મહાદેવ એપ કેસમાં CBI દ્વારા 6 રાજ્યોમાં 33 સ્થળોએ તપાસ (સર્ચ) હાથ ધરાયું

સેન્ટ્રલ બ્યુરો ઓફ ઇન્વેસ્ટિગેશન (CBI) એ છેલ્લા કેટલાક દિવસોમાં મહાદેવ ઓનલાઈન બુક એપના ગેરકાયદેસર ઓનલાઈન સટ્ટાબાજી પ્લેટફોર્મના પેનલ ઓપરેટરોના પરિસરમાં 06 રાજ્યોમાં 33 સ્થળોએ દરોડા પાડ્યા છે. જેમાં અમૃતસર, દિલ્હી, નાગૌર, ધોલપુર, ભોપાલ, રાયપુર, દુર્ગ, ઈન્દોર, અમદાવાદ, વડોદરા, સુરત, મુંબઈ અને નાગપુરમાં સર્ચ ઓપરેશન હાથ ધરવામાં આવ્યું હતું.ઓમાનમાંથી પ્રત્યાર્પણ બાદ પ્લેટફોર્મના મુખ્ય પ્રમોટરોમાંના એક અને મુખ્ય આરોપી સૌરભ ચંદ્રાકરે કરેલા ખુલાસાના આધારે આ દરોડા પાડવામાં આવ્યા હતા.

આ દરોડા દરમિયાન, લાઈવ સટ્ટાબાજી અને જુગારની પેનલો ચાલતી મળી આવી હતી અને તેને તોડી પાડવામાં આવી હતી. મ્યુલ એકાઉન્ટ્સ અને હવાલા નેટવર્કનો ઉપયોગ દર્શાવતા ડિજિટલ ઉપકરણો, મોબાઇલ ફોન અને ગુનાહિત દસ્તાવેજો મળી આવ્યા છે અને જપ્ત કરવામાં આવ્યા છે.

સૌરભ ચંદ્રાકરનું ઓમાનમાંથી પ્રત્યાર્પણ કરવામાં આવ્યું હતું અને 01.11.2026ના રોજ CBI દ્વારા તેની ધરપકડ કરવામાં આવી હતી. સ્પેશિયલ જજ (CBI કેસ), રાયપુરે તેના 8 દિવસના પોલીસ રિમાન્ડ CBIને મંજૂર કર્યા હતા. તેની પૂછપરછમાં પ્લેટફોર્મની કાર્યપદ્ધતિ અને ભારતમાં તેના પેનલ ઓપરેટરોના નેટવર્ક વિશેની વિગતો બહાર આવી હતી. તપાસ દરમિયાન એકત્રિત કરવામાં આવેલા દસ્તાવેજી અને ડિજિટલ પુરાવાઓ સાથે તેનો સામનો પણ કરાવવામાં આવ્યો હતો.

છત્તીસગઢ રાજ્ય સરકાર તરફથી ટ્રાન્સફર થયા બાદ CBIએ મહાદેવ ઓનલાઈન બુકમાં બે FIR નોંધી છે. અત્યાર સુધી કરવામાં આવેલી તપાસમાં બહાર આવ્યું છે કે આ પ્લેટફોર્મ વિદેશથી હેડ ઓફિસ દ્વારા ચલાવવામાં આવે છે અને ભારતમાં પેનલ ઓપરેટરોના વિશાળ નેટવર્ક દ્વારા કાર્યરત છે. આ ઓપરેટરો ગ્રાહક ID સંભાળે છે, અન્ય વ્યક્તિઓના નામે ખાસ ખોલવામાં આવેલા અથવા ભાડે લેવામાં આવેલા બેંક ખાતાઓમાં સટ્ટાબાજીના નાણાં એકત્રિત કરે છે અને હવાલા ચેનલો દ્વારા નફો વિદેશ મોકલે છે.

પોલીસ કસ્ટડી પૂરી થતાં, સૌરભ ચંદ્રાકરને 12.11.2026ના રોજ નામદાર સ્પેશિયલ જજ (CBI કેસ), રાયપુર સમક્ષ રજૂ કરવામાં આવ્યો હતો અને તેને 19.11.2026 સુધી ન્યાયિક કસ્ટડીમાં મોકલી દેવામાં આવ્યો છે.

વિદેશમાં સ્થિત અન્ય આરોપીઓ, કામગીરીમાં મદદ કરનાર વ્યક્તિઓ અને સંબંધિત જાહેર સેવકોની ભૂમિકા અંગે તપાસ ચાલુ છે. અન્ય ફરાર આરોપીઓના પ્રત્યાર્પણ માટેના પગલાં લેવામાં આવી રહ્યા છે.

જાહેર જનતાને સાવચેત કરવામાં આવે છે કે ઓનલાઈન સટ્ટાબાજી અને જુગાર ગેરકાયદેસર છે. આવી પ્રવૃત્તિ માટે અન્ય લોકોને પોતાનું બેંક ખાતું, સિમ કાર્ડ અથવા ઓળખના દસ્તાવેજો ઉછીના આપવા કે ભાડે આપવા એ પણ ફોજદારી ગુનો છે અને તેનાથી ખાતાધારક સામે કાયદેસરની કાર્યવાહી થઈ શકે છે.

SM/BS/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com