قبائلی امور کی وزارت
azadi ka amrit mahotsav

بستر خطے کے جامع ترقیاتی منصوبے کا جائزہ لینے کے لیے رائے پور میں اعلیٰ سطحی اجلاس


قبائلی برادریوں کے ذرائع معاش، صحت، تعلیم، بنیادی ڈھانچے، جنگلاتی حقوق اور ثقافتی ورثے پر خصوصی توجہ

پوسٹ کرنے کی تاریخ: 19 NOV 2026 6:25PM by PIB Delhi

بستر خطے کے جامع ترقیاتی منصوبے پر غور و خوض کے لیے آج رائے پور میں چھتیس گڑھ حکومت کے چیف سکریٹری جناب وکاس شیل کی صدارت میں ایک اعلیٰ سطحی اجلاس منعقد ہوا۔ اجلاس میں مربوط، مقامی ضروریات کے مطابق اور نتائج پر مبنی اقدامات کے ذریعے بستر کو ایک مثالی قبائلی خطے کے طور پر ترقی دینے پر توجہ مرکوز کی گئی۔

https://static.pib.gov.in/WriteReadData/userfiles/image/2026/nov/image001_20261119182626_e6bf75.jpg

وزارتِ قبائلی امور کے وفد کی قیادت وزارت کے ایڈیشنل سکریٹری جناب منیش ٹھاکر نے کی۔ وفد میں وزارت کی ڈائریکٹر محترمہ سمدھا سنگھ، جناب اَخیلا بیہاریہ اوٹا اور محترمہ شویتا مشرا، سینئر مشیران، نیز ڈی اے جے جی یو اے ڈویژن، وزارتِ قبائلی امور جناب سبھاش کمار شامل تھے۔

چھتیس گڑھ حکومت کی جانب سے اجلاس میں جناب وکاس شیل، چیف سکریٹری؛ جناب منوج کمار پنگوا، محکمۂ جنگلات و موسمیاتی تبدیلی؛ محترمہ شاہلا نگار، محکمۂ خواتین و بہبودِ اطفال؛ ڈاکٹر کمل پریت سنگھ، محکمۂ اسکولی تعلیم؛ جناب سدھارتھ کومل پردیشی، محکمۂ زرعی ترقی، کسانوں کی بہبود اور بایوٹیکنالوجی؛ جناب امیت کٹاریہ، محکمۂ صحت و خاندانی بہبود؛ جناب سولڈ بھارتی داسن، محکمۂ سیاحت و ثقافت؛ جناب بسوراجو ایس، محکمۂ تکنیکی تعلیم، روزگار اور ہنرمندی کی ترقی؛ جناب راجیش سنگھ رانا، محکمۂ دیہی صنعتیں؛ ڈاکٹر سارَنس متّر، محکمۂ توانائی؛ اور محکمۂ قبائلی و درج فہرست ذاتوں کی ترقی کے کمشنر ڈاکٹر ڈی۔ راہل وینکٹ نے شرکت کی۔

https://static.pib.gov.in/WriteReadData/userfiles/image/2026/nov/image002_20261119182631_4f87f2.jpg

ترقیاتی منصوبے میں بستر ڈویژن کے سات اضلاع—بستر، کانکیر، کونڈاگاؤں، نارائن پور، دانتے واڑہ، بیجاپور اور سکما کو شامل کیا گیا ہے۔ ریاستی حکومت اور ضلعی انتظامیہ کے ساتھ وزارت کی شراکت داری کو آگے بڑھاتے ہوئے، اس اجلاس میں ترقیاتی خامیوں کا جائزہ لینے، نفاذ کے لیے ترجیحات کی نشاندہی کرنے اور مرکزی اسکیموں، ریاستی محکموں اور ضلعی سطح کے اداروں، بشمول مربوط قبائلی ترقیاتی ایجنسیوں اور مربوط قبائلی ترقیاتی منصوبوں کے درمیان تال میل کو مضبوط بنانے کے لیے ایک پلیٹ فارم فراہم کیا گیا۔

اجلاس میں زیرِ بحث اہم اقدامات میں قبائلی علاقوں کے کمزور طبقات کے لیے برادری کے زیرِ انتظام بچوں کی نگہداشت کے مراکز؛ جگدل پور میں سِکل سیل بیماری کے لیے مجوزہ مرکزِ مہارت؛ ملیریا اور تپِ دق کے خاتمے کے لیے ہدف پر مبنی اقدامات؛ مادری زبان پر مبنی کثیر لسانی تعلیم؛ اور بالغوں کی تعلیم، ڈیجیٹل خواندگی اور مالیاتی خواندگی شامل تھے۔

ذرائع معاش سے متعلق ترجیحات میں املی اور مہوا کی قدر میں اضافے کے لیے کلسٹرز، زراعت اور باغبانی، مویشی پالن اور ماہی پروری، قبائلی کاروبار، روایتی دست کاری کے کلسٹرز، جگدل پور میں مجوزہ ٹرائی فوڈ پارک اور مقامی برادریوں کی قیادت میں ماحول دوست سیاحت شامل تھی۔

https://static.pib.gov.in/WriteReadData/userfiles/image/2026/nov/image003_20261119182640_c3d200.jpg

اس منصوبے میں مقدس جنگلات اور مقامی طبی پودوں کے تحفظ، قبائلی موسیقی اور دست کاری کے فروغ، بادل اکیڈمی کو مضبوط بنانے، خصوصی طور پر کمزور قبائلی گروپوں کے مسکن سے متعلق حقوق کو تسلیم کرنے اور اجتماعی جنگلاتی وسائل کے انتظام کا بھی تصور پیش کیا گیا ہے۔ گاؤں میں بجلی کی فراہمی اور دیگر بنیادی سہولیات سے متعلق تجاویز کو بھی نمایاں طور پر اجاگر کیا گیا۔ وزارت کی جانب سے پیش کردہ خاکے میں منظوری کے مختلف مراحل، تجاویز کی تیاری اور نفاذ کے تحت آنے والے اقدامات کی تفصیلات پیش کی گئیں۔

اجلاس میں اس بات پر زور دیا گیا کہ مجوزہ اقدامات کو بستر کے مختلف علاقوں میں رہنے والی قبائلی برادریوں کے معیارِ زندگی اور ذرائع معاش کے مواقع میں قابلِ پیمائش بہتری میں تبدیل کرنے کے لیے مقامی برادریوں کی شمولیت، ضلع وار منصوبہ بندی، مقررہ مدت میں پیش رفت کا جائزہ اور ادارہ جاتی سطح پر مؤثر تال میل نہایت اہم ہیں۔

****

ش ح۔ ش ا ر۔ ول

Uno-7927

 


(ریلیز آئی ڈی: 2338746) وزیٹر کاؤنٹر : 6
یہ ریلیز پڑھیں: English , हिन्दी