نئی دہلی، 21 فروری / محکمۂ دفاع کی  نو رتن سرکاری کمپنی  بھارت الیکٹرانکس لمیٹیڈ ( بی ای ایل ) نے   اپنا ایک نیا پروڈکٹ  ‘‘ ماحولیاتی آبی جنریٹر  ( اے ڈبلیو جی ) ’’ کی  آج ایرو انڈیا – 2019 میں نقاب کشائی کی ہے ، جو  پوری دنیا میں پینے کے پانی کی مسلسل بڑھتی ہوئی ضرورت کو پورا کرنے  کا ایک اختراعی  حل ہے ۔ 

          فوج کے سربراہ جنرل  بپن راوت نے  بی ای ایل کے  چیئرمین اور مینجنگ ڈائریکٹر جناب ایم وی گوتم  ، ڈائریکٹروں اور دیگر سینئر عہدیداروں کی موجودگی میں اے ڈبلیو  جی کا افتتاح کیا ۔

          بی ای ایل کا ماحولیاتی آبی جنریٹر  ماحول میں موجود  رطوبت سے براہ راست پانی  پیدا کرنے کے لئے استعمال کیا جا سکتا ہے ۔ وہ دن دور نہیں ، جب پینے کا پانی کرۂ ارض پر سب سے  قیمتی  شے بن جائے گا ۔  زیر زمین پانی ، جو پینے کے پانی  کا موجودہ اہم ذریعہ ہے ،  بہت تیزی کے ساتھ کم ہو رہا ہے  ، جب کہ پانی کے متبادل ذرائع کی تلاش کے لئے تحقیق کی جا رہی ہے ۔

          بی ای ایل کا ماحولیاتی آبی جنریٹر  ماحول میں موجود  رطوبت سے پانی  حاصل کرنے اور اسے صاف کرنے کے لئے ایک نئی ٹیکنا لوجی کا استعمال کرتا ہے ۔  یہ  صاف ، محفوظ  پینے کا پانی پیدا کرنے کے لئے ماحولیاتی رطوبت کو  جمع کرنے کے لئے  تمازت کو استعمال کرتا ہے ۔ اے ڈبلیو جی میں  ایک معدنیاتی یونٹ  بھی ہے ، جو  پانی کو  پینے کے قابل بنانے کے لئے اس میں ضروری معدنیات کو حل کرتا ہے ۔ اے ڈبلیو جی ایک جگہ نصب ہونے والے اور  موبائل  دو طرح کے ڈیزائن میں  تیار کیا گیا ہے اور یہ 30 لیٹر یومیہ ، 100 لیٹر یومیہ ، 500 لیٹر یومیہ اور 1000 لیٹر یومیہ کی صلاحیت میں دستیاب ہے ۔

          ماحولیاتی آبی جنریٹر کو عوامی مراکز  اور عوامی مقامات پر پینے کے پانی  کی فراہمی کے لئے استعمال کیا جا سکتا ہے ۔ جیسے حفظانِ صحت کے مراکز ، اسکول ، کالج ، دفاتر ، ریلوے اسٹیشن ، بس اسٹینڈ ، ہوائی اڈے ، بندر گاہ  ، سمندر میں تیل کے کارخانے ، فوجی تنصیبات ، دور دراز کے علاقے ، دور دراز قائم تنصیبات اور رہائشی کمپلیکس وغیرہ ۔

          ماحولیاتی آبی جنریٹر  سی ایس آئی آر – آئی آئی  سی ٹی  اور حیدر آباد کی ایک اسٹارٹ اَپ کمپنی میتری کے اشتراک سے بی ای ایل کے ذریعے  تیار کیا گیا ہے ۔ اسے ایرو انڈیا – 2019 کے ہال – ای میں بی ای ایل کے اسٹال پر نمائش کے لئے رکھا گیا ہے ۔  بی ای ایل  حکومتِ ہند کی اسٹارٹ اَپ انڈیا پہل کے تحت  اسٹارٹ اَپ کمپنیوں کو امداد فراہم کر رہی ہے ۔

 

 ( م ن ۔  و ا   ۔   ع ا  )      ( 21 – 02 – 2019 )

U. No. 1173

 

(Release ID: 1565875)