پوسٹ کرنے کی تاریخ:
10 NOV 2026 5:10PM by PIB Delhi
وزارت داخلہ (ایم ایچ اے) نے زیر التوا معاملات کو نمٹانے کے لیے چلائی گئی خصوصی مہم 6 کو کامیابی کے ساتھ مکمل کر لیا ہے۔ یہ مہم 2 سے 31 اکتوبر 2026 تک جاری رہی۔ وزیر اعظم جناب نریندر مودی کی قیادت اور وزیر داخلہ جناب امت شاہ کی رہنمائی میں ایک ماہ طویل اس مہم کے دوران صفائی ستھرائی اور مؤثر دفتری انتظام کو فروغ دینے، زیر التوا معاملات کو تیزی سے نمٹانے، عوامی شکایات کا ازالہ کرنے اور وزارت و اس کے اداروں کے مجموعی کام کاج کو بہتر بنانے پر توجہ مرکوز کی گئی۔ خصوصی طور پر فیلڈ اور دور دراز کے دفاتر پر توجہ دی گئی، جہاں عوام سے براہ راست رابطہ رہتا ہے۔
خصوصی مہم 6 کے تحت وزارت داخلہ نے زیر التوا معاملات کو نمٹانے، صفائی ستھرائی اور مؤثر دفتری انتظام کے شعبوں میں نمایاں پیش رفت حاصل کی۔ اس مہم کا آغاز 15 ستمبر 2026 کو تیاری کے مرحلے سے ہوا، جس کے بعد 2 سے 31 اکتوبر 2026 تک ملک بھر میں وزارت داخلہ اور اس کے منسلک و ماتحت دفاتر میں اس پر عمل درآمد کیا گیا۔
اس مہم کی اعلیٰ ترین سطح پر قریبی نگرانی کی گئی، جس میں وزارت کے تمام ڈویژنوں، مرکزی مسلح پولیس فورسز (سی اے پی ایف) اور متعلقہ اداروں نے سرگرمی سے حصہ لیا۔ انتظامی اصلاحات اور عوامی شکایات کے محکمے (ڈی اے آر پی جی) کے زیر انتظام خصوصی مہم پورٹل پر باقاعدگی سے پیش رفت کی رپورٹیں اپ لوڈ کی گئیں۔
سوچھتا مہم کے لیے شروعات میں مجموعی طور پر 6,757 مقامات کی نشاندہی کی گئی تھی، جن کی تعداد بعد ازاں بڑھا کر 7,963 کر دی گئی۔ مہم کی اہم کامیابیاں درج ذیل ہیں:
حوالہ جات اور شکایات کا تصفیہ: اراکین پارلیمنٹ کی جانب سے موصول ہونے والے 147 حوالہ جات، ریاستی حکومتوں کے 141 حوالہ جات، عوام کی 11,902 شکایات اور 1,666 اپیلوں کا تصفیہ کیا گیا۔
ریکارڈ کا جائزہ: 2,19,644 فزیکل فائلوں اور 30,385 الیکٹرانک فائلوں کا جائزہ لیا گیا۔
خلائی انتظام: ریکارڈ کے مؤثر انتظام اور غیر ضروری سامان کو ٹھکانے لگانے کے ذریعے دفتری جگہ کے 78,125 مربع فٹ رقبے کو خالی کرایا گیا۔
آمدنی کا حصول: اسکریپ (ردی و فالتو سامان) کو ٹھکانے لگانے کے ذریعے 10.17 کروڑ روپے سے زائد کی آمدنی حاصل ہوئی، جس میں سے 2.63 کروڑ روپے ای ویسٹ (الیکٹرانک کچرے) کو ٹھکانے لگانے سے حاصل ہوئے۔
سوشل میڈیا کے ذریعے تشہیر: مہم کے بارے میں بیداری پیدا کرنے اور اس کی سرگرمیوں و کامیابیوں کو اجاگر کرنے کے لیے مختلف سوشل میڈیا پلیٹ فارمز، بشمول ایکس، انسٹاگرام، فیس بک اور یوٹیوب پر #SpecialCampaign6 ہیش ٹیگ کے ساتھ تقریباً 1,200 پوسٹس شیئر کی گئیں۔
خصوصی مہم 6 کے تحت 13 اکتوبر 2026 کو ایک روزہ خصوصی مہم بھی چلائی گئی، جس کا مقصد وزارت اور اس کے منسلک و ماتحت دفاتر میں باہمی تال میل کے ساتھ کوششیں کرتے ہوئے مہم کے مقررہ اہداف کے حصول میں تیزی لانا تھا۔ اس دوران شجرکاری مہم، صفائی ستھرائی کی خصوصی مہم اور پرانے و غیر ضروری ریکارڈ کو تلف کرنے سمیت مختلف سرگرمیاں انجام دی گئیں۔ ان اقدامات کا مقصد ماحولیاتی پائیداری کو فروغ دینا، کام کی جگہوں پر صفائی ستھرائی کو بہتر بنانا اور ریکارڈ کے مؤثر انتظام کو یقینی بنانا تھا۔ اس خصوصی مہم میں وزارت اور اس کے اداروں کے اہلکاروں نے جوش و خروش کے ساتھ حصہ لیا، جس سے مہم کے مقاصد کے حصول میں نمایاں مدد ملی۔
وزارت داخلہ نے خصوصی مہم 6 کے ذریعے پیدا ہونے والی رفتار کو برقرار رکھنے کے اپنے عزم کا اعادہ کیا ہے۔ اس سلسلے میں خدمات کی مؤثر فراہمی، جواب دہی، صفائی ستھرائی اور مثبت دفتری ماحول کو فروغ دینے پر مسلسل زور دیا جائے گا۔ مرکزی مسلح پولیس فورسز (سی اے پی ایف) اور دیگر متعلقہ اداروں کی فعال شمولیت نے اس مہم کو مزید تقویت بخشی اور اس کے کامیاب نفاذ میں نمایاں تعاون کیا۔
خصوصی مہم 6 نے نہ صرف کام کی جگہوں کو صاف ستھرا اور منظم بنانے میں اہم کردار ادا کیا ہے بلکہ وزارت اور اس کے ماتحت فیلڈدفاتر میں ذمہ داری، شفافیت اور کارکردگی کے جذبے کو بھی مزید مستحکم کیا ہے۔ یہ پہل جواب دہ طرز حکمرانی، عوام کو مؤثر خدمات کی فراہمی اور انتظامی امور میں بہترین طریقۂ کار کو ادارہ جاتی شکل دینے کے تئیں وزارت کے مسلسل عزم کی عکاسی کرتی ہے۔
***
ش ح۔ ش آ۔ ج
uno-7458