পোষ্ট কৰা হৈছে:
15 NOV 2026 7:16PM by PIB Guwahati
ভাৰত চৰকাৰৰ জনজাতীয় পৰিক্ৰমা মন্ত্ৰালয়ৰ অধীনস্থ ভাৰতীয় জনজাতীয় সমবায় বিপণন উন্নয়ন ফেডাৰেচন লিমিটেড (ট্ৰাইফেড), আঞ্চলিক কাৰ্যালয়, উত্তৰ-পূব অঞ্চল, গুৱাহাটীয়ে জনজাতীয় গৌৰৱ দিৱস উপলক্ষে ১৫ নৱেম্বৰৰ পৰা ২১ নৱেম্বৰ ২০২৬ লৈ গুৱাহাটীৰ খানাপাৰাত সপ্তাহজোৰা ৰাষ্ট্ৰীয় জনজাতীয় প্ৰদৰ্শনী-সহ-বিপণন ব্যৱস্থাৰে “আদি মহোৎসৱ”ৰ আয়োজন কৰিছে।
অসম চৰকাৰৰ জনজাতীয় পৰিক্ৰমা মন্ত্ৰী ড° ৰণোজ পেগুৱে এই মহোৎসৱ উদ্বোধন কৰে। সমবেত ৰাইজক সম্বোধন কৰি ড° ৰণোজ পেগুৱে দেশৰ জনজাতীয় সম্প্ৰদায়সমূহৰ অৱদানৰ সন্মানত এই দিৱস পালন কৰাৰ ঐতিহাসিক সিদ্ধান্ত লোৱাৰ বাবে ভাৰত চৰকাৰ আৰু প্ৰধানমন্ত্ৰী নৰেন্দ্ৰ মোদীক কৃতজ্ঞতা জ্ঞাপন কৰে।
তেওঁ কয় যে এই পদক্ষেপে জনজাতীয় স্বাধীনতা সংগ্ৰামীসকলৰ ত্যাগ আৰু অৱদানৰ প্ৰতি ৰাষ্ট্ৰৰ স্বীকৃতি আৰু সন্মান প্ৰতিফলিত কৰে। তেওঁ উল্লেখ কৰে যে জনজাতীয় গৌৰৱ দিৱস কেৱল ভগৱান বিৰছা মুণ্ডাৰ জয়ন্তী উদযাপন নহয়, বৰঞ্চ দেশৰ প্ৰতিটো কোণৰ পৰা ভাৰতৰ স্বাধীনতাৰ বাবে যুঁজ দিয়া অসংখ্য জনজাতীয় বীৰক স্মৰণ আৰু সন্মান জনোৱাৰ এটা উপলক্ষ।
উত্তৰ-পূব ৰাজ্যসমূহৰ ক্ৰমবৰ্ধমান পৰ্যটন সম্ভাৱনাৰ কথা উল্লেখ কৰি তেওঁ কয় যে এনে উদযাপন আৰু পদক্ষেপে স্থানীয় শিল্পী আৰু পৰম্পৰাগত উদ্যোগীসকলক তেওঁলোকৰ সামগ্ৰী প্ৰদৰ্শন কৰাৰ লগতে বজাৰ সম্প্ৰসাৰণ কৰিবলৈ মূল্যৱান সুযোগ প্ৰদান কৰে। বৰ্তমানৰ অনলাইন বিপণন আৰু ডিজিটেল বাণিজ্যৰ যুগত পৰম্পৰাগত সামগ্ৰীৰ সঠিক পেকেজিং আৰু উপস্থাপনৰ গুৰুত্বৰ ওপৰত তেওঁ আলোকপাত কৰে।
সপ্তাহজোৰা প্ৰদৰ্শনী-সহ-বিপণন কাৰ্যসূচীত উত্তৰ-পূব অঞ্চল আৰু দেশৰ অন্যান্য প্ৰান্তৰ জনজাতীয় শিল্পী তথা বন ধন বিকাশ কেন্দ্ৰৰ হিতাধিকাৰীসকলৰ প্ৰামাণিক জনজাতীয় সামগ্ৰীৰ বিস্তৃত পৰিসৰ একত্ৰিত হৈছে। ইয়াত দৰ্শকে পৰম্পৰাগত হস্তশিল্প, হস্ততাঁত, বাঁহ আৰু বেতৰ শিল্প, ধাতুৰ কাম আৰু বিভিন্ন বনভিত্তিক সামগ্ৰীৰ বৈচিত্ৰ্যময় সংগ্ৰহ অন্বেষণ কৰিব পাৰিব।
আদি মহোৎসৱে দৰ্শকক শিল্পীসকলৰ সৈতে প্ৰত্যক্ষভাৱে জড়িত হৈ তেওঁলোকৰ জীৱিকা সমৰ্থন কৰি ভাৰতৰ জনজাতীয় পৰম্পৰাৰ চহকী বৈচিত্ৰ্য অনুভৱ কৰাৰ সুযোগ প্ৰদান কৰে। এই অনুষ্ঠানটোৱে জনজাতীয় উৎপাদকসকলৰ বজাৰ সংযোগ শক্তিশালী কৰা আৰু থলুৱা কলা, সংস্কৃতি তথা পৰম্পৰাগত শিল্পকৰ্মৰ সংৰক্ষণক প্ৰসাৰ কৰাৰো লক্ষ্য ৰাখিছে।
উদ্বোধনী অনুষ্ঠানত ট্ৰাইফেডৰ পৰিচালন সঞ্চালক শ্ৰী এম ৰাজামুৰুগান, আই পি এছ, ট্ৰাইফেড, উত্তৰ-পূব অঞ্চলৰ আঞ্চলিক প্ৰবন্ধক শ্ৰী পামথিং কেইশিং, নাবাৰ্ড, অসম আঞ্চলিক কাৰ্যালয়ৰ মুখ্য মহা প্ৰবন্ধক শ্ৰী জি ৰমেশ কুমাৰ আৰু ভাৰত চৰকাৰৰ বিত্ত মন্ত্ৰালয়ৰ আয়কৰ আয়ুক্ত শ্ৰী পি এছ থুইংগালেং, আই আৰ এছ-কে ধৰি কেইবাগৰাকীও বিশিষ্ট ব্যক্তি উপস্থিত থাকে।




***
SS/DD