ইনফোর্মেসন অমসুং ব্রোদকাস্তিং মন্ত্রালয়
azadi ka amrit mahotsav

পি.আই.বি. ইম্ফালনা থৌবালদা পি.এম. বিশ্বকর্ম স্কীম অমসুং নশা মুক্ত ভারত অভিয়ানগী মতাঙদা বার্তা পাঙথোকখ্রে


পি.এম. বিশ্বকর্ম স্কীমগী মখাদা খুৎহৈবা ১৮,১৩২ রেজিস্তর তৌখ্রে: এম.এস.এম.ই. এসিস্তেন্ত দিরেক্তর রেদ্দী

মনিপুরদা ২০২৬কী ওক্তোবর ফাওবদা এন.দি.পি.এস. এক্তকী মখাদা কেস ৩১৭ রেজিস্তর তৌখ্রে, মীওই ৪৪১ ফাখ্রে

থাগৎখিবা: 18 NOV 2026 2:20PM by PIB Imphal

প্রেস ইনফোর্মেসন ব্যুরো (পি.আই.বি.), রিজনল ওফিস, ইম্ফালনা য়ুমশকৈশা নুমিত্তা থৌবাল দিস্ত্রিক্ততা “পি.এম. বিশ্বকর্ম স্কীম” অমসুং “নশা মুক্ত ভারত অভিয়ান”গী মতাঙদা নোংমগী ওইবা মেদিয়া ৱর্কশোপ (বার্তা) অমা পাঙথোকখ্রে।

থৌবাল অমসুং ককচিং দিস্ত্রিক্ততজী লাকপা পাউমীশিং অমসুং মেদিয়া প্রোফেস্নেলশিংগীদমক ‘বিকসিত ভারত ২০৪৭’ হায়বা থীমগী মখাদা থৌবাল বাজারগী ক্ষেত্রী শঙলেন্দা পাঙথোকখিবা ৱর্কশোপ অসি হৌখিবা চহি ১২ অসিদা ভারত লৈঙাক্না ফংখিবা মায় পাকপশিং অদু উৎলিবা পি.আই.বি.না চত্থরকপা আউতরীচ খোঙথাংগী শরুক অমা ওইনা পাঙথোকখিবনি।

Image

মসিনা লৈঙাক্কী মীহুৎশিং, হীরম অসিগী অখঙ-অহৈশিং অমসুং মেদিয়াগী মরক্তা ঈ-পাউ পীথোক-পীশিন তৌনবা, ৱাখল্লোন ফোঙদোক্নবা অমসুং কান্নবা ৱারী শানবা হেনগৎহন্নবগীদমক ৱারী-ৱাতায় শানবগী ফম্পাক অমা পীবগা লোয়ননা দিস্ত্রিক্ত অনি অসিদা মথৌ তৌরিবা পাউমীশিং অমসুং মেদিয়া প্রোফেস্নেলশিংদা পি.এম. বিশ্বকর্ম স্কীম অমসুং নশা মুক্ত ভারত অভিয়ানগী মতাঙদা মপুং ফাবা ৱাখল-লৌশিং ফংহন্নবা পান্দমসু থমখি।

পি.আই.বি., রিজনেল ওফিস ইম্ফালগী মেদিয়া এন্দ কম্ম্যুনিকেসন ওফিসর পুষ্পা মাইবমগা লোয়ননা ঙসিগী ৱর্কশোপকী রিসোর্স পর্সনশিং ওইনা এম. শিবা সাই রেদ্দী, আই.ই.দি.এস., এসিস্তেন্ত দাইরেক্তর, এম.এস.এম.ই., দি.এফ.ও., ইম্ফাল, মিনিস্ত্রী ওফ এম.এস.এম.ই. অমসুং অরম আন্থ, সুপরিন্তেন্দেন্ত ওফ এন.সি.বি., ইম্ফাল জোনেল য়ুনিতনা ৱর্কশোপ অসিগী হৌদোকপগী মীফমদা শরুক য়াখি।

মীফম অদুদা ৱা ঙাঙলদুনা, পুষ্পা মাইবম্না লৈঙাক্কী য়াইফ-থৌরাংশিং অমসুং চাউখৎ-থৌরাংশিং অসি মীয়ামদা, মরু ওইনা তোঙান-তোঙানবা ফ্লেগশিপ স্কীমশিংগী পান্দম থম্লিবা বেনিফিসরীশিংদা য়ৌহনবদা মেদিয়ানা লৌরিবা মরু ওইবা থৌদাং অদু ফোঙদোকখি।

