہے۔  یہ اسکیم ’’سیل امپلائی  رینڈرنگ  وولینٹرزم  اینڈ انیشی ایٹیوز فار کمیونٹی انگیجمنٹ (سروس) ‘‘ کہلاتی ہے۔ یہ اسکیم ایک خاص منصوبہ بند طریقے پر ملازمین کی طرف سے انسان دوستی کی  سرگرمیوں کو فروغ دیگی۔

وزیر موصوف نے ملازمین کیلئے اس اسکیم میں اندراج کرانے کی خاطر ایک پورٹل کی شروعات بھی کی۔ سیل سروس پورٹل اس اسکیم پر عملدرآمد کیلئے ایک پلیٹ فارم کا کام دیگا تاکہ  مختلف ساجھیداروں کے مابین تیز رفتاری کے ساتھ تبادلہ خیال ہوسکے۔

اس  موقع پر اظہار خیال کرتے ہوئے جناب دھرمیندر پردھان نے کہا کہ یہ سیل کا ایک بڑا قدم ہے اور اس کا مقصد یہ ہے کہ سیل کے ملازمین اور ان کے کنبوں کی اس بات کیلئے حوصلہ افزائی کی جاسکے کہ وہ سماج کو ایک مؤثر انداز میں اپنی خدمات فراہم کریں۔ انہوں نے کہا ’’یہ سال آئین کے  نفاذ کا 70واں سال ہے، عزت مآب صدر جمہوریہ ہند جناب رام ناتھ کووند نے کہا ہے کہ اپنے حقوق کے بارے میں  چوکس رہتے  وقت شہریوں کو اپنے فرائض کا بھی احساس ہونا چاہئے۔ سروس اسکیم کے ذریعے  سیل کے ملازمین اپنے سماجی فرائض رضاکارانہ طور پر پورا کرنے کیلئے آگے آئیں گے اور سماجی فلاح وبہبود نیز قوم کی تعمیر میں اپنا رول ادا کریں گے‘‘۔

جناب پردھان نے ملازمین سے کہا کہ وہ بڑے پیمانے پر آگے آئیں اور رضاکارانہ سرگرمیوں کے ذریعے ،جو ان کے علاقوں کے مفاد پر مبنی ہو  سماجی کام کریں۔  انہوں نے کہا کہ سیل کے ملازمین اور ان کے افراد خاندان قوم کی تعمیر اور کمیونٹی کی ترقی میں اپنا کردار ادا کرسکتے ہیں۔ انہوں نے سیل کے ملازمین سے کہا کہ وہ پوری خلوص نیت کے ساتھ اس اسکیم میں شرکت کریں اور دوسروں کی مدد کرنا اپنی زندگی کا جزو لاینفک بنالیں۔  انہوں نے یہ بھی کہا کہ سماجی بھلائی کے کاموں میں ملازمین کے اقدامات کی حوصلہ افزائی کی جانی چاہئے۔

سیل کے  تقریباً 70000 باقاعدہ ملازم ہیں اور سیل کے مختلف پلانٹوں میں 60000 کنٹریکٹ والے ملازم ہیں۔ ان تمام  ملازمین اور ان کے افراد خاندان  کی حوصلہ افزائی کی جائے گی کہ وہ آگے آئیں اور کمیونٹی کی ترقی کیلئے وی پی اے  کو اپنائیں۔ جن بھلائی کے کاموں میں ان کی حوصلہ افزائی کی جانی ہے ان میں صحت ، خواتین کو بااختیار بنانا ، آمدنی کا مستقبل ذریعہ ، معذوروں کی مدد ، پانی اور صفائی ستھرائی تک رسائی ، گاؤوں کی ترقی، ماحول کو بہتر بنانا ، کھیل کود کی تربیت اور روایتی فنون لطیفہ اور کلچر وغیرہ شامل ہیں۔ اسکیم کے ذریعے وی پی ایز سے متعلقہ دیگر کاموں کیلئے بھی  ملازمین کی حوصلہ افزائی کی جانی ہے ۔

سیل اپنے پلانٹوں اور یونٹوں میں اس اسکیم کے ذریعے آگاہی پھیلانے  اور ملازمین  کو وی پی ایس میں شرکت کرنے پر آمادہ کرنے کیلئے بڑے پیمانے پر خصوصی  پروگرام چلائے گی۔ سیل کے یوم تاسیس یعنی 24 جنوری کو وی پی ایس کے ذریعے کمیونٹی کی ترقی کیلئے تمام پلانٹوں اور یونٹوں میں  کام کرنے کا عہد لیا جائیگا۔

 

۔۔۔۔۔۔۔۔۔۔۔۔۔۔۔۔۔۔۔۔۔۔

م ن۔ ج۔ع ن

U-333

(Release ID: 1600310) Visitor Counter : 66