Image

মেদিয়াগী মীওইশিংবু ঙসিগী ৱর্কশোপ অসিগী “থৱায় অমসুং পুক্নিং”নি হায়রদুনা, লৈঙাক্কী খোঙথাংশিং অসি কান্নবা ফংবা য়ারবা বেনিফিসরী খুদিংমক্তা য়ৌহন্নবা থবক্তা ওন্থোকপা থৌদাং লৌনবা মখোয়বু পুক্নিং থৌগৎখি।

“ঐখোয়না চাওখৎ-থৌরাংশিং রিপোর্ত তৌবখক্তা নত্তনা খুন্নাইদা অফবা অহোংবা পুরক্নবা পুক্নিং থৌগৎনবসু থৌদাং লৈবা জর্নেলিজমগী পাঙ্গল অসি শীজিন্নরসি,” হায়না পুস্পা মাইবম্না হায়খি।

ৱর্কশোপ অসিগী মনুংদা খন্ন-নৈনখিবা ৱাফমশিং অসিনা মরু ওইবা থৌরাং অনি অসিগী মতাঙদা হেন্না মমুৎ তানা খঙহল্লগনি অমসুং লৈঙাক, মেদিয়া অমসুং মীয়ামগী মরক্তা হেন্না চাউনা খুৎশম্নদুনা থবক তৌবদা পুক্নিং থৌগৎকনি হায়না মহাক্না মখা তানা থাজবা ফোঙদোকখি।

পি.এম. বিশ্বকর্ম অমসুং নশা মুক্ত ভারত অভিয়ান অসিনা মীপুম খুদিংমক কোনশিনবা চাওখৎপগী মরু ওইবা মায়কৈ অনিবু মহুৎ শিল্লি হায়না মহাক্না ফোঙদোকখি।

“পি.এম. বিশ্বকর্মনা স্কিল, ওন্ত্রপ্রিন্যুরশিপ অমসুং শেল-থুমগী খুদোংচাবশিংগী খুত্থাংদা মীয়ামগী মপাঙ্গল হাপ্নবা হোৎনরি অদুগা নশা মুক্ত ভারত অভিয়ান্না হকশেল, মীয়ামদা খঙহনবা অমসুং থৌদাং লৈবা লমচৎ য়োকখত্তুনা খুন্নাইবু ঙাকথোক্নবা হোৎনরি,” মহাক্না হায়খি।

Image

মপাঙ্গল কনবা লৈবাক অমা শেমগৎনবগীদমক অনিমক তঙাইফদবনি হায়না মহাক্না ফোঙদোকখি অমসুং চাউখৎলবা ভারত অমা ওইনবগীদমক শেল-থুম মরাং কায়বা, খুন্নাইগী মীপুম খুদিংমক কোনশিনবা অমসুং হকচাং ফবা ওইগদবনি হায়না মহাক্না মখা তাখি।

তুংদা পাঙথোকখিবা তেক্নিকেল সেসন অদুদা, এম. শিবা সাই রেদ্দীনা পি.এম. বিশ্বকর্ম স্কীমগী মতাঙদা প্রজেন্তেসন অমা পীখি।

হান্নদগী চৎনরকপা খুৎহৈবশিংবু য়োকখৎনবা, মখোয়গী খুন্নাই অমসুং শেল-থুমগী থাক ৱাংখৎহন্নবা অমসুং ভারতকী ইনাক খুল্লবা নাৎকী লন-থুম ঙাক-শেনবদা মতেঙ পাংনবা শেম্লিবা কেন্দ্রগী ফ্লেগশিপ স্কীম অসিগী পান্দম ফংবদা মেদিয়াগী মীওইশিংনা লৌরিবা মরু ওইবা থৌদাং অদুবুসু রেদ্দীনা ময়েক শেংনা পনখি।

“স্কীম অসিগী পান্দম ফংবদা অদোম্না মরু ওইবা থৌদাং অমা লৌরি। অদোম্না লৈঙাক অমসুং মীয়ামগী মরক্তা শম্নহল্লিবা থোংনি,” হায়না মহাক্না হায়খি।

স্কীম অসিগী মখাদা ফংলিবা মরু ওইবা কান্নবশিং, মখোয়গী মরক্তা স্কিল শেমগৎনবা ত্রেনিং, অনৌবা মতমগী তুলকিতকী মতেঙ, পোত্থোক য়োনবদা মতেঙ পাংবা, ই-কমর্স প্লেতফোর্মশিং ফংহনবা অমসুং সবসিদাইজ ক্রেদিতকী খুদোংচাবশিংগী মতাঙদা মহাক্না ফোঙদোকখি।

থৌরাংশিং অসিনা খুৎহৈবশিংদা পোত্থোক পুথোকপগী চাং হেনগৎহনবা, হেন্না পাক-চাউবা কৈথেলশিংদা চঙবা ঙমহনবা অমসুং তুং কোইনা চৎকদবা হিংনবগী লম্বী শেমগৎপদা মতেঙ পাংবা ঙমগনি হায়বা ৱাফম মহাক্না থমখি।

সেপ্তেম্বর ১৭, ২০২৩দা হৌদোকখিবা স্কীম অসিগী মখাদা ভারত লৈঙাক্না হৌজিক ফাওবদা ২০২৭-২৮ ফাওবদা তোঙান-তোঙানবা শিনফম ১৮গী খুৎহৈবশিংবু শক্তি পীনবগীদমক লুপা করোর ১৯,০০০ থাদখ্রে হায়না মহাক্না হায়খি।

স্কীম অসিগী মরু ওইবা পান্দমশিংগী মরক্তা অমদি “গুরু-শিশ্য পরম্পরা”গী খুত্থাংদা হান্নদগী লোয়নরক্লবা স্কিলশিং অদু ঙাক-শেন্দুনা থম্বগা লোয়ননা খুৎহৈবশিংবু “ত্রেদিস্নেল আর্তিজন”দগী ওন্ত্রপ্রিন্যুর ওন্থোকপনি হায়না রিসোর্স পর্সন অদুনা হায়খি।

থৌরম অদুদা শরুক য়ারিবা এম.এস.এম.ই.গী ৱাই.পি. (য়ং প্রোফেস্নেল) কাশিং শিংনাইসুইনা মীফম অদুদা লৈবাক শিনবা থুংনা খুৎহৈবা লাখ ৩০ হেনবনা স্কীম অসিগী মখাদা রেজিস্ত্রেসন তৌনবগীদমক চে থাজিল্লকখি অমসুং মনিপুরদা ওথোরিতীনা হৌজিক ফাওবদা খুৎহৈবা ৯১,৬৯৩ দগী চে ফংখ্রে হায়খি।

Image

মখোয়গী মরক্তা, খুৎহৈবা ১৮,১৩২ রেজিস্তর তৌখ্রে অমসুং ১৩,১০৫বু স্কিল লৈবা খুৎহৈবা ওইনা ভেরিফাই তৌখ্রে অমসুং মখোয়গী মরক্তা ১২,০৪৬না বেসিক ত্রেনিং ফংখ্রে।

বেসিক ত্রেনিং লৌখিবা খুৎহৈবা ২,৮৫১দা লুপা ১৫,০০০ মমল ওইগদবা তুলকিতশিং লেম্না পীখ্রে। মখোয়গী মরক্তা ২,৪০৩দা লোনগী অয়াবা পীখ্রে অমসুং খুৎহৈবা ২,১৪০দা শেনফম য়েন্থোকখ্রে।

থেংনরিবা শিংনবা কয়া লৈরবসু, মনিপুরদা খুৎহৈবশিংদগী অফবা রেসপোন্স ফংদুনা স্কীম অসি থবক্তা ওন্থোক্লি হায়না মহাক্না হায়খি। স্তেত অসিনা ফজনা থবক তৌরি অমসুং অৱাং-নোংপোক লমদমগী খ্বায়দগী ফজনা থবক তৌবা স্তেত অহুমগী মরক্তা অমা ওইরি।

মণিপুরনা অতোপ্পা অৱাং-নোংপোক্কী স্তেতশিংদগী হেন্দুনা খ্বায়দগী ফজনা থবক তৌবা স্তেত ওইরক্কনি হায়বগী অচেৎপা থাজবা ফোঙদোক্লদুনা স্কীম অসিনা মনিপুরগী হান্নদগী লৈজরিবা খুৎহৈবশিংদা অচৌবা কান্নবা পীগনি হায়না মহাক্না থাজবা ফোঙদোকখি।

স্কীম অসিগী ত্রেনিং অমসুং কান্নবশিং ফংলবা রেজিস্তর তৌরবা খুৎহৈবা অনিনসু মখোয়না স্কীম অসিগী মতাঙদা করম্না খঙলকখিবগে অমসুং মখোয়গী শিনফমদা পুরকখিবা অফবা অহোংবগী মতাঙদা ফোঙদোকখি।

‘নশা মুক্ত ভারত অভিয়ান’গী মতাঙদা মহাক্কী প্রজেন্তেসন পীরদুনা এন.সি.বি., ইম্ফাল জোনেল য়ুনিতকী সুপরিন্তেন্দেন্ত অরম আন্থনা অভিয়ান অসিগী য়ুম্বী মরিগী মতাঙদা ময়েক শেংনা তাকখি।

লৈঙাক্কী খোঙজং অসিবু মায় পাকহনবদা মেদিয়ানা লৌরিবা মরু ওইবা থৌদাং অদুবুসু মহাক্না পনখি অমসুং মেদিয়ানা “নিশা শীজিন্নবা মীওই” হায়বগুম্বা ইকায়খুম্নবা উৎপা ৱাহৈশিং শীজিন্নগদবনি হায়না হায়খি।

Image

ওফিসিয়েল ওইনা ফাগৎপগী মশিংদা য়ুম্ফম ওইদুনা, দ্রগ শীজিন্নরম্বদগী শীজিন্নখিদ্রবা মীওইশৎংগী ৱারীশিং লীদুনা অমসুং অঙাঙশিং অমসুং হিংহৌরবশিংবু ঙাক-শেন্দুনা নিশাগা মরী লৈনবা রিপোর্তশিং ফোঙবা মতমদা হেল্পলাইন নম্বরশিং হাপ্পীয়ু।

মেদিয়ানা “এদিক্ত” নত্ত্রগা “দ্রগী” হায়বগুম্বা মিংথোলশিং শীজিন্নবা অমসুং নিশা শীজিন্নববু ফজবা, অফবা মওংদা উৎপা থাদোক্নবসু মহাক্না মখা তানা ফোঙদোকখি।

নিশা করম্না শাবগে নত্ত্রগা শীজিন্নবগে হায়বদু উৎপা, অঙাঙশিংগী মিং পনবা অমসুং পাউ পীরকপশিংগী মিং পনবা নত্ত্রগা ওপরেসনগী অকুপ্পা ৱারোল ফোঙদোকপা অসি য়ারিবমখৈ তৌরোইদবনি হায়না মহাক্না মখা তাখি।

নার্কোতিক দ্রগস এন্দ সাইকোত্রোপিক সবস্তান্সেস এক্ত, ১৯৮৫ (এন.দি.পি.এস. এক্ত) চৎনহনবা মতমদা ফংখিবা মায় পাকপশিংগী অকুপ্পা ৱারোল পীরদুনা মহাক্না হায়খি মদুদি ২০২৫দা মীওই ৩৪৯ ফাবগা লোয়ননা অপুনবা এন.দি.পি.এস. কেস ২৮৪ রেজিস্তর তৌখি অদুগা চৎলিবা চহি অসিদা ওক্তোবর ফাওবদা মীওই ৪৪১ ফাবগা লোয়ননা অপুনবা কেস ৩১৭ রেজিস্তর তৌখ্রে।

তোঙান-তোঙানবা এন.দি.পি.এস. কেসশিংদা ফাখিবা অপুনবা মীওই ২৬৯ হৌজিক জেলদা লৈরি অমসুং ১৬৬না বেলদা লৈরি হায়না মহাক্না হায়খি।

ওগস্ত ১৫, ২০২০দা হৌদোকখিবা নশা মুক্ত ভারত অভিয়ান (এন.এম.বি.এ.) অসি নিশা শীজিন্নবগী মায়োক্তা লৈবাক শিনবা থুংনা চত্থবা মীয়ামগী খোঙজং অমনি। খোঙথাং অসি বিকসিত ভারত ২০৪৭গী ভিজনগী মমাঙদা ভারতপু নিশা লৈতবা লৈবাক অমা ওইনা শেমগৎপগা মরী লৈনৈ।

তেক্নিকেল প্রজেন্তেসনশিং অদুগী মতুংদা ৱাহং-পাউখুমগী সেসন অমা পাঙথোকখি, মদুদা রিসোর্স পর্সনশিংনা পাউমীশিংনা হংলকপা ৱাহংশিংগী পাউখুম পীখি অমসুং স্কীমশিং অসিগী তোঙান-তোঙানবা মশকশিং ময়েক শেংনা খঙহনখি।

প্রজেন্তেসনশিং অদুদগী লৌখৎপা মরু ওইবা ৱাফমশিং অদু শম্লপ্না ফোঙদোক্তুনা অমসুং মেদিয়া প্রোফেস্নেলশিংনা পুক্নিং চঙনা শরুক য়াখিবনা থৌরম অসিবু চাউনা মায় পাকপা অমা ওইহল্লে হায়রদুনা ঐচ. দীপক্কুমার শর্মানা থাগৎ ৱাহৈ ফোঙদোক্তুনা ৱর্কশোপ অদু লোইশিনখি।

Image

থৌবাল, ককচিং অমসুং চান্দেল দিস্ত্রিক্ততগী লাকপা পাউমীশিংনা ৱর্কশোপ অদুদা শরুক য়াখি।

*****


(রিলিজ আই.দি.: 2338129) ভিজিতর কাউন্তর : 3
রিলিজ অসি মসিদা পাবীয়ু: